#كتمان
كان الساعة الوحدة تع العشية.... كل واحد وش قاعد يدير... درصاف البسمة مفارقتهاش.. حكات مع ايمن وقالها رايح يجيبلها كادو غالي..... سير رايح يجيب خاتم ولا كاش حاجة... ولات تسوطي وتضحك بالصوت... حتى بخصتها مها سكتت وراحت تحط لغدا وتغني فرحانة.....
سمعو صوت معتز يعيط من الفوق وهابط يجري...، شافو معاه يسقسيو فيه وش بيه...
"... يما لقاو بلال و صحابو...."
"..... وين لقاوه،شكون لي قالك...."
".... عيطولي لابوليس وقالك لقاو ربعة من أصل سبعة حيين والتلاتة ميتين...."
وبدا النديب والبكا من جديد... خرج معا باباه وعيط لايهم ودارين بش يجيو.... راحو طول للسبيطار ويدعيو يكون حي...
دخلو بزربة يحوسو عليه.... سقساو دلوهم على البيت لي فيها... لقاو صحاب بلال لتما... كل واحد وحالتو وعايلاتهم يبكيو من الفرحة...... الخوف بدا يتسلل لقلوبهم كي شافو واحد منهم يبكي....
".... وينو بلال؟؟؟"
جا الطبيب وشاف معاهم بأسف
".... روحو للمشرحة التحت بلاك يكون من لي لقاوهم....
موسى خلاص رجليه ولاو يرجفو ومعتز راح يبكي دموعو حاكمهم بسيف... دلوهم وكل خطوة هي خطوة للموت....
بداو ينحيو الغطاوات على الموتى.... حتى لحقو وين بلال..... جثة زرقا كلشي ميت فيه... بلال مات... الفرحة تع دارهم والزهواني مات وشبع موت.....
موسى هبطو دموعو.... معتز محملش روحو وطلق ولا يعيط باسمو بش ينوض... خرجوهم ومتأسفين على حالتهم.... موتة بلال جاتهم حاجة مش متوقعة خلاص.... سرقتو وهو صغير...مبقاش لعرسو بزاف....
راحو للدار ومعلابلهمش كيفاه رح يواجهوهم.. خاصة حبيبة... صعيب انك توقف و
تقول لأم انو ولدك مات فالبحر... ولدك راح ومش راح يرجعلك.....
هما سمعو الباب تع الدار يتحل وهما تجمعو متوقعينو كامل راهو حي وراح يطمنهم عليه،
شافت حبيبة مع موسى تترجاه بعينها ينطق ويريحلها قلبها....
"..... بلال لقاوه ميت هو وزوج معاه.."
شهقو كامل.... مش مأمنين... من الشوك كاين لي ولا يضحك
"... شوف موسى بركا تمسخير.. ههه قولي وين راه بلال وكتاه يجي؟؟؟"
جبدها معتز.... يحضن في مو ويبكي.. وهي تحاول تجبد روحها منو
".... قتلك وينو ولدي... وينو بلااااااال... جيبولي ولددددددددي هئ هئ لالا مامتش مش رايح يموت.... عرسو الشهر الجاي... منيتك كيفاه يموت..... حبسو كدب وينو ولدددي.... "
حبيبة دخلت فحالة انهيار عصبي.... ولات تضرب فيي روحها وتندب وتعيط.... منلوموهاش صعيبة بزاف..... تفقدي ولدك صغير....
من لي ولا تجهيز للعرس وفرحة... تقلب كلشي لجنازة.... كامل مهدودين.. الجيران بداو يسمعو وراح يعزيو ويبكيو معاهم... يعتبروهم كيما ولادهم... ترباو قدام عينيهم.... الحومة تضامنت معاهم ووقفو وقفة وحدة...
خديجة جات من الكوسمتيك... حالتها باينة مش راقدة... شافت النسا داخلين خارجين من دار الجزار... استغربت وجا في بالها يكون بلال رجع...
ضحكت وراحت تجري تطبطب... شافتهم لابسين الكحل وطالقين القرآن والبكا داير حالة
دخلت و حابة تطرد الأفكار السيئة من راسها..
شافت حبيبة راقدة ودارين ودرصاف قدامها..
".. لبنات وش كاين؟؟؟"
شافو معاها بتأسف... وناضت ليها دارين حضنتها.. وهمست فوذنها
"... ادعيلو بالرحمة وسامحيه... نعرفك قلبك بيض..."
جبدتها من عليها وشافت معاها
".... وينو بلال؟؟ شكون لي مات قولي..."
"... بلال عطاكي عمرو خديجة هئ هئ لقاوه جثة فالبحر هو و تلاتة صحابو... خويا مات يا خديجة...."
ناضت تعيط عليها... مزالت مصدومة كيفاه مات هدا ماهيش مأمنة.... مستحيل لبارح نامتو انو باسها و حضنها ... وقالها رح نتلقاو كاش نهار
".... دارين أحلفي قوليلي راكي تكذبي... هو هههه راه يتمسخر بيا كي عوايدو حاب يقولبني كيما مالف.... ههه بلال اخرج راني فقت بيك... خفت نسحرك هه اخرج بلال. "
طلعت تحوس عليه في الدار... وفي كل بلاصة والنساء يزيدو يبكيو كتر وكتر...
".... حبسسسسوووا بكا واحد ما مات راهو يتمسخر بيكم اني نعرفو ونعرف خدايمو... درك يجي كيما مالف ويضحك عليا... ديجا عرسنا الشهر الجاي.... هههه"
هي قاعدة هكداك وهما يدخلو نعشو لي جابوه من السبيطار هازو معتز وايهم وموسى... بش يشوفوه قبل ما يصليو عليه... ويدفنوه مع العصر.....
أنت تقرأ
كتمان [ مكتملة ]
Short Storyأول قصة ليا وكنت مبتدئة فيها شوية... لكن كتبتها بشغف ...بقلمي أسيل "كتمان....عندما يصبح البوح محرما .." قصة "كِتْمَانْ" قصة رايحة تخرج من كل واحدة فيكم المكبوت، مع شخصية عايشة في عالم صنعتو لروحها، برا تلقاوها كأي شخص عادي، تتصنع السعادة والف...
![كتمان [ مكتملة ]](https://img.wattpad.com/cover/354613214-64-k629921.jpg)