للقدر والنصيب كلمة اخرى

31

#للنصيب_والقدر_كلمة_اخرى

ح31
رقدت نحس في روحي تاعبة من الحنة
ونضت بدري وفكرت نجرب نتصل بيوسف بالك نلقاه واعي
انا.. السلام عليكم 
يوسف .. وعليكم السلام
مش مصدق انك قررتي تكلميني يومين فاتن عليا تقول فاقد حاجة زي التايه ونصبر في روحي ونقول يومين وتكون ديمة معاك 
انا..صباح الخير ياحبي
يوسف .. صباح الورد والياسمين ياصباحي الحلو انتي
انا.. غريبة واعي بكري
يوسف .. مارقدتش انا بيش انوض بدري
انا.. اما انا هذي النوضة من الحنة امس رقدت تالفة
يوسف ..صحة حبيبي صحة
انا.. وانت خيرك مارقدتش
يوسف .. مش عارف ممكن من الفرحة
انا..دوووم يارب
يوسف .. وشنو غير رايك وكلمتيني مع انك ليك يومين صامدة حتى با امال ما اتصلتي تنشدي عليا
انا.. رايفت عليك ومشتاقة لك واجد ونبي نشوفك اخرا وبعدين كنت نطمن عليك من هبة لانك لما ترن عليها تحكي حذاي وتفتح السبيكر وتحكي معاك
يوسف ..صار حارمتيني من صوتك وانت لا ياعيني والله واستني شوي شنو قلتي تبي تشوفيني
انا.. اه نبي نشوفك تو
يوسف ..تحكي جد
انا..جد الجد
يوسف ..هي طالع تو
انا..خلاص نكلم احمد ونغير دبشي ونستناك نفطرو مع بعض
يوسف ..اكيد مش طبيعية انتي
انا..والله طبيعية واااااجد
يوسف ..هي سلام مسافة الطريق بس
انارنيت على احمد لانه راقد في المربوعة البرانية على خاطر الحوش معبي نسوان
احمد..صباح الخير نوارتي فيك حاجة تشكي من حاجة
لاني شفت الساعة لقيتها الساعة 7 الصبح خفت عليها بعد امبارح
انا..مافي شئ ياقلبي غير كلمت يوسف وقلت ليه نبي نشوفه نحس في روحي مشتاقة ليه وبنفطر معاه
احمد.. خلاص هي تو انوض نغسل وجي ونستناه بس وين بتفطرو لان شوي ثاني والحوش كله ينوض
مع اني حسيت بضيق لكن نبرة الفرح اللي في صوتها خلتني نفكر فيها هي اكثر
انا.. نفطرو في الجنان الخلفي على الطاولة والكراسي اللي برا
احمد..اه تمام هي امنا نوضي بسرعة وتي روحك
انا
نضت غيرت دبشي ولبست سروال جينز وعليه تشيرت واسع وطويل عليه ميني ماوس بالبودري والتشيرت ابيض لونه والجينز ازرق لونه ودرت شعري ذيل وتعطرت وطلعت للمطبخ بنوتي الفطور لقيت هبة موتية ليا كل شئ انا جيتها حضنتها
سلمها يارب اللي مريحة صاحبتها بس كيف عرفتي
هبة ..سمعتك وانتي تكلمي في احمد وانا فراشي قريب من داراك قلت مافيها ماحوست بحنتها
انا..ياقلبي انتي
هي حبيبة احمد رن عليا معناها يوسف جاء وطلعت لقيتهم مقمعزين في الجنان الخلفي سلمت على يوسف وصبحت عليهم
احمد ..خذا كوب كابتشينو وطرف كيك وقال انخليكم برواحكم بس حاولو ما اطولوش قبل مايوعى عليكم الحوش معاش تخلصو من زحمتهم وطلع احمد بعد ماباسني على راسي
يوسف ..صباح الورد ياقلبي ومسك ايدي
وقعد يبحث فيها
الحنة تهبل طالعة عليك تخيلت كل شئ الا انك تطلع عليك الحنة
انا..عليش ماتطلعش عليا الحنة
يوسف ..حبيبي ماهو ملامحك وشكلك عكس بكل
انا..هي حبي افطر
يوسف ..نحس في روحي شبعت لما شفتك لكن تعرفي ياغلاي انحس فيك ناقصة شوي
انا..اه ماناكلش ماعنديش نية وناكل الا بالغصب من التوتر
يوسف ..لكن اليوم بتفطري معاي
انا..اكيد
وفطرت انا ويوسف والتوتر خف عليا شوي وفعلا شوفته ريحتني واجد وكان اكبر غلط اني قررت اني مانكلماش وكملنا الفطور وجونا حلو مع اني نعتبر ماكليتش واجد لكن خير من قبل
يوسف ..هي حبيبي نبي نروح قبل مايزحمن عليا الصبايا نحس في حركة واجد في الحوش
انا..ايه صح لانهن اكيد يفطرو
ولما جاء يوسف بيطلع عطاني بوسة خطف على فمي انحرجت واجد منه وطلع وخشيت للحوش كلهم انفجعو وقعدو يسئلو وين كنت
هبة ..كانت مع حبيب القلب وزوج الغد
وقعدن البنات يتعاطين ودايرات جو
هبة بهمس..كان نسحاب شوفته تغير مودك هكي راه جبته لك من اول مابدا الفرح
انا ..حتى انا كان نسحاب هكي يصير فيا راه كل يوم قعدت انشوف فيه
يوسف
طلعت من عندها مش مصدق روحي من الفرحة تقريبا من اول مابدا الفرح ماحسيت بفرحة في صوتها كيف ماشفتها اليوم ومعاها مهزبتنيش على البوسة قبل خذها وادير في حالة مع انها حلالي لكن شنو بندير مش مقتنعة باي اتصال  الا لما يصير الدخول نجيها ياربي ليا اللي تخلي فيا كل يوم مجنون بيها
انا
طلعت ووجهزت روحي بيش نمشي للكوافيرة وطبعا كلهم يسحابو الفيلو عندي بس طلعت ازقط منهم وخليت الفيلو عند احمد في الحوش الثاني ولما جاء احمد بيرفعني للكوافيرة جابه وخلاه في السيارة ومشينا للكوافيرة وجت معاي هنادي  لان هبة و اصالة  وانوار وتنسيم بيبرمن على الحوش ويشرفن على العاملات قبل مايطلعن ومقسمات الشغل بينهن وطبعا هنادي  حدير مكياج وتسريحة وحتطلع للصالة بيش تجهزها وتستقبل الناس مع ماما وعمتو غالية الناس مابين ماجهزن البنات الاخرات وهبة هي اللي بتكمل معاي لعند نمشي للصالة ومكيجتني  الكوافيرة ودارتلي تسريحة حلوة  تمشي مع استايل الفيلو وطبعا الضلال دارتهن يركبن على لون الميدي اللي بنلبسه لما بيجو اهل يوسف
وكملت ومشيت للحوش لاني عارفاته فاضي لبست الفيلو وساعدتني هبة وكملت كل شئ وهبة عجبها الفيلو وماتخيلاتش هكي لانها حتى هيا عارفة كيف كنت نتمنى يكون شكله بس حتى هذا عجبها واجد والمهم انه طالع عليا وطبعا الفيلو كان ضابط بشكل الحوتة والنفخة اللي من تحت نفخة كبيرة وطالع منها ذيل طويل ومن جيهة الرقبة فتحة نازالة على الكتاف وكمامه كم وكله دانتيل  ودارت شعري تسريحة مرفوعة مع خصلات نازلة منها وعليها تاج فضي ولبست دبلة فضة جابها ليا يوسف بعد الفاتحة وخراص طوال فضة حلوات وطلعت زي الملكات فعلا وطلعت لاحمد اللي كان يستنى فيا والشباب برا كل واحد بسيارة بيش يزفوني للصالة دايرن جو
احمد..ماشاءالله يا احلى ملكة
انا.. تسلم يارب وحتى انت طالع تهبل باللبسة الرسمية
كان لابس بدلة رسمية ازرق كحلي وقميص سماوي تهبل طالعة عليه 
هبة ..هي نلبسك الكاب معاش في وقت
لبستني هبة الكاب وركبتني هي واحمد في السيارة من الخلف وهبة ركبت من قدام والسيارات دارن جو يهبل نسني التوتر اللي انا فيه لعند ماوصلنا للصالة نزلت للاستقبال بيش نحول كابي وجتني ماما وعمتو غالية وانوار والبنات وطبعا كلهن قعدن يحكن عليا كيف طالعة وشربتني عمتو غالية امية مرقية  ونبهو النسوان اني بنخش وطبعا كبيداتي محمد وموسى لابسين بدل رسمية ولونهن زي بدلة احمد بالزبط سلمو عليا وخشو هما الاولين للصالة واحمد شدني وهو اللي خش بيا وطبعا صاحبتي لبستهن كلهن  بلون  الاحمر لان الميدي بتاعي لونه احمر
وخششني احمد وقعد شاد ايدي وهي ترعش وركبني للمسرح وباس على راسي وطلع والفرقة دايرة جو يهبل وبعدها خشيت غيرت الفيلو لبست ميدي لونه احمر وكمه ربع ومنفوخ واجد وكبير ومنطقة الصدر كلها مرصعة بفصوص ملونة ولبست طوق ورد نفس الوان الفصوص ولبست سلسلة نبض والاسوارة بتاعتها هدية يوسف مع خراص ذهبيات قريبات في الشكل لنفس السلسلة وطلعت وشوي جو هل يوسف طبعا دايرات جو لبس عربي وعليك نظام خاشات بيه للصالة ومعاهن السباتات وشايلات حناية كبيرة وكانن السوابيت طابور طويل والذهب محطوط في سفرة منظرها انيق ملبسة بالكاتفة وركبت عليا جدة يوسف حني حليمة
حني حليمة ..بسم الله على بنيتي ماشاءالله على وليدي واخذ هالغزالة وباست على راسي وجابو الحناية وحطت في ايدي قطعة ليرة ذهب كبيرة وحطت فوقها الحنة ونزلت وبعدها عمتي سميحة هي وعمتي عازة لبسوني الطاقم وكان يهبل واحلى حاجة عندهم انهم جايبين الحاجة فخمة لكن في نفس الوقت بسيطة تمشي مع شكلي وطبعا جابولي العقد الكبير والنبيلة ومعاها خلخال وتاج ذهب ونزلن وغنن شوي والفرقة قامت القدر بيهن وبعدين تعشو وطلعو والناس اول باول بدو يطلعو وانا لبست كابي عشان نصور مع الشباب والبنات ودرنا صورة جماعية حلوة وبعدين صورة مع البنات وصورة مع احمد بالميدي وبعدها روحنا وسلحت دبشي ورقدت ميتة من التعب لكن في تعب زايد ولية تسحن فيا سحن  مش عارفة خيرني حتى الموعد مازال عليه اسبوع وناديت ماما وحكيت ليها وكلمت عمتو وقالولي لازم انقول ليوسف بيش مايضايقش بكرة طبعا نبهت ماما على هبة وانوار انهن مايحكن لحد وانا نفكر كيف بنحكي ليوسف على الموضوع لكن معاش فيها اتصلت بيه
يوسف ..ياعيون وقلب وروح يوسف
انا..اهلين ياحبي
يوسف ..ماشاءالله طالعة تجنني اليوم
انا..وين شفتني
يوسف ..غير الحكي عليك امال ورتني صور  ليك
انا..اه
يوسف ..غير امتى بيجي بكرة بس
انا..قلبي انقبض وقاطعته قبل مايكمل
حبي بنحكيلك حاجة
يوسف ..ان شاءالله خير
انا..والله ماني عارفة
وطبعا بنموت من الحشم حبيبي بكرة ليلة الدخول بتاجل راه
يوسف ..شنو اه فهميني شنو تقصدي وليش بنأجل الفرح
انا.. لا استنى وركز معاي الدخلة اللي بتتاجل لكن مش الفرح افهم عليا ياهمي راه بنموت من الحشم
يوسف .. اه كيف هو هذا وقتها
انا بحشم .. لا مازال المفروض بعد ستة ايام لكن شكلها من التوتر
يوسف ..سكري شوي عبورة وتو نعاودلك
سكرت منه وحسيت انه اضايق وعنده الحق لما الواحد يستنى في ليلة العمر وفي الاخير بقضيها كانه مع صاحبه
وشوي ورن عليا يوسف
انا.. ايوة ياحبي
يوسف ..اهلين ياقلبي
انا..وين رحت حسيتك اضايقت
يوسف ..شوي لكن بعدين فكرت انك بتكوني العمر كله ليا جت على كم يوم المهم انك بتحطي راسك على المخدة حذاي  وبين احضاني
انا..نجيه اللي يفكر بعقل يارب
وسكرنا بعد ماحكينا شوي ورقدت طول بعد مع هبة دارتلي كباية حليب دافي مع قرفة وعسل وجاء ثاني يوم وعديت للكوافيرة ومشت معاي هبة ودارتلي مكياج يهبل وتسريحة نفس تسريحة امس بتغيير بسيط  وركبتلي الطرحة اللي كانت طويلة بطول ذيل الفيلو وروحت للحوشنا الثاني حوش عمو محمود لانه فاضي بيش نلبس. الفيلو غادي ولبست ولبستني  هبة الكاب وكلمت احمد وجن السيارات اللي بيعدن معاي ومامشوش معاي ناس واجد ومشت معاي من البنات اصالة  وهبة  وعمتو غالية اكيد ورغم ان الفرح لولد اختها لكن ماعدت لهم بكل وحتى لمايعاتبو فيها ويتصلو تقوللهن اهناك واحد يسيب عرس بنته ليمشي يحضر عرس ولد اخته
ومشيت وكان ديكور الصالة حلو ووانا في الاستقبال بتاع الصالة  تحولي هبة في الكاب جاء يوسف وطالع يهبل ومساوي لحيته ومخففها شوي وطالع انيق واجد وهمسلي
يوسف.. تهبلي ياعمري ملكة ياملكة قلبي وباس راسي وباسني على خدودي وحط ايده في ايدي وخشينا للصالة والفرقة دايرة جو من الاخير والفرقة اللي جايبينها مش عادية
وقمعز حداي يوسف وهو يتغزل عليا ومسك ايدي وباسها  وبعدها طلع والفرقة قايمة بالقدر وبعدين خش يوسف اخرى وخذا ايديا بين ايديه وباسني وطلبو منا نغيرو الدبل وغيرها ليا وغيرتها ليه وبعدها جابو التورتة وقصيناها وحط قطعة كبيرة في فمي قعدت برا من فمي وجاء كلاها  بفمه والصالة كلها عيطت وانا متت من الاحراج وفنصت فيه لان قلبي بيطلع من كثر الدق وطبعا دارولنا اضاءة هادية بيش نرقص انا وياه ورقصنا شوي مش واجد لانه كان مستعجل
انا..عليش مستعجل ياحبي
يوسف ..نحطك بين احضاني هذي بروحها نعمة عندي
انا..بسته على خذه لا شعوريا والصالة قلبتها عياط وطلعنا من الصالة وحطلتي هبة واصالة  كابي وتعبن عيوني دموع وعمتو غالية قعدت توصي في يوسف عليا
عمتو غالية ..دير بالك عليها حطها في عيونك راه قطعة من قلبنا راه نوارتنا
يوسف ..كوني هانية ياخالتي هي اللي وصيها عليا
عمتو غالية .. هي منغير وصى عارفاته تهني
جيتها  اضبطتها وبعدها هبة واصالة وفكنا احمد من بعضنا وباس احمد راسي وطلعنا