နတ်ရေးတဲ့ ရွှေဖူးစာ
or ရွှေမင်းသားရဲ့ ကြင်ရာတော်
အခန်း (၆၆)
.
" မင်းသားကိုယ်တိုင် ပြန်လိုက်ပို့ပေးတာလား... "
ဦးဟန်,မှာ မမလေးကို ပြန်လာပို့ပေးတဲ့ သူက အိမ်ရှေ့စံမင်းသားကိုယ်တိုင်ဖြစ်နေတာကြောင့် အံ့သြသွားရသည်။
" ဟုတ်တယ်။တေး အိပ်ပျော်နေတယ်။ကျွန်တော်ပဲသူ့ကို အိမ်ထဲထိပို့ပေးမယ်။ရှေ့ကနေ တေးအခန်းကို ပြပေးနိုင်မလား... "
" ဟုတ်ကဲ့ ပြပေးနိုင်ပါတယ်။ကျွန်တော့်အနောက်ကနေ လိုက်လာခဲ့ပေးပါ မင်းသား "
" အင်း "
ဒီပ, အိပ်ပျော်နေတဲ့ သူမကိုယ်လေးကို အသာအယာပွေ့ယူလိုက်သည်။ဒဏ်ရာတွေရှိနေတာကြောင့် ပွေ့သာပွေ့ရတယ် သူမနာကျင်သွားမှာကို စိုးရိမ်နေမိသည်။
သူမအိပ်ခန်းဆီ ပွေ့ချီသွားသည့်တောက်လျှောက်
အရုပ်လေးတစ်ရုပ်ပမာ ငြိမ်သက်၍ အိပ်မောကျနေလေသည်။
ခမ်းနားတဲ့ အိမ်ကြီး၏ ဒုတိယထပ်ကိုရောက်လာတဲ့
အခါမှာတော့...
" ဒီအိပ်ခန်းက မမလေးရဲ့ အိပ်ခန်းပါ မင်းသား "
" ကျွန်တော် တေးအနားမှာ ခဏလောက် နေချင်သေးလို့ ခွင့်ပြုပေးနိုင်မလား။နောက်ထပ်တွေ့ဖြစ်ဖို့ဆိုတာ မသေချာတော့လို့ပါ "
ဒီလူက အခုချိန်မှာ သူမ၏ စောင့်ရှောက်သူဖြစ်နေတာမို့... ဒီပ, သူမအနားမှာခဏနေဖို့ကို တရားဝင်
ခွင့်တောင်းလိုက်တာပါ။
" ဟုတ်ကဲ့ ကျွန်တော် အောက်ထပ်မှာ ဆင်းပြီး
စောင့်နေပါ့မယ်။မင်းသား အေးအေးဆေးဆေး နေလို့ရပါတယ် "
" အင်း "
အဲ့နောက် ဒီပ, သူမကိုပွေ့ချီလျက်နဲ့ အိပ်ခန်းထဲကို
ဝင်လာခဲ့လိုက်သည်။
သူဌေးသမီး မိန်းကလေးတစ်ယောက်၏ အိပ်ခန်းဖြစ်သော်ငြားလည်း အသုံးအဆောင် ပစ္စည်းအများအပြားက အခန်းတွင်းကို နေရာယူထားသည်မျိုးမရှိ။
အဖြူရောင် အိပ်ခန်းကျယ်ထဲမှာ ကုတင်၊မှန်တင်ခုံနှင့် စာကြည့်စားပွဲတို့သာရှိနေပြီး၊ရှင်းလင်းမှုဖြင့်
အခန်းလေးက သန့်ပြန့်နေ၏။အဝတ်လဲခန်းနှင့်
ရေချိုးခန်းတို့ကလည်း အခန်းတွင်းမှာရှိနေသည်။
