කණාමැදිරි එළි

CHAPTER 58

හැමෝම කාමරවලට යද්දි මන් තණකොළ ගොල්ලෙ කෙළවර තිබ්බ පොඩි බැම්ම උඩ වාඩිවෙලා අහස දිහා බලන් හිටියේ තව ටික්කින් එන්නම් කියලා. පෝය පහුවෙලා නිසා හඳ ටිකින් ටික අඩුවෙනවා. ඒ උනාට එළියයි. තරු ගොඩක් අහසෙ තැනින් තැන විසිරිලා තිබ්බා. නිමෙන්න ඔන්න මෙන්න තියෙන ෆයර් එකෙන් රස්නයක් ආවෙ නැතත් ලොකු සීතලක් තිබ්බෙත් නැති නිසා මන් අත් දෙකත් බැදන් හද වටේ තිබ්බ තරු ගැන්නා. විටින් විට එන හුළගට තිබ්බ සීතල ටිකක් වැඩි උනත් මන් එතනම හිටියේ කොහොමත් මට දැන්ම නින්ද යන්නෙ නෑ කියලා මන් දන්න නිසා.

" ඇයි තනියම තරු ගනින්නෙ...?"

" තෙනූශ අයියා... ඔයා... නිදාගන්නෙ නැද්ද?"

" අද නින්ද යන්නෙ නෑ මට. ඔයා?"

" ඒකම තමා."

මන් අහස දිහා බලන් එක අස්සෙන් එක පාරටම ගැස්සිලා මගෙ එහාපැත්ත බැලුවේ තෙනූශ අයියා ඇවිල්ලා වාඩි උන නිසා. තනි කලු ඇදලා ඇත්තටම කලු අවතාරයක් වගේ. එයා මට අඩියක් විතර එහයින් වාඩිවෙලා අහස දිහා බලන් හිටියා. මන් ඒවෙලාවෙ තමා දැක්කෙ කණාමැදිරියෙක් එහෙට මෙහෙට යනවා අපෙ අස්සෙන්.

" අයියා...."

" ම්ම්..."

" ඔයා... මොකක් හරි ප්‍රශ්නෙක නේද?"

" යෙතුනිට එහෙම හිතෙනවද?" මන් එයා දිහා බලන් අහද්දි එයා අහස දිහා බලන් හිටියා.

" හ්ම් ඔව්. ඔයා.. ඔයාගෙ ඇස් වල දුකක් පේනවා."

" ඒ කියන්නෙ මගෙ ඇස් දෙක දිහා බලන් හිටියා නේද?" එයා පොඩි හිනාවකින් මන් දිහ බැලුවා.

" ඔව් ඉතින් ඔයත් බලන් හිටියේ..." මන් මූණ අනිත් පැත්ත හරවගත්තේ එයාගෙ හිනාව තව ලොකු වෙද්දි.

" අයියා.."

" හ්ම්.."

" මොකද උනේ? ඇයි ඔහොම?"

" මන් යෙතුනිට කතාවක් කියන්නද?"

" හ්ම් හා. මොකක් ගැනද?"

" අහන් ඉන්නවද?"

" හා." මන් කිව්වම අයියා ආයෙ අහස දිහා බලාගෙන ලොකු හුස්මක් පහළ දැම්මා.

" එකමත් එක කාලෙක යෙතුනි හිටියලු පිරිමි ළමයෙක්. එයා හරි වයසට එද්දි එයාට හිත ගියා එක ලස්සන ගෑණු ළමයෙකුට. ඒත් ඒ ගෑණු ළමයා එයාට කැමති වෙලා නෑ. කාලෙත් එක්කම ඒ ගෑණු ළමයා එය ආදරේ කරපු කෙනා එක්ක සතුටින් ඉද්දි අර පිරිමි ළමයගෙ පවුලෙන් මේ පිරිමි ළමයවත් බන්දලා දෙන්න හැදුවලු. හැබැයි ඒකට මේ පිරිමි ළමයා කැමති වෙලා නෑ මොකද එයා තාම අර ගෑණු ළමයට ආදරේ කරන නිසා. ඒ උනත් පවුලෙ බල කිරීම මත ඒ පිරිමි ළමයා තව ගෑණු ළමයෙක්ව බැන්දලු. ඒ ගෑණු ළමයට පවා පිරිමි ළමයා ගැන කැමැත්තක් තිබිලා නෑ. එයත් පවුලෙ බලකිරීමට තමා බැදලා තියෙන්නෙ. ඒ දෙන්නා බැදලත් ඒ දෙන්නගෙ වැඩම බලාගෙන හිටියා. එකට කන්න බොන්න කතා කරන්න මේ මුකුත් නැ.