للقدر والنصيب كلمة اخرى

9

#للنصيب_والقدر_كلمة_اخرى

ح9
احمد ...صباح الخير خموجة
انا...صباح النور يامصحصح غريبة نايض قبلي انصر شنو بيصير
احمد ...مافي شئ لكن عمي عمر طلع بدري ونوضني قالي راك تنسى دواء عبير لانه طلع هو وعمتي حواء
انا...نفجعت ونطيت خيرهم شنو صاير نين طالعين من صبح ربي
احمد ...بشوي بشوي حوضك مايتحملش هزة هكي
انا...قعدت ندمع بالله قولي شنو فيه
احمد بيتكلم خشت انوار بسرعة يا احمد قوللها قبل ما ادير مناحاة
احمد ...هديي هديييي مافي شئ غير عمي عمر ضروري يمشي لدرنة عنده اجتماع مهم وقال لعمتي حواء هيا رافقيني وخوذي الصغار معاك بيقعدو يومين وانتي وانوار بنرفعكم معاي لحوشنا على خاطر القراية لان حتى انوار ماتنسيش عندها شهادة ولما بتجي الشلة هنا من بيعول عليهم
انا...مسحت ادموعي انفجعت وخفت يكون حد صايرتله حاجة
انوار ...صباح الخير حبيبة
انا...صباح النور
انوار هيا نوضي وتي روحك وصحصحي وانا تو نوتيلك دبشك
انا ...شنو الكرم اللي نزل عليك
انوار ...خزي عليك معقولة انا مانوقفش معاك
انا نضت ضميتها وقلتلها توالله لولاك انتي راه صايرة فيا ليلة
احمد ...هيا انا نوتي الفطور مابين انتي غسلتي وجك وصليتي وانوار ضمتلك الدبش
انا...ايه عاد هكي دلال راه مانقدرش عليه
احمد وانوار مع بعضهم ونحن قديش عندنا نوارة 
انا ...ربي يخليكم لي ياضي عيوني
نضت توضيت وصليت وكلمت بابا اطمنت عليه ودرت روحي زعلانة منه على خاطر ماوعنيش وراضني وقالي تو نجيبلك هدية سمحة من درنة
ورضيت طبعا الموضوع فيه هديه عاد هههه وفي نفس الوقت في خاطري قلت بينهم يغيرو جو قديش ليهم ماطلعو وهما من اللي يصيرلي الحساسية  والحادث والطيحة
وطلعت خشيت للمطبخ لقيت احمد موتي فطور محترم
وفطرنا انا واحمد وانوار واحمد جابلي دواي وقالي عارفك ناسيتيه
انا...مانخممش فيه لاني عارفة درعي مستحيل ينسى
احمد ...واو قديش ليك ماقلتيها لي شكله في حد خدا مكاني
انا ...والله ماياخذ مكانك واحد واللي بيبعدني عليك مايلزمني راك غالي عندي تي يا راجل انا نحس فيك مرات باتي  مش خوي او صديقي
احمد ...عفنتيه بتي ياراجل تقول صاحبي اللي يحكي
انا وانوار هههههههه
انوار ...تعرف يا احمد نتغيرو على كل الناس ونبيعو كل الناس ونستغنو على كل الناس لكن انت مستحيل نحن ربي ماعطانش سند وظهر ننسندو عليه ونفتخرو بيه من بابا وماما لكن ربي عوضنا بيك ياسندنا
احمد ...نعني مانفقدكن يارب وحتى انا ربي حرمني من حن الاخت ومحبتها من امي وباتي لكن عوضني بيكن ومعاها زوز خوت اولاد ياخذو العقل
انا...عاد انت محمد وموسى واخذين عقلك
احمد ..مش مغير واخذين عقلي
انوار ...حي فاتتك لقطة دارها محمد
احمد وانا ...شنو
انوار ...محمد انغيرله في دبشه ولبسته سروال جينز وقميص ابيض مشي قالي لابسيني الجاكة السودا معاه قلت ليه عليش قاللها نبي نبقى كيف احمد
قعدنا نضحكو عليه
احمد..نقنهم بيخلو مكانهم 
انا ...بابا ماهوش مطول قال يومين بس
انوار ...هههه على من يضحكو كان ماجو اول يوم في امتحاناتنا تعالو حاسبوني
احمد ...خليهم يغيرو جو   هيا كان كملتو وكال
انا وانوار واتين
ومشينا لحوش عمتي غالية ولاقتنا وهي فرحانة طبعا انا وانوار دارنا في الدور الثاني لكن انا بسبب وضعي والدروج فقعدت في دار احمد
احمد ...ينعلي نا من اللي ديمة واخذه داري واداعك في
عمتي غالية ...الحوش كله لنوارة  وانت اللي ادور وين تقعد
احمد ...سلم عمتي حواء قالتلي خوذ دور الضيوف كله والضيوف تو ندرولهم راي وقالتلي لما نتزوج بديره ليا نا ومرتي مش انتي تلزي فيا وتسحابيني ماعندي وين نقعد
عمتي غاليه ...ان شاءالله ربي يفرحني بيكم كلكم
انوار ...سمله عليا ماحد يدور فيا
جاها عمي محمود وضمها وقاللها انتي قرعتي ياشينة
طبعا عمي محمود نحن كلنا كوم وانوار كوم ثاني على خاطر ماما لما جابتها تعبت واجد فخذتها عمتي غاليه عندها من هيا عمرها يوم لعند ما ماما صحت فكبد عليها عمي محمود واجد حتى لما يجيها عريس بابا يقوله خليني نسئل بوها الثاني وانوار اصلا ماتقولاش عمي  زيي نا هي تنادي فيه باتي
بمعنى بابا تنادي فيه بابا وعمي محمود تنادي فيه باتي
انا ... احمد ابعث رسالة في الفايبر للشلة بيش يجو هنا وانا خشيت تمددت نحس في السيارة خضتني واجد وشكلي رديت رقدت نين نوضتني عمتي غاليه للغذاء
تغذينا وجت الشلة وقعدنا نقروا وكملنا قراية
هشام ...شنو رايكم بكرة تجو تقرو عندنا
باتي وامي ديمة يسئلو عليكم حتى لما حكيت لامي  على طيحت عبير انفجعت غير انا طمنتها وقلت ليها تو تجيك
انا ...كلمتني بالتيلفون وطمنتها عليا ربي يسلمها يارب
احمد ... والله ماني عارفة مفروض عبير ماتخضخضش واجد لكن تو نشوفو
هشام...خلاص شوفو روحكم وابعتولي رسالة وعدت الشلة
احمد خش ياخذ في دبشه ويتمتم
عليك هم وانا ديمة ملزوز من داري
انا ... رقتلي احمد هيا طبني وحطني في داري
احمد ...تي نبصر عليك حتى كان بتقعدي فيها بكل والله ماتغلا عليك ياهبلة تغير انركب عليك عارفة فيسع ماتولعي
انا...ياسامط
احمد قولي كنك حسيتك ماتبيش تمشي لعند حوش هشام لاني حسيت ردك فيه شوي عصبية
احمد ...نوارتي  انا شاك في حاجة شور هشام  لكن مانقدرش انقول عليها نين انتاكد وكان انتي تبي تمشي نمشو ليش لا انتي تامري
انا ...وانا نستنى نين اتاكد
حمودي ايه نبي نمشي على الاقل حتى عمتي رابحة تطمن عليا انت عارفة لانها مقعدة طلعتها بهذيك الحسبة
احمد ...حاضر تو نكتبلهم في القروب
انا ...حمودي بالله عليك خوذ سيارة عمي محمود ماترفعنيش في سيارتك
احمد ...عليش
انا...سيارتك خضتني واجد اليوم لدرجة لما تمدت حسيت بوجع
احمد ...كنك فيك حاجة نرفعك نعاينك وكنك ماقلتي
انا ...مافي شئ غير شوي وجع بس
احمد ..حاضر تو نكلمه بيش يطلع بسيارتي مع انه مايحب يسوقها بكل
انا ...الحق مش برستيج عمي محمود بكل تخيله وهو يسوق في كروزر
احمد ...على خاطرك حيوافق طول
هو نحن بنمشو بعد الغذاء صح
انا ...اه خيرك
احمد ...لا مافي شئ
وعدى احمد رقد وانا قعدت نراجع في اللي قريناه ونستنى في اتصال يوسف
رن تيلفوني
يوسف ...اهلين
انا...اهلين بيك
يوسف ...كيف حالك اليوم وحال صحتك
انا ...شوي بس يوسف خش علي بابا انتظار
اهلين بابا
بابا ..في من تكلمي تو
انا ولاول مرة نكذب على بابا نكلم في هبة
بابا ...كيف حالك وشنو دايرة وقريتو انتي وانوار او لا
انا ...انا الحمدلله الشلة ماليهاش ساعة ونص كيف روحو وانوار عمي محمود مش مخليها اتنفس
بابا...انا مطمن عليكم محمود خوي اللي ماجابته امي وعشرة عمري
هيا تصبحي على خير طولتي على صاحبتك
انا ...هي تصبح على خير وسلملي على ماما وبوسلي خوتي
وجعني بابا ووجعتني نفسي لما كذبت عليه
يوسف ...ايوه وين رحتى
انا ...تعرف اول مرة اني نكذب على بابا بسببك
يوسف ...عليش
انا... لما قالي مع من انتظار قلت ليه هبة حسيت روحي اعيييي بكل
يوسف ...سامحيني لكن تعرفي نتلاقو بس وان شاءالله بعدها ماعاد تكذبي عليه
انا ...ان شاءالله
يوسف ...خطرها عليش باتك يتصل بيك وهو مش معاكم او شنو
انا ...بابا وماما وخوتي الولاد الصغار عدو لدرنة وانا وانوار جينا لحوش عمي صاحب بابا
يوسف ..بدون ماتقوليلي
انا...اسمع يايوسف عشان نكون واضحة معاك ومن الاول وحتى قبل مانشوفك نحطو النقاط على الحروف
حوش عمي صاحب بابا  حوشنا الثاني عندنا دار عندهم انا وانوار وحتى تو باديين ايديرو في دار لمحمد وموسى وولده  عنده دار عندنا يعني كانهم هلي وخط احمر مانحبش حد يتعداه
يوسف ...به به وانتي رقتلك
انا...لانهم هلي مانتحملش فيهم شئ
يوسف ..اصلا انا امبارح بنسئلك على احمد
انا ...شنو بتسئل عليه
يوسف ...انتي حكيتي لي على قروبك كااسماء وكيف علاقتكم ببعض لكن احمد نحس علاقتكم تختلف
انا ...طبعا حكيت ليوسف على كل شئ بس بدون مانوضح واجد على احمد ولانذكر اسم عمتي غالية ولا اسم عمي محمود بيش مايعرفش يوسف انه ولد خالته
يوسف ...شكلي بنغار انا
انا...غار من الدنيا كلها وامنعني على الدنيا كلها الا احمد
يوسف ...راد الله عليا راجل يشاركني في حبيبتي ومعاها بنرضى وبنسكت
انا...تحشمت من كلمة حبيبتي وحسيتها  حلوة من فمه طالعة
يوسف ...وين رحتي
انا ...بحشم قاعدة
يوسف ...نجيه اللي يتحشم
انا ...يوسف بنسكر انا صوت احمد ينادي فيا بنشوفه خيره
يوسف ...هي سلام
انا ...تصبح على خير
يوسف ...وانت من اهله