للقدر والنصيب كلمة اخرى

32

#للنصيب_والقدر_كلمة_اخرى

ح32
كان اجمل يوم بعمري وخشينا لفيلتنا الصغيرة ولقيتها تهبل ومش عادية احلى اثاث وديكورات والبنات رتبنها صح
يوسف ..نورتي حوشك حبيبتي
انا..منور بيك ياعمري
جاء يوسف وضمني بقوة
يوسف ..واخيرا وانا شهرين ومرتي وحلالي وحارمتيني حتى من بوسة بريئة
انا ..اهو تميت حلالك رسمي وتقدر ادير وتاخذ اللي تبيه
يوسف حولني من حضنه وهو ماسك يديا بين ايديه
يوسف.. اين ناخذ اللي نبيه ونا من بختي مامرضتي الا اليوم
انا ..انحرجت وطبست ماهو من التوتر جت قبل موعدها
يوسف شد ايديا الاثنين ومسكهن بايد وحدة والثانية رفع راسي بيها
يوسف.. امتى بتبطلي حشم انتي مرتي وحلالي ونور عيوني ولايهمك ياعمري نستناك العمر كله نا مش اسبوع او عشرة ايام
انا..بنظرة كلها حب هو اسبوع بس مش اكثر
يوسف.طبس عليا وباسني بوسة طويلة نين ارتخيت بين ايديه وقديش حسيت بيها وقلبي يدق بقوة
يوسف .حول من عليا ومازال رافع وجهي مقابل وجه انا تو مكتفي بهذه لعند مايفرج ربي
انا .. هههههه
يوسف ..سلم الضحكة وصاحبة الضحكة
انا ..تسلم
بنخش انحول الفيلو
يوسف ..بضحكة تبي مساعدة
انا ..لا شكرا بضحكة
وخشيت للدار وقبل مانسكر خش يوسف وقالي بناخذ بيجامتي حتى نا بنغير وخذاها وطلع
وانا حولت الفيلو وفرحت طبعا اني لقيته ساهل والسوستة انفكت بسهولة ولقيت الفالحات حاطلتي روب صايع بكل على السرير فتحت الدولاب وقعدت نشوف في البيجامات وخذيت وحدة مستورة وشيفون ثلاثة قطع ولبستها ومسحت وجهي بمزيل المكياج لاني مانحباش ورتبت شعري وفكيت منه البروش وطلعت لقيته مغير لبسته ولابس بيجامة تهبل طالعة عليه
يوسف ..ياهلا بالنور اللي نور قلبي وحوشي ودينتي
انا..واجد عليا هكي راه
يوسف ..انا مهما نقول مانقدرش نوصف فرحتي لانك في دينتي
تعالي في حضني طالما هذا اللي نقدرو عليه حاليا
انا ..ههه وجيته بكل حب وحنية وخذاني في حضنه زي ماتاخذ الام وليدها في حضنها
يوسف ..حبيبي تاكلي حاجة
انا..لا كليت قبل مانمشي للكوافيرة ومانحسش في روحي جعانة
يوسف ..الكوفيرة مشيتي ليها الساعة 2الظهر معقولة مازالتي ماجعتي لتو
انا ..شوفتك وانا بين حضنك شبعني
بالك انت حبيبي جعان انديرلك حاجة تاكلها
يوسف ..انقني جعان وفي عشاء واتي يبي تسخين بس
انا..هيي تو نوض انسخنه لك
يوسف ..وقمعزي حداي بيش الواحد ياكل ومقابله وجيه سمح زي وجيهك
انا ..حاضر
وصبيت سخنت العشاء وحطيت معاه مشروب غازي وعصير لي ورتبته على الطاولة وجيت بناديه لقيته خاش عليا
انا..تو كنت بناديك
يوسف ..القلوب عند بعضها
وتعشى يوسف ونحن نهدرزو وبعدها ضميت النعمة وحطيت الماعين في غسالة الماعين وخشينا للدار وقعدنا نتفرجو ونهدرزو نين لقينا روحنا راقدين ومانندري الا المنبه يرن على الساعة 11 الصبح نضت ولقيت روحي راقدة بحضن يوسف تحركت شوي وبصوت واطيييي
انا..يوسف يوسف حبيبي وسيفة
فتح عيونه وبنظرات كلها حب
يوسف ..نعم ياعيون وسيفة
انا...صباح الخير حبيبي
هيا نوض دوش ووتي روحك مابين وتيت فطور
يوسف ..حاضر
خشيت انا للحمام غسلت وجهي وغيرت بيجامتي ولبست فستان طوله محير وواسع بس طالع عليا حلو من الشيفون ومشطت شعري وشديته بالجنب وخشيت للمطبخ نوتي في الفطور
وانا كملت ترتيب السفرة ماعرفتش شنو يحب يشرب فطيبت قهوة وشاي وانا درت لروحي الكابتشينو على خشت يوسف
انا..صحة صحة حبيبي
يوسف ..سلمك
انا..هي الفطور واتي وتعرف ماعرفتش شنو تحب تشرب يعني المفضل عندك فطيبت الاثنين قهوة وشاي لان تقريبا ايام تعارفنا حكينا في كل شئ الا الوكال
يوسف ..ولايهمك العمر قدامنا ونتعرفو  الفطور نحب الشاهي والعصرية نحب قهوة عربية معدلة
وانتي
انا..في جميع الاوقات نحب الكابتشينو والشاي الاخضر
يوسف ..ان شاءالله في نسكافيه لاني الحق ماظنيش جبت مع الحاجات اللي شريتهن غريبة ماسئلتينيش عليهن
انا.. ماتخافش حبيبي لاني عارفة روحي مانقعدش بلاها لما جن البنات يوم التفريشة بعتت معاهن نسكافيه واتية ومضروبة وحطنها في الفريز
يوسف ..سلم الفالحة مهنية على روحها
انا..هيا حبيبي بيش نلحق نوتي روحي
يوسف ..هلك بيجو صح
انا ..لا لا هلي سبرهم مايشوفوش بنتهم الا عند الاسبوع لما تمشيلهم زايرة لكن بتجي انوار مع عمو وعمتو
يوسف ..اه شنو بيصبرك على هلك
انا ...هههه شنو بندير كان عادات هلك راه الواحد عرف كيف يغش لكن هذين عادات هلي ماعندي ماندير
هيا انا بنوض نوتي روحي
خشيت درت مكياج بسيط لكن حلو ولبست فستان احمر طويل من لوراء وقصير شوي من قدام وكمه لعند المرفق وقماشته دانتيل وفيه نفخة شوي وبرمت على شعري بالسشوار مع انه ناعم لكن زيادة الفرد وطلقته ولبست تاج فضي بسيط مع حذاء فضي وشنطة فضية وخش يوسف بعد ماكملت جاء وخذاني في حضنه
يوسف ..ياربي انا متزوج قمر يمشي على الارض
انا ..ضميته بقوة هيا حبيبي غير دبشك وتيته لك
يوسف ..عليك عوج انا نلبس عربي وانتي تلبسي عادي
انا..هههه عاد سبركم هالمرة شنو اندير جدتك قالت لي ان الكنة ماتلبسش العربي الا لما تزور هلها بعدين تجينا بيه
يوسف ...اه ههههه تعرفي مش متخيلك بالعربي بكل
انا ..عليش
يوسف ..لان استيالك وفيسك يمشي على اجنبي رقيق وناعم والعربي لبسة بدوية
انا ..هذي لبست بلادي ماعندي منين نهرب منها ونحب لبسته ديمة تسهف فيا لما نشوف مرا لابستها وبعدين تو تشوف كان ماطلعت بيه نهبل
يوسف ..والله لو تلبسي شوال تطلعي بيه قمر
انا ..ربي يحفظك لي شنو نطلعو
يوسف ..كملت العطر بس مازال
انا ..نحط كابي عليا
يوسف ..عليش وانتي لبستك مستورة
انا ..مش حلوة عروسة نطلع من غير كاب وفي نفس الوقت السترة كويسة نين ربي يهديني على المحرمة ونلبسها
يوسف ..ان شاءالله
انا ..شنو حبيبي تبيني نلبس محرمة
يوسف ..لا حبيبي كل حاجة بالقناعة
انا..ربي يخليك لي يارب
وركبنا في السيارة ومشينا لحوش جد يوسف اب امه لانه هو اللي مربيه وبنلقو خوته ومرت بوه وبوه وامه وراجلها عندهم كلهم وملتمين علي الغذاء