#كتمان
أيام وأسابيع تعدي علينا كي النسمة لي تخلينا نشتاقو لخفتها.... روتينيات تعدي على الشخصيات... نبداو بدرصاف لي فتح عليها سي ياسين وهي مدمرة من كل الجهات... هاديك الغطرسة لي عندها زالت ولات كلشي توافق عليه... وزاد عليها كي خسر أيمن التليفون بكلمة انسايني... هدا كامل خلاها تركع للقدر وتخليه يمشيها.... أما حاجة مخليتها مفاجأة للعايلة والناس الكل.... مدام تعرفو درصاف... رايحين تعرفو انو لكان غرقت وخسرت الحرب رايحة تدي معاها ضحايا.. ملازمش تغرق وحدها.... هدا يعتبر واحد من مبادئها النرجسية....
."....درصاف هيا اي جات عجوزتك وراجلك بش تروحو تخيرو البيت والفراش... هيا نوضي."
ناضت لبست وش جا قدامها ومشات... تبسمت تبسيمة صفرا لخنساء وركبت ملورا هي ومها..
لدرك هي مش فاهمة علاه قبل ياسين الزواج.. يخي كان رافض كلشي باينة كاين حاجة... طلعت عينيها معاه لقاتو يخنزر فيها.... يزيد شوية يضربها من الغش.... ضحكتلو ضحكة استفزاز خلاتو ميشوفش الدودانة شعرا وتقلبت الطموبيل بيهم وهي شابعة ضحك... شحال تشتي المكرة.... على الأقل بردت درك شوية...
كملو نهار بالقضيان وكي العادة حاجة ما عاجبتها... عينها كبيرة ولازم السومة قبل... ومن حطة هادي العايلة باينة مش رايحة تمشي معاهم بعيد... خلاتهم لتما وراحت ركبت ملورا تسناهم....
لقاتو جا ركب هو تاني وجبد ڨارو يتكيف...
"... اخرج اتكيف برا منحملش ريحة الدخان.."
قفل الطيق كامل وزاد كمل بتكيف كي شغل مكرة...
تنرفزت منو وجات خارجة قفل الباب وخلاها
"... شوف نتا... متخلينيش نسبك حل الطاقة راني رايحة نتغم..."
"... منحلش واخبطي راسك فالباب... وديجا كي راني حاملك ومرميتكش من الطموبيل راكي مليحة... "
"... ياسين... قتلك حل اححححححح مقدرتش نتفس..."
حمارو عينيها من الدخان... وحاسة بنفسها تقطع عليها وهو مكمل بضحكتو الشيطانية..
"... موتي وخليني نتهنا منك... علابلك شحال نكرهك ومنطيقكش... "
بسيف بش حللها الطاقة... خلاها ترد النفو بشوية... تنهدت وحطت راسها على الكرسي..
"... نتا مهبول حاب تقتلني ولا واش.. لكان حاسبلي رايحة نسكتلك نو شيري انا مانيش لي تعرفهوم ومالف بيهم... لاصق فيا ويزيد يحل في فمو... "
".. أنا تاني مش ميت عليك.. راني مديك بسيف عليا.."
".....ههه وي باينة.. لعبتها فسخت كلشي ومبعد رجعت كي الكلب... الرخص بعينو.. "
حمارو عينيه ودور ليها... تحلفي عزرائيل يحوم عليه...
"... وش قلتي درك؟؟ "
تخطف وجها... وفي سع ما جات هاربة وهو حكمها من يدها ووهبط ليها...
زيرلها على وجها وهي وجها حمار من الخوف.
"... تعرفي حاجة.... في رأيك علاه قبلت نتزوج بوحدة عاهرة كيما نتيا... ؟؟؟ خمي معايا شوية..."
حاولت تجبد روحها منو ومقدرتش.. الدموع تجمدو في عينيها التنين... همسلها وقرب كتر لوجها وريحة الدخان من فمو خانقتها..
"... خاطر يا يا لالة المترياليست... نتي قاعدة دور على راجل ختي... "
أنت تقرأ
كتمان [ مكتملة ]
القصة القصيرةأول قصة ليا وكنت مبتدئة فيها شوية... لكن كتبتها بشغف ...بقلمي أسيل "كتمان....عندما يصبح البوح محرما .." قصة "كِتْمَانْ" قصة رايحة تخرج من كل واحدة فيكم المكبوت، مع شخصية عايشة في عالم صنعتو لروحها، برا تلقاوها كأي شخص عادي، تتصنع السعادة والف...
![كتمان [ مكتملة ]](https://img.wattpad.com/cover/354613214-64-k629921.jpg)