للقدر والنصيب كلمة اخرى

21

#للنصيب_والقدر_كلمة_اخرى

ح21
عليش معاش نقول سندنا
يوسف ..بصوت عالي ناقلت معاش تقولي
انا..ليش فهمني بيش نعرف لكن هكي نبطل انقولها مستحيل
يوسف ..انا المفروض بنكون سندك وظهرك وعزوتك وحاميك وحاطك في قلبي وعيوني
انا..تعرف يا يوسف وماتزعلش مني صح علاقة بابا وماما وعمو بعمتو غالية غير علاقات ناس واجد لكن كل راجل ومرا مهما يكون الراجل هو سندها وعزوتها لكن المرا بروحها تبي سند وعزوة قدام راجلها وانا بابا وعمو واحمد هذوم عزوتي وظهري المنسندة بيهن قدامك وهذي قناعتي مهما تكون طيب وحنون معاي وحاطني جو قلبك هما بيبقو عزوتي اللي بتحميني منك لما يجيك يوم وتظلمني
يوسف ..غلبتيني في هذي لكن ربي يقدرني ونحافظ عليك ولانظلمك ولانغلط فيك ولانخليك تحتاجي لعزوة بسببي انا ..امين يارب
يوسف ..هي سلام
انا ..سلامات
يوسف
سكرت منها وانا منحرج من العقل اللي عندها كان وحدة ثانية راه سمعتني محاظرة قبل ماتفهم ليش انا مانبيهاش تقول هكي
وانا قعدت نكمل في التشيز كيك
على مرواحة احمد وانوار
انوار ..تعرفي احمد جابلك حاجة جديدة عليك بكل وتهبل ومميزة
انا ..اي حاجة يجبها احمد اكيد تهبل شنو جبتو
احمد..جبتلك جمبسوت
انا ..اه معقولة من فستان لجمبسوت
احمد ..غير شوفيه وكان ماعجبكش انرده لاني شرطت عليه
انا ...طلعه احمد ومده ليا حولته من الكيس بتاعه وفتحت فمي كان حاجة ماتفهمي شئ من اناقته منطقة  البنطلون قماش وردي هادي وناعم والطرف من فوق كت وردي من نفس القماش وعليه كاب شيفون مرصع كله بفصوص لولي وردي هادي زي لون القماش وبسب الفصوص مش مبين شئ الكاب وجابلي معاه حذاء ابيض عالي بس علو واحد على خاطر ممنوع الكعب عليا وسير للشعر مرصع باللولي الابيض حاجة من الاخير
احمد ..نوارة شنو عجبك كان عجبك خشي البسيه ووريه لينا
انا ..قال عجبني انا ذبت فيه
انوار ..هيا قيسيه
انا ..به من كثر مافرحانة بيه خشيت لبسته وطلقت شعري ولبست سير الشعر ولبست الكندرة معاه وطلعت عليهم
ها شنو رايكم
احمد وانوار لاحياة لمن تنادي
انا..هييييي وين رحتو
احمد ..في الجمال اللي يمشي على الارض
انوار ..تهبلي تهبلي تهبلي طالعة احلى من القمر
انا ..حتى انا ذبت في روحي من كثر ماهو طالع عليا ومحليني
احمد ..لا نوراتي انتي اللي محليتيه هو تما حلو عشان لابستيه
انا نعرف انها حلوة وتخيلته عليها بيطلع حلو بس مش للدرجة هذي لدرجة حسيت بشعور اخيي لما تفكرت انها بتتزوج يوسف ولاول مرة نحس بشعور زي هذاواستغربت من روحي على الاحساس هذا
انا ..تسلم ياقلبي والحلو ان الكاب ساتر ايديا مش عريان
انوار ..من الاخير حتغطي على حلومة
احمد .. اكيد لاني عارفك ماتحبي العريان استني نسيت
انا..شنو
احمد ..جبتلك معاه داندين لولي واسوارة مسمار كارتيه وبناخذلك ساعة بيضاء انوار قالت لي عندك
انا ..نجيه يارب اللي مانسى شئ
انوار ..وراهن فضة راه
انا ..عليش حتى اكسسوار عادي
انوار ..قالك اكسسوار هو لو لقاهن ذهب ابيض راه جابهن لك غير مالقاش حاجة عجباته وانا اللي اقترحت عليه الفضة
انا ..لهدرجة حمودي
احمد ..حتى انتي نوارتي معقولة انلبسك اكسسوار انا الفضة ومش راضي عليها
انا ..تسلم ياقلبي والله حتى الفضة تهبل
وشكلي بنلبسه في خطبتي
احمد ..شنو هذا ماناقص
قلتها وطلعت من قلبي للحظة حسيت روحي اني مانبيش يوسف يوشفها كيف طالعة بيه قمة الجمال وانقدتني انوار لما تكلمت بيش قدرت نطلع رد يبرر كلمتي
انوار ..غريبة عجبك للدرجة هذي
انا ..اه يهبل ومطلعني حلوة واجد
احمد ..انك تلبسيه في خطبتك هذا اللي ناقص حتى لو عجبك تقول ماعندنا بيش نشرولك
انا ..ربي يخليكم لي كلكم
انوار وريني لبستك
انوار ..تشوفيني لابستها خير نعدي نلبس ونجيك
احمد ..شنو صار كملتي التشيز
سئلتها عليه بيش نهرب من الشعور اللي مسيطر عليا وخايف تحس عليا
انا ..اه كملته وتو حطيته في العلب بتاعته وبنخليه اربع ساعات بيش نقدر انزينه
احمد ..سلم دياتك وان شاءالله مش تعب على حوضك
انا ..تعبك راحة لا ماحسيت بشئ
ونزلت علينا انوار
انا ..طالعة تهبلي يا نانا مش عادي الفستان زي الاميرات
احمد ..طلعت عيني ولا اختارته
انوار ..ههههه المهم طلعت بيه
انا ..زي الاميرات مخليكي
كان فستان قصير تحت الركبة ومنفوخ ومن عند الخصر حزام ذهبي ولونه وردي داكن  وعليه كندرة بكعب عالي ذهبية ولابسة عليه سلسلة فيها اسمها جايبها لها عمو محمود وبروش ذهبي في شعرها اللي يخش في الشعر زي المشط وحاطة شعرها بالجنب طبعا انوار شعرها طويل لكن لنهاية ظهرها مش زيي في الطول وشعرها اسود مش فاتح زيي انا طالعة لبابا في لون الشعر وهيا لماما
احمد ..يهبل طالع عليك واكيد القالب غالب
ربي يحفظكن لي وانت طالعات زي الغزلة والله وانت راكبات معاي السيارة كان نلقى نغلفها كلها من كثر مايشبحو لكن
انا وانوار ...ههههههه
انا..وانا نقول احمد خيره السيارة الجديدة رواشنها معتمات
احمد ..اكيد لان الكروزر كل مانعتم الروشن يحولو فيهن لكن هذي في كتيبها نازال التعتيم مايقدرش حد يقولي فكه
انوار ..وانا نقول اليوم رفعتني بالكيا نش الكروزر مع ان نوارة مش معانا ماشية
احمد ..اكيد من يوم ورايح الطلوع بهذي بس لما تكونن معاي
انوار ..انا جعانة
احمد ..حتى انا جيعان بكل
انا ..خسى الجوع هيا نوضو نحطلكم من بدري طيبت
احمد ..الله شنو درتي
انا ..طاجين دجاج في الكوشة ومعاه بيتزا
انوار ..تعب عليك هكي
انا ..اي تعب ساد متعبتكم ادورولي في السوق ونخليكم من غير عشاء خصوصا بابا وعمو متعشين برا وماما وعمتو متعشيين اكيد عند عمتي عزيزة
وبعدين البيتزا في الفريز واتية طلعتها حطيت عليها الزيتون والجبنة بس
احمد ..نعني مانفقدك
انا ..هيا نوضو غيرو مابين انا غيرت لبستي وعلقتها وسخنت لكم العشاء تكون انوار غيرت وعلقت دبشها وانت دوشت
انا
خشيت غيرت دبشي وفرحانة واجد بيه لاني انحب الحاجة المميزة وقلت اكيد كلهم حنلاقاهم لابسين فساتين ونطلع انا متغيرة عليهن وسرح عقلي شوي وانا نحط في الجبنة على البيتزا قديش ماتفهم عليا يا احمد ودارس تفكيري ان شاءالله يوسف يطلع زيك يارب على جية انوار
انوار ...هيييي وين رايحة انا من بدري انادي خلاص البيتزا غرقت جبنة
انا ..سرحت شوي
انوار ..اكيد الوضع اللي انتي فيه يقول انك سرحانة لكن في شنو
انا..في احمد قديش يفهم عليا وقديش دارس دماغي وقديش يفهم علي مرات من قبل مانحكي وتمنيت يوسف يطلع حتى ربعه
انوار .. وانتي ليش عمرك مافكرتي في احمد مع انه ديمة احداك
انا ..انتي فيش اتقولي
انوار ..انا نقول في اللي كنا نتمنوه انا وماما وبابا وامي وباتي ومافيش حد قدر يقولها لك لما لاقوك تبي يوسف وزادو سكتو لما احمد هو اللي فاتحهم في الموضوع 
انا ..عيطت انوااااار اسكتي
عيطت عليها بيش تسكت كانها نوضت فيا حاجة كانت راقدة كانها نوضت فيا فكرة ديمة انباعد فيها على دماغي على خشت احمد وارتبكت وخشيت للحمام بيش مايفطنش عليا
احمد ..اني جيت وين العشاء
انا سمعت الحديث اللي دار بين انوار ونوارتي وكلام انوار صدمني لاني حتى انا ليش خليتها تمشي بعيد عليا ليش نخليها تمشي لشخص ثاني وانا عشان بس شفتها بلبسة تهبل غرت من يوسف امنا بعدين وهيا بتلبس ليه اشكال والوان بتلبس ليه على العريان وانا عمري ماشفتها بيه بيشوف فيها حاجات انا مانقدرش انشوفهن فيها وغير انه بينوض ويرقد وهيا بجنبه التفكير هذا خلاني نحس في روحي ابصر كيف
انوار ..حمودي وين رحت
احمد ..قاعد وين نوارة
نوارة ..اني هنا اهو دقيقة بس ونطلع الطاجين ونتبل السلاطة
تعشينا وتقريبا العشاء كمل ونحن ساكتين وكل واحد يفكر وسارح في تفكيره نين قطاعته انوار
انوار ..هييي وين رايحين خيركم تو شنو جد عليكم
انا..خيرك شنو فيه
انوار ..ساكتين تقول في اجتماع
احمد..ههههه والله الاجتماع اللي نحكوه فيه مانحكوه في زردة
انا..جد تحكي نسحاب الاجتماعات هادية
احمد ..تو اتخرجي وتجي تحضري معاي اجتماع وتشوفي بعيونك
انا ..صحة صحة خلوني نغسل الماعين
احمد ..لا تو نغسلهن نا
انوار ..تو نغسلهن عليك انتي عدي كملي التشيز كيك
انا..بطل انت وياهها تو نغسلهن نا شن هنا واعرات بنحول النعمة وبنحطهن في الغسالة
احمد ..ماهو هذا ليش فردت عضلاتي
انا ..به هيا يا سيدي
انوار ..وانا بنوض نوتي شنطتي وتو نوتيلك معاي نوارة
انا..به حبيبة
انوار ..حمودي نوتيلك شنطتك حتى انت بتاعت الزردة
احمد ..ااااايه ايش الكرم هذا اليوم نانا
انوار ..خزي عليكم كان درت حاجة تركبو عليا وكان مادرتش تركبو عليا
انا..بس غريب الكرم هذا جديد عليك
انوار ..ماهو بنقعد مرا عاد نبي نتعود على المسؤلية
انا واحمد .. هههههه
احمد ..صار بتقعدي مرا وجاء وضمها احلى مرا واغلى مرا سلمها يارب
انوار.. ربي يخليك ليا
انا ..هيا يا احمد معاش نخلصو من انوار
عدي نانا وتي الشناطي ولبستي ماتحطيهاش مع الدبش
انوار ..عليش
انا ..على خاطر يوم الصالة بنلبس في الحوش بيش انديره لهن مفاجاءة
انوار ..به
طلعت انوار وانا قعدت انجهز لطبقة زينة التشيز كيك واحمد حط الماعين في الغسالة بعد مانظفهن ومسح الطاولة وقمعز احداي وانا قررت ننسى كلام انوار وبنفوت الموضوع بكل
انا..حمودي مش كان تعدي اتمدد لان اكيد بكرة بتحرك واجد وافطن لروحك ودير بالك على روحك
احمد ..اكيد من غير  ماتوصي غير بنقعد حداك شوي نين ياخذني النوم
انا ..به
وقعدت نجهز في الزينة بتاعت الاريو والكراميل والفراولة والشوكلا
احمد..قديش طرف درتي
انا..والله ماعديت لكن تقريبا بين 45/50
احمد..واجد يانوارتي
انا ..عادي حمودي بنحول منه طروف لبابا وعمو وعمتو وماما وموسى ومحمد وانوار
احمد..اه باه
انا..تعرف يا حمودي فيش نفكر
احمد..شنو
انا ..اني نفتح مشروع للتشيز كيك او بمعنى اصح للكيكات انا نعشق شغلهن والحمدلله مافي حد ذاق شغل ايديا الا ماعجبه
احمد ..مشروع حلو بس انتي مش مستحقة ليه نوارتي
انا..القصة مش فلوس لان كان نبي فلوس انت قاعد فيش ادير
احمد ..ههه هذا اللي نحكي فيه وانا عيني حية ماتستحقي لواحد
انا..تسلم ياقلبي
لكن الحكاية استقلال وتحس روحك انك ادير في حاجة ولك كيان واني مش عايشة زي الحيوانات ناكل ونشرب ونرقد
احمد ..حشاك نوارتي
انا.. وبعدين ننشغل في حاجة حلوة ونحب انديرها
احمد ..وانا معاك بس فكرتي كيف ووين تبدي
انا ..اه فكرت لكن مازالت الفكرة ماكملت في دماغي تكمل بس ونقولك عليها
احمد ..تمام نوارتي خلاص انا بنوض بنرقد اليوم نايض بدري
انا ..عدي ياقلبي وتعبناك اليوم معانا
احمد ..معاش تقولي هكي احسن لك
انا..به خلاص هي تصبح على خير