နာမည်ကြီးဝတ္ထုထဲကိုကူးပြောင်းပြီးနောက်ဇာတ်ကောင်တွေလွဲကုန်ပြီ

chapter 100

Heartthrob - 100
လက်ဖက်ရည်ဆက်အစေခံမလေး ဒူးထောက်ချလိုက်ခြင်းက ကြက်မြင်း၏အာရုံကို ဆွဲဆောင်သွားသည်။ ၎င်းက စပ်စပ်စုစုဖြင့် လျှောက်လာပြီး လက်ဖက်ရည်များက ဖန်းချောင်ကျိုး၏ ဖိနပ်ထိပ်အား စိုသွားစေသည်ကို တွေ့လိုက်ရသည်။ ဖိနပ်ပေါ်တွင် လက်ဖက်ရွက်အနည်းငယ်လည်း ကပ်ငြိနေသေး၏။ သူ ဖန်းချောင်ကျိုးကို မော့မကြည့်လိုက်မိဘဲ ‌မနေနိုင်။

ဖန်းချောင်ကျိုးနှင့် အချိန်အတော်ကြာ နေထိုင်ခဲ့ပြီးနောက်တွင် ဖန်းချောင်ကျိုး အတော်လေးအသန့်ကြိုက်သည်ကို သူ သိတာကြာပြီဖြစ်သည်။ အထူးသဖြင့် အဝတ်အစားကို သန့်ရှင်းသပ်ရပ်စွာ ဝတ်ဆင်တတ်၏။

ဖန်းချောင်ကျိုးက ထိုမိန်းကလေး ဒူးထောက်လာသည်ကို မြင်သောအခါ တန့်သွားသည်။ ထို့နောက် သူ ထရပ်ကာ တစ်ဖက်လူ မျက်နှာချင်းဆိုင်ကာ ဒူးထောက်နေသည့်ဖက်မှ အနည်းငယ်ရွှေ့လိုက်ချင်မိ၏။ သို့သော် သူ လှုပ်လိုက်သောအခါမှာပဲ ဒူးထောက်နေသော အ‌စေခံမလေးက ရှေ့သို့ နှစ်လှမ်းတိုးလာလေသည်။ ၎င်းက ဖန်းချောင်ကျိုး၏လမ်းကို ပိတ်လိုက်ရုံမျှသာမက သူ့ခြေသလုံးကိုကိုင်ထားသလိုပုံစံလည်း ဖြစ်သွားသေး၏။

"သခင်လေး!"

ဖန်းချောင်ကျိုးမှာ ထိုသို့သောအနေအထားမျိုးဖြင့် တစ်ခါမှမနေဖူးသောကြောင့် လန့်မသွားမိဘဲမနေနိုင်။ ဖိနပ်များ မတော်တဆ စိုသွားခြင်းသာမဟုတ်ပါလား၊ ဘာကြောင့် ကိစ္စကို သည်လောက် အလေးအနက်ဖြစ်သွားအောင်လုပ်နေရသည်လဲ။

နေပါဦး။

အခန်းဖော်ဟောင်းက သူ့အား ပြောခဲ့သည့်စကားအရ စစ်ဆေးခြင်းက အဆင့် ၄ ဆင့်ရှိပုံပေါ်သည်။ သူ ယခု တတိယအဆင့်တွင် ရောက်နေပြီဖြစ်ပြီး အဆင့်နှစ်ဆင့် ကျော်ဖြတ်နိုင်ခဲ့ပြီးဖြစ်မည်။ ရရှိမည့် ဝိဉာဉ်ကျောက်တုံးများကို ပေါင်းလိုက်လျှင် တစ်ထောင့်နှင့်တစ်ရာ ရှိပြီဖြစ်သည်။ ကြက်ဆင်ညို၏ခွဲတမ်းကိုပါ ထပ်ပေါင်းလျှင် နှစ်ထောင့်နှစ်ရာ ရှိနေလေပြီ။

သူ နဂိုကတည်းက ဝိဉာဉ်ကျောက်တုံး တစ်ရာသာ ယူချင်ခဲ့ခြင်းဖြစ်သည်။ ယခု သူရမည့်ကျောက်တုံးများ အလွန်များနေပြီဖြစ်၏။