كتمان [ مكتملة ]

الحلقة 69

#كتمان

".... شوف ايمن متهبلنيش بزاف... قداه عندنا وحنا مع بعضانا رانا في خمس سنين.. علابلك رايحين يخطبوني غير غدوة.... أرواح حط عليا الكلمة برك...حبت تكذب عليه بش يجيو
صدق كوبا عليها.. وهي خلاص وصلت معاها للطوب تجبد في شعرها وتعيط.. البلان تاعها تخرب كامل... وزيد هاداك ياسين ولد خنساء جاي يخطب... وهي مش قابلة..

خرجت من بيتها وراحت تاكل معاهم.. كانت الكئابة شوية اما الزمان يداوي..
"... حبيبة او جاني واحد الراجل حاب يخطب لولدو... وقالي بنو نتي تعرفي مرتو..."

شافت معاه حبيبة وهزت راسها..
"... اه تفكرت... كانت خنساء حبيبتي جات قبل تلت شهر وهدرتلي على الخطبة... ومع جنازة بلال نسيت... قاتلي ولدها كبير و قاعدة تحوسلو على عروسة... و عجبتها درصاف... "
".... لمهم كيما تفاهمنا قالك نهار الجمعة يشرفونا.....سجيو روحكم..."
"... شكون لي قالكم قابلة... بابا انا مانيش حابة نتزوج... "
خنزر فيها وحبيبة تشوف
"... درصااااااف اسكتي عليا.. وليتي متحترميش ولا شنو...؟؟؟ تديه وتبلعي فمك.. من وكتاه نشاورك انا.. نسناك حتى تبوري هنايا راكي 28 سنة... ختك لي قل عليك زوجت ونتي بتشيطينك مزلتي قاعدة... "
ناضو ليه يهديو فيه... وهي قاعدة تهبط في دموع التماسيح هادوك... بش تحاول تحبس كلشي... أما القدر لي رايح يمد كلمتو...
♣️♣️♣️♣️♣️♣️

قاعدة تغسل فالماعن وتمسح في الطابلة.. وتخمم... بدون ما تفيق هبطو دموع من عينيها... حاسة بروحها تدمر يوم بعد يوم.. حابة تعيط وتقول بنو مانيش حابة نتزوج.. أنا في قلبي غير بلال... منقدرش نتزوج واحد خلاف.... خايفة يجي نهار وتعيطلو باسم بلال... خايفة ترجحو وغير هي تعرف مرارة الحب وجرحه....

سمعت التليفون يصوني لقاتو عصام... مسحت دموع وهزت عليه كرهتو ومش طايقتو...
"... خديجة سفا من البارح وانا نعيط وماكيش تجاوبي كشما كاين....؟؟...خالتي مليحة.."
"...م مليحة ممممليحة حمد لله جيست ماشوفتش ليزابال تاعك....."
كان صوتها فيه غصة كبيرة... كأنو قاعدة تنافق فيه وتكذب عليه بنها مهتمة بيه وهي ماعندها حتى ذرة احساس ليه....
".... قاعدة تبكي؟؟ خديجة متخافيش نحطك فوق راسي والله... رايح نكونلك نعم الزوج ونعم الولد لمك.... علابالي متحبينيش اما الحب يجي بالعشرة.... "
حابة تقولو بنو قلبها معمر ومش فارغ.. حابة تقول بنو هي مش رايحة تقدر تحبو لانو رآها تشوف فيه بلال...
شافها سكتت وغير تنفسها لي يتسمع...
"... خديجة معندك والو تقوليهولي.... ؟؟"
"....بلال اسمحلي والله غلبانة... قصدي عصام ولد جارتنا صغير يعيط اسمو بلال تخربطت اسمحلي...."
".... لا معليش نخليك ترتاحي مالا تهلاي في روحك وكشما تحتاجي راهي لهنا..."
"... اوكي"
مزيا مفاقش بيها... قلبها يخبط بزربة.....
نحا التليفون من وذنو... وخرج يطل من البالكون... ضحك باستهزاء ومسح دموعو... مزالت تخمم فيه وتبكي عليه.... حاجة ما رايحة تتبدل... جامي رح تحبو... بلال لي سرقلو خديجة من يدو....

جبد ڨارو من جيبو ويتكيف بشوية... وفي كل نفس يتفكرها هي... ملي وعا على روحو وهو يحبها... كانو صغار وكانت هي القاوية لي دايما تحامي عليه مع انو هو أكبر منها.... كي يعاقبو باباه تجييلو الماكلة...

في بالو بنو هي تاني تبادلو نفس المشاعر... لكن اليوم زاد تأكد انو هي ملك بلال....عصر قلبو عليه وراح تكا ويخمم فيها وفي كل صلاة يتمنى انو تكون من نصيبو وتحبو....