كتمان [ مكتملة ]

الحلقة 84

#كتمان

تشرعو عينيها فيه مصدومة...وش قاعد يقول هادا درك
"... ككك كيفاه ررراجل ختك... ؟؟؟"

ضحك بالصوت عليها.... ودور شاف معاها ورخف يديه عليها
"... ههه معلابلكش ههههه عليمن تلعبيها يا بنت حبيبة.... حاسبة الناس كامل بهيمة كيفك.. هداك ايمن لي تلاقيتي معاه في القهوة راجل اختي يا لالة.... تشوكيتي اه... مكنتش حاسبك خطافة رجال وخرابة ديار... نتي حية كبيرة يا درصاف وميقدرلك غير انا...."

تقدرو تعرفو درك كمية الصدمة لي راهي فيها..
حالفة الدنيا انو تكسرها وتصدمها في كل مرة وتخرب طموحاتها واحلامها....

محست غير كي لقات مها وعجوزتها جاو وهو رجع ركب من القدام... تبسملها باستفزاز ومشاو....خلاها في بحر من التساؤلات والحيرة....
".. درصاف اه درصاف وينك...؟؟"
".. اه وي يما وش كاين... ؟؟"
".... وين كنتي هيا اهبطي رانا وصلنا لدار.."

شافت معاه شوفة غريبة وهو هزلها براسو بخبث...

كلشي خططت ليه رجع عليها... وقعت على عقد موتها بيديها...تسما ايمن طول الوقت وهو يلعب عليها.... اكتر من عامين وهو يعقب معاها في الوقت وهو متزوج وعندو ولاد وحتى الدراهم هادوك كامل كذب فكذب... احلام في أحلام..

والشي لي فيض الكأس انو رايحة تتزوج بواحد عارف حقيقة كلشي دارتو.. خلاص درصاف نتيا غرقتي وواحد ما راح يمنعك من البحر هدا....

♣️♣️♣️♣️♣️♣️♣️

خلص وناض وهي جبدت الغطا عليها... عطاتو بظهرها تبكي بصمت... ككل مرة علاقة جنسية باردة بيناتهم... جبد قارو وقعد يتكيف... حاسس روحو قاعد يختصب فيها مش يدي في حقو.. عدات سمانتين وهما هكدا.... دير لميناج صباح تغسل وتطيب.... تمد لمها الدوا.. يجي هو من الخدمة ياكل... وفليل علاقة باردة ولا يرقدو وهي عاطيتو بالظهر... راح دوش وخرج للبالكون يكمل فهداك الڨارو بسيف.. على الأقل يبرد روحو وقلبو... حاسس بالضيقة واليأس... في بالو بنو رايحة تتبدل وترجع تحبو اما على حساب هاد الشي الحالة مطولة..
لقاها خرجت من الدوش لبست بيجامتها ورقدت... وهو يرسم فخيالاتو على ظهرها.. احلام وطموحات وآمال تربطو بخديجة.. محس غير جبدها ليه وهي مسحت دموعها بالزربة... في بالها مش حاسس بيها وبجرحها..
دورت وجها ليه وتشوف معاه باستغراب..وهو حط وجهو في رقبتها و يتنفس بشوية..

".... توحشتيه ؟؟؟"
"... ششش شكون ؟؟"
"... في زوج علابنا شكون؟؟ بلال حبيبك..هه"
".... لا هو... لا انا نسيتو متخممش منزيدش نذكر اسمو قدامك... أنا مرتك درك..."

حط يدو على فمها وتبسم بسخرية...
".... ششششش متكذبيش عليا خديجة... أنا الوحيد لي حافضك... وحافظ كل حاجة فيك.. مزلتي تحبيه ومزلتي تشوفيني هو.. مزلتي تتمناي لوكان كنتي معاه هو مش معايا انا... "

محست غير بدموع تعمرو وطاحو على وجهو هو...
"... اسكت عصام.. ربي يعيشك متفكرنيش فيه.. أنا حابة ننساه اما مقدرتش مش بيدي.. اسمحلي... علابالي اني قاعدة نجرح في كرامتك اما والله ما بيدي.. "
قربها ليه كتر وسكتو في زوج... حاسين بقلوبهم يخبطو في زوج بزربة... غمضو عينيهم ونطقو في زوج بكلمة نحبك... هو نطقها ليها وهي مش عارفة ليمن نطقتها.. ليه ولا لبلال الميت....