للقدر والنصيب كلمة اخرى

86 والاخير

#للنصيب_والقدر_كلمة_اخرى

ح86 الاخيرة
وقعدنا نهدرزو عادي نين جاء اسامة ورنيت على احمد وجاء وتعشينا مع بعض وفتحت انا الموضوع بعد ماعطيت لاحمد الملخص على السريع بيش يساعدني
احمد .. عدي ياسامة اقعد احذا مرتك وخلي مرتي تقعد حذاي
وجيت قعدت حذا احمد
احمد.. اصالة احكي شنو مزعلك من اسامة
اسامة باستغراب .. من يزعل من من
انا.. اسامة خلي اصالة تقول اللي عندها بيش انت تعرف وين المشكلة وتعرف شنو ترد عليها
اسامة بضيق.. به احكي ياصولو
اصالة بتحسر  .. ياه قديش ليا ماسمعته منك
اسامة .. ماهو انتي السبب
اصالة .. مهما كانن اسبابك بس مايخليكش تخوني
اسامة .. نخونك
اصالة .. اه
وحكت ليه اللي قالته ليا كله
اسامة .. ضحكة ضحكة كبيرة لدرجة كلنا استغربنا
احمد.. اسامة كنك هيا ماقالتش نكتة
اسامة بسعادة .. خطتي نجحت هذا ليش نضحك
انا واصالة واحمد.. خطة
اسامة .. اه انا حكيت لصاحبي على اهمال اصالة ليا وعلى قد مالمحت مافهمتش عليا فقالي جرب انها تحس ان في وحدة ثانية في حياتك وفعلا طول الوقت نحكي معاه على الفون والماسنجر والواتس بيش تشك وتغير عليا وتفطن لروحها والمشكلة انها زادات في اهمال روحها من كثر من نار الغيرة تاكل فيها وقعدت نتمادى بيش نبيها تتكلم ويعني لولاكم انتم راه مازالت نعاني اصالة انتي اهملتيني واجد وحجتك سما ورغم ان سما هادية ومسالمة حبيبة بوها وانا معاك ايد بايد حتى ايام الشغل عندك نشد فيها عليك ولما تكون عندك مناسبة نطلع بيها بيش ماتعبكش لكن انتي لاحياة لمن تنادي
اصالة ببكاء.. والله ماني عارفة نحس في كل شئ تما صعب عليا كأن الامومة امتحان وخايفة اني نفشل فيه
اسامة .. مسك ايدين اصالة كيف تفشلي فيه وانا معاك وايدي بايدك
اصالة .. سامحني على اهمالي ليك
اسامة .. ولايهمك حبيبتي بس معاش اديريها
احمد.. ديمة معاش ادسو على بعض اللي وجعاته حاجة من شريكه يجي يواجه بيش ماتكبرش وتتراكم ومعاش يكون في وقت للتصالح
انا.. احسن حل لحياة زوجية هانية انه الشريك يحكي لشريكه سبب ضيقه بس يختار الوقت المناسب للحكي
احمد.. هيا عاد نحن عطونا الاذن بعد ما اطمنا عليكم وربي يهنيكم ان شاءالله
اسامة واصالة .. امين يارب
اسامة .. مازال بدري خليكم
احمد بغمزة .. بدري من عمرك اكيد وراكم حاجات واجدة تحلوها
وطلعنا انا واحمد وفي السيارة
انا.. حبيبي مش ملاحظ قروبنا تقول ضرباته عين ماصلت على النبي
احمد.. عليه الف صلاة وسلام عليش
انا.. الايام اللي فاتن كنا نحلو في مشكلة بين وليد وهبة وبعدها سند يحل في مشكلة بين عبدالله وخالدة وانا وانت بين فتحي وهنادي وتو اسامة واصالة وهشام بين سندوسماح 
احمد.. صح لكن الحياة هكي ماتخلاش من المشاكل وحتى نحن مش استثناء لان اللي مرينا كبير واجد علينا وهذا ليش حاليا الوضع بينا هاني
انا.. بامارة التلفزيون من يومين
احمد.. هههه بس كيف تعاملنا معاه
من يومين
مقمعزة انتفرج على مبارة كورة وهو غير القناة وحط على مسرحية العيال كبرت حمقت منه وقلت ليه تو نتفرج عليها في الدار وخشيت للدار حطيت عليها وشوي وجاء وقالي خلاص تعالي نتفرجو على مبارتك كل شئ الا زعلك انا لا خلاص بنتفرج عليها هنا عدى احمد طفى شاشة الصالة وجاء وقالي نتفرج عليها هنا معاك وانا شوي وحطيت على المسرحية وقلت ليه تو نتفرج عليها في الاعادة كل شئ الا حمودي وخذاني في حضنه وتفرجنا عليها بكل حب وحنان
انا.. ربي يحفظك ليا
ومشن ايام يجرن بسرعة وتميت في الشهر السادس تعب صح بس تعب حلو واحمد واهلي كلهم محاوطيني وخشيت للسابع وومازال اسبوعين ونكمل الثامن ونحس في روحي خلاص معاش قادرة وكلمت عمتو وجاء احمد رفعوني للمصحة وبعد الكشف
الدكتورة .. ولادة مبكرة لازم انديرو عملية صعب تجيب طبيعي
احمد بخوف.. هي كويسة صح يا دكتورة
الدكتورة .. كويسة غير الولادة الطبيعة خطيرة على قلبها لكن القيصرية لا
احمد.. يارب سلمها واحفظها لي تمام يادكتورة
وخشيت للعمليات وبعد ساعات نضت لقيتهم كلهم معاي
انا.. ولدي وين
احمد.. يبوس في جبيني حمدلله على السلامة كويس ياقلبي ماتخافيش غير في الحضانة لانه صغير شوي
انا.. الله يسلمك ياقلبي متاكد حاله باهي
ماما.. والله بنيتي حاله باهي غير لانه جاء في السابع فاكيد بيكون في الحضانة يطمنو عليه
عمتو غالية .. حمدلله على سلامتك يتربى في عزكم يارب
انا.. يارب امين
احمد.. انتي كويسة حبيبي
انا.. كويسة لان اكيد بالمسكنات تو يستر الله في الباقي
قعدت ثلاثة ايام في المصحة وماغاب عليا حد وقروبي كل مرة يجي حد منهم وماما وعمتو مافارقوني وروحت للحوش ومعاي ولدي حبيبي اللي سمينه محمد لان عمو قال ماتسموش عليا فسميناه محمد على الرسول عليه الف صلاة وسلام ولان اسم احمد ومحمود من حروف اسم محمد وطبعا لان الدروج واعارات عليا فلقيتهم دايرين ليا سرير تحت ورقدني احمد عليه
احمد.. نورتي حوشك ياقلبي
انا.. تسلم ياروحي
وعطاني بوسة كبيرة قديش كنت مشتاقة ليها لان في المصحة ماخلونيش بروحي بكل معاه
احمد.. رايفت عليك واااااجد
انا.. وانا اكثر منك وضمني احمد بقوة نين قريب حسيت العملية بتنفتح من جديد بس ماتكلمتش لاني مرايفة لحضنه واجد
انا.. حبيبي جيبلي محمد نبي نرضعه
احمد.. شنو بترضعيه
انا.. اه من شنو بياكل امنا
احمد.. لا هذا ليا انا بس
انا.. حمودي مايكونش عقلك صغير الرضاعة الطبيعية فايدة ليه وليا وبعدين ربي قال وفطامه في عامين
احمد.. اه بترضعيه عامين
انا.. اه اذا هو ماسيباش
احمد.. الصبر يارب جبت شريك لعمري بروحي
انا.. ههه واحلى شريك قطعة منك و مني
احمد.. وهو يمدلي في محمد ربي يحفظك ويحفظه
انا.. امين
احمد.. يشبه من
انا.. نحس فيه مزيج بيني وبينك
احمد.. ايش مايكون شكله المهم انه هو خلاصة حبنا وربيع قلوبنا
انا.. ان شاءالله بس مش حنديرو فرق بينه وبين خوته اللي بيجو
احمد بعصبية .. اي خوت هو وبس
انا باستغراب .. شنو شنو قصدك
احمد.. انا ماعنديش استعداد نمر بتجربة عذابك وكل لحظة بتمشي مني وانك بتفارقيني في اي لحظة صعب مانقدرش صعب نوارتي وهذا كله كوم وانا واقف نستنى فيك في حجرة العمليات وانا نحس بروحي تطلع وخايف معاش تطلعي منها صعب مانقدرش نمر بيه ثاني 
انا.. عيوني دمعو يعني بتخلي ولدي بروحه زيك مع ان انت يا حبيبي ربي عوضك بيا وبي انوار ومحمد وموسى لكن هو ربي بمن بيعوضه
احمد.. خواله موسى ومحمد وعبدالله واحمد وارين وسما وملك هذوم نسيتيهم والله شنو
انا.. بس مش خوته
احمد.. وانتم ماكنتوش خوتي لكن عمري ماحسيت بغير هكي انهي نوارتي الكلام وماعنديش استعداد انراجع فيه واصلا انا قلت للدكتورة تكتبلك حبوب منع حمل مايضركش لانك بتكوني مرضعة
انا.. حاضر حبيبي وانا خاطري واجعني
جاء احمد وضمني انا وولدنا في حضني وباسني على جبيني وبوسة خفيفة على فمي
احمد.. حبيبي ماتزعليش مني انا كنت مستعد نقعد من غير صغار بكل ولانخسرك وربي الحمدلله جبر بخاطرنا بمحمد عشان ماننحرموش من الصغار لكن ماعنديش استعداد ثاني نمر بتجربة خسارتك
انا.. خلاص حبيبي وربي يقدرنا ونربو ولدنا بخير وصلاح
احمد.. امين
ودرنا اسبوع لمحمد كبير  واجد تقول عرس ومشن ايامنا ونحن بقمة السعادة يمرن بينا المشاكل المعتادة الخفيفة وغيرة احمد من محمد مع ان ولدي مايقعد معانا واجد وهو ديمة بين جدوده
واحتفلنا بذكرى ميلاد محمد لسنته الاولى والتمينا كلنا وشرا احمد وعبدالله وسند وهشام ووليد وفتحي ووسيم واسامة قطعة ارض كبيرة وقررو يبنو فيها استوديهات صغيرة لكل واحد وعائلته بحيث نكونو ديمة مجتمعين فيها بالذات بعد كبر عائلاتنا ودارو فيها مكان للعب الصغار وعشبوها كلها وزرعو فيها شجر واجد وحمام سباحة مغلق وخلوها مزرعة تهبل ومع استوديهتنا الصغيرة دارو فيها صالة كبيرة بحيث نجتمعو فيها كلنا للعب او لوجبات الاكل  وطبعا تزوج هشام ووجدان من فترة وعرسهم كان عائلي بينا نحن بس لان هشام كانت عنده حالة وفاة ومعاش قدر ياجل الفرح لان كان موعده محدد والايام تمشي وخذتنا الدنيا لكن اجتماعنا كل اسبوعين في مزرعتنا ماتغيرش بكل ووقفونا لبعض في الاحزان قبل الافراح مانقصش ارتباطنا ببعضنا زاد اكثر بارتباط صغارنا ببعضهم واحتفلنا بذكرى ميلاد محمد الثانية مشيت للدكتورة بدون مايعلم احمد واكتشفت اني حامل في شهر لاني سيبت الحبوب من حوالي اربع شهور لان الدكتورة طمنتني قالت ليا ممكن اللي مريت بيه في حملي الاول ما نمرش بيه في حملي الثاني وصليت استخارة وتوكلت على الله وبطلت الحبوب وطبعا ختمت القران حفظ ولله الحمد واحمد دارلي حفلة كبيرة وذبحلي بدل الجمل اثنين وتصدق واجد بمبلغ كبير لان  من القصة اللي صارت لنا زمان تمينا كل حاجة تصير لينا سوى فرح او حزن لازم  نتصدقو ونحمدو في ربنا على كل شئ وطبعا كنت خايفة من رد فعل احمد ومانقدرش نقول لحد قبل مانقوله ساد المرة الاولى مازالت واجعته لتو وجت لحظة المواجهة
انا..حبيبي
احمد.. ياروح حبيبك وقلب حبيبك
انا بتوتر.. بنقولك حاجة
احمد
كان في ايديا اوراق انراجع  فيهن لكن حسيت التوتر في نبرة صوتها خفت الحق خفت عليها
احمد بخوف.. شنو حبيبي وكنك متوترة هكي
انا.. بنقولك حاجة وخايف تزعل مني
احمد.. انتي عارفتيني مانقدرش نزعل منك
انا.. حبيبي انا حامل
احمد بصدمة.. شنوووووو
انا.....
احمد بعصبية .. نحن شنو كان اتفاقنا محمد وبس وبس صح او لا تكلمي ليش درتي هكي عشان ليا ستة شهور معاش تابعت الحبوب معاك ليش مصرة انك تعذبيني ليش مصرة انك تحرقيني ليش حرام عليك يانوارتي حرام عليك شنو درتلك انا
انا
وهو يحكي وانا قلبي يتقطع عليه كيف حسيت انه فعلا خايف خايف هذا اللي شفته في عيونه الخوف
انا.. حبيبي اسمعني بس
احمد.. انا مش حبيبك لاني لو حبيبك مادرتيش هكي وتخليني نعيش اللي مريت بيه في حملك بمحمد
انا وجيت شديت ايديه.. غير اسمعني حبيبي هو في خير من رايي ربي
احمد باستغراب .. كيف
انا.. لاظلم من استخار ولاخاب من استشار وانا استخرت ربي قبل مانسيب الحبوب وبعدين حبيبي ربي كاتبلي بحمل ثاني حتى لو قاعدة لتو ناخذ في الحبوب وبعدين حتى الدكتورة قالت ليا احتمال كبير اني مانمرش بلي مريت بيه بحملي بمحمد لان وقتها اصلا كنت ضعيفة ونفسية مش تمام لكن تو انت معاي من الاول وانت علمت قبل اي حد وبتكون معاي خطوة بخطوة فحتكون نفسيتي رايقة وصحتي تمام انا هكي قلبي حاسس لانك معاي
احمد.. بنطلع تو نجي
وطلع احمد وانا مابيتش نقوله شئ اكثر من هكي لان اكيد بيمشي لسند وتو يهدا وفعلا احمد مشى لسند
عند سند واحمد
سند .. المفروض تفرح يا احمد لان اهو ليها شهر حامل وصحتها ماشاءالله معناها مش تعب زي حملها بمحمد
احمد.. خايف ياسند خايف
سند.. مانيش لايمك على الخوف لكن عيش فرحتك وفرحتها بالحمل هي ماتبيش محمد بروحه ماتبيشي ينحرم من حاجات انت انحرمت منهن
احمد.. بس هيا وانوار عوضوني وناعمري ما حسيت بنقص
سند.. بس الوقت تغير ومن قالك ان ارين وملك وسما وعبد المالك واحمد يكونو لمحمد زي ما عبير وانوار كانو ليك شنو الضمان واكيد عبير هذا شعورها
احمد.. عندك حق بس مازالت خايف
سند .. افرح معاها وخليك خايف عليها وعدي ياسيدي للدكتورة وتابع حملها معاها خطوة بخطوة بس افرح ماتخليش الخوف يخطف الفرح منك
احمد.. والله فرحان اني بتكون عندي قطعة ثانية من نوارتي ونتمناها تطلع بنت تشبه امها بس خايف
وروح احمد للحوش وهو جايب معاه وردة بيضا وشوكلا
احمد.. مبارك حبيبتي وربي يفتح عويناتك على خير يارب
جيت ضميته وقعدت نبكي
احمد.. عليش الدموع تو
انا ومازالت في حضنه .. من الفرحة
احمد.. حتى انا فرحان لكن خايف عليك يانوارتي
انا.. الاعمار بيد الله حبيبي
احمد.. ونعم بالله
جبتلك شوكلا
انا بفرحة .. كادبوري
احمد.. والله مخرومة
وقعدت ناكل في الشوكلا بفرحة وفرحانة ان احمد تقبل الحمل وعدى معاي ثاني يوم للدكتورة وطمناته عليا وبعدها بلغنا العيلة وفرحو كلهم وكانو خايفين من ردت فعل احمد لكن لما شافوه فرحان فرحو واجد حتى هما وفعلا مشى حملي عادي جدا بدون اي تعب او وجع الا دوخة الصبح المعتادة واحمد محاوطني بحبه وحنانه وخوفه الزايد لدرجة طولت في النوم مرة اصر انه يرفعني للدكتورة ومارتاحش نين قالت ليه الدكتورة انه طبيعي في حالتي ومافيش خوف ومشن الايام وكملت التاسع وجاء موعد ولادتي لكن الدكتورة قررت العملية لان طبيعي صعب نولد وفعلا خشيت غرفة العمليات وربي رزقني ببنوته سمحة تهبل خذت من شكلي واجد
احمد.. بنيتي شاطرة طالعة زي امها
سند.. تكبر شوي يبدو العرسان طابور عليها
احمد.. اي عرسان تخلل معاي بنتي مانيش وعطيها لحد
انا.. شنو حبيبي بتسميها
احمد.. عبير
ماما.. عليش ما امها عبير
احمد.. عشان تقعد عبير محاوطتني من كل جيهة ومعاي ديمة
عمتو .. ربي يحفظكم لبعض يارب عبير عبير
عمو .. ان شاءالله تفرح بيها وتطلع زي امها
بابا.. طالما نحن معاها ومع محمد اكيد بيطلعو زي بوهم وامهم
احمد.. انتم ربيوتنا وتو بتربو ولادنا بيش يطلعو زينا
ماما.. العمر معاش فيه يا حبيبي
انا.. يعطيكم طولت العمر يارب نين تزوجهم وتفرحو بيهم
وقعدت طبعا ثلاثة ايام والقروب كل مرة جايني حد نين روحت وبعدها درنا اسبوع كبير لعبير
انا.. فرحان حبيبي
احمد.. عشان انتي بخير فرحان واجد واجد وان بنوتي طالعة شبهك
انا.. ههه صغارنا تقول احتكار حتى محمد ماشاءالله واخذ منك لون البشرة بس وشكله بيطلع طويل زيك والباقي انا
احمد.. وهو يطول يبقى شبهك بعدين يبدن عليه البنات عرايك
انا.. ههههه ربي يعينه ويحفظكم لي يارب
وبعد 14 سنة
مشن بحلوهن ومرهن فقدنا ناس من حبايبنا فقضاء الله ليس امامه شئ  واسرتنا زادت اطفال اكثر فهبة ووليد رزقو بطفلين ادهم وليلى وطبعا البكر حبيبي الصغير احمد اللي تو عمره 14
واصالة واسامة بعد سما رزقو بوسام وايهم
وعبدالله وخالدة بعد عبدالمالك رزقو عبد الرحمن وعبد المهيمن وخولة
وسند وسماح رزقو بعد ارين بي اريام واسرار وفهد
وهنادي وفتحي رزقت بي اوس ومحمد
وهشام ووجدان رزقو بي توأم ماسة وادم بعد معاناة ورحلة علاج انتهت بالزرع
انوار ووسيم بعد ملك رزقو بتوأم ايهم وادهم وبعدهم ياسمين 
وانا واحمد بعد محمد وعبير معاش فكرنا في الصغار وفرحنا بيهم واكتفينا محمد واخذ شخصية بوه وشكلي بس بلون بشرة احمد وجسم احمد وطويل زيه وعبير خذت كل حاجة مني بس بانوثة طاغية رغم صغر سنها ومعاها نعومتها ودلعها زايدها انوثة
ونجتمعو دائما كل اسبوعين في مزرعتنا الكبيرة اللي تمت مليانة ضجة ولعب صغارنا وعرايكهم الحلوة اللي تخلينا اليوم كله ونحن نضحكو عليهم نقعدو فيها ثلاثة ايام نسرقو فيهن في الشهر مرتين من زحمة الدنيا وصخب الحياة واحمد الصغير عشقي طبعا هو معاش صغير عمره 14 سنة وديمة حبيبي يغير منه ويوم ونحن في الصالة الكبيرة مجتمعين والصغار اللي يلعب واللي يقرا واللي يعزف واللي يغني
عبير بنتي ببكاء.. يابابا تعال لاحمد والله فددني
احمد.. كنك عبورة شنو دارلك هالمرة
على خشت احمد الصغير وطبعا بكاء عبير كلنا قعدنا منتبهين ونبو نعرفو هالمرة احمد عليش مبكيها
احمدالصغير.. امس في المدرسة لقيتها تحكي مع الخرا سليم
عبير بدموع .. هو اللي وقفني لانه كان غايب يبي الدروس اللي فاتوه
احمد الصغير .. وليش انتي بس ياخذ منك انا من الاول قلت ليكم فكونا منها المدرسة هذي
انا.. عيب عليك يا حبيبي الصغير هذي ثالث مدرسة ننقلوكم ليها
احمدالصغير .. ماهو انا مانبيش نمد وجهي نين نلقى عبير واخذها واحد مني زي مادار باتي احمد ليك اللي لولا #النصيب راه خسرك طول عمره
كلنا بصدمة ودهشة
احمد..هههه  مش قلت ليك ماتحكيش لاحمد قصتنا انتي اللي تشطرتي لما سئلك
وليد .. عيب يا احمد شنو  تحكي انت
انا.. خليه ياوليد احمد ربايتي وانا نتفاهم معاه
وليد .. اصلا ماكبر راسه الا انتي
احمد الصغير .. انا ماقلتش حاجة غلط  مازالن لي 6سنين ويكون عمري 20 وهي تكون 18 وتخطبوها رسمي لي وبعدها بسنتين زواج  انا مانبيش نستنى نين نكبر وياخذها واحد مني
انا.. هيا لك طالما هيا تبيك حتى من غير خطوبة
احمد وهو ضام عبير ليه .. والله طلع افلح مني حتى بنتي تنحب شبه امها ههه وهذا اللي بيجنن احمد الصغير منها والحلو ان عبير بنتي تبيه رغم صغر سنهم
احمد الصغير .. لا يا امي نوارة عبير لازم تكون مخطوبة رسمي ليا عشان لما نشد اي واحد حاول يقرب منها مايقوليش انت شنو تقرب ليها
انا واحمد قعدنا نشبحو لبعض ونضحكو وطبعا هيسترية ضحك انطلقت فينا كلنا لان فعلا الضحك معدي بالذات لما يكونو صغارك السبب فيه
احمد الصغير خذا عبير من حضن بوها
احمد الصغير .. معاش تحضنها واجد ياباتي انا مانتحملش
احمد.. امشي يامعفن تتحكم في بنتي من تو
انا.. ههههه زي ماكنت اديرلي
احمد حضني بعد ما احمد الصغير خذا بنتنا وطلع بيش يراضيها .. تعرفي ياقلبي احمد وعبير كانهم انا وانتي تو غير احمد الصغير اذكى مني عرف انه يبي عبير بدري ومايبيش يخليها اضيع منه كيفي لكن الحمدلله كنتي لي في الاخير 
انا.. لان  ربي اراد انا نكونو لبعض لان #للنصيب_والقدر_كلمة_اخرى
انتهت