للقدر والنصيب كلمة اخرى

77

#للنصيب_والقدر_كلمة_اخرى

ح77
وخذيت فوني لقيت فيه رسالة فتحتها وبصدمة صبيت
هبة .. كنك ياعبورة
انا........ احمد نبي احمد
وجيت بنمشي طحت لان رجليا مازالن متعقدات
هنادي .. اهدي تو اناديه اهدي بس
انوار اطلعي كلمي احمد بسرعة
وطلعت انوار لاحمد
انوار .. احمد تعال شوف نوارة خيرها
احمد.. كيف خيرها وجاء يجري لقاني طايحة والبنات ينوضن فيا
احمد.. كنها نوارتي
انا.. تعال شوف يا احمد تعال شوف
احمد .. شنو
سندني وقمعزني على الصالون
انا وريته الرسالة مكتوب فيها ( عمرك ماحتكوني سعيدة مش حنقرب شعرة منك ولا منه لكن حتنسي الفرح في حياتك معاه )
انا .. قريت يا احمد انا ياربي شنو دايرة في عمري عشان يصير فينا هكي
احمد ... حضني اهدي ياقلبي اهدي والله ماواحد يقدر يقربك او يفرق بينا وسيورني نلقاه
وخذا احمد الفون وطلع بعد ماهديت
هبة .. هاكي ياعبير هذي حبة مهدي تريحك شوي
خذيتها وقعدت نتفرج عليهم وهنا يحكن ويبن يغيرن جو ليا لكن انا نفكر في من بيخرب حياتي هكي وحاسدني على السعادة اللي انا فيها وكان السبب في حرماني من جنيني
انا... اصالة وسماح وخالدة ياسركن روحن لعيالكن حرام عليكن
اصالة .. تلزي فينا
انا.. لا ياروحي والله واجعيني عيالكن اكيد يبو يرضعو
سماح .. حاضر عبورة تو نروحو غير نطمنو عليك بس
هبة .. اطمنو انا معاها مش حنسيبها وبايتة هنا
انا.. لاحبيبة شنو ذنب راجلك يرقد بلاك والله اكيد بعد حبة المهدئ تو نرقد
وفعلا روحن البنات وعيت خالي باتو هنا لان ماما مقدرتش تروح وانوار حتى هيا وشوي لقيت روحي راقدة وجاء احمد بعد الفجر رفعني لحوشنا وضمني ورقد والحمدلله حبة المهدئ قوية رقدت بدون مانشوف كوابيس
ونضت الظهر لقيت روحي بين احضان احمد زدت حضنته زين 
احمد بالنوم ... نوارتي اللهم اني صايم
انا.. ههههه نسيت وهمست في وذنه
ببنوض حبيبي نتوضى ونصلي وبننزل لتحت ونخليك راقد
احمد.. به حبيبي غير خليني في حالي بس ومعاه تهمسي اللهم اني صايم
وجيت بننزل من على السرير انطيح من طولي قفزلي احمد
احمد .. كنك نوارتي
انا بعبرتي .. ماقدرتش نوقف على رجليا
احمد بخوف ... هدي بس ترا اوقفي
حاوالت نوقف طحت اخرى
احمد.. استني شوي
طلع احمد لبسة ليه ولبسة ليا ورفعني للحمام وحطني على الحوض بيغسلي وجهي
انا .. حبيبي خليني نتوضئ بنصلي قبل
احمد ... به وساعدني في الوضوء وخش هو توضئ وصليت وراه مقمعزة وانا بدموعي
وغيرلي دبشي ومشطلي شعري وظفره وغير دبشه ونزلني وانا في حضنه وبنطلعو من الباب الثاني يطلع المفتاح في السيارة والسيارة في الورشة ونسى اصلا اللي صاير في السيارة ردينا نزلنا من الباب اللي داخل الحوش ولاقتنا ماما
ماما .. خيرك بنيتي خيرها يا احمد
احمد  حطني على الكنبة بيكلم بوه بياخذ مفتاح سيارته
احمد.. عمتي شئ غير ماقدرتش توقف على رجليها بنرفعها نعاينها
ماما .. ياروحي يابنيتي
انا .. ماما مافيا شئ هدي بالك
على طلعة عمو وعمتو ومرت خالي وغزلان وانوار
انا.. والله مافيا حاجة اكيد مازالت قاعدة رعشة امس غير احمد يبي يطمن بس
احمد .. هيا نوارتي السيارة سخنت
عمو ..استنو  نمشي معاكم
واحمد حس المقصود بكلام عمو
احمد بضيق .. لا يا باتي مازالت قادر نحمي مراتي وطبني وطلع
انا.. حمودي عمو مش هكي قصده
احمد.. والله هكي قصده خليني فيك تو
ومشينا للمصحة وجابلوي كرسي متحرك ماباش احمد يحطني فيه وقعد رافعني في حضنه  وبعد الفحص والصور
الدكتور .. اطمنو المشكلة بسيطة
احمد.. اذا بسيطة ليش ماقدرتش توقف
الدكتور .. هيا صايرة ليها حاجة مسببة ليها ازمة
احمد.. امبارح تعرضنا لضرب بالرصاص
الدكتور .. اذا عرف السبب ماتخافوش هيا فترة بس وحتوقفي عادي بس مش تقضيها قمعيز استعيني بقيلات او حد تنسندي عليه وتمشي على الاقل كل اربع ساعات  تمشي  ربع ساعة او اكثر على حسب استطاعتك
احمد.. تمام يادكتور شكرا ليك
الدكتور .. هذا واجبنا
وطلعنا واحمد رافعني ونبكي
احمد.. كنك حبيبي
انا.. بنرجع للقيلات
احمد.. من قال وانا فيش اندير
انا.. ربي يخليك لي وحسبي الله ونعم الوكيل في اللي كان السبب
احمد.. ربي ماينسى حد
وركبنا السيارة
انا .. حبيبي ماعرفتش منو اللي بعتلي الرسالة
احمد .. مقفل يعطي
انا.. اصلا مستحيل بيخليه مفتوح
ووصلنا للحوش ورفعني احمد وحطني في دار المعيشة وطمنهم عليا
انوار .. ياروحي وين ماقلنا الدنيا زهت ليك وكل مرة صايرتلك حاجة
انا .. الحمدلله على كل حال نانا كلمي احمد يجبلي غيار
احمد.. ههه اهو جبته لك هيا نغيرلك
انوار .. خليها حمودي تو نبدللها
احمد.. لا نوارتي قطعة مني انا مسؤل عليها
انوار .. بتبدللها هنا
احمد.. اه انتي اطلعي اوقفي على الباب نين نكمللها
انا.. عيني عينك
احمد .. مانحس في حد وغيرلي دبشي وانا على حضن الصبح  وانقول اللهم صايم وتو نغيرلك في دبشك استغفر الله العظيم
انا.. ههههه
احمد .. تضحكي وانا نار والعة فيا
انا.. اللهم انك صايم
احمد.. حسابك بعد المغرب
انا .. به جيبلي المصحف وملاية الصلاة خليني نقرا الجزء اليومي 
انوار .. مازال
احمد .. كملت
وخشت انوار وطلع احمد
انوار .. هذا كله تغير دبش كان مش رمضان راه قلت اديرو في حاجة ثانية
انا.. هههه صايعة
انوار .. من اللي يشوفكم مايقعد صايع
انا.. وين غزلان
انوار .. مع ماما وعمتو ومرت خالي في المطبخ
انا .. به خليني نقرا
وقعدت نقرا ونبكي ونبكي صاعبة عليا روحي واجد وشوي اذن المغرب وفطرنا وبعد الفطور والصلاة طلعني احمد للجنان وقعد يمشي فيا ونهدرزو وجونا نوعا ما يعتبر حلو وشوي فطنت باحمد طبني في حضنه
احمد.. تو بنطفي ناري
انا.. توقعتك نسيت
احمد.. ناري لما تولع صعب تطفى  الا  بيك
وركبنا لحوشنا وقضينا وقت حلو ودخلني دوشت ولبسني دبشي ونزلني لتحت لان البنات على جية
احمد.. حبيبي بنجهز ندوش ونمشي للتروايح
انا.. ربي معاك ودير بالك على روحك
احمد .. ان شاءالله
وقمعزني على الصالون وركب لحوشنا وجتني غزلان
انا.. معليش بسببي ليك يومين ماطلعتي قضيتي حاجتك
غزلان .. عادي ولايهمك المهم انكم بخير
انا وباستغراب لان غزلان عمرها ماكانت مؤدبة هكي
انا.. تسلمي يارب
غزلان .. تعرفي عبير قديش نتمنى زياد يكون يحبني ربع اللي يحبك بيه احمد
كيف خايف عليك وكيف مهتم بيك وكيف روحه معلقة بيك
انا.. مستحيل زياد يحبك ربع احمد ليا
غزلان باستغراب .. ليش
انا .. ههههه لان زياد عمره ماكان احمد
وعلى العموم ربي يهنيك يارب وتلقي زياد خير حتى من احمد
غزلان .. امين يارب
وجن البنات وجو عبودي وسما وارين وفرحت بيهم واجد اكثر من هلهم
هبة .. مش عارفة بكرة تقدرو تجو او لا
انوار .. ايه جايين ان شاءالله لان امبدري باتي مشى للمزرعة جاب الخروف ورفعه لعمي خليفة
هبة .. اكيد باتي دار قصة
انوار .. لكن باتي عرف يقنعه
هنادي .. معناها بنتلاقو غادي بكرة باذن الله
انوار .. لكن ماما ماضنيش تجي لانها بتطلع مع غزلان ومرت خالي للسوق لانهن لازم يروحو قبل العيد
انا.. تمام ياسر انهم يومين معطلين مادارو شئ بسبب اللي صارلنا
غزلان .. عادي عبورة معاش ادوري شئ تو نلحق نجيب حاجاتي كلها
البنات طبعا مستغربات التغير اللي صاير لغزلان
غزلان .. هههه اكيد كلكم اتقولو شنو التغيير اللي صارلي
اصالة .. فعلا
غزلان .. لاني حبيت بس وعرفت شنو الحب
خالدة .. ربي يدوم عليك
غزلان .. امين
هبة .. لكن امي تو تزعل
انا.. اعذريها حبيبة وتو هيا تكلم عمتي فاطمة وتفهمها
انوار .. هيا تفضلو اليوم انتن قاعدات زي العرايس وانا انضيف فيكن
هنادي .. مرة من عمرك
انوار .. تدللن انتن
وقعدن نهدرزو ومشى على الوقت قريب اربع ساعات
هبة .. هيا حبيبة نوضي نساعدك تتمشي
انا .. لا حبيبة انتي حامل جيبلي القيلات من عمتو
على خشت احمد
احمد.. عليش انا جاي على خاطر نمشيك
انا مادة ايديا بيش ياخذني لحضنه.. ربي يخليك ليا يارب
وعلى ضحك البنات وتعليقاتهن 
ورفعني احمد وقعد يمشي فيا وسند وبابا وعمو قاعدين في الجنان على الجلسة اللي برا
انا.. حبيبي كمل بيا للجنان الخلفي
احمد.. كنك نوارتي
انا.. كلهم يشبحو ليا ومركزين معاي
احمد .. نجي الحشومي يارب
ومشى بيا احمد للجنان الخلفي وقعد يمشي بيا النص ساعة ولما رن المؤقت اللي دايره احمد
احمد... حبيبي شنو تو تمام
انا.. تماا وخذاني ببوسة طويلة كلها حب وعشق حتى انفاسي راحت وبعد عليا وهو بنفس يرقى وينزل وقاعد حاضني بايديه لانه عارفني بنطيح كان يطلقني
احمد بصوت متقطع .. نحبك يا اغلى حاجة عندي ياروحي انت
انا.. وانت روحي ونبض قلبي
وطبني احمد عشان يرفعني للحوش لانه عارف مستحيل اني نقدر نتمشى حتى خطوتين وانا رجليا سليمة لابال تو
احمد.. نحطك في الحوش لاني شويا ثانية نرفعك لفوق
انا.. به حبيبي لان البنات قاعدات
وحطني احمد على الصالون وطلع
البنات بصوت واحد فيش كنتو اديرو
انا.. يعني فيش كنا انديرو
هبة .. قالك شئ انا وليد ماتحركن مشاعري معاه زي مامشاعري كلها تحركت وانا نتفرج عليك انتي واحمد
يابنتي تقولو عرسان قاعدين رغم انه ليكم سنة متزوجين
انا.. قل اعوذ برب الفلق
هنادي.. والله ياعبورة نحن كلنا متزوجات لكن والله جسمنا قشعر كانا اول مرة نشوفو راجل يبوس في مراته
انا.. حي عليكن حي وانتن مصح وجهكن تتفرجو علينا
انوار .. ماهو سمعنا صوتكم من لوراء قلنا نشوفوكم وطبعا لانكم هايمين في بعض ماحسيتو بينا بكل
انا.. اما انتن طلعتن جفاف رسمي
اصالة .. مش قصة جفاف ياعبورة القصة انكم في رومانسية غريبة بينكم
سماح .. رومانسية  اللي انا ليا سنين علاقة انا وسند قبل الزواج ماشفتهاش بينا
انا.. والله تحكن جد يابنات
هنادي .. جد الجد
انا... امنا غزلان شنو تقول
غزلان .. ههه انا ماشفتش نين وصلتو للبوسة انا اصلا شفته كيف يساند فيك ويمشي فيك جسمي كله رعش فمبالك نوصل للمرحلة للي شافنها البنات
انا.. بس عيب عليكن اتفرجن علينا
انوار .. اي عيب حبيبة ماهو لما تكوني انتي واحمد تمينا معاش نقدرو نتوقعو شنو اديرو تخيلو اليوم اول ماروح من المصحة ورغم ان انا وماما وعمتو قاعدات ومخلانش نغيرو دبشها وغير ليها دبشها
انا... والله يابنات حتيجبن اخرتي
ومشت الهدرزة والضحك وروحو البنات وروحو ماما ومرت خالي وغزلان لحوش الثاني وانوار روحت لحوشها
وانا واحمد اسحرنا وصلينا الفجر وركبنا
احمد.. حبيبي بكرة كان عارفة روحك بتضايقي ماتمشيش
انا.. شنو بضايقني حبيبي
احمد..  يبدن البنات كلهن يتحاوسن وانتي مقمعزة
انا.. لا حبيبي ما تشغلش بالك لان ليا فترة تعودت اني انتفرج في معظم الوقت
احمد.. شنو قصدك
انا.. اللي مرينا بيه كل مرة كان في سبب اني ماندير شئ حتى في اسبوعات عبودي و ارين وسما ماخلوني اندير شئ مقمعزة شادة البيبهات وبس وكل وحدة تقولي لا انتي كنتي في غيبوبة وكلام من هذا
احمد.. ربي يحفظهن ليك يارب
انا .. ويحفظك ليا
وثاني يوم مشينا لحوش عمي خليفة ولقينا كلهم جايين قبلنا حتى عمو وعمتو سابقينا وطبعا بعد السلام وانا في حضن احمد نزلني قمعزت للداخل وطلع للشباب
وفطرنا وجو يهبل وانا قعدت الحاضنة للصغار وسلمهم يارب زي الملائكة الا ارين صعبة شوي وعياطة
وقبل التروايح بشوي جاني احمد وطلعني برا
فتحي .. عدي للجنان الخلفي خير يا احمد حتى عبير تكون مرتاحة
احمد.. تمام يا رفيق
وفعلا نزلني احمد في الجنان الخلفي وقعد يمشي فيا وانا راسي رافعاته نشوف في الفرخات شنو يديرن
احمد.. خيرك نوارتي مانازلتيش راسك قريب طحتي تو
انا .. نشوف في الرواشن والبلكوني بالك حد يشوف فينا
احمد. . انا راجلك خايفة من شنو
انا.. حكيت لاحمد شنو صار بس بختصار طبعا انهن كانن يتفرجن علينا لكن مش الكلام اللي دار بينا اكيد عيب انعاوده لراجلي
احمد.. وكان تفرجن خلي حبيبي اللي يتفرج يتفرج انا مانقدرش نشد روحي عليك
انا بحشم .. ربي يخليك ليا على رنة المؤقت وكملنا الطريق وهو يساند فيا نين دخلني للبنات وعدو الشباب والابهات للتروايح وطلعنا نحن للجنان بمساعدة عمتو وعمتي فاطمة بيش طلعت معاهن وقمعزنا وهدرزنا بقلوب صافية مايعركها شئ وقلوب محبة وقلبها على بعض
ومشن يومين اللي قبل العيد عادي لكن في شئ يصير مع احمد مش تمام  وعيت خالي روحو قبل العيد بيوم  وجاء العيد وفي الصبح قلت خليني نجرب نصبي بروحي قبل مانوض احمد للصلاة العيد وتسحبت بالشوي وفجاءة
لقيت روحي قدرت نصبي وحركت رجليا مشيت شوي شوي قعدت نمشي على قفزة احمد
احمد.. قدرتيها ياروحي
انا.. مشيت بروحي حبيبي مشيت بروحي
احمد.. حضني ايه ياقلبي
اصلا فطنت بيك وانتي تسحبي قلت خليها نشوفها شنو بدير لاني عارفك قوية ياحبي
انا.. صباح الخير ياقلبي
احمد.. صباحي احلى صباح معاك
انا.. هي نوض دوش للصلاة
احمد.. هيي
وجهزنا روحنا ونزلنا وطبعا لبستي كانت جيبة كلوش واسعة وملونة بالوان فاقعة وعليها بلوزة بيضاء وجاكيت وردي هادي لانه من ضمن الوان الجيبة وحذاء زحاف وردي هادي وطبعا كلهم ماتوقعوش الجيبة كيف تطلع عليا حلوة لاني عمري مالبستها
ومشن ايام العيد احلى ايام العيد وجاء رابع يوم العيد خش عليا احمد قريب العصر وهو وجه حامق وكانه باكي لان عيونه حمر  ومايتفسرش
احمد.. نوارة نوضي لمي دبشك وعدي لحوشنا الثاني 
انا ....................