နတ်ရေးတဲ့ ရွှေဖူးစာ
or ရွှေမင်းသားရဲ့ ကြင်ရာတော်
အခန်း (၅၇)
" အစ်ကိုကြီး အခုဘယ်မှာလဲ "
" ဘယ်မှာရှိတယ်ဆိုတာ သိရင်၊မိဖုရားကြီး က အိမ်ရှေ့စံကို သံတော်ဦးတင်မလို့လား "
ဖုန်းဆက်လို့ကိုင်တာနဲ့ အစ်ကိုဖြစ်သူဆီကနေ ခပ်ငေါ့ငေါ့ စကားသံကို တန်းကြားရတော့သည်။
" အစ်ကိုကြီး ဘာတွေလုပ်နေတာလဲ။သရဖီလည်း အဖမ်းခံထားရတယ်။ကျွန်မကိုလည်း မင်းကြီးရော
မင်းသားရောက စကားတောင်သိပ်မပြောကြတော့ဘူး။စန္ဒီတို့မှာ အားကိုးရာက အစ်ကိုကြီးပဲရှိတာ။အစ်ကိုကြီး အမှားလုပ်ရင် စန္ဒီတို့ပါခံရမှာ။အဲ့ဒါကြောင့်... "
" ဘာလဲ... မိဖုရားကြီးက အစ်ကိုဖြစ်တဲ့ ကျုပ်ကိုထိခိုက်မိမှာထက်၊ မိဖုရားကြီးကို ထိခိုက်မှာဆိုးလို့
ကျုပ်ကို နားချဖို့ လုပ်နေတာလား "
စကားပင်မဆုံးသေး အစ်ကိုကြီးက ဒေါသဖြင့် ပြောလာလေသည်။
" စန္ဒီကိုထိခိုက်မှာဆိုးလို့ ဆိုတာမျိုးထက်၊အားလုံးထိခိုက်မှာကို မလိုလားလို့ ပြောနေရတာ။အခုတောင် သရဖီလေးက အချုပ်ထဲမှာ။စန္ဒီ့မှာ သရဖီလေးကို အချုပ်ထဲကနေ ထုတ်ပေးချင်တာတောင်၊
စိတ်ကပဲ ရောက်နေတယ်။လူက အချုပ်ထဲကနေ
ထုတ်ပေးနိုင်တဲ့ အင်အားမရှိဘူး။အစ်ကိုကြီးသာ
တစ်ခုခု အမှားလုပ်မိရင်၊စန္ဒီတို့တစ်မိသားစုလုံးကို
ထိခိုက်လာမှာ "
" မိဖုရားဖြစ်နေပြီး၊ကိုယ့်သွေးသားတစ်ယောက်ကိုတောင် မကာကွယ်ပေးနိုင်ဘူးလား။အခုနေရာကိုရောက်အောင် ကျုပ်ဘက်က ဘယ်လောက်တောင် လုပ်ထားပေးခဲ့ရသလဲ။နှစ်တွေလည်းကြာနေပြီ အခုထိ အာဏာကိုမချုပ်ကိုင်နိုင်သေးဘူးလား။ကျုပ် မိဖုရားကြီးအတွက် ရင်းနှီးထားတာတွေက
အလကားဖြစ်သွားပြီပဲ။မိဖုရားကြီးနေရာမှာသာ
တခြားတစ်ယောက်ကို နန်းတော်ထဲမှာနေရာတစ်ခုလောက်ရအောင် လုပ်ပေးခဲ့ရင်၊အခုလောက်ဆိုရင်
ကျုပ်အတွက်အတော်လေး အားကိုးနေရလောက်ပြီ။မိဖုရားကြီးက ပျိုးထောင်ပေးရကျိုးမနပ်ဘူးဘဲ "
