كتمان [ مكتملة ]

الحلقة 59

#كتمان

".... نتي هي لي حرق على جالها... ارواحي بسبتك مات وخلاني... خطافة الرجال.."
تلاحت عليها ورايحة تضربها وفتون تحاول تفك روحها...
"... ختي والله معلابالي وش قاعدة تهدري... خاطيني..."
هبطت دموعها وحبست ضرب فيها... ولات تبكي كي لولاد صغار....
".... خلاني وراح علاه يا ربي علاه وش درت انا... بش ديتو وخليتني حية... "
فتون غاضتها راحت حضنتها بشوية... وزيد ليل خافت كشما يسمعو الناس برا....
سكتت ومسحت حالتها
".... راكي مليحة درك... "
".... ممم مليحة متخافيش اسمحيلي كي ضربتك... مانيش في حوالي والله... "
".... تحبيه؟؟؟ "
طلعت خديجة عينيها وسكتت كأنو الجرح تعها قاعد يتحل....
".... كتر من أي حاجة في حياتي..."
تبسمت فتون... فكرتها في الياس وحبها ليه..
".... رانا كيفكيف لازم نتعذبو... الحب اكبر عذاب نعيشوه.... "
"....نتي ماكيش تحسي كنا رح نتزوجو... اعترفلي بنو يحبني.... سنين وانا نتعذب... فلخر خلاني هئ هئ...."
"..... تزوج هههه ونتيا "
ضحكت كي المهبولة....
"... مات هههههه"
في سع جا في بالها بلال خو علاء....
".... تحكي على بلال... "
".... وي هو... "
".... ربي يرحمو ويصبرك ختي... "
تبسمتلها وسكتت... تشوف فالنجوم والحالة مضوية في الليل..
".... هههه حكيت كلشي... نتيا شكون سع ؟؟ جامي شفتك من قبل.."
معرفتش كيفاه تجاوب عليها... وش رايحة تقولها...قعدت تشوف فيها حتى نطقت خديجة
".... متقوليش نتي حبيبة معتز ههه عرفتو الحلوف... وزيد اونسانت.... بو نساوين جامي يتبدل... ختي ننصحك تبعدي الراجل مزوج وعندو طفلة...."
حمارت فتون... حكمتها الضحكة...
".... لا لا راكي غالطة... أنا جيت مع علاء..."

خديجة شرعت عينيها...
".... علاء؟؟ علاء لي يسكن هنايا... ؟؟؟ "
هزتلها راسها بزربة... خديجة طرشقت بالضحك..... شافت معاها فتون باستفهام
"..... هههههه نتيا حبيبة علاء.... امبوسيبل كيفاه هدا.... علاء بو نواظر المعقد... ههههه هم يضحك وهم يبكي..... "
".... مفهمتش وش يضحك فيها... أنا مرتو مش حبيبتو... "
خديجة خلاص كرشها رايحة تتفلڨ بالضحك.. مسحت دموعها....
".... علابلك شكون علاء... علاء هادا راهو حجرة جامدة تمشي.... رايحة ضيعي حياتك معاه... "

جاها فضول تعرف وش مقصدها.... فهمتها خديجة كملت تحكي...
"... علاء مش خلاص كيما خاوتو الأخرين.. أنا كنت منشوفوش بزاف بالرغم انو جارنا... هداك يقدر يقتل بلا ما يحس.... بلال كان يقولي بنو معقد من النسا.... ميحملش يقيسوه... تأمني جامي حكيت معاه... حياتو كامل جامي حكا مع طفلة..."
هزتلها براسها فتون وفي راسها أسئلة بزاف....كل ما قاعدة تنبش في حياته كتر تعرف بنو عبد مختلف ومميز عن الي عرفتهم في حياتها....
سمعت الباب تحل تع دارهم لقاتو يحوس عليها وباين الغش في عينيه... راحت عندو وجبدها من يدها ودخلها للدار.... داها لبيتو لي كان يرقد فيها هو وزكريا..... غمض عينيه ونطق بصوت باكي...
".... علاه خرجتي برا.. ؟؟ ؟"
".... أننننن نا محبيتش نديرو نجيكم... وزيد مانيش حابة نحطك فموقف مش مليح معاهم.."

سكت يحلل في كلامها في راسو... حل خزانة ورمالها زورة ومخدة....
"... اليوم نباتو هنايا حتى الغدوة نروحو... عندك تحكي معاهم ولا تقوليلهم حاجة تخصنا... رايح نقتلك والله... فهمتي "
هزتلو براسها بهيه خايفة كشما يدير.....وهو خرج برا يتنفس.... وحكاية البسيكولوغ في راسو لازملو علاج لحالتو..... كل ما قاعد يشوف كرشها تكبار كل يوم كل ما خايف يتهور و يقتلها...
عاود دخل وهما تفرقو كل واحد راح لبيتو.. حتى سمع صوت درصاف تعيط... ناض بزربة وراح ليهم