كتمان [ مكتملة ]

الحلقة 12

#كتمان
         
الابتسامة طريق كامل مفارقتهاش..... عينيها يلمعو وتشوف فالطريق والسما وطلوع الشمس مع وقت الفجر.... فرحانة وتسنا الوقت لي توصل فيه... عند حبيب الروح والقلب... فارس أحلامها.....
اما هو فعينيه مازالت فارغة وميتة.... يشوف فالمصيبة لي قاعدة قدامو.... كيفاه رايح يدير معاها درك.... وهو طول عمرو معتازل النسا وجامي قرب لوحدة في حياتو.... جامي فهم النسا.... وتعاملو اقتصر على امو واخواتو.....
"..... اي انت حبس لهنا اي موسيو.... راك معاي.. انتايا متسمعش"
دور وجهو بشوية ليها وعيونو لأول مرة يتلاقاو مع عينيها..... ركزت معاه وتشوف في لون عيونو المختلف.... وهو يسكاني في وجها حاب يحفظ ملامحها..... البرود لي مكتاسي وجهو.... و الحمرة لي مغطية وجها.... كانت أجمل لوحة مع الشمس...... كأنها لوحة رسمت بمقدرة الإله.....
".... وين نحبسك؟"
"... نحوس على بيس يوصلني لمدينة الجاية.... تقدر تديني لتما"
".....وينها داركم نوصلك ليها...؟"
"...... د..دا....دارنا هيه دارنا لتما"
"... مديلي لدراس تاعكم هيا..."
صوتو الهادي خوفها..... وزيد معالم وجهو الجامدة... خافت يقتلها هنايا...
".... هاهي درررررك ندلك عليها..... "
مجاوبش وكمل الطريق.. تليفونو محبسش من العياط.... امو تقلقت عليه.... محبش يجاوب عليها وهو رح يطول....
رجع الصمت...... وهما فالطريق..... لقاها قدامو راقدة...... دور يشوف معاها..... رجليها حفيانين ومجروحين.... الكفن المقطع والجرحات فيديها..... أما زينها كان باهت.... تنهد تنهيدة من قلبو...... ورجع كمل السوقان....
عدات تلات سوايع...... لقات روحها فطنت.... وتفكرت وين راهي.... يعني يقدرو يكونو يحوسو عليها..... متقدرش ترجع لدارهم... رح يرجعوها للسبيطار...
".... مزلنا مطولين.... قداه بقا؟؟ حابة نشرب ما..... تعيش وزيد جيعانة...."
دبلت عينيها.... نفخت وجها وباقية تشوف معاه...... وهو كان مقلق منها.... اكره عبد عندو لي يهدر بزاف وهي لسانها طويل ومتسكتش..
.... حبس الطموبيل قدام حومة صغيرة...... لولاد يلعبو ويجريو والنسا يطلو علا البالكو.....
لقات روحها قدام حومة الياس....عينيها تعمرت بالدموع وقلبها زادو نبضاتو..... ولات تشهق ويديها يرجفو.... ووجها حمار.... وهو متبع حالتها.... عرف درك شكون هو الياس هدا باينة تحبو..... سقسا روحو سؤال.... هل هذا هو الحب؟؟.... الحب لي سمع عليه وشافو في عينين خوه لمرتو.... وعينين يماه لباباه.... وعينين جارتهم خديجة لخوه بلال......
الحب لي يخلي الإنسان يتنازل على كلشي بش يعيش معامن يحب... الحب لي تخلد أساطير عليه وناس تقتل على جالو....
الحب الي يخليك تعيش في عالم يرسمو حبيبك ليه.....
هبطت تجري من الطموبيل.... الفرحة ماهيش سايعتها...... لدار الياس....
..... جبد ورقة صغيرة من جيبو..... محا اسم فتاة الدماء وكتب.... فتاة الحب البرتقالية.... ❤️💓♥️💘