နတ်ရေးတဲ့ ရွှေဖူးစာ
or ရွှေမင်းသားရဲ့ ကြင်ရာတော်
အခန်း (၆၇)
.
" မမလေး အစ်မကြီးဆီသွားရင်းနဲ့ သခင်လေးစျာန် ကိုပါဝင်ကြည့်ခဲ့ပါလား။ဒီမနက်အထိ သတိပြန်မရသေးဘူးလို့ ပြောတယ် "
" တေးက အဲ့လူကို ဘာအတွက်ဝင်တွေ့ရမှာလဲ
ဦးလေးဟန် "
" ဟင်... "
ခံစားချက်မဲ့နေတဲ့ မျက်ဝန်းလေးတွေနှင့် ကြည့်ပြီး
ပြန်မေးခွန်းထုတ်လာတဲ့ မမလေးကြောင့်... ဦးဟန်မှာ ရုတ်တရက် ကြောင်အသွားရသည်။
" သခင်လေးစျာန် အခုထိသတိပြန်မရသေးတာက သေနတ်ဒဏ်ရာကြောင့်တင်မဟုတ်ဘူး။မမလေးအဖေ၊အစ်ကိုကြီးကို အချုပ်ခန်းကနေ ကယ်ထုတ်ပေးဖို့လုပ်ရင်းက အဆိပ်မိသွားခဲ့တာပါ။မမလေးမှတ်မိမှာပါ။အစ်ကိုကြီးကို အချုပ်ခန်းထဲကနေ ကယ်ထုတ်ပေးနိုင်ဖို့... အဲ့ညက သခင်လေးစျာန် အိမ်ရှေ့စံမင်းသားရဲ့ သွေးနဲ့ အမတ်ချုပ်ကြီးဆီမှာ အလဲအလှယ် လုပ်ခဲ့တာကိုလေ။အဲ့သွေးကို အမတ်ချုပ်ကြီးက သခင်လေးစျာန် ကို... "
" ဆက်မပြောနဲ့တော့! ဘာကိုမှတ်မိဘူး။
မနေ့ညကအထိ ဖြစ်ပျက်ခဲ့တဲ့ အရာအားလုံးကို
တေးမေ့ပစ်လိုက်ပြီ။တေးဘဝရဲ့အစက ဒီနေ့ပဲ။ဒါကြောင့် တေးဘဝရဲ့အတိတ်ကိုထပ်ပြီး မတူးဆွပါနဲ့။တေးအခုဆေးရုံကိုသွားမယ်။မေကြီးကိုအိမ်ပြန်ခေါ်လာလို့ရမရဆိုတာကို ဆရာဝန်နဲ့တွေ့ပြီး စကားပြောမယ်။ပြီးရင် ကုမ္ပဏီကို ဝင်မယ်။ဒီရက်ထဲမှာ ဟစ်နေခဲ့တာတွေကို အကုန်ပြန်လုပ်ရမယ်။
ကုမ္ပဏီပိုင်းကို တေးကသိပ်မကျွမ်းသေးတာမို့..
ဦးလေးဟန် က တေးကိုအများကြီး ကူပေးရမယ်။
တေးသွားတော့မယ်။ကုမ္ပဏီမှာတွေ့မယ် "
" ဟုတ်ကဲ့ မမလေး "
အိမ်ရှေ့စံမင်းသားရဲ့အကြောင်းကိုတင် အပြောမခံတာ မဟုတ်ဘဲ... သခင်လေးစျာန်အကြောင်းကိုပါ
မမလေးက အပြောမခံပေ။
နှစ်ယောက်လုံးက မမလေးချစ်ခင်နှစ်သက်ရတဲ့သူတွေဖြစ်ပေမဲ့လည်း အခုချိန်မှာတော့... နှစ်ယောက်လုံးက မမလေးရဲ့စိတ်နှလုံးကိုနာကျင်စေရတဲ့သူတွေဖြစ်နေပေသည်။
