للقدر والنصيب كلمة اخرى

12

#للنصيب_والقدر_كلمة_اخرى

ح12
نضت الصبح ولبست لبسة حلوة سروال واسع زي الجيبة لونه بيج وعليه سورية قصيرة لونها وردي وكويش مخربش بين القهوي والبيج وشنطة بيج وطبعا شعري لميته رفعته فوق ودرته ذيل وطلعت
هبة ...وووووووه وين الاناقة هذي كلها
انا ...شنو قالولك عليا يامعفنة نشلتت قبل والله شنو
هبة ...عيب عاد انتي اصل الاناقة غير حسيت بحاجة حلوة زيادة اليوم
انا..غير بس اخر يوم في الامتحانات وفرحانة بنرتاح
هبة ...طبعا من قدك عاد حالك مش زي حالنا ياحنة بتعدي لطرابلس وابصر بعدها وين تسافري انتي الصيف ماتقعدي بكل
انا..قل اعوذ برب الفلق
هبة ..خزي عليك
انا ...هييي قبل ما نتاخرو
وصلنا للكلية وركبت للامتحان وكان امتحان ساهل بكل وطلعت اول وحدة وقعدت نزل بشوي عليا
ولما نزلت نسمع في زوز دكاترة يهدرزو على دكتور مادة قسم يوسف ويقولو ماكرهم مكر جايب ليهم امتحان الوقت كله مايسدهمش بيش ايحلوه
فقلت بيني وبين نفسي اكيد حيطلع متاخر
نزل هشام  اول واحد وبعده طول سند   وبعدها اصالة وهنادي  وبعدها هبة واحمد
وانا باستغراب
خيركم احمد وهبة نزلتو موخر الامتحان ساهل بكل
احمد ...يستر الله من كثر ماهو ساهل ودرت ولقيت روحي ملخبط واجد
انا..كيف ونحن المادة قريناها كلنا وساهلة هي مش صعبة
احمد ...والله ماني عارف يانوارتي  الحق لقيت روحي قالب الاجابات
انا..غير جاتك في هذي ساهلة مع انك اول سنة صفيت من غير مادة لكن جت في هذي ساهلة وانتي ياحنة خيرك طلعتي موخر ان شاءالله حتى انتي زي احمد
طبعا نسيت نقوللكم اهل احمد واهلي ماينادوش فيا عبير نهائي  نوارة القلب او يدلعو فيا نوارتي  طبعا بابا قبل بسميني نور لكن سماني على خاطر عمتو غالية كانت ديمة خاطرها في اسم عبير فسماني على خاطرها لكن نوارة القلب عشان في نفس اليوم اللي جيت فيه عمومحمود خش في صفقة كبيرة ويوم جيتي ربح الصفقة وبابا ترقى في منصبه فيقولو يوم جيتي نور القلب من الفرحة ومابيتش انقوللكم من الاول عشان ماتتخلبطوش في اسمي لما ينادوه اصحابي ولما ينادوني هلي وهل احمد لانهم الوحيدين اللي مسموح ينادوني بيه
هبة .. احرف منه انا الاجابات لقيتهن غلط كلهن
انا ..بحمق خيركم ياهمي انا مانبيش حد يعقب علينا نبو ديمة نكونو مع بعض وبحثث في الاخرين وقلت ليهم وانتو شنو درتو ان شاءالله مالخبطوش حتى انتو
هشام  ..انا في سؤال بس لخبطت فيه
وسند  وعبدالله  نحن تمام التمام و اصالة وهنادي حتى نحن تمام
انا ..يستر الله
هشام  ..عبورة اليوم فيك حاجة حلوة
هبة ..لبسة جديدة بس
اصالة ..من ورانا امتى طلعتي وشريتيها
انا ..والله لاطلعت ولاشئ وين بنطلع بالله والمحلات معظمهن دروج هدوم احمد وانوار طلعو جابوها لي عارفيني نحب الالوان هذي ونسقولي اللبسة
هشام  خبط الكرسي بالقوة وقال نا طالع
بحتنا فيه باستغراب واستئذن وطلع وطلع عبدالله وراه
انا..خيره هشام حتى في الامتحان حل كويس
سند  ..ماتركزيش بالك في حاجة اخرى صايرة ليه تو عبدالله يفهم منه ويشوفه كنه
انا ..رن هاتفي ولقيته يوسف
سيبت الشلة ورديت
اهلين
يوسف ..اهلين بيك
وين انتي
انا..في الكافتيريا شوي ونطلع لك
خشيت وبحتت في احمد فهمني طول
قلت ليهم شوي تو نجي
احمد ..قالي به
هبة ..وين
احمد ..بعد تجي تو تقولك
ورن احمد على هشام وعبدالله وقاللهم تعالو
انا ..طلعت ونوصف ليوسف في لبستي وهو يوصفلي في لبسته ولما قرب مني
جاني احمد يجري
انا ..خيرك احمد شنو في
احمد ..هاتي القيلات طالعة بيهن تو ينفجع الراجل
انا.. ههههه نسيتهن بكل
خذاهن احمد وطلع وجاني يوسف ويضحك وانا نشبحله ونضحك
وانا نقوله ..هو انت
ويوسف ..هو انتي
طلع اللي مسكني لما قريب طحت من الدروج اول يوم الامتحانات
يوسف ..سبحان الله الصوت كيف يتغير على التيلفون
انا ..شنو صوتي شين امنا
يوسف .. على الطبيعة او التيلفون صوتك يجنن
انا ..وشكلي
يوسف ..تجنني مع اني قلت ليك لو تطلعي عفريته مستحيل نتخلى عليك وانا
انا...حتى انت سموح وشكلك حلو
يوسف ..بنسئلك اللي خذا منك القيلات هذا احمد اللي تحكيلي عليه
انا..اه احمد ولد خالتك
يوسف صار تعرفي وسكتي ماقلتيش ليا
انا.. ماهو كان قلت ليك كنت حتعرفني
يوسف .. صار انتي نوارة  القلب امنا عبير شنو قصته طالما اسمك نوارة القلب انا ..حكيت قصة اسم نوارة القلب بس مش مسموح تناديني بيه راه كان بتنادي يبقى نوارة بس
يوسف ..عليش
انا..لان اهلي واهل احمد يحمقو حتى في عيلتكم لما ينادو فيا الاولاد احمد يدير في حالة البنات عادي عشان مايعرفوش اسمي عبير ولان اغلبهن ينادن فيا نوارة بس لكن اولاد عيلة احمد مرات يديرو في جو ويبو يحتكو بيا ينادو فيا هكي وكان سمعهم احمد او عمو محمود نهارهم احرف
يوسف ..نذكر مرة احمد ضرب سراج ولد عمه نين دخله للمستشفى وقالو السبب نوارة ان شاءالله على خاطر قالك نوارة القلب
انا ..اه بس كان سراج يقول فيها نوارة قلبي هزبه احمد وهزبه عمو محمود ويوم عملية عمتوغالية في المصحة نادني وماتجي الا في وذن احمد ماحزوه منه الا بطلوع الروح
يوسف ..احمد يعرف اني انا يوسف ولد خالته
انا ..لا لكن تو بنخش بنحكي للشلتي كلها عشان مانحبش اندس حاجة زي هذي عليهم وفي نفس الوقت مانبيش كل مرة احمد يفضلي جو على خاطر نحكي معاك مش حلوة في حق احمد 
يوسف ..غريبة احمد نعرفه طبعه واعر بكل غريبة متساهل معاك هكي طالما انه ليه سلطة قوية عليك
انا .. احمد صح واعر وكل حاجة انديرها لازم يعلم بيها تخيل حتى لو بابا وماما قالولي به على حاجة بنديرها لازم انشاور احمد وناخذ موافقته كنهدا مايحزها حزاز احمد واعر بس حنين ومتفاهم في نفس الوقت ومش عارفة لما حكيت ليه الموضوع سكت واجد بس ماحمقش مني ولاهزبني وقالي خليه نعرفوه من قبل وبعدين ساهل
يوسف .. هاكي المنديل وامسحي وجك مش عارف خدك شنو ملبزه
انا..خذيت المنديل وقلت اشبح شنو حتى وكال ماكليت بالك زيت من الوجه وقعدت نمسح فيه كله
يوسف خذا مني المنديل وشافه وقعد يضحك
انا..خيرك عليش تضحك
يوسف .. على برائتك ماضربتيش النقص
انا ..كيف شنو قصدك
يوسف .. وجك مافيشي شئ وقلت ليك خذك اللي ملبز وانتي مسحتي وجك كله كانك تاكدي في اللي شاك فيه
انا..باستغراب شنو شاك
يوسف ..الحق انتي قلتي ليا انك ماتحبيش الميكاج لكن لما شفتك بشرة صافية وبيضاء وخدود ورديات وشفايف كرز انقني شكيت انك مش صادقة معاي
لكن لما شفت المنديل كيف نظيف صدقتك وانحرجت من روحي وفي نفس الوقت ارتحت
انا... الميكاج مانحباش بكل انا من نوعية الناس نحب نهتم ببشرتي ونعتني بيها
يوسف ..ربي يحفظك قديش انا محظوظ
انا..هيا يوسف نكملو هدرزتنا بالتيلفون
عشان انا عمرهم ماشافوني مع شباب الا شلتي
يوسف .. باه تو نحكو سلام تو
انا ..سلام
خشيت على الشلة وقمعزت وقلت ليهم بنحكي ليكم موضوع