للقدر والنصيب كلمة اخرى

4

#للنصيب_والقدر_كلمة_اخرى

ح4
هبة ...صباح الخير عمي عمر
انا ... صباح الخير بابا وبسته
بابا ... عطلتي في النومة نوضتك اكثر من مرة قبل ماتجي هبة وايست منك سيبتك نين جاتك هبة
انا... والله يابابا رقدت موخر وعمتك هبة تنخصني في جنبي قريب عيطت
تلفتت ليها وعطيتها نظرة هيا تعرفها شنو معناها
هبة ... عطتني نظرة نهاري احرف منها معناها اليوم كله بيمشي على راسي خلتني مابين ماوصلت للكلية نفكر كيف نبلط منها
وصلنا للكلية سلمت على بابا وخشينا
طبعا بابا انسان رغم مركزه الكبير في الدولة الا اننا نعتبرو ماديا حالة كويسة برغم مركزه مفروض نكونو احسن بواجد من هكي  لانه ماشي بمبدا قرش حرام مستحيل يخش حوشي ولان جدي الله يرحمه من حفظت القران وامام جامع كان مش غريب علينا تفكير بابا يكون هكي وراضيين الحمدلله لانه مش منقص علينا شئ  وبابا حنون واجد لدرجة حتى الولاد لما يبو حاجة من اباهاتهم يجو لبابا بيش يكلمهم ومتفاهم واجد ووعطيني حرية لابعد حد لانه عارفني كيف بنستخدمها لكن طبعا هو عطى الحرية لكن موكل احمد بينا خشينا للكلية وانا نهزب في هبة وقالبة وجهي عليها طبعا زودت العيار حبتين هههه بيش مانعطيهاش فرصة تسئلني على شنو اللي مسهرني
خشينا للمحاضرة بعد ستين ترجية للدكتور لكن صارت معاي حاجة غريبة
طبعا اليوم كانت محاضرة مشتركة مع قسم ثاني لان المادة مشتركة بينا ولانهم هما مش واجد عدد الطلاب جمعونا مع بعض اللي صارلي من اول ماخشيت للمحاضرة وانا قلبي يدق في دق مش طبيعي طبعا شفت قروبي لقيت احمد مش جاي انشغلت عليه وقلت اكيد قلبي يدق على خاطر مشغولة على احمد ومشت المحاضرة طبعا رغم وعارة الدكتور الا ان المادة غالية عليا وشاطرة فيها وديما نرفع في ايدي والدكتور لانه مافيش حد يرفع في ايده غيري ماليشي الا ينوض فيا على كل سؤال يسئل فيه وطبعا مايخلاش الامر من انه يهزب مرة مرة في الطلبة وكلهم يشبحولي بنظرة كان يلقو يكسرو ايدي اللي نرفع فيها
وكملت المحاضرة وطلعت بسرعة نتصل بي احمد نبي نطمن ونعرف خيره قلبي
انا ... الو احمد
احمد... استغربت اللهفة في صوت نوارة اهلين نوارتي 
انا ... انت كويس مافيك شئ خيرك ماجيتش للمحاضرة
احمد
زاد استغرابي صحصحت كويس
احمد ..بشوي شوي بيش نعرف على شنو نرد
انا كويس مافيا شئ وماجيتش للمحاضرة راحت عليا نومة ونضت موخر لانك مانوضتنيش زي المعتاد
فقلت مانيش جاي لاني عارفة مش حيدخلني تسحابيتي زيك حتى تتاخري شوي بكلمة منك يدخلك
انا... تنهدت تنهيدة كبيرة وقلت
الحمدلله مافيك شئ معاش اديرها مرة ثانية  وانا بروحي وعيت موخر لولا هبة والمفروض بعتت رسالة فاهم  عشان مانشغلش عليك وسكرت بحمق
احمد
بنرد لقيتها سكرت في وجهي لكن الاستغراب خلاني نوض ونغير دبشي ونمشي للكلية
انا ... انكلم في قروبي كلهم الولاد والبنات
اسمعو مرة ثانية اللي يتاخر والله اللي عارف روحه مش حيجي للمحاضرة او للكلية او موعد بينا يبعث رسالة ويطمنا مش نقعد نغلي عليكم
كلهم شبحولي باستغراب
سند  ...كنك عبورة شنو جد عليك
هشام ...اليوم مش تمام من اول ماخشيتي للمحاضرة وانتي وضعك مش مريح حتى وانتي تجاوبي حسيت في حاجة مش تمام
عبدالله ... كنك ياعبير اليوم مش طبيعية اصالة  ... امنا خدودك اللي تقول دايرة ليهن احمر خدود
انا
عطيت نظرة اصالة  هيا عارفتها
اصالة
عطتني نظرة بمعنى سكري فمك بحكم عبير ماتحبش الدوة هذي قدام الولاد لانها رغم وعارتها وشجاعتها الا انها تتحشم في حشم يخليني مستغربة منها
هبة وهنادي ... عبورة مريضة شكلك
انا ... رديت بعربدة
خيركم مع امي مافيا شئ غير  من اول ماخشيت للمحاضرة وقلبي يدق وبس ماعرفتش خير امه ولما لقيت احمد غايب خفت تكون صايرة فيه حاجة
هشام  ... تخافي علينا لهدرجة
انا ... انتم قطعة من قلبي ورفقة عمري كيف مانخافش عليكم والله مانتخيل حياتي بلا واحد منكم وانا نحكي كان صوتي عالي شوي انتبهت على روحي
ضمتني هبة وهنادي واصالة  والله حتى نحن نحبوك ومانرضو حاجة فيك
هشام وسند وعبدالله ... هي ماتقلبوهاش مناحة
سند ... حاضر ياعبورة اي واحد فينا بيتاخر او ماهوش جاي نبعتو رسالة
هشام  ... خطرها شنو رايكم انديرو قروب على الفايبر وهكي حتى اللي بيبعث رسالة تجي للكل
عجبتنا الفكرة ودرنا قروب على الفايبر وسميناه اصدقاء العمر
طبعا نحن في النت مش واجد زي غيرنا لان ديمة مع بعض وحتى اللي داير حساب على الفيس تقريبا مش ضايفين غيرنا واهالينا وخوتنا بس يعني نفس الاصدقاء المضافين عند كل واحد وحتى اللي انزلو فيهن تلقي الكل عارفهن
وانا قاعدة نسقو في خلفية القروب ونختارو شفت احمد جاي سيبتهم وجيته قبل مايوصل على اساس بنهزبه لكن لما وصلت حسيت روحي رقت لما اطمنت انه مافيه شئ
احمد
شفتها جاية استغربت وقلت كنها نوارة تصرفاتها هكي اليوم شنو صاير ليها
انا  ... اهلين حمودي كيف حالك بخير قلتها وانا رايقة خلاص عاد بعد فشيت خاطري
احمد ... كويس نوارة انتي اللي كنك مش تمام اليوم
وصلنا في القروب وحكوله كل شئ وقالوله على القروب وانا في الوقت هذا سرحانة ماعرفتش شنو السبب اللي مخليني هكي ومع هذا كله قلبي ماوقفش زيادة دق ووصلت للاخير انا ضغطي هابط
فقلت للبنات هيا نمشو للكافتيريا بناخذ منهم ملح
شبحولي كلهم باستغراب لكن ردت فعل احمد طبعا اوفر شوي بحكم علاقته بيا اقوى بحكم اني فتحت عيوني عليه ومرات نحس فيه كانه بوي مش خوي بس
احمد
الحق خفت عليها لان نوارتي من هيا طفلة وانا نعرفها فتحت عيونها عليا بحكم انا اكبر منها بسنة بس ماخشيتش للمدرسة نين هيا خشت عشان نكون معاها وقتها صغير مانعرفش الا هيا وخوتها بحكم اني وحيد ماعنديش خوت
احمد... كنك نوارة نرفعك للمستشفى شكله ضغطك هابط طالما تبي ملح خليني نرفعك للمستشفى حتى تقيسي ضغطك
انا ... لا مش مستاهلة حمودي تو ناخذ ملح ونشوف كان تعدل نبض قلبي باه كنهدا تو ترفعني
احمد ... خلاص اقعدي تو نعدي انجيبلك ونشوفلك بالمرة كان عندهم عصير ليمون فرش
انا ... باه
عدى احمد ومعاه عبدالله
احمد وعبدالله  جو وجايبين معاهم عصير لينا كلنا
ومدلي احمد الملح خذيت منه وشربت العصير حسيت روحي رقت لكن قلبي قاعد زي ماهو لكن معاش ركزت عليه
سند.. اليوم راكم تنسو العشاء عندنا
نحن ... مش ناسيين
طبعا اليوم احلام دايرة عشاء لصحابتها  قبل الفرح بوقت بيش تبدا رايقة لصاحبتها وتلحق تهدرز معاهن ونحن بنروحو لحواشينا ناخذو دبشنا وبنعدو ليها طول بنعولو معاها لان احلام  ماعندهاش خوات بنات وماعندهش الا سند  و شاهين  بس اولاد
انا ... يابنات بعد المحاضرة نروحو طول ونتلاقو عند احلام
حضرنا المحاضرة وروحنا خذينا دبشنا ومشينا تكت عليا هبة رافعنا خوها الكبير وتكينا على هنادي واصالة  بحكم في حي ثاني بيجبها بوها لحوش اهل سند 
وقعدنا نعولو ونساعدو في عمتي عزيزة على خاطر العزومة وطبعا نحن زي بناتها وماسكين كل حاجة ليها ومشت عزومة تهبل وحلومة طلعت زي القمر وبهدلنا الشباب ونحن نبعتو فيهم وقعدنا نهدرزو ونحن نشرفو على العاملات وهنا يضمن في الحوسة وبعد خلاص تمينا كل شئ قررنا نباتو عند احلام وبتنا وكل وحدة فينا مشت للكلية بنفس لبست اليوم اللي قبله طبعا الشباب قعدو يعلقو علينا لانهم عارفين ان نحن مانحبوش نلبسو اللبسة يومين في جرت بعض
انا ... نشوف في مذكراتي لقيت روحي ناسية الشيت بتاعي في القاعة
قلت ليهم بنركب نجيبها ونجي
هبة ... نمشي معاك
انا ... لا مش لازم انتو اشقو بشنو بتوكلونا جعانة على الاخير من فطور عمتي عزيزة ماكليت شئ
هبة ... يافجعانة
اصالة ...حرام عليك ياهبة عبورة اقل وحدة فينا كلت نحن اللي كلينا تقول ديناصورات
عبدالله...تو نمشي نجيب ليكم سندوتشات
وانا ركبت للقاعة
احمد
في حاجة مش عارفة شنو هيا قالت لي امشي اركب وراها ومعرفتش السبب لكن طلعت وراها
هشام  ... وين احمد
احمد ... بنمشي وراء نوارة 
هشام 
قلت احمد كنه لكن لاني عارف علاقة احمد وعبير واجد وديمة احمد يعامل في عبير كانه بنته مش صديقته او اخته بس
انا
راكبة على الدروج وطبعا بحكم الحادث اللي تعرضت ليه الدروج مانقدرش نركبهن بسرعة ورغم ان القاعة في الدور الاول وشوي وحسيت واحد مسكني من ذيل شعري طبعا شعري طويل واجد وديمة نحبه انديره ذيل والتفت عادي بدون خوف لان الحركة هذي الوحيد اللي يقدر ايديرها ليا احمد حتى قروبي الولاد مايقدرش حد يتجرا ويدير هكي لكن بمجرد ما التفت انصدمت لقيته واحد مانعرفاش ومانندريش على روحي فكيت شعري من ايده وهو مبتسم ومانندري على روحي والا انا وعطيته هداك الكف نين سمعته رن وبنفتح فمي بندوي
مانشوف الا احمد هاد عليه وبدى فيه ضرب وانا نحز في احمد والتمو الشباب وجو عبدالله  وهشام وسند قعدو شادين احمد وهو يهزب ويقول اطلقوني عليه بيش يعرف على وين يمد ايده
انا
طبعا انا منهارة لما وحلت اني نفك احمد خذيت زاوية وقعدت نبكي بحرقة لان عمره ماصارلي موقف زي هذا ولاني ديمة نحط في حدود مع كل شخص نتعامل معاه ماتخيلتش يصرلي هكي موقف
جاء الامن بتاع الكلية ورفعونا لمكتب المسجل وطبعا طلع الفرخ مش من كليتنا وجاي يسنكح هنا وقال انه ماقدرش يقاوم الشعر ونعومته ومافطنت بروحي الا سند  مصرفقه كف وقعدو يشدو فيه الولاد طبعا بعد مادار مسجل الكلية معاه اللازم طلعنا لقيت البنات اضبطني وقعدت نبكي منهارة وهما يسكتو فيا
احمد ... خلاص نوارتي حتى انتي ماقصرتيش الكف اللي عطيتيه ليه والله سمعت رنته وانا في بداية الدروج
انا ... بحتت لاحمد وعيوني دموع
شكرا احمد وسند وهشام وعبدالله ماقصرتو
احمد ...هيا خلاص بطلي دموع
انا .. خلاص بنتحجب معاش بنخلي شعري هكي
عبدالله ...فنص فيا وقالي شنو تفتفتي انتي ماتاخذيش قرار في لحظة وجع تندمي عليه الحجاب مش حطت محرمة على الراس لازم يلتبس بقناعة بكرة اتجي لابستيه مانشركه الا وهو على راسك واه جربي وديرها بس
انا.... قعدت نبحت في عبدالله وقلت ليه بصوت مخنوق باه خلاص
هشام  ... عبورة مش موقف زي هذا يخليك تنهاري نحن واخذين عليك قوية
انا ... قوية بيكم وبي اهلي بلاكم لاشئ
سند  ...خليني نجيبلك عصير ليمون فرش تهدو بالكم
انا قعدن البنات يهدن فيا شوي وهديت لكن شعوري حلو قديش ربي ناعم عليا بوخيين ماجابتهمش امي غير احمد بحكم اني البكر واللي بعدي اختي وخوتي الولاد الزوز صغار واجد 
جابلنا  سند  العصير وقالي عبورة
مش لازم عمي عمر وعمتي حواء يعلمو بلي صار معاك تو ينشغلو عليك ونحن ديمة معاك
حتى البنات قالولي صح عبورة مش لازم يعلمو كلام سند  صح بحتت في احمد بناخذ منه التاكيد احمد هزلي راسه بمعنى ايه
احمد
شفتها تبحث فيا بتاع تاخذ في رايي لاني كان ماوافقتش معناها اذا هي ماحكتش انا نحكي ليهم لكن حتى انا كلام  سند  حق وفي الاخير هالحيوان ماقصرناش معاه ومعاش يقدر حد يفكر يتجرا عليها مرة ثانية
وروحت للحوش ورقدت نحس في روحي تاعبة ولان سهرنا واجد عند احلام
لكن لما حطيت راسي على المخدة شفت تليفوني ما لقيتش ولارنة من يوسف فكرت شوي فيه لكن من التعب رقدت ....