طلعت تاكل في ظفارها من القلقة....يحوسو يضحكو عليها الناس... درصاف تزوج من عايلة مزيريية غير هادي متصراش.... جات رايحة تحكي مع ايمن لقات قافل التلفون ولات تخبط في الدنيا وتكسر.... يالوكان تموت ومتخليش عايلتها يستشفاو فيها....
رجعت تسطحت وتخمم كيفاه تتلاقا بيه وتقولو يجي يخطبها ماهيش قادرة تصبر.. 28سنة بزاف....
سمعو الدقان تع الباب هبطو يشوفو شكون لقاوه زاكي.....
".... ماما وينو بلال... او يحوس عليه صاحبو"
"... معلاباليش درك نشوفو...."
لقاتو مكانش سير يكون خرج يحوس على خدمة.
"... ماهوش فالدار حوس عليه برا..."
في نفس الوقت خديجة تعيط وتعاود عليه قافل تليفونو من الصباح وماهيش عادتو يديرها... تنهدت وراحت للكوسمتيك... مبعد تعدي عليه في الدار وتشوفو
عدات يومين وبلال مكانش فالدار... الدنيا مقلبة حوسو عليه في كل بلاصة... حسو مكانش حتى القش نصو داه.... سقسو الجيران.. صحابو القراب اما والو... حبيبة هبلت من البكا... ماهيش قادرة تخسر طفل خلاف مكفاش غصتها على علاء يزيد يلحقو خوه....
كانو ملمومين فالصالون وخديجة معاهم هي تاني حالتها تبكي.... حستو بهدرتو معاها يودع فيها.... الحزن هو السيد.... كامل رايحين يموتو بالخوف غير درصاف ولا علابلها بيه.... يموت ولا يحيى.... لاتية بخططها وحياتها....
حتى جا موسى داخل من الباب... ناضو ليه يستفسرو وش كاين... نطقها بالم..
"... حرڨ مع صحابو..."
مهم دوب سمعت الجملة طاحت تغاشات... ناضو يجريو ليها يشممولها فالريحة كشما تفطن...
خديجة ويا خديجة... خرجت من الدار معلابلهاش وين رايحة... تخلى عليها وراح.. علاه مداهاش ؟؟؟ وينهم وعودو لي مدهوملها
كلشي تبخر كي الما....
الدموع تحجرو في عينيها.... صعيبة تفقدي واحد عزيز عليك بزاف..... الدار والزواج واولادهم.... كلشي طار.... طاحت تبكي على ركايبها...وتعيط بأعلى صوت
".... خلاني وراح... بلال علاه عليك وش درتلك بش تخليني نتعذب اكتر واكتر.... حرام عليك والله ما نسامحك يا بلال.... نشاله تتعذب يا خداع..."
راحت للدار وقفلت عليها تبكي وتندب... مها تبكي معاها ومعلابلهاش اصلا وش صاري حضنتها بشوية ويبكيو..... قلبها تحسو يحرق من الداخل......
♣️♣️♣️♣️♣️♣️
دخل للدار غلبان.... وعينيه يدورو على الدار حسها مكانش.... مشا بشوية لقاها تصلي وحاطة صلاية.... ضحك باستهزاء خلاها حتى تكمل
".... ربي يقبل؟؟؟ ههه"
"... آمين.."
".... من وكتاه صلاة العاهرات تتقبل؟؟"
صدمها بردو.....علاه قاسي هكدا وميحسش.،
شافت معاه وتبسمت بألم...
".... مدام ربي خلى واحد كيما نتا عايش فالدنيا ويعذب الناس... رايح يغفرلي ويتقبل مني.... لانو انت هو عذابي"
خلاتو واقف وراحت للكوزينة.... بقا يعاود
في هدرتها في راسو.... حس بحاجة قاستو.. اول مرة يحس بالالم من كلام عبد خلاف.......
أنت تقرأ
كتمان [ مكتملة ]
Short Storyأول قصة ليا وكنت مبتدئة فيها شوية... لكن كتبتها بشغف ...بقلمي أسيل "كتمان....عندما يصبح البوح محرما .." قصة "كِتْمَانْ" قصة رايحة تخرج من كل واحدة فيكم المكبوت، مع شخصية عايشة في عالم صنعتو لروحها، برا تلقاوها كأي شخص عادي، تتصنع السعادة والف...
![كتمان [ مكتملة ]](https://img.wattpad.com/cover/354613214-64-k629921.jpg)