للقدر والنصيب كلمة اخرى

38

#للنصيب_والقدر_كلمة_اخرى

ح38
نضت الصبح وعلى قد مافرحانة اني بنشوف بابا وماما وعمو محمود وعمتو غالية وكبيداتي الزوز واحمد لان انوار قالت لي بيروح اليوم لكن في حاجة منغصة عليا فرحتى وتحسبت عليها من على الصبح على قد مانحس في قلبي موجوع
يوسف ..صباح الخير حبيبي خيرك مانوضينيش
انا..فطنت بيك تصلي في الفجر فقلت اكيد طولت مارجعت رقدت قلت خليك براحتك
يوسف .. به حبيبي جيعان وتي الفطور
انا..حاضر حبيبي
جهزت الفطور وطيبت الشاهي وانا خذيت كابتشينو بس وماعنديش نية نفطر نحس في قلبي مغموم
يوسف ..خيرك حبيبتي مافطرتيش
انا..ماخاطريش نحس في روحي من كثر ما فرحانة بشوفت اهلي نين ماخاطري في شئ
يوسف ..هانت وينفك الحصار
انا..ايه واخيرا
يوسف
حسيت بيها انها مش تمام ومانبيش نضغط عليها خصوصا اني خايف تكون سمعت باللي صار في حوش اهل منى والعركة اللي دارتها امال وامل وكان ماحزيناها منها راه امال قريب قتلت امل
وخايف تواجهني مانعرفش كيف نبرر ليها على الاقل بنصبر نستنى احمد نين يجي بيش يساعدني خصوصا انه يعرف بالقصة كلها خايف نفقدها كان نلقى نحطها جو قلبي ونسكر عليها لاتشوف ولاتكلم حد
انا..وين رحت
يوسف ..قاعد نفكر في الملاك اللي قدامي
انا..نحن لما بنسافرو بتكون الكلية بدت كيف بنديرو
يوسف ..كلمت عبدالسلام بحيث يكلم مسجل الكلية ويجدد لنا القيد وبعد مانروحو نبدو طول وربي يصبرني 
انا ..عليش ربي يصبرك
يوسف ..انا راه غيور موت راه كيف بيقعدو يشبحو فيك وانا بنتحمل وساكت
غير الحمدلله ماعندكش اختلاط واجد في الكلية الا في نطاق قروبك
انا.. انا طول عمري باحترامي يا يوسف وعمرا ماحد تعدى عليا شنو بيجد عليا
يوسف .. ماتلومنيش عبورة مايشوفوش فيك بعيوني
انا..حبيبي كبر عقلك وكون واثق فيا
يوسف ..عبورة الثقة ماليهاش دعوى بالغيرة
انا..بتخوفني منك
يوسف .. ماتفكري في شئ انا عارف شنو عندي انتي بيضاء ومستحيل ضني يمشي بعيد
انا..معاش تقول بيضاء خيرلك راه
يوسف ..هههههه  حاضر
انا ..هيا نوض دور وين تمشي الكوافيرة قريب تجي وحتى انوار وهبة بيجو واشقى لنا بغذاء 
يوسف ..عاد من قدك  انتي وحاضر تو نطلع نجيب غذاء
انا ..اكيد  دير بالك على روحك
يوسف ..هي سلام
شوي وجت هبة وانوار
وقعدنا نهدرزو وانوار اديرلنا في كابتشينو لي وقهوة ليها ولهبة وانا وهبة قاعدين نهدرزو
هبة ..شنو صار معاك امس
انا..ماصار شئ درت روحي عادي وجت عند اهل منى وشكل امال تعاركت هيا وياها لاني سمعت صوت هرجة لكن درت الحولة مانبيش نبين اني نعرف شئ ولما طلعت نصورو شفتها تراقب فينا من بعيد تلسونت على يوسف واجد بيش تشوف قديش نحن مع بعض وعمك يوسف ماصدق كمل اللي بديته 
هبة ..ههههه ماسحبتكش مكارة
انا ..طيبة وبيضاء زي ماتقولولي لكن لعند حاجاتي نتوحش
هبة ..ايوه انا نبيك هكي ديمة
انوار ..مفروض انتي اللي اضيفي مش نا يامعفنة
انا ..ضميتها قديش مرايفة عليك يامعفنة
انوار ..والله حتى نحن كلنا حتى احمد امبارح كلمني وقالي كبدي طايبة عليها
انا..يمشي المعفن مادورني بكل
انوار ..خزي عليك هو قال مانبيش نكلمها لاني مانقدرش انتحمل نبي نتعود على بعدها بالشوي وكان قعدت نكلم فيها ديمة معاش نقدر انتعود على بعدها
هبة ..صح عنده حق خصوصا انتي عاد مرات راجل تو
انا..بس الراجل شنو دخله في الموضوع ويوسف مش غريب عليه العلاقة اللي بينا ويعرفها كويس
انوار ..اهو هكي اريح حتى لاحمد
انا ..تنهدت وقعدنا نشربو في القهوة
هبة ..واخيرا اليوم عاد دخولك رسمي
انا..بحشم اه بس هو مايعرفش
انوار ..كيف
انا ..قلت ليه بكرة
هبة ..ليش
انا..المفجاءة حتكون حلوة بالذات الليلة بدل البيجامة يلاقني لابسة روب الدخول
انوار ..اختي طلعت صايعة في الحلقة الاخيرة
انا..صايعة مع زوجي وحلالي
هبة وانوار ..هههههه
انا ..هيا الحوش حوشكم خلوني ندوش قبل ماتجي الكوافيرة
خشيت دوشت وانا في قلبي فرحة اني تو بنولي حلاله صح مش على الورق بس بنولي مرته بحق وحقيق
طلعت من الحمام ولابسة كبوط الحمام ووتيت روبي بتاع الدخول حطيته على الكنبة اللي قدام السرير بيش نروح نلقاه جاهز وطلعت زبون يوسف وحطيته له في المربوعة بيش يغير ومعاه عطره وصباطه
وطبعا يوسف جاب الغذاء وطلع وتغذينا وضمينا حوستنا
وجت الكوافيرة وسشورت شعري قبل وقلت ليها اديره ليا كسرات بلقطة حلوة  لاني نبيهن بعد سلحت العربي بحكم الطرابلسي مش حيبان شعري منه
ومكيجتني واول مرة انمكيج مكياج ثقيل للدرجة هذي على خاطر العربي يبي مكياج ثقيل ولبستني انوار وهبة الذهب وطلعت نجنن بالعربي ماتخيلتش نطلع نهبل بيه هكي من كثر مايقولولي ان وجهي مش وجه عربي ويوسف جاء وخش للمربوعة لقى دبشه فهم عليا خش حمام المربوعة وغير دبشه وطلع ماتفهم شئ حتى هو
وطلعت عليه وهو يمشط في شعره وقف وطاح منه المشط وفتح فمه
طبعا هبة وانوار من بعيد يتفرجو بدون مايحس بيهم يوسف
انا..وسيفة خيرك حبيبي
يوسف ..فطن لروحه على قد مانقول قمر مش حنوصفك ماشاءالله ولاقوة الا بالله
وجاء ضمني بالشوي وبصوت عالي مراتي قمر ياناس ياهو مراتي غزالة وبعدت عليه
انا..وسيفة اعقل خيرك
يوسف ..معاش في عقل اصلا اللي هناك طيرتيه اليوم
انا..مش قلت ليك يطلع عليا العربي
يوسف .. انتي اللي طالعة عليه مش هو اللي طالع عليك
انا..تسلم ياقلبي
يوسف ..لولا هلك راه ماطلعتي اليوم ولاخليتك تطلعي حتى مابندير شئ لكن انتفرج عليك ساد
انا ..يوسف تحشم  تو يسمعنك انوار وهبة
يوسف ..كرني وخششني للصالة شور هبة وانوار انا مانديرش في حاجة عيب حلالي ومرتي وملاكي صح يابنات
هبة وانوار ..يضحكن وبس
هبة ..هيا بنطلعو نحن فتحي جاء وبنعدو نبرمو على الحوش تو اكيد  تعبا ناس
انا ..به 
طلع معاهم يوسف وانا قعدت نستنى في اهل يوسف يجو ومنى وعبدالسلام
ووصلت امال وعمتي عازة هما الاولين وبعدها جت عمتي سميحة وخالة يوسف صالحة ام سالم وام امل وقعدنا نستنو في عبدالسلام وشوي وجو ولبسني يوسف الكاب لاني قعدت حايسة فيه وركبني هو وامال وطبعا ماخلاش الامر من تعليقات الاعجاب من عمتي عازة وام يوسف ومشينا لحوش هلي وبعد السلام والبكاء رقت شوي وسئلت على  احمد قالولي مازال ماجاء طيارته في الليل موخر ماحصلش في طيارة الصبح طبعا نا صارلي احباط وانقهرت وطبعا شلتي كلها حاضرة الا احمد حتى هشام وعبدالله وسند  ماغابو لانهم هما اللي يعولو مع بابا وقايمين القدر الحق وجت المصورة وصورت انا ويوسف وكان ذايب بكل وانا فرحانة قلت هذا كله مايعرفش انه اليوم خلاص بنولي حلاله ومرته صح
وبعدين صورنا مع منى وعبدالسلام والعيلة كل مرة مع واحد وبعدها بابا قال خلاص ياسركم روحو وانا كله نطول على خاطر بالك نلحق على احمد
قعدت في داري نحول في العربي مع اصالة  وهبة وهنادي ونهدرزو ويوسف مكسد برا
لمن البنات بدلتي وذهبي قلت ليهن خلنه هنا ماعندي مابندير بيه وبكرة تو تجيبه انوار ليا ولبست قفطان شيفون مخصر وواسع من تحت لونه بيج هادي مورد باحمر ورد كبير وكمه كم ومنفوخ مشدود باسوارة وطلقت شعري لان الكوافيرة قلت ليها اديره ليا كسرات وحولت مكياجي الثقيل وهبة دارتلي مكياج خفيف
وطلعنا ونسمعو صوت هرجة بس بعيدة شوي جيت بنطلع ماخلاتنيش عمتو غالية ونسئل ماحد يرد عليا نين بابا جاني وبتكشيخ هيا اطلعي واستغربت بابا خيره حطت هبة الكاب عليا ولان برنوص الكاب نازال واجد ماشفت حد ونا طالعة ولما جاء يوسف يركب فيا دفني دف واستغربت من ردت فعله هذي ولما طلع بالسيارة رفعت برنوص الكاب ولقيت دبشه متبهدل وسئلته ماردش عليا حطيت عليه ايدي بيش ينتبه ليا دف ايدي بقوة نين حسيتها وجعتني على طول دمعتي نزلت خصوصا انه يجري بسرعة كبيرة ووصلنا حوشنا وانا خشيت مانفرز في حاجة من تصرف يوسف
وعلى طول. درست ورانا سيارة اخرى انا خشيت وشوي نسمع يوسف صوته عالي ولما بحتت من الروشن لقيت عبدالسلام شاده ويهدي فيه لكن مابانش عليا مع من يتعارك حولت الكاب من عليا وعدلت شعري ونستنى فيه بيش نطمن عليه
وسمعت الباب اسكر بقوة نين فجعني
وجيته
انا..خيرك حبيبي شنو فيك وخيرك متبهدل هكي
يوسف .بصوت عالي وواضح انه راقيتله بكل
يوسف ..انا تضحكي عليا يا كلبة ياحقيرة **********نا تكذبي عليا وتقوليلي صور مش عند حد الا احمد بس
انا ..طبعا دموعي شلالات من كلام يوسف اللي عمري ماسمعته حتى من بابا
فيش تقول انت احترم نفسك
يوسف ..مع اشكلات زيك نعتبر انا قمة الاحترام وماينفعش الا ان الواحد يتعامل معاك هكي
انا..غير فهمني شنو في ونرعش كلي على بعضي
يوسف ..شنو بنفهمك وانتي تضحكي عليا مفهمتيني انك نظيفة وانك ماعندكش علاقات وانك واضحة وطلعتي مسخة زيك زي غيرك صورك بدبش نوم معبيات تيلفون هشام  ياصايعة ياحقيرة انا ..كلمة امسخة نزلت عليا زي السهم في قلبي واخرى اني نسمع فيها من  الشخص اللي اليوم نكمل فرحتي معاه  وخشيت للدار بنجيبله مصحف وبنحلف عليه ان والله صوري ماعند واحد الا احمد وعمرهن ماكانن صور بملابس النوم انا خشيت للدار وهو جاء وراي زي الثور الهايج ودفني بقوة نين بصدري طحت على الكنبة اللي قدام السرير وحاجة زادت ضغطت عليا نين حسيت حرف الكنبة خش في صدري تاريته بعد دفني دلفني بكراعه
انا طحت وتما دم يطلع من فمي جاء شدني من شعري ولما لقاء فمي دم خاف وقعد ماسك فيا
يوسف
انا لما شفت الدم خفت وقعدت نقول لروحي شنو درت انا شنو درت
عبورة ردي عليا كنك
انا..مخنوقة بالدم اللي في فمي نبي نتكلم قعدت نرجع في دم دبش يوسف تعبا ودبشي ومانندري على حاجة الا ان يوسف طابني وحطني في السيارة وطلع بيا ونسمع في كلامه زي الخيالات
يوسف .. والله ماكان قصدي انضرك والله نحبك ونغار عليك والله ماقصدي سامحيني بالله والله بلاك مانسوى حاجة
وفعلا انا بلاها مانسوى حاجة ليش درت فيها هكي ليش ماطلعتش نين هديت وبعدين جيتها لكن خفت تطلع زي امل فيش تقول يايوسف عبير عمرها ماكانت زي امل الحقيرة
وفطنت لروحي اني قدام المصحة نزلت وانا انعيط وطابها في حضني الحقوني
جاء الدكتور كنها شنو في
انا .. بحتت في يوسف بنظرة كلها عتاب
وبصوت دوبك ماطالع طحت على حرف الكنبة قدام السرير وحسيت بحاجة غرزت في صدري
الدكتور ..هيا جهزو الصورة
وصوروني وطلع عندي كسر في عظمة القفص الصدري وجرحت الرئة لان كسر العظمة جاء كبير
الدكتور .. لازم مانخششوها للعمليات عشان نوقفو نزيف الرئة
وانا معاش نعلم بشئ
يوسف ..انا كنت في دوامة من الخوف خوف من شنو درت فيها وخوف من اني نفقدها وخوف من كل شئ على رنة تيلفوني لقيته احمد زدت خفت لكن خطرت عليا عبير لما همستلي مهما كان اللي فيا رد بالك تقول انك انت السبب
وهنا قلبي انعصر
يوسف ..بعبرة الو
احمد.. اهلين يوسف
معليش على الازعاج بس نرن على نوارة ماتردش قلت نجربك بالك هيا نش فاضية
يوسف
.رديت على احمد لان صوته كانه عارف حاجة
يوسف .. احمد عبير راه في المصحة وغرفة العمليات
احمد ..شنو اين مصحة هيا
يوسف ..مصحة ...
سكر احمد في وجهي وانا قعدت نبكي من جدي ونلوم في روحي شنو درت انا
احمد ..دموعي غلبوني وانا نسوق وكلمات رسالتها ترن في دماغي ونقول انا سيبتها انا خليتها لو قعدت احداها راه ماصارلها شئ ووصلت للمصحة وجيت  ليوسف على طلعة الدكتور
الدكتور ..اطمنو الحمدلله حالها كويس وبندخلوها للعناية لزيادة الاطمنان
وشير الدكتور على يوسف انت زوجها
يوسف ..اه
الدكتور ..من اول ماخشت وهي تنادي احمد وبس
يوسف ..احمد خوها 
احمد ..نا احمد  نقدر نخشلها يا دكتور
الدكتور ..تخشلها بس ماتحكيش معاها نين هي تفوق كويس
احمد ..به خش احمد ولبس الروب بتاع العناية
يوسف
انا جمدت في مكاني ماقدرتش اندافع حتى على حقي في اني نشوفها الاول
احمد
خشيت عليها وقمعزت احداها وشكلها  كيف منصفر وانا في خاطري سامحيني نوارتي والله ماعاد مسيبك حقك عليا ونزلن دموعي على ايدها اللي ماسكها بين ايديا
فطنت بيا ونزلت دمعة من عينها
انا..احمد واخيرا جيت
احمد ..سامحيني يانوارتي والله ماعاد مسيبك سامحيني ياقلبي
انا..بحتت فيه باتسامة
احمد ..حمدلله على سلامتك كيف صار وشنو اللي صارلك
انا ..بصوت واطي ويادوب بطلع الكلام مني
عثرت طحت على حرف الكنبة اللي قدام السرير غرزت فيا غرز لاني طحت عليها بقوتي ماشديت في شئ
احمد ..حمدلله على سلامتك ياقلبي
انا ..رديت رقدت
واحمد طلع وطمن يوسف عليا وقاله يعدي يغير دبشه لان هلها تو يجو يشوفك هكي يسحابوها كبيرة حالتها
يوسف .. وانا بكل الم باه وتو نتصل حتى بهلي
طلعت واتصلت بعبدالسلام
ولما وصلت لحوشي لقيته قدامي وحكيت ليه شنو صار معاي
عبدالسلام ..انا نبي نفهم شنو اللي صار بينك وبين هشام  نين هبلت هكي ودرت في عروستك هكي
يوسف ..ونحن عند هلها ونستنى فيها تغير في دبشها كان مقمعز بحداي هشام  وكان يبربش في فونه نادوه من  جوا سيب فونه وعدى سيبه متعمد او لا الله واعلم المهم عيني جت على الخلفية صورة ليه هو عبير انصدمت خصوصا اني لما سئلتها تصور معاهم عادي قالت لي انها تصور عادي لكن لازم كلنا مش مع واحد بس الا احمد طبعا وصورهم كلها مش عند الاولاد يعني لما يصور مع بعض يصورو في فونات البنات بس بحيث الاولاد ماعندهمش من الصور حمقت الحق وشديت الفون في ايدي وبمجرد ماسحبت فتح وخشيت على الاستديو لقيت صور واجد لعبير عنده بيبجامات النوم وملابس اعراس ومعاش قدرت نتحمل روحي جاني وشد مني الفون وقالي من سمحلك قلت ليه انت شنو يديرن صور مرتي عندك في فونك قالي صور حبيبتي وديمة تبعتلي فيهن ولولاك انت وبفلوسك ماخشيت حياتها راه تو هيا ملكي نا ومرتي تو ومعاش قدرت نتحمل تعاركت معاه وبعد روحنا لحقني للحوش وكان انت ماجيتش حزيت كنت قتلته وخشيت عليها مانشوف في شئ غير انها ضحكت عليا زي امل
عبدالسلام ..لاحول ولاقوة الا بالله معقولة تحط عبير بميزان واحد مع امل
يوسف ..الغيرة عمتني وخونت امل ليا معاش خلتني نشوف شئ
عبدالسلام ..يستر الله من ردت فعلها بعد ماتنوض لاني عارف فمك خارب اكيد ماعقبت عليها كلمة ومعاها مديت ايديك عليها
يوسف ..تخيل وانا شايلها بنخش بيها للمصحة قالتلي ماتقولش انك انت السبب اللي انا فيه
عبدالسلام ..خزي عليك ومعاها حطيتها في ميزان واحد مع وحدة حقيرة وتافهة حرام عليك يايوسف خربت حياتك
يوسف ..مستعد نتحمل منها كل شئ الا انها تسيبني وقلتها ونا نبكي بحرقة وندم
عبدالسلام ..هذي بنت تربت على الدلال والاحترام وماتعرف شنو ردت فعلها يايوسف
هيا خش غير دبشك ونمشو للمصحة اكيد هلها وهلك غادي تو
يوسف ..خشيت للدار قابلني الدم اللي معبي الفرشة وروب ابيض طايح بحذا الدم رفعته وشفته عرفته روب الدخلة وقلت في بالي ليش حاطته هنا وبعدين خطر عليا كلامها ونحن نصورو لما ضمتني قالتلي هانت حبيبي ساعات ونكون مرتك جد مش على الورق بس وانا نهرت وقعدت نبكي بصوت عالي وضام الروب بين يديا جاني عبدالسلام وطلعني وطلعلي دبش غيرت دبشي  في الحمام وطلعنا للمصحة
لقيت عمتي حواء وعمي عمر وخالتي غالية وعمي محمود وانوار وهبة وهنادي  واصالة  وامي وامال وخالتي عازة وباتي وخالد العيلة كلها خفت ومش قادر نحط عيني في عينهم وجاني عمي عمر بكل حنية
عمي عمر ..مافيها شئ بسيطة ماتشغلش بالك
طبعا بابا قعد يواسي فيه لما شاف عيونه وعرفه انه باكي واجد
يوسف ..ان شاءالله ياعمي مافيها شئ مانتخيلش حياتي بلاها
طلع احمد من عندها وقالي تبيك نوارة
يوسف ..انا جمدت مكاني وخفت ومش عارف باي عين بنقابلها