للقدر والنصيب كلمة اخرى

84

#للنصيب_والقدر_كلمة_اخرى

ح84
احمد بخوف .. حبيبي نوارة نوارة فيقي كنتي تو تحكي معاي
طلعت نجري للدكتورة اللي جت بسرعة وطلعتني الدكتورة برا ومشى عليا الوقت كانه دهر
سند.. ان شاءالله خير يا احمد
احمد.. يستر الله
عمتو وماما وبابا وانوار والقروب كله متجمعين قدام حجرتي والسنتهم ما وقفتش على الدعاء طلعت الدكتورة
احمد.. طمنيني يادكتورة
الدكتورة .. ان شاءالله خير
احمد.. بس وجهك مايقولش هكي
الدكتورة .. قلبها ضعف الحق نحن قدامنا 36  ساعة  واذا مرن على خير معاش في خوف عليها
احمد
سمعت كلام الدكتورة وطحت على الارض معاش عرفت انتحكم في روحي او نشد اعصابي وانهرت اه انهرت اللي كنت قوي على شانها قاعدة تصارع بين الحياة والموت عشان تجيب ليا وليها بيبي بس انا مانبيش نبيها هيا بس
بابا .. نوض يا احمد استهدى بالله
احمد.. لا اله الا الله
عمو .. نوض توضى وصلي ركعتين وادعيلها نوض
احمد.. مش قادر نتحمل كنكم ماتحسوش بيا انا اصلا ماكنتش نبيها تحمل لاني نبيها هيا بس
ماما وهي تبكي .. صبي يا احمد لو علمت بيك نوارة هكي انك تقول حتزعل
احمد.. غصبن عني مش قادر نتخيل انها حتبعد عليا
عمو ..تفائل خير يا ولدي هكي تعذب فيها
احمد.. استغفر الله العظيم يارب احفظهم لي الاثنين
احمد
صبيت توضيت وصليت ركعتين ودعيت لربي واستودعتهم عنده وانا نحس في روحي بنموت بلاها ورجعت لحجرتها والحيت على الدكتورة تخليني معاها لداخل وتحت الحاحي وافقت خشيت احذاها شاد ايدها بايديا الاثنين نبيها تحس بوجودي معاها ومر يوم كانه سنة ومافي شئ واليوم الثاني زيه وطبعا انا قلت ليهم كل واحد يروح للحوش حتى امي وعمتي وباتي وعمي وتعالو كل مرة حد ماتقعدوش كلكم وكل واحد عنده حاجة ايديرها
احمد.. عدو كل واحد لشغله وانت ياوليد  خوذ مراتك وروح بيها حرام عليكم ولدكم والله لو كان تنوض نوارة تزعل منكم وانتي يا نانا سادك انتي مش قادرة توقفي خوذها ياوسيم روح بيها وانا حنطمنكم عليها كل ساعة حنبعث ليكم رسالة على الفايبر
سند .. به نقعد معاك انا
احمد.. انا قلت ماحد يقعد معناها محد يقعد نبي نوارتي لما تنوض ماتحسش بان الدنيا وقفت على خاطرها لان هذا حيزعلها
بابا .. بس يا احمد
احمد.. عمي انت اكثر واحد حاسس بناري ريحني الله يريحك
بابا .. خلاص هيا كل واحد  يروح لحوشه
اصلا نحن وقفتنا هذي هيا اللي مش حتخلي نوارة تنوض
ماما .. ليش ان شاءالله
بابا .. ماتشوفيش في الممرضات والله المرضى اللي في المصحة وكلامهم على الزحمة اللي دايرنها على خاطر بنتي
عمتو .. عندك حق ياعمر هيا وكل واحد منكم يوقض اهله انهم معاش يتعبو روحهم بالجية
احمد.. الله يريحكم انا بنخش لنوارة
سند .. عمي عمر روحو بسماح معاكم انا بنقعد معاه وكل مرة واحد من الشباب يجي يقعد معاه مانقدروش نسيبوه
بابا.. به ربي يحفظكم لبعض
عبدالله .. خلاص لما بتجي تروح كلمني ياسند نجي انا
سند .. تمام
وروحو كلهم غصبن عنهم وامي وعمتو وانوار والبنات تقريبا الدمعة ماجفت من عينهم
احمد
قاعد احذاها ونتفرج عليها نشبع في عيوني منها وهيا مغفية لان الدكتورة قالت مش في غيبوبة هي تعتبر راقدة بسبب ضعف جسمها وقلبها هو اللي مش مخليها تنوض  ومشى اليوم اللي بعده وفي الليل قريب تخش على ثالث يوم فتحت عيونها وانا من الفرحة دموعي نزلن برواحهن وهي بصوت واطي يادوب اطلع الكلمة
انا.. ح ب ي ب ي نا كوووي سة
احمد.. ياروحي انتي وقلبي حمدلله على سلامتك وقعدت نبوس فيها في كل تركينة تجي عيني عليها
انا.. ا ح م د ال ص غ ي ر كوووو ي س
احمد.. اه كويس بكل خليني نكلم الدكتورة تجي تشوفك
وطلعت للدكتورة كلمتها   ولقيت برا هشام قلتها له وقلت ليه يبعت رسالة على الفايبر يبلغهم كلهم وقعدت نستنى في الدكتورة
احمد.. ها يادكتورة طمنيني
الدكتورة .. تمام الحمدلله بس
احمد بخوف .. بس شنو
الدكتورة .. نبيها تكمل الفاضل في الشهر الرابع هنا في المصحة
احمد.. المهم تكون كويسة عادي يادكتورة
وخش احمد عليا بعد ماحولو جهاز التنفس لكن باقي الخيوط قاعدات في جسمي
انا.. حبيبي انا عييت من الرقدة
احمد.. تحملي حبيبي على خاطر اللي في بطنك واللي تستني فيه بفارغ الصبر
انا.. وانت ماتستناش فيه
احمد.. انا المهم عندي انك تنوضي
انا برمت وجهي عليه للجيهة الثانية ونزلت دمعة مني لف احمد وجهي شوره
احمد.. ياقلبي قدري وضعي كيف بنحبه او نستناه وهو ياخذ فيك مني بالشوي ترا قوليلي وانت كل شوي مريضة وكل مرضة تفتحي عيونك بعدها نسجد لربي شكر كيف بنحبه وانا خايف يوم تغمضي عيونك معاش تفتحيهن ترا قوليلي
انا.. نبيه لانه منك لانه بذرتك اللي انزرعت جواي ونتحمل كل شئ على خاطر تنمو
احمد.. وانا عهد عليا تفوتي مرحلة الخطر وانا نحبه ونستناه اكثر ما انتي تحبيه وتستنيه لكن تو ماتطلبي مني شئ ارجوك
انا..حاضر حبيبي بس قولي خيره منظرك هكي
احمد.. هههه ماهو ماروحتش بكل للحوش
انا.. به انا حالي كويس روح حبيبي دوش وغفيلك شوي بيش تجي وتسهر معاي
احمد.. حاضر غير تو هشام بيروح ومش عارف منو اللي بيجي نخليه معاك ونعدي
انا .. به
احمد
قعدت نشوف فيها ومانبيهاش تسكر عيونها خايفة تسكرهم معاش تفتحهم رغم ان الدكتورة طمنتني لكن الخوف باني نخسرها كبير واجد
شوي ودق الباب ولقيت امي وعمتي حواء جاييت
احمد.. اهلين بامهاتي
ماما وعمتو .. اهلين بيك وحمدلله على سلامتها
احمد.. الله يسلمكم
ماما.. واعية والله راقدة
احمد.. واعية انتم خشولها وانا بنعدي ندوش ونغير ونريح شوي وساعتين هكي ونجي
عمتو .. وكول حاجة
احمد.. حاضر يا امي بنقوللكم فاهمين عمي عمر شنو قال على الزيارة
ماما.. اه لو جن البنات نروحو نحن ونخلوها مع وحدة منهن ونروحو بالباقي مانديروش زحمة
احمد.. تمام بكل هي سلام تو 
وطبعا تما حالي احسن من قبل لكن الدكتورة قالت الاسبوعين الفاضلات في الرابع لازم نقضيهن في المصحة ومشن الايام وحالي كويس واحمد مايفارقش فيا غير ساعتين او اربع ساعات يريح فيهن في الحوش ويدوش وفاتن الاسبوعين وكملت الشهر الرابع بخير الحمدلله وخشيت للاسبوع الاول من الخامس واحمد اصر على الدكتورة انها تخليني نين تتاكد تماما
الدكتورة .. طبعا تو عادي تقدرو يصير بينكم اتصال جسدي بس بدون مجهود قوي
انا.. تمام يادكتورة
الدكتورة .. وتمشو على النصايح كلها اللي قلت عليها والمتابعة كل اسبوعين
انا.. حاضر يادكتورة
وخش عليا احمد وعيونه ملينات فرح
احمد.. واخيرا بناخذك لحضني وبترقدي جنبي واخيرا بتنوري حوشي
انا.. واخيرا ياقلبي
احمد.. هيا انساعدك تغيري دبشك
انا.. لا ماتقربش مني
احمد باستغراب .. ليش
انا.. شوف كم ليا راقدة في المصحة واكيد ريحتي يع
احمد.. ههههه اي ريحة يا ام ريحة تريحتك احلى حتى مني انا معقولة انخليك بدون نظافة وانتي راقدة
انا.. ماهو غسل الاطراف مش زي الدوش
احمد.. تعرفي لو تبدا ريحة الكناسة .(حشاكم) احلى من ريحتك انتي تبدي عندي قمر وهيا بيش تروحي وانديرلك احلى دوش
انا.. ربي يخليك ليا
وروحت طبعا جسمي مازال يحس بوهن وتعب بسبب الرقدة الطويلة ووصلنا للحوش وطبعا لقيت العيلة كلها متجمعة والقروب باهاليهم كلهم بعد السلام استئدنت منهم عشان ندوش ونغير دبشي وننزللهم وركبني احمد وجهزلي حمام عبالي البانيو وحطلي فيه زيت الياسمين عشان نروق وفعلا خشيت فيه
احمد.. اقعدي في البانيو شوي مابين جهزت ليك دبشك واذا تبي ترتاحي بعدها عادي مش لازم تنزلي
انا.. لا حبيبي بننزل وبنهدرز تعبت غير من الراحة
احمد.. لكن اي حركة ممنوعة فاهمة او لا
انا.. حاضر
ودوشت وطلعت من الدوش ولبسني احمد دبشي وجففلي شعري عشان نلبس وشاحي لان اكيد الشباب بيكلموني يسلمو عليا وحسيت بضيق
احمد.. كنها حبيبي وجهك تغير
انا.. حبيبي شكلك معاش تبيني
احمد.. ردي بالك تقولي كلام زي هذا وعمرك ماتفكري اتقوليه
انا.. تصرفاتك هكي تقول
احمد.. شنو اللي شفتيه خلى عقلك يفكر هكي
انا..انت عارف ان الدكتورة قالت ان عادي يصير بينا اتصال وانت يادوب هيا بوسة وانا في الدوش
احمد.. جاء حضني
حبيبي معقولة عقلك يجيب هكي كل مافي الموضوع اني عارف في ناس تحت وانتي تبي تنزلي ليهم وانا لو قربتك بالذات بعد المدة هذي فصعب انك تنوضي على طول والله انا شاد روحي بالغصب عليك بالذات وانا ندوشلك والله نغيرلك في دبشك والله حتى تو شاد روحي بالغصب
انا بفرح .. ربي يخليك لي يارب ويحفظك
احمد.. ويخليك ليا وهي انزلي قبل مانغير رايي
ونزلت سلمت على الشباب قبل بيش نقدر نحول الوشاح
وقعدنا نهدرزو ونضحكو وجونا حلو وفرحانة واجد باحمد الصغير
هبة .. كان تشوفي منظرك وانتي تقولي حبيبي الصغير
هنادي .. ياعيني ياعيني عندك حبيبن مرة وحدة
انا.. ربي يخليهم لي ويخلي حبيبي الصغير لاهله يارب
هبة .. امين يارب
انوار .. بنقوللكم على حاجة ان شاءالله ماتكونو فهمتو كلام بابا غلط في المصحة
اصالة .. نحن عمي عمر مانزعلوش منه
خالدة.. لكن خاطري نعرف كيف نحن السبب بلي في نوارة وقتها
انا .. بابا شنو قال
انوار .. بابا لما قاللكم ماشفتوش الممرضات والمرضى شنو  يقولو انتم ماركزتوش على الكلمة هذي
سماح .. انا سمعتها لكن مافهمتهاش
انوار .. الممرضات طول الوقت وهما يقولو عليك صحبة اللي بينا مهما صار ليهم تلقى نفس المجموعة حاضرة حتى البنات رغم انهن متزوجات لكن رفقتهن ماتغيرتش
هبة .. انا مكنتش معاكم لكن وليد حكاها لي وصح الكلام انا بس لما التميتو عندي ولما اصريت اني نطلع نشوف نوارة ونرفعه احمد ليها المريضة اللي حذاي سئلتني وانا بكل هبل حكيت ليها وعمتي ام وليد قعدت تفنص فيا ولما روحنا قالت لي انتي تبي اضري صاحبتك اكثر ماهي مضرورة استغربت من عمتي ليش قالت هكي ولما سئلتها كيف بنضرها قالت ان العين علينا حق وعلاقاتنا هذي من النادر تلقي زيها فاصلا اكثر اللي يصير ليكم عين
انوار.. ااااايوه وهذا اللي بابا قصده
وجدان ..صح نحن مافكرنا فيها بكل واكثر وحدين مضرورين ياروحي عبير واحمد
انا.. الحمدلله على كل حال وكل حاجة من ربي يامحلاها
خشت علينا بنت وكلهم اندهشو من جيتها 
البنت .. السلام عليكم