للقدر والنصيب كلمة اخرى

1

#للنصيب_والقدر_كلمة_اخرى

ح1
انا عبير عمري 18 سنة وسنة اولى جامعة طبعا جوي حلو ونعتبر على حسب مايقولو جميلة جدا لاني واخذة جمالي من بابا وماما  و عندي جاذبية حلوة  وعندي صديقتي هبة نفس عمري حتى هيا وجوها حلو اكثر مني   وعندي قروب في الجامعة وهو اصلا قروب الابتدائي والاعدادي والثانوي من اربع اولاد احمد طبعا وضعه بروحه تو تعرفوه لقدام  وهشام وسند وعبدالله  وانا وهبة واصالة وهنادي  
واهلي واهل احمد واهليهم قراب لبعض واجد ونعتبرو  عشرة عمر تو نحكيلكم عليها وعندي اخت وحدة اصغر مني بسنة واسمها انوار وحتى هيا حلوة بس كل شئ فيها على اسود الشعر والعيون والرموش  والبشرة البيضاء واخذتهن من ماما عكسي واخذة العيون الفاتحات والشعر الاشقر من بابا وعندي خوت اولاد اثنين صغار واجد مني محمد 3سنوات وموسى سنة
في الصيف تعرضت لحادث اصبت اصابة بالغة في الحوض وعدى عليا صيف يدره الكبد رغم محاولة اهلي وصديقاتي يغيرو جوي طبعا واصالة  وهنادي  حتى هما صاحبتي واجد لكن هبة الاقرب لقلبي وجارتي وصديقة الطفولة
وخشينا للجامعة وفرحانين بالجو الجديد علينا وايامي عادي مافيهاش شئ مميز وواجد يبعتولي يبو علاقة وانا كنت رافضة اندير اي علاقة عشان مانبيش نخون ثقة اهلي كانت هذي قناعتي طبعا نسيت انقول اني شخصيتي تبان انها ضعيفة  بس انا اقوى من هما يتخيلو لكن حساسة واجد رغم قوتي ودمعتي بسرعة ماتنزل ومكان حد يعرفني كويس الا احمد لكن مشكلتي حشومية واجد وصحابي الاولاد يقولولي انتي صاحبة صاحبها من كثر اني معروف عليا اني عند كلمتي ومواعيدي مواعيد انجليز ومافيش حد يقصدني مانصبيش معاه
وعدت السنة الاولى ونجح قروبنا كله الحمدلله وجي الصيف طبعا اني نمشي من بنغازي لطرابلس في الصيف بحكم خوالي وعمامي فيها لان اصلي منها لكن انولدت وعشت وكبرت في بنغازي
وكمل الصيف بدون جديد وجت السنة الثانية واحمد عنده ولد خالته
سالم ديمة يجينا ويكسد مع قروبنا عاجبه جونا مع ان احمد مش واجد هو وياه ونسيت نقوللكم اني غالي عليا واجد التحدي ومرة خشيت في تحدي مع سالم وربحت في التحدي فاتصل بيا مرة من رقم ريفي ويسئل فيا شنو تبي بما اني ربحت الرهان وقلت ليه طبعا شنو نبي وسكر وبعدها قريب مع الساعة واحد في الليل رن نفس الرقم فاستغربت وهما عارفين اني بعد الساعة عشرة مانردش على قروبي الولاد الا احمد او البنات بس نرد عليهن لكن مش عارفة ليش عقلي قالي ردي
الو ...اهلين
انا حامقة وماعطيتاش فرصة يحكي كلمة نين قلت اللي نبيه
انا ..كنك ياسالم متصل تو ان شاءالله خير وانت عارف اني مانردش عليكم في الوقت هذا واللي خلاني انرد عشان نهزبك لو عقلك فكر في حاجة خلاتك ترن عليا تو وان شاءالله حاجة مهمة اللي خلاتك تكلمني تو تكلم
طبعا مافيش رد قعدت نقول الو الو الو وسكرت
قلت في خاطري اكيد انحرج مني
بعدها عاود ثاني ورديت ومش عارفة ليش عقلي ماباش يمنعني على الرد
انا.. الو ... الو ... الو باه ياسالم تو يبان ليك بكرة كان ما آدبتك عليها نبدل اسمي  برضو مافيش رد
تكنطيت وسكرت وقلت لو يرن مرة اخرى معاد رادة لكن للاسف لقيت روحي رادة عليه
انا.. الو ... الو ... كان ماتردش معاش تفكر تكلمني وبكرة حسابك معاي وبعدها مع احمد ومن ايام الثانوي معاش درت عركة لكن عادي نعاود واندير عركة حتى وانا في عمري هذا وحسابك بكرة
نسمع في ضحكة مش عادية مافهمتش شنو صار فيا ضحكة فيها سحر غريب بدل مانسكر بعد الكلام اللي قلته لقيت روحي مادة وجهي وقاعدة نسمع في الضحكة اللي رفعتني لعالم ثاني
هو رد ... معقولة الصوت هذا يعرف يدير عركة ويعرف يضرب
انا رحت في نغمة الصوت وحسيت رعشة بجسمي كله وماعرفتش السبب شعور عمري ماحسيته
فطنت لروحي وورديت
انا ... ونكسر حتى الكسر ماتعرفينيش لما نحمق واسئل عليا ولد خالتك وبعدين ركزت وقلت ليه انت مش سالم
رد .... لا مش سالم انا ضيف جاي عندهم وضاربني الكساد فقلت انرن على اخر رقم مطلوب
رديت .... حركة مش مؤدبة
رد ... بما اني سمعت صوتك عادي نطلع مش مؤدب
انا .... سكرت التيلفون واستغربت من روحي كيف درت هكي وكيف ماسكرتش من الاول
رن من جديد وهالمرة في حاجة تقولي ردي وعلى قد ماحاولت نقاومها فشلت لكن لما جيت بنرد فصل الخط مش عارفة ليش انقهرت وشوي وعاود الرقم درت جو الثقل وخليته يرن شوي ورديت
الو ... اهلين
هو ... تعرفي ضاربني الكساد واللي انا عندهم يرقدو بدري احكي معاي نطير الكساد
انا ... ياسلام شنو قالولك علي حمادة سلطان بيش اطير بيا الكساد
هو... قعد يضحك ويضحك وقالي من اي عصر انتي
انا ... هو يضحك وانا ذايبة في هالضحكة اللي تقول اول مرة نسمع حد يضحك لكن ضحتكه غير وكان خاطري نقوله من عصر جدتك لكن مانطقتش لانها مابتش تطلع اصلا 
هو ...وين رحتي
انا ... قاعدة
هو ... ماقصدي شئ لكن انا مكسد وانتي شكلك مكسدة فقلت نحكو مع بعض ونطيرو الكساد
انا ... ومنو اللي قالك اني مكسدة
هو ... شنو اديري
انا ... نتفرج على اعادة مباراة
هو .... مات من الضحك
وانا انتهيت من الذوبان ضحكة فيها سحر غريب مانعرفش حتى كيف نوصفه
هو ... تتفرجي على المباراة قصدك انتي من جماعة الكورة
انا ... كنهم جماعة الكورة
هو ... ماكنهمش لكن انتي من اللي يتفرج بس والله يتفرج ويلعب
انا ... نتفرج ونلعب
هو ... ماشاءالله بس اللي يتفرج على الكورة يقعد مكسد لابال اعادة
انا ... فاتني موعدها الاصلي لان كان عندنا ضيوف ولهيت في الكوجينة
هو ... ماشاءالله وتعرفي اطيبي اخرى
انا ... ست بيت درجة اولى
هو ... اه شفتي اه بدينا نحكو ونتعرفو
انا .... او كي تمام بس بدون اسماء وبدون اسئلة شنو تقري او تشتغلي لو غير هكي سكر احسن
هو ... تمام التمام
وقعدنا نحكو ونحكو وانا مرة مرة نراجع في روحي ونقولي خيرني ضعفت وغيرت مبداي لكن في حاجة ماخلتنيش نسكر
هو ... سؤال وانتي حرة اتجاوبي او لا
انا ... شنو قلنا نحن
هو ... ماترديش لو ماتبيش
انا ... شنو هو
هو ... انا نحس في كلامك مش شرقاوي صافي نحس فيه خليط وكلمات واجد مش شرقاوية
انا ... انا غرباوية الاصل بس مولودة وكبرت وعشت في الشرق
هو ... عليك حظ ماشاءالله اللي عندي
انا ... عليش
هو .... عشان انا نحب اللهجة الغرباوية
انا ... فقلت ليه رغم اني ندوي عجينة بين الدوتين
هو ... وهذا اللي محلي كلامك
الكلمة خدتني لمكان ثاني وشعور ثاني بس ماعرفتش شنو هو ونسيت المباراة اللي نتفرج عليها اللي كملت شغلي في المطبخ وانا راقيلي من الضيوف على خاطر ماتفرجتش عليها
هو ... وين رحتي
انا ... قاعدة
وشوي ونسمع الفجر انفجعت
هو ... خيرك
انا ...قصدي قعدت انهدرز معاك نين الفجر اذن
هو ... عليش شنو فيها
انا ... عمري مادرتها قبل شنو جدعليا
هو ... قصدك بتقوليلي انك عمرك مادرتي علاقة
انا ... ايه عمري مادرت علاقة صح  عندي اصدقاء اولاد لكن علاقة لا
هو ... غريبة
انا ... خليك استغرب بروحك انا بنعدي انتوضى وانصلي الفجر ونرقد قبل ما نمشي لج... قصدي لقرايتي
هو .... نكلمك ثاني عادي اذا سمحتي
انا ... لا  سلام