နာမည်ကြီးဝတ္ထုထဲကိုကူးပြောင်းပြီးနောက်ဇာတ်ကောင်တွေလွဲကုန်ပြီ

Chapter 143 (pt 1)

Heartthrob - 143
(ရှောင်ရှစ်တိရဲ့ အချစ်မှတ်တမ်း အချပ်ပို)

ပထမဆုံး ထိုသူကို သတိထားမိချိန်က ဘယ်အချိန်မှန်း ရွှယ်သန်းရုံ မမှတ်မိတော့ပါ။
အစကတော့ သူ့စိတ်ထဲတွင် ထိုသူသည် တခြားသူများနှင့် ဘာမှမကွာ၊ အမြဲ သူ့ကို ကြည့်နေသည်၊ အမြဲ သူ့ကို ရှောင်ရှစ်တိဟု ခေါ်သည်၊ အမြဲ သူ့ကို သူမလိုသောပစ္စည်းတချို့ပေးလေ့ရှိသည်။

ထိုအချိန်က သူ တစ်ဖက်လူကို အာ့ရှစ်ရှုန်းအဖြစ် သဘောထားခဲ့သည်။ သို့သော် ရုတ်တရက် ထိုသူက သူ့ကို ဆက်မကပ်နေတော့ပေ။

ရွှယ်သန်းရုံ ထိုကိစ္စကို စိတ်ထဲမထားခဲ့ပါ၊ သူ့အမြင်တွင် ထိုသူက မနှောင့်ယှက်တော့သဖြင့် သူ ပို၍ကောင်းကောင်း ကျင့်ကြံနိုင်သေးသည်။ သို့သော် ထင်မှတ်မထားသည့်အရာက ဖြစ်ပျက်လာခဲ့၏။
သူ မြွေဆိပ်မိသွားပြီး ဂူထဲ၌ လဲနေခဲ့သည်။ သူ့အသိစိတ်များ ဝေဝါးနေ‌သော်လည်း ဖန်းချောင်ကျိုး ဘာလုပ်ခဲ့သည်ကို သူသိပါ၏။ ထိုသူက ဝတ္ထုစာအုပ် ဖတ်နေခဲ့ခြင်းပင်။ နောက်ပိုင်း သူ စိတ်အစဉ် ကြည်လင်လာသောအခါတွင် ဖန်းချောင်ကျိုး၏ စကားများကရော ဖန်းချောင်ကျိုး၏ အပြုအမူများကပါ သူ့ကို အနည်းငယ် ဒေါသထွက်စေသည်။

ဖန်းချောင်ကျိုး မြွေသေကို သူ့အားပေးလာချိန်တွင် သူ တုံ့ဆိုင်းခြင်းမရှိစွာပဲ မြွေသေကို မြေပေါ် ရိုက်ချပစ်ခဲ့သည်။

သို့သော် နောက်ပိုင်းတွင် မြွေဆိပ်မိထားသော သူသည် ဖန်းချောင်ကျိုးအား သိပ်မကောင်းသည့်ကိစ္စများ လုပ်ခဲ့မိ၏။ မြွေဆိပ် ရှင်းလင်းသွားသောအခါတွင်ပင် သူ တစ်ဖက်လူကို သူ့အောက်၌ဖိထားပြီး တစ်ဖက်လူ၏ပါးပြင်အားကိုက်ခဲ့သော ခံစားချက်ကို မှတ်မိနေပါသေးသည်။

ဤသည်မှာ သူ ပထမဆုံးအကြိမ် တခြားသူနှင့် ဒီလောက်နီးနီးကပ်ကပ် နေဖူးခြင်းဖြစ်သည်။ ထို့အပြင် နောက်ပိုင်းနေ့ရက်များတွင်လည်း သူ ဖန်းချောင်ကျိုးကို စွဲ‌လန်းနေခဲ့သည်။ထိုကိစ္စနောက်ပိုင်းတွင် ရွှယ်သန်းရုံ ဖန်းချောင်ကျိုးကို တောင်းပန်ချင်ခဲ့ပါသည်။ သို့သော် ဖန်းချောင်ကျိုးက ပြန်လာသည်နှင့် တံခါးပိတ်ကျင့်ကြံသွားကြောင်း ရှစ်ဖူက သူ့ကို ပြောခဲ့သည်။ နောက်တစ်ခေါက် ဖန်းချောင်ကျိုးကို ထပ်တွေ့ရသည်မှာ ၆ လမျှအကြာ သူနှင့်ဖန်းချောင်ကျိုးတို့ ကျင့်ကြံသူစုဝေးပွဲသို့ တက်ရောက်ရမည့်အချိန်တွင် ဖြစ်သည်။