كتمان [ مكتملة ]

الحلقة 8

#كتمان
♣️🖤الحلقة ٨♣️🖤
".... علاء قولي وشبيك علاه قابر روحك فالدار وشبيك ولدي حكيلي انا مك.... والله توحشتك.... ولكان على خاوتك مديرش عليهم تعرفهم يحبو يتمسخرو معاك.... أرواح شوف ملاك والله طفلة عسل علابالك كامل قالو تشبهلك....."
".... يما متخلينيش نكوبي عليك.... علابالك منحملش البلايص لي فيهم الغاشي.... ارحميني منقدرش نجي وزيد خدام...... "
".... شوف ولدي متجيش للعرس أرواح قبل العرس.... "
تنهد بشوية.... الدنيا يشوف فيها فلو.... حتا نوادرو مش قادر يوصل ليهم.... مقادرش يهدر معاها بزاف
"... اوكي..... وآخر مرة "
".... السمانة الجاية نهار الخميس.... العرس انتا أرواح قبل بيومين..... هيا ولدي ربي معاك هههههه ملاك راهي تبكي "
كوبا بزربة التليفون..... حتا وهي معاه تخمم في ملاك....

"... شفت مك.... تحوس غير على مصلحتها... عليها ضحات بيك هداك النهار.... هي متحبكش هههههه علابلك علاش بسك نتا مش راجل... نتا مش معتز ولا ايهم... نتا مش بلال.... نتايا عليلو الخواف.... "
ليلة هاديك رقدت بكري ما قدرتش نوض وزيد السخانة طالعة بت فالموت نترعد.... وكوابيس الليل محبوش يخلصو.....نكرهك.... كلمة تتعاود من فمو كل دقيقة..... شكون يكره معلاباليش هو علابالو😈🖤

🌌🌌🌌
".... درصاف ارواحي تتعشاي هيا وعيطي لزاكي معاك.. "
قعدو ملمومين كي العادة.... عايلة وحنان العايلة لي لا مال ولا جاه يقدر يعوضو... ضحكاتهم مسموعين.... الفرحة عامرتهم والمشاكل هاجرتهم.....
اما لالة حبيبة لي كانت ناقصة فرحتها... ولدها علاء اللغز لي محيرها... كي سمعت صوتو عرفتو مريض الوقت هادا شتا ومع هو ضعيف دايما يمرض ويكملها فالفراش سمانتين، محبتش تقلقو بزاف بالأسئلة تعها لكن تقعد أم.... ولازم تهتم بولادها مهما كبرو...
"... يما وين ساهية؟ علابلك متحمسة لعرس ايهم والله ساديل.... عسل ومش رايح يلقا كيفها"
"... ههه شتي دارين والله عسل بالحق ربي يهنيكوم نشاله"
".... موسى... عيطت لعلاء اليوم وعرضتو على عرس ايهم..."
".... ولدك حاب يعيش وحدو... خليه وزيد زايد ناقص تقول والد حجرة انا.. "
"... زوجوه درك يستعقل ههه "
"... بلال مش وقت ضحك درك.. " خنزر فيه معتز
".... موسى.. وشبيك قالي اني نجي... بسيف باش قنعتو... ونتوما واحد ما يقلقو ولا يحكي معاه... مانيش حابة نفقد ولدي...."
سكتو الكل بعد هدرة مهم... علابلهم قداه تحب علاء وتعزو......