للقدر والنصيب كلمة اخرى

46

#للنصيب_والقدر_كلمة_اخرى

ح46
نضت الصبح وعدى احمد للكلية وفي الظهر جن البنات وجاء سند وعبدالله وقعدو يهدرزو معاي وغيرولي جوي وتعشو عندنا وروحو البنات لكن هبة قاعدة ماخلاتنيش عارفتني مازالت نبكي ونتعب في الليل رغم مكابرتي ايه نتعذب ومن الجيهتين عذابي في الشخص اللي حبيته وطلع شكاك والجهة الثاني خوي وصديق عمري يطعني طعنة اللي هو المفروض يدافع عليا ويحميني مش يخرب حياتي ونزلت لاشعوريا دمعة من عيني على خشت احمد
احمد..نوارتي هكي تعذبي فيا راه
انا..اعذرني ياقلبي غصبن عني راه تنزل
احمد..مازال كان بترجعيله مازال راه
انا..مستحيل ومعاش تفكر تسئلني لانك كان سئلتني مرة اخرى تبدا ماتعرفنيش
احمد..بنطلعها من الموضوع هيا نقريك المحاضرات اللي فاتوك
انا كل مرة نتاكد ان في حاجة اكبر من موضوع هشام  بس بين يوسف ونوارتي لاني نعرفها مستحيل تكون بالقسوة هذي الا في شئ كبير وانا نستنى تقوله ليا
انا..وين رحت حمودي
احمد..قاعد هي نبدو
وقعد يشرحلي احمد وحسيته مركز وجت حتى هبة وقعدت حتى هيا تساعد في احمد وفهمت منه شرح محاضرة اليوم اللي مامشتش ليها وبعدين رقدنا
ومشن ايام وجن ايام ومع ان الوضع تما عادي لكن قاعدة نضعف اكثر من الاول نين نحس في روحي تميت غولة وبدو امتحانات الجزئي الاول ولاني انتساب ماشوري الامتحانات لكن قعدت انراجع ونقرا معاهم
ومازال في عدتي اسبوع ونكمل الثلاثة الشهور بابا طالع عمل وماما مشت مع عمتو للعزاء قريب وانوار اطياح حتى هيا امتحانات عاد اول سنة جامعة وعمو محمود قاللها لو تنجحي بتقدير كويس نوافق على الزواج يكون في الصيف هي ووسيم وجاء احمد وقالي غيري دبشك وتعالي في حد بيشوفك
انا ..من حمودي
احمد..غيري وتعالي
انا..رد بالك تقولي هشام
احمد..اي هشام انا نشوف فيه في الكلية قريب بنقتله لولا اني مواعدك مش نجيبه لهنا
انا..به
غيرت لبست فستان زمان كان مخصرني تو طالع عليا تقول شوال لونه ابيض ومخربش برصاصي ووردي وشديت شعري بمساكة لميته بس مرخية اللمة
وطلعت لاحمد خششني المربوعة وطلع سكر الباب
انا..السلام عليكم
يوسف ..وعليكم السلام
شفتها لما خششها احمد وسكر الباب وقعدت مصدوووم من شكلها كيف رايحة طالما تحبني وتتعذب على خاطري نين وصلت للشكل هذا ليش ماعطتنيش فرصة ثانية وسامحتني ليش يارب
انا
شفته في قلبي مشاعر واجد بس مافهمتش شنو هيا المشاعر هاذي كان مقمعز في نهاية المربوعة واضح انه ضاعف هلبة  واول مرة يمر عليا راجل ينقهر على مرا لدرجة انه يضعف هكي واللحية طاولة بس حلوة قاعدة
يوسف ..كيف حالك
انا..الحمدلله
يوسف ..ناقصة بكل رايحة جلد على عظم
انا..حتى انت ضاعف بس انا ناخذ في فيتامينات وان شاءالله حنرجع زي ماكنت
يوسف ..نحبك عبير
قالها بكل لهفة 
انا .. وحتى انا مازالت نصارع انا وحبك
يوسف ..باه سامحيني وارجعيلي دنيتي بلاك شينة
انا..السماح سامحتك من لما وصلتني ورقتي لكن نرجعلك مستحيل
يوسف ..عليش طالما مازالتي تحبيني
انا..مازالت نصارع يعني في جانب كرهك
يوسف ..لهدرجة قلبك قاسي
انا ..لهدرجة لان اهانتك كانت قوية وبالله مانبيش نفتح مواضيع نحاول ننساها
يوسف ..مافيش امل
قالها بكل حزن وانا كنت في حزن احرف منه لما نرد عليه لكن درت روحي عادية وقوية ومابينتش شئ
انا..لا مافيش امل لان لو في امل ماكنتش طلعت من حوشي اصلا وقعدت زعلانة فيه نين سامحتك  دور غيري وعيش حياتك لاني حتى انا بمجرد ننساك بالمزبوط بنعيش حياتي واكيد بندور على حب جديد
يوسف ..بس الحب للحبيب الاولي وانا حبك الاولي
انا..على حسب الحبيب الاولي
في حبيب اولي يخليك تعيش عمرك كله وانت تفكر فيه وفي حبيب اولي يخليك تفكر انك تنساه وماتبكيش على الاطلال وادور غيره وتحب وتعشق من جديد
يوسف ..انتي لي انتي ملكي
قالها بعصبية وبصوت عالي وقدم مني بس انا وخرت 
انا..وطي صوتك لو سمحت مانيش قطعة ارض تقول ملكي انا ملك نفسي وملك الناس اللي ربوني
يوسف ..اخر مرة نقولك والله نحبك
انا..يوسف خلاص انتهى الكلام اصلا انا مش بعيد نكمل اسبوع عدتي ونفتح قلبي من جديد للحب لاني مازالت صغيرة وبنعيش حياتي وبنعيش الحب من جديد وبنتزوج وبنجيب اطفال
يوسف باستهزاء .. كان جبتي
انا..شنو تقصد
يوسف ..مانقصد شئ لكن كان لقيتي راجل يتزوجك تعالي حاسبيني بعدين
انا..يوسف خلاص الكلام كمل وانت شكلك بتخلي الخاتمة بينا مش حلوة اطلع وربي يوفقك مع غيري وتلقى المرا اللي ماعندهاش ماضي بيش ماتشكش فيها وادمر حياتها وهي عروس
ومشيت فتحت الباب وانا انبه في روحي راك تبكي راك تبكي وطلع يوسف وطلع وراه احمد وبعد خشلي في المربوعة لقاني نبكي
انا..ليش يا احمد ادير فيا هكي انا شنو درت فيك
احمد..اسسسس نوارتي والله نبيك تعطي لروحك فرصة عشان ماتندميش
انا..مسحت دموعي مستحيل نندم
وطلعت وخشيت لداري رقدت بقفطاني حسيت روحي النوم كانه ملاذي من التفكير
احمد
خشيت عليها لقيتها راقدة بقفطانها غطيتها وطلعت وانا نخمم كيف اندير معاها وانا نشوف فيها كل مافيها للوراء رغم انها ادير في روحها عادي ومشن الايام وكملن  ايام عدتي وطبعا في ايام عدتي فتحي قرا فاتحة هنادي لكن البيان  اجلوه نين نكمل عدتي ونروق شوي لان يبي ايدرلها  بيان كبير واصالة حتى هيا الفرح مازال متاجل نين نكمل عدتي  على خاطر اصالة ولد عمها ويبي العرس بدون فاتحة كبيرة  وعبدالله قرا فاتحته على اخت هنادي لكن سند مادار شئ بحكم انه قريب واجد من احمد واحمد قلبه موجوع واجد عليا مباش يدير شئ نين نروق اني وتو بنبدا نصحصح لروحي ولاهلي ولاحبابي اللي وقفو حاجات واجد على خاطري وبعد حوالي اسبوع من بعد عدتي  نسمع في احمد وانا في داري ينادي
احمد..نوارة نوارتي
انا..نعم ياقلب نوارة
احمد ..هي وتي شنطتك
انوار ..بعيطة على وين ان شاءالله
احمد..تلفت لانوار كيف امنا ماقالتش ليك عمتي حواء
انوار ..لا شنو في
احمد..انا قلت ليها تقولك بيش توتي روحك ونوارتي اني اللي بنقولها لها
انا..شنو حمودي شوقتني
احمد..هي وتي روحك وانوار ومحمد وموسى وعمتي حواء وامي بنعدو لتركيا اسبوع نغيرو جو وانجو
انا ..والله صح حمودي
فرحت واجد لاني بجد محتاجة لهكي طلعة
انوار .. يسلمه يارب ونجيه شكلك المقاولة الاخيرة رست عليك
احمد..مازالت بس باتي وعمي عمر ساعدوني في تجهيز السفرة
انا..شديت ايد احمد ربي يحفظكم لي يارب
احمد..الطيارة بكرة في الليل هي كل وحدة توتي روحها
انا..به خليني نقولها للشلة  بيش كان عندهم حاجة بعد اسبوع يعني بعد انروح يبدو فيها ياسرهم تاجيل
احمد ..عين العقل
انا ..خطرت عليا فكرة لكن بسرعة مادمعت
احمد..نوارتي كنك عاد مش قلنا خلاص
طبعا انوار ركبت فوق لانها بتوتي دبشهم كلهم ومش بعيد تلقاني مادة وجهي نين هي توتيه ليا
انا ..حمودي تعال قمعز نبيك خطرت عليا حاجة بس بنشاورك عادي او لا
احمد ..
جينا وقمعزنا وكان اللي خاطر في بالي انها اي شئ تبيه حنوافقها عليه حتى لو مش راضي
احمد.. شنو نوارتي
انا..حمودي بما ان هنادي بدير فاتحة كبيرة لان فتحي مايبيهاش تحرم روحها من شئ وحتى هبة مرات فرحها حتى هو يكون الصيف واصالة فرحها مش حيطول 
احمد..به
انا..نبي ناخذ من فلوس مؤخري معاي لتركيا وبنشري قفطان فاتحة لهنادي وبناخذ قفاطين لهبة واصالة لان فاتحتهن صغيرة بيدروها بحكم العرس قريب وحتى كان في حاجة عجبتني بناخذ حاجة لسماح الباردة على خاطر سند وبناخذ لعبدالله
احمد.. هههههه ياعنجد سماح الباردة خزي عليك بتولي مرت خوك ومازالتي ماتحبيها
انا..هههه ماهو كان تخلي روحها عادية قدامنا والله نحبوها لكن من كثر ماعندهاش  ثقة معانا نين تحسها تتصنع
احمد..عاد انتن وين وهي وين مع انها والله حتى هيا حلوة ولازم تحبنها على خاطر سند
انا..والله مانكرهها لكن الحق باردة
احمد ..ههههه شوفي نوارتي المؤخر ليك يكتبو فيه الناس في عقد الزواج لانه حق المرا
انا..ماهو لانه هلبة  ولاني ماقعدتش مع يوسف هلبة نحس فيه كانه مش حقي
احمد ..لا حق ومش خسارة فيك وبعدين لاباتي ولاباتك  اللي حطوه المتاخر راه اللي حطه عمي علي بروحه لما جو بيقرو الفاتحة مع ان باتي وباتك قالوله واجد لان الراجل عمره مايمسكه موخر كان يبي يسيب مراته لكن عمي علي قاللهم انا هكي نبي وماتراجعونيش واما من ناحية ماقعدتيش مع يوسف واجد هذي ماليهاش دعوة بالمؤخر وبرضو حتى انتي قلتي ليوسف ماتبي شئ منه وحتى لما جو لمو دبشك انتي قلتي للبنات انهم يخلو الذهب واي حاجة جابها يوسف ليك حتى الدبش لكن هو جابلك كل حاجة صح فهمتي او لا هذا حقك واصرفي فيه كيف ماتبي
انا..به ريحتني الله يريحك
احمد..اجمعين يارب
انا..خليني انجيبلك الفلوس بيش بكرة تحولهن ليا بيش نلقاهن قدامي
احمد..حاضر نوضي جيبهم
انا
ركبت لدار ماما وقلبي يدق وبس لاني من يوم جتني ورقتي وفتحتها معاش جيت شورها بكل خشيت على ماما
السلام عليكم
ماما..وعليكم السلام
شنو جهزتي شنطتك
انا..لاشوي وننزل انوتيها ماما وين شنطتي
ماما ..فضيتها في خزنة باتك
انا..به افتحيها ليا نبي فلوس
ماما ..به بنيتي لكن شنو تبيهن
انا..بنشري بيهم حاجات لقروبي من تركيا حتى هما اجلو كل شئ على خاطري بناخذلهم هداية سمحة
ماما ..سلمها بنيتي اللي تفكر بعقل
انا..
فتحت ماما الخزنة واول ماجت عيني على العلبة اللي فيها سلسلة نبض وخطر عليا وقت جابها ليا طول لكن مادمعتش الحق وفرحت اني مادمعتش خذيت الفلوس ونزلت بيهن لاحمد وعطيتهن له وطلع احمد وانا وتيت شنطتي وخشت عليا انوار كملتها معاي