للقدر والنصيب كلمة اخرى

28

#للنصيب_والقدر_كلمة_اخرى

ح28
ونضت الصبح على صوت هرجة
طلعت عليهم وانا ببيجامة النوم وطول جاني احمد يجري وخششني للدار ودفني وقالي غيري دبشك الشباب برا
طبعا وجهي طاح
احمد..ماشافك حد
انا..اه الحمدلله
احمد
انا قبل نشوف فيها ببيجامات النوم عادي ومع ان ديمة بيجامتها مستورات الا اني المرة هذي نحس فيها غير ليش مش عارف كل حاجة شعور غريب نحس بيه اه ياربي الصبر يارب 
انا ..غيرت دبشي وغسلت وجهي وتوضيت وصليت وطلعت عليهم
وين الهرجة هذي حتى وانتم مرتبين وموتين كل شئ لازم منها الهرجة الليبي ليبي مهما دار
سند .. الناس تقول صباح الخير
انا..هرجتكم نوضتني من سابع نومة وتبوني نصبح عليكم.  امشي مانيش مصبحة
عبدالله ..عادي عادي عروس وادللي اليوم
انا..انحرجت
هبة .. هيا الفطور واتي
انا..دايرين الهرجة هذي ومعاها مش فاطرين في حياشانكم
هشام ..اخس يابخيلة
ماما ..لما تبدا توكل فيكم  من رزقها عدلو على كلامها طالما عمك عمر ونا حية ماتفكرو  فيها بكل وتعالو جواعة امتى ماتبو
سند ..ماهو تسحاب روحها كان بتعدي نحن معاش بنجو
احمد..تسحابكم تجو على خاطرها ماهو 
عبدالله .. ربي يحفظك ياعمتي دايرة لينا قيمة من يومك ويحفظ عمي عمر 
ماما..حتى انتم مغير تسلمو
محمد..ونحن ياماما
ماما..انت ووخيك الخير والبركة
موسى ..واحمد
ماماجت واضبطت احمد... لا عاد احمد بروحه مايجي في غلاه ولا مكانه حد
انوار ..راحت علينا يانوارة
انا.. اسكتي احسن نحن عند ماما مع احمد خسرانين
هيا تفضلو افطرو
طبعا عدى الفطور يهبل و اصالة  وهنادي  وماما وعمتو غالية وانوار وهبة مامعقبين جهد وملتمين كلنا وجاء حتى بابا وعمو محمود فطرو معانا وبصارة الشباب ما ليهاش حل وكملناه كله ضحك لدرجة حتى فوني  ماشفته ولاكأن ورانا حاجة خواطر رايقة مع ان ماما وعمتو غالية حاسة كأن  فيهن حاجة بس مش عارفة شنو ومشى الجو للساعة 11 ونحن على طاولة الفطور لكن بابا وعمو طلعو قبل الوقت هذا  وناضن البنات وانا ماخلوني اندير شئ وخشيت للدار تمددت ودق عليا احمد
احمد ..نوارة
انا .. نعم حمودي خش وعدلت قمعيزتي لاني مش متغطية
احمد ..نوارتي ليش ماتبيش تمشي للكوافيرة الفستان وخليتيني انا اللي نختاره لك والحنة قلتي مانكش محنية لكن حتى كوافيرة ليش ماتبيش تمشي تقول غاصبينك عليه
انا..لا والله مش هكي حمودي اولا الفستان انا عطيتك المواصفات بيش تجيبه ليا انت وانت جبته ليا زي ما انا نبي واحلى اخرا والحنة لان الحق نبي نطلع مميزة في العرس وانا من النوع الحنة اطول في ايدي ماتحول ولكن درت عبود من داخل اه شوفه
احمد..ياعنجد عبووووود ياعزوز
انا..والله احلى من هكي لان ماما وعمتو غصبو عليا هلبة فراضيتهم وحنيت من داخل بس
احمد .. به والكوافيرة
انا..الكوافيرة كان بنمشيلها بتسكر راسها على المكياج الثقيل والاوفر بحكم انها تلبيسة وفاتحة مقرية وانا زي ماقلت ليك على خاطر الحنة نبي في التلبيسة بسيطة بيش في العرس نطلع واو
فبندير شعري فلو ورفعة بسيطة والمكياج بسيط لاني نبي نطلع زي الاميرات وفي فرحي زي الملكات
احمد.. باهي اللي تشوفيه غير امي وعمتي حواء مبنش يقتنعن يسحابن انصر شنو صارلك
انا..انت اقتنعت صح
احمد..اكيد لانك انتي ماتعرفيش تكذبي
انا..تمام معناها حيقتنعن
حمودي راه انت بتجيبلي الفيلو
احمد..واذا ماجبته لك لمن بنجيبه
انا.. بس بتاخذ حقه انت مادخلنيش لانهم هما  بيدفعو حقه
احمد..اكيد ناخذه ولايهمك
انا..ربي يخليه ليا اللي يسمع في الكلام
احمد ..به انخليك بيش بعدين تبدي رايقة واه على فكرة حجزت مصورة تجيك تصورك هنا بدل شحورة الاستوديو 
انا..تمام بكل والله تقول في بالي
احمد.. عارفك انا وعارف اللي تبيه رباية ايدي انا
وطلع احمد وقعدت نفكر في الكلام اللي نقول فيه لكن نحس في قلبي حاجة مش تمام ومش عارفة شنو هيا ورن عليا يوسف
يوسف ..اهلين بمراتي الحلوة
انا ..اهلين بيك
يوسف ..وين قاعدة
انا..في الحوش
يوسف ..امنا امتى بتطلعك الكوافيرة اذا مامشيتي لتو
انا..مانيش ماشية لكوافيرة وحكيت ليه الكلام اللي قلته لاحمد
يوسف ..انتي بتطلعي قمر في جميع الاحوال
انا..تسلم ياحبي
يوسف.. شنو شنو شنو قلتي عاودي
انا..تسلم
يوسف ..تسلم ياشنو
انا..ياحبي
يوسف ..الله قديش طالعة منك تهبل
انا..معناها ديمة بنقولها لك ولايهمك ياحبي
يوسف ..اه ياقلبي
انا..خلاص ياحبي خليني بنبدا في روحي هبة تنادي فيا
يوسف ..خلاص حبيبي عدي هيا
وانا طلعت على هبة
خيرك نفختي راسي
هبة ..هداك هو كان بتبدي
انا..به تو نكلم انوار اديرلي شعري
اصالة  ..لا خليها انوار تو انديره لك كيف تبيه زي مادرتي في عرس احلام ولا يوم عزومتها
انا..نبيه فلو زي عزومتها
اصالة  ..تمام هي
دراتلي اصالة شعري زي مانبي وهبة حطلتي مكياج خفيف رسمت عيني بخط رقيق وكحلت عيني بقلم اخضر ومسكرا وبودرة واحمر خدود خفيف لانها عارفة تو نخش في روحي ويزيدو خدودي ينحمرو وخلاص قرب المغرب طلعت الفستان طبعا الفستان ماحد شافه الااحمد بس وحتى لما شراه حطه في داره بعد قسته بدون مايعلم حد وكان الفستان طويل وشكله زي الحوتة ضابط على الجسم وواسع من تحت بكل وظهره عريان كله بشكل بيضاوي ومشكل بخيوط من نفس الفستان  وكمامه طوال
وقماشه مرشوشة كلها تلمع بلمعة فضية وخذيت عليه تاج بسيط وانيق فضي واخراص ذهب ابيض طوال شوي واسوارة بسيطة في ايدي معاها خاتم من نفس لقطة الاسوارة  وحذاء عالي علو واحد لونه فضي  وطريقة شعري تغطي على فتحة الظهر طبعا الحوش معبي بصحباتي واهلهن واهل الاولاد وعمتو غالية وماما وماعندناش اقراب بالدم الا عم بعيد لبابا كلمنهم بس وطلعت عليهم وتفاجو بيا كيف طلعت
هبة ..سلمها يارب ونجيها ملاك يارب
ماما وعمتو غالية ..بسم الله ماشاءالله
انوار ..ياروحي ياوخيتي كيف طالعة تهبلي
وكلمات مديح واجدة طبعا وانا رنيت على احمد لان عندي رايهم كوم واحمد كوم ثاني
احمد..نعم نوارتي تبي حاجة
انا..انت وين
احمد ..قدام الحوش
انا ..به خش للمربوعة
احمد ..صبايا شن خششني جوا
انا..نبيك والمربوعة فاضية سكرت حتى الباب الفاصل هيا تعال وانا كنت نستنى فيه في المربوعة اصلا خش احمد واول مارفع نظره شوري فتح فمه
انا..شنو رايك
احمد..زي العادة تاخذي العقل بسم الله ماشاءالله لما تخشي خليهن يرقوك  فاهمة
انا..كلهم عجبهم  لكن انت عارف رايك بروحه عندي
احمد ..والله ملاك يمشي على الارض واللون ماتخيلته يطلع عليك هكي لانك لما قستيه ماوريتيشي ليا ولانه مش من الوانك المفضلة فاستغربت لكن من الاخير لازم تجربي الوان غير الوردي ودرجاته او القهوي بدرجاته وعاكس على عيونك مبينهن تقول خضر وهنا عسليات
انا..ان شاءالله بعد غامرت المغامرة هذي اكيد بنبدا انجرب الوان ثانية
احمد..هي بنطلع قريب يجو الناس وردي بالك على روحك وارقي روحك نفس الايات تحفظي فيهن لمحمد اقريهن لروحك فاهمة
انا..حاضر اصلا عليا الوضوء
احمد..تمام خشي هيا
كنت نحاول نطلع بسرعة قلبي يدق لدرجة تخيلتها تسمع فيه مش قادر جمالها ماينفهمش نا وين كنت اعمى نين مديت وجهي وجاء غيري خذها  تميت نبي نطلع بسرعة خايف نشدها ونقوللها سيبيه نا نبيك نا نحبك وانقهرت وقطع تفكيري صوت سيارتهم جيات يبيبن
انا
قمعزت على الصالون وقلبي حفلة العاب نارية جوا من التوتر وخشت امه عمتي سميحة وخواتها الثلاثة ومرت بوه عمتي عازة وامال اخته الوحيدة وبنات عمهم اثنين ومجموعة من بنات الخالات والعمات وخشو بسوابيت
الحق رقتلي انا قلت مانبي شئ عليش متعبين اروحاهم بما ان العرس قريب قربت مني امال وكانها فهمت اللي يدور في دماغي
امال..عبورة ماتضايقيش يوسف ماشوره شئ هذين حكم باتي قال والله مانكم متحركين من غير ماتاخذو لها كسوة بيانها زيها زي اللي قبلها يقصد خطيبة عبدالسلام واخرى قال لازم يكون احسن حاجة على خاطر بوها وعلى خاطر عمو محمود
انا..به ربي يحفظه لكن انا والله ما اعتراضي لحاجة الا انه الفرح قريب
امال ..مايغلى عليك شئ لان كلنا فرحانين ليوسف وماصدقناه فتح قلبه للزواج بعد ماكان قافل عليه
انا ..ربي يخليكم له
وعدت امال وبدو  البنات في الضيافة وطبعا سلم وخياتي ماقصرن ربي عطاني وخية من بابا وماما لكن زاد كرمه عليا بهالصحابات اللي مافي زيهن
وشوي وقالو يوسف بيخش وانا قلبي قعد يضرب ضرب بندير جوا والتوتر على اخره لكن خش عليا طرف ماتفهمي شئ عيون خضر واسعة بشرة قمحية تهبل ولحية مرسومة مش سودا لونها زي لون شعره عسلي داكن وطول وعرض طبعا انا نجي عند صدره هذا ليش يشوف فيا قصيرة بس انا طولي معقول ولابس بدلة بنية داكنة لكن طالع ماتفهمي شئ انا سرحت فيه نين جاء لعندي وسلم عليا وباس راسي وايدي لاني منبهة عليه مايفكرش يبوس خذي انا ذبت وقريب اغمى عليا ريحة العطر ساحرة واذكرت يوم اللي بنطيح شدني وطبعا البنات قلبنها عياطات وقمعزنا
يوسف ..وين حبيبي عندك حق مامشيتي للكوافيرة هذي تبي تطلعي عادية بيش في العرس بتكوني مميزة ياربي انا هكي نشوف فيك قمر يمشي على الارض معناها يوم الفرح شنو بتطلعي واللون يجنن عليك طالع
انا ..قريب نحفر  الصالون ونخش فيه وفجاءة مسك ايدي وبكل حنية
يوسف ..انحبك انحبك انحبك
انا..بصوت واطي نمووووووت فيك
وجتنا عمتي سميحة هيا لبسها الذهب
لبسني يوسف الدبلة طبعا انا اللي اخترتها الحاجة الوحيدة طبعا اللي اخترتها وهما جايبين طاقم ذهب يهبل رقيق وحلو مش عادي واسوارة ومعاها خاتمها حتى هيا ذهب وانصدمت انا من الذهب بندوي ليوسف عمتي سميحة طول قالتلي
عمتي سميحة ..ماتقولي شئ يابنيتي لو نجيبولك كنوز الدنيا شوي فيك يكفي ان يوسف فك عقدت الزواج على ايديك والطاقم راه من عمك علي والاسوارة والخاتم مني
انا..بحشم صحيتي عميمة
عمتي سميحة ..يوسف هيا طلع هديتك
انا..شنو اخرا
يوسف ..لاهدي شوري معقولة حبيبتي ونبض قلبي مانجيب ليها شئ مني الا دبلة بس
انا..بس هكي واجد ياحبي
رفع يوسف عيونه فيا على الكلمة وقالي
يوسف ..والله مهما نجيب مايجن شئ قدام الكلمة اللي سمعتها تو
طلع من جيبه علبة في سلسال بشكل نبض واسوارته وعجبني واجد لانه بسيط وانا نحب اللي هكي ولبسهن لي وطبعا تمت حوسة الذهب الاصفر على الذهب الابيض طبعا جتنا هبة وضحكت على منظري وقالت المصورة جت وطلعنا للصالة حولت حوسة الذهب في الاول صورة بلي لبسته من الاول بزيادة الدبلة بس وخذت لنا صور حلوات وبعدها قالولي نغير نلبس فستان هما جايبنه ليا خشيت وغيرت لقيت داري طبعا معبية بالسوابيت
هبة ..ماشاءالله امنا في العرس شنو بيجيبو غير الفستان بدلتين وحدة قصيرة وطويلة وكاب يهبل وسبات مستلزمات ومكياج وسبات ملابس داخلية واوراب وتوت وكل حاجة بكندرتها وشنطتها حتى من التوت معاهن احذية فرش
ولبست الفستان وحتى هو حلو وكان بودري داكن درجته حلوة ومبوج وطوله محير وكم للمرفق وقماشه كله دانتيل ناعم وحلو وفيه حزام ذهبي رقيق ولبست الطاقم اللي جايبينه والاسوارة والخاتم وحولت التاج ولبست طوق ورد جايبنه مع الفستان وكندرة ذهبية بشنطتها وطلعت عليهم ونادو على يوسف وصورنا وبعدين صورنا مع العيلة وطول مانحن نصورو يوسف ماسكت بكل وانا بديت نفك شوي من الحشم لانه في الاخير راجلي وقبل مايروحو اهل يوسف نادو عليا يبيني يوسف فضولنا المربوعة وخشيت عليه جاني وباسني على خدودي وانا وليت حمرا زي الطماطم وطلع وروحو اهل يوسف بعد مادارو جو يهبل هما والبنات وقعدت معاهم وخش عليا احمد وطبعا ناديت احمد صور معانا. لكن حسيته زي المضايق
انا..بصوت واطي خيرك حمودي جوك شكله مش تمام
احمد..غير شكلي مش راقد بس ونخمم فيك بتفارقيني قريب
انا ..اي فراق تحكي عليه انا معاك عمري كله للموت
احمد ..في خاطري ياريت لكن كيف وانتي مالكك راجل غيري
انا ..حمودي نغير دبشي ونطلع من جو العروس ونجيك
احمد ..به حتى انا بنركب نغير دبشي