للقدر والنصيب كلمة اخرى

63

#للنصيب_والقدر_كلمة_اخرى

ح63
احمد
سرحت بتفكيري زعمك لشنو تخطط وشنو المفاجاءة وقدامي التقويم انتبهت للتاريخ وعرفت هي لشنو تخطط حتى انا نعرف ومفاجئتها مش حتكون زي مفاجئتي
وجاء ثاني يوم وطلعت مع هبة وفتحي وخذيت روب حلو تو نحكيلكم عليه لقدام ومعاه زوز ارواب ثانيات وخذيت بيجامة حلوة لاحمد وغلفتها وعدينا للحلواني وحجزت  تورتة قبل بنديرها بروحي لكن معاش في وقت ورراي حاجات واجد وعدينا للحناية وتفقت معاها بكرة تجي تحنيني وخذيت ورد مجفف وشموع لزوم المواضيع وروحت ودسيتهن تحت في دار عمتو وطبعا زي ماتوقعت قالت لي انها بعد بكرة بيمشو عند اهلي وحكيت  ليها على الحناية وقالت تو نقولو لاحمد انك بتمشي معاي للمة اللي عندنا بعد بكرة انا وامك
جاء احمد وحطينا العشاء وتعشينا وضميت الماعين
عمتو غالية .. احمد بكرة بتجي حناية بتحني نوارتي
احمد.. عليش
عمتو غالية .. بعد بكرة عندنا لمة انا وعمتك حواء بنعدو ليها  وبنرفعو معانا نوارة نبي الناس تتعرف عليها ككنتي
احمد.. بعد بكرة يا امي متاكدة
عمتو غالية .. اه بعد بكرة باذن الله
احمد.. بحمق اللي يريحك يا امي لكن نوارة شنو تبي تمشي معاك لانها ماتحبش اللمات والتجمعات
عمتو غالية .. هي قالت عادي لكن بتشاورك قبل
احمد.. به اللي مفكرة تشاورني وانا حاسة انكم متفقين ومنسقين كل حاجة
عمتو غالية .. كنك رقتلك لو ماتبيهاش تمشي عادي
احمد.. طالما هي بتمشي عادي يا امي
انا
في المطبخ نسمع في الحديث ونضحك على احمد لان احمد حامق من جده
جهزت الشاهي وجبته ليهم وشربنا وركب احمد طول بدون مايستناني نركب معاه لان حتى عمو محمود قاعد وعرفته تحشم
عمتو غالية .. صبي  اركبي مع راجلك
انا.. تصبحو على خير وبست على راسهم وركبت
السلام عليكم
احمد. وعليكم السلام
.كنك طولتي ماركبتي
انا.. انت ماقلتش ليا هيا
احمد.. باتي قاعد كيف بنقولها المفروض تفهميها
انا.. حمودي كان ماتبينيش نمشي عادي ياحبيبي
احمد.. فيها حبيبي وماتبينيش نمشي
جيتها وحضنتها زين
عدي ياقلبي طالما انك تبي مع ان اليوم هذا قبل عندي حاجة لكن مش مشكلة حتى بعدها انديرها
انا.. حاجة شنو حبيبي
احمد.. بستها على راسها هي حبيبتي بنمشي  لصالة الالعاب عندي اوراق بنتمهن
انا.. حتى انا عندي حاجات قاعدة اندير فيهن نكملهن
احمد.. شنو مشروع جديد
انا.. اه ديكورات لمحل كاتروات بشكل احذية يبوها مجسمة
احمد.. ربي يعاونك
انا ..ويعاونك انت
وعدينا للدار وقعدت انا نشتغل وفرحانة بلي بنديره لاني صليت حتى استخارة
احمد
نشوف فيها مرة مرة ونلقى فيها سعيدة وقلبي حاسس بحاجة بس مافهمتش شنو وقعدت سارح فكرة تجيبني وفكرة تودي نين انتبهت لنوارتي جابت ليا كابتشينو وشربتها وبعدها
احمد.. خلاص حبيبي بكرة بتجيك الحناية بدري
انا..حتى انا نحس في روحي تعبت
احمد.. هيا نوضو نرقدو
تمدننا على السرير وخشيت في حضن احمد
انا.. حبيبي ما نضايقكش فيك وانت تبدا حاضني الليل كله
احمد.. نضايق ومن منك لو العمر كله نحضنك مستحيل انا كان نلقى نفتح قلبي ونحطك فيه ونسكر عليه
انا
زدت خشيت فيه وانا ذايبة في كلامه اللي يهبل وشوي ولقيت روحي راقدة
انا.. صباح الخير حبيبي
احمد.. صباحي انتي ياقلبي
انا.. هي نوض مابين نزلت جهزت الفطور
احمد.. نفطرو هنا
انا.. لاحبيبي اليوم عمو مايطلعش بدري فمش حلوة مانفطروش معاه
احمد.. به اللي تبيه ياقلبي
وخشيت للحمام وتوضيت وصليت وغيرت دبشي ونزلت جهزت الفطور وخشت عمتو عاونتني بعد اصرار وفطرنا مع بعض وعمو كان فرحان واجد بلمتنا وحسينا ان حتى بعد انوار عليه هان شوي
وركب احمد وغير دبشه وطلع للمكتب بتاعه وانا جتني الحناية وحنيت وعمتو دارت الغذاء وبعدها حولت هبة ليا الحنة
ولمت زيزي  حوست الحنة
هبة .. بالك ناسية حاجة
انا.. نراجع معاك بتجيبي التورتة بكرة العشية وبتجيبو العشاء راك تنسي الفطائر التركية والبيتزا بيش يسهل تسخينهن والسلاطات
وطبعا انا بنجهز العصير الفرش عمو محمود جاب الفواكه اليوم
هبة .. تمام التمام وبعد مانجيبلك الحاجات انديرلك شعرك فلو ونطلع بيش انتي تكملي الباقي
انا.. ربي يخليك لي ولايحرمني منك قوليلي مافيش جديد مع وليد حسيتك مسكتة الفترة هذي
هبة .. خليها تو يبي قعدة وتو الهي في روحك وماتنسيش انتي بتكوني في العسل ونحن بنكونو في حوشكم بنجهزو لجية انوار
انا.. من التوتر نسيت بكل ان انوار بتجي بعد يومين هالفرخة صح ليها شهر ونص ليها تعسل 
عند احمد وسند
احمد.. والله بنطلع من عقلي ياسند
سند .. عليش حتى في الاجتماع حسيتك بكل مش مركز
احمد.. ياراجل بكرة عيد ميلاد نوارتي وانت عارف قبل شنو انديرو
سند .. اديرو في حفلة كبيرة وتحتفلو بعيدك وعيدها مع بعض
احمد.. تمام وتبداء التجهيزات على قدم وساق لدرجة ننسى انه عيد ميلادي من كثر ما انا نعول عليه ونزبطه انه عيد ميلادي انا بالهدايا واسمي على التورتة
سند.. به وين المشكلة
احمد.. باتي وامي مبردين بكل وحتى خطمت على حوشنا الثاني لقيت عمي وعمتي عادي جدا ومعاها عمتو حواء تهدرز على اللمة عادي
سند.. غريب صح الامر بالك يجهزو في حاجة ومايبوكش تعلم
احمد.. مافيش بوادر تجهيز بكل حتى نوارتي طلعت مع هبة وفتحي وقالت تبي تجيب حاجات مفاجاءة توقعتها بتجيب هدية ليا لكن لما روحت من العمل وركبت للجناح مالقيت شئ جديد بكل الا واخذة لبسة ليها هيا بس وشوي ميك اب
سند.. به وانت شنو بدير
احمد.. بالنسبة ليا يوم ميلاد نوارتي هذي يوم ميلادي نا خذيت ليها هدية حلوة وثاني يوم بنطلع انا وياها حجزت يومين جناح في فندق كنوع من التغير بالك الفندق يغريها شوي
سند.. تضرب على الثقيل في جديد شكله 
احمد.. في بس حاجات خاصة لكن اللي نقدر انقوله حسيت بيها تغيرت واجد واحيانا نحسها تبيني كزوجها لكن بحكم انها تتحشم مش عارفة كيف تقولها
سند.. مش عندها العطر
احمد..عندها لكن ماتنساش هي حشومية واجد وهذا ليش خطر عليا الفندق
سند.. وبه مانكاش مناقش اهلك واهلها على حفلة ميلادكم  مرات يستنو فيك انت بحكم ان كل شئ قبل كنت ادير فيه
احمد.. فكرت لكن قلت طالما ماحد سئلني بندير اللي في مزاجي وتبي الحق انا نبيه هادي بيني وبينها ياسر ونحن عشرين سنة يحتفلو بينا
سند.. ربي يوفقك ويعطيك على صبرك وعلى قد حبك يارب
احمد.. امين يارب قديش متمني تكون حياتي طبيعية زي اي زوجين
وروح احمد وتغذاء معانا وهبة حتى هيا وروحت هبة وركب احمد يقيل وعجباته حنتي لاني دايرتها بسيطة شوي وقالي ايش ما اديري حلو وضمني وقيلت انا وياه ونضنا العصرية وجهزت العصرية وعمو وعمتو وبابا وماما جو وكان جو يهبل وبعدها احمد وبابا وعمو طلعو ونحن قعدنا نهدرزو
ماما.. غريبة احمد ماشكش على التسكيت هذا
انا.. اكيد شك لكن ماتكلمش
عمتو .. اصلا لما قلت ليه انك بتعدي معانا للمة رقتله
ماما.. حرام عليكم  وكان قلتيله انك بتحتفلي بميلادكم مع بعض شنو فيها
انا.. وكيف بتكون مفاجاءة نبيه اول ذكرى ميلاد لنا ونحن متزوجين مميزة وفيها حاجة مميزة مش زي السنوات الاولات
ماما.. اللي يريحك ياماما وربي يهنيكم ويدوم الفرح بينكم
انا..امين يارب
ماتبوش مساعدة مني في تجهيزات جيت انوار
عمتو غالية .. كله شريناه واتي ونحن ماناش دايرين شئ بعد بكرة على الاقل ترتاح من السفر واللي بنديروه اليومين اللي بعد جيتها 
وجاء الليل ورقدنا مثل المعتاد وانا نفكر في ليلة بكرة كيف بتكون وندعي لربي يقدرني ونسعده
وجاء ثاني يوم واحمد طلع وقال بما انكم بتبدو لاهيين في اللمة مانيش مروح على الغذاء تو نتغذاء مع سند وبيرد  للمكتب عنده شغل واجد
  وعدت عمتو لحوش اهلي وبابا وعمو ومحمد وموسى عدو للمزرعة وماما وعمتو عدو للمة بيروح بيهم السواق وهبة جتني جهزت معاي ودارتلي شعري وروحت واتصلت باحمد مع الساعة سبعة ونص المغرب
انا.. السلام عليكم
احمد.. وعليكم السلام نوارتي
انا.. حمودي راه في الحوش انا
احمد.. عليش مش في اللمة انتي
انا.. ماهو ماعجبنيش الجو ماقدرتش نقعد وروح بيا عمو وتو انا قاعدة بروحي حتى محمد وموسى عدو مع بابا وعمو للمزرعة
احمد.. انا مشغول الحق كلمي هبة بالك تجيك
انا.. درت روحي زعلانة معقولة نقولك تعال بروحي تقولي كلمي هبة خلاص تو نقعد بروحي سلام هي وسكرت
احمد
شكلها زعلت ياهمي مانقدر على زعلها
وفرصة انروح بدري نرفع معاي الهدية وتجهز روحها بيش بكرة نطلعو  للفندق خير
سند.. فيش تفكر
احمد.. سند بنعدي انا بنروح وخليك انت كمل باقي الشغل عليا
سند ..شنو في
احمد.. نوارتي روحت من اللمة ماعجبهاش الجو وقاعدة بروحها وقلت فرصة نعطيها الهدية ونطلعو ندهورو وبكرة نمشو للفندق وطبعا بيكون عليك تعب الشغل اليومين الجايات 
سند .. تمام كون هاني وربي يحقق لك مافي قلبك يارب
احمد.. امين يارب من يومك قدر ياصاحبي
طلعت وانا فرحان وتكيت خذيت ليها وردة وحدة حمراء ومشيت للحوش واول ماخشيت وركبت من عند الدروج استغربت الاضاءة القوية مسكرة ومفتوحة الاضاءة اللي على سياج الدروج بس استغربت واجد وخفت لان نوارتي ماتحبش الدروج يكون ضيهن خافت هكي وركبت لاربع درجات لقيت ....