للقدر والنصيب كلمة اخرى

62

#للنصيب_والقدر_كلمة_اخرى

ح62
انا.. تعرف يا احمد كان ماتزوجتك  خير
احمد.. اه شنوووووو عليش
انا.. الصيف قرب مايكمل وانت مازالت مارفعتني للبحر وقبل مانتزوجك وانت ديمة ترفع فينا للبحر
احمد.. طيحتي قلبي نوارتي سحبت حاجة صايرة معاك هذي بس خلاص من بكرة نمشو الا زعلك
انا.. تضحك عليا بكلمتين ماهو عارف لازم نحجزو واشبح نحصلو حجز او لا لان قبل ديمة نحجزو من بداية الصيف وتو ماد وجهك لتو وندوي وحامقة منه بجديات
احمد..ههههه
انا..عليش تضحك قلت شئ يضحك
احمد
قديش منظرها يهبل وهيا حامقة قربت منها وضميتها وهيا حاولت ادفني بس ماقدرتش عليا لان ضاغط عليها زين
انا.. حول ما تضحكش عليا بحضن
احمد.. ياهبلة انا حجزت من اول اسبوع عرسنا لكن نستنى فيك تسئلي لاني قلت مرات ماخاطرهاش
وبمجرد ماقلت هكي ارتخت بين ايديا ولفت ايديها عليا
انا.. ليش ماقلتش من الاول وحجزت لينا بس والله زي العادة
احمد.. انتي شنو تبي
انا.. زي العادة مع فرق بسيط
احمد..اصلا انا هكي درت لكن شنو الفرق البسيط
انا.. انك انت راجلي وانا مرتك وسند معاه سماح وعبدالله معاه خالدة واصالة معاها اسامة
احمد.. بست راسها
وطبعا بلغنا العيلة كلها ووتينا اروحنا وتوكلنا على الله ومشينا للبحر و طبعا نحن نحجزو وبعدين يتقاسمو الفلوس فيما بينهم لانهم واجدين وحمل الجماعة ريشة وكنت فرحانة واجد ولبست فستان شيفون ابيض مخطط بالوردي كمه الا ربع وكلوش من تحت واجد وشعري لميته على بعضه وطول الطريق انغني انا واحمد ومنسجمين ووصلنا وكل واحد خذا الشاليه بتاعه انا واحمد بروحانا وماما وبابا وعمو وماما وخوتي الولاد بروحاهم وعبدالله وخالدة  لان العيلة عندهم مناسبة ماجوش الا هما بس ومعاهم هنادي وطبعا هنادي بتقعد مع ماما وعمتو و وهبة  هلها كلهم جو وطبعا اهل سند جو حتى احلام وراجلها وطبعا حلومة حامل لانها كانت دايرة مانع وهذا وين فكاته في شهرها الخامس تو وسند والباردة سماح شاليه برواحهم حتى هما ونزلنا كلنا للبحر وكان في مسافة بين الشاليهات والبحر
انا .. حمودي بنعوم
احمد.. خليها على المغرب به
انا..حاضر  به انوض نغير قفطاني ونلبس سروال بيش نعرف انعوم خير
احمد.. حتى انا بنغير
وعدينا انا واحمد انا لبست سروال وعليه سورية قهوية طويلة بيش ماتبين شئ مع المية واحمد لبس شورت قهوي وماليا كت رصاصية ومشينا جيهت البحر ونحن قربنا لقينا ناس تقريبا نعرفوهم ولما قربنا عرفانهم
احمد.. هدوم شنو جايبهم هنا
انا..حمودي خليك عادي وما ادور شئ هدوم جدودك وين بتهرب منهم وكان على يوسف خليك معاه عادي هو شاف حاله وانا شفت حالي بالله عليك ما اضايق روحك
احمد.. سلمها العاقلة
انا اضايقت مش على روحي انا كنت خايف عليها هي تضايق 
مشينا سلمنا عليهم جدي وحناي لان حتى من قبل كنا كل عيد نمشولهم نعيدو عليهم كانهم جدودنا لانهم جدود احمد
وسلمنا على خالة احمد ام سالم وخالتي سميحة ام يوسف وحتى على مرت يوسف لقيتها معاهم وعلى خوات سالم منال وامل وسلامهم بارد عليا وجاء سالم سلمنا عليه وهدرزنا معاه اكثر حاجة لانه كان مسافر فترة طويلة وحكى معانا على التغيرات اللي صارت وحسيت احمد كانه اضايق شوي
انا.. هي حمودي قريب مغرب
احمد.. هيا عطينا الاذن سالم بنمشو نعومو
وجينا عند البنات والشباب وقعدنا نهدرزو نغيرو في الجو
هبة .. عليك موقف تميتو فيه
انا..ما اديري في بالك شئ
احمد.. تعالي نوارتي نظفرلك شعرك بيش مايعقدكش في العوامة
عبدالله ..تحشم وانت تقول فيها عيني عينك
احمد.. وعليش بنتحشم ماهو قبل نظفر فيه ليها
سند.. قبل احمد وعبير لكن تو انتو زوج وزوجة
هنادي ..شنو عيب يعني الراجل يظفر شعر مرته
عبدالله .. مش عيب لكن مش حلوة  قدامنا لانه الراجل
احمد.. احكو على اساس بيهمني حد هيا تعالي نوارتي
وجيته وقمعزت بين رجليه وقعد يظفرلي وطبعا التعليقات ما وقفتش البنات عاجبهم وسند وعبدالله واسامة وفتحي رقتلهم وكملي احمد وصبينا بنعومو
احمد.. نوارتي استني هنا نسيت ماجبتش المنشف والكبوط ليك
انا.. به
طبعا لاني بعدت عليهم قمعزت بروحي وشوي وحسيت بحد قرب مني والتفت ولقيته
يوسف .. السلام عليكم
انا.. وعليكم السلام
يوسف..كيف حالك عبير
انا..بخير الحمدلله كيف حالك انت ومبارك ليك
يوسف .. الله يبارك فيك ومبارك حتى انتي
انا.. الله يبارك فيك
وجاء يوسف بيمشي
يوسف معليش سؤال
يوسف ..تفضلي
انا.. يوم اللي جابك احمد لحوشنا قبل ماتكمل العدة قلت كلمة ياريت تجاوبني عليها بصراحة شنو قصدت بيها
يوسف ..تفضلي
انا.. لما حكيت ليك اني بنشوف حياتي وبنجيب صغار و قلت بهزوة كان جبتي بالله عليك شنو تقصد بيها
يوسف .. شئ غير في لحظة حمق بس
انا.. حلفتك بالله وباغلى ماعندك
يوسف .. انتي اغلى ماعندي
انا.. يوسف رد عليا اللي بينا انتهى وكل واحد شاف حاله قديش ليه بالله عليك رد عليا
يوسف .. انتي شفتي حالك وشكلك سعيدة لكن اني مازال مش مصدق بعدك عليا وكيف قدرتي تقسي للدرجة هذي
انا .. #النصيب والقدر كان ليه كلمته بينا وتو انت متزوج ماتظلم بنت الناس معاك زي ماظلمتني وحاول تحبها لان شكلها طيوبة
يوسف .. #النصيب والقدر قديش هما اقوى من البني ادم  هالكلمتين هذين
انا.. بالله عليك ماتغيرش الموضوع رد عليا
يوسف .. قبل مانخطبك رسمي جاني احمد وقالي ان عندك مشكلة في الحمل مش مستحيل لكن بالعلاج بسبب الكسور اللي تعرضت ليها منطقة الحوض ولانه مايبينيش اني انسيبك بعد الزواج وينوجع قلبك فحب يحطني في الصورة من البداية لان كان سيبتك في البداية الوجع اخف وانا قلت ليه اخر همي وبعدين نرفعها لاي مكان تتعالج
انا..عيوني دمعو لكن حاوالت انهن  ماينزلوش  قدامه شكرا لانك رديت عليا
يوسف .. مع اني عمري مانسيتك لكن احمد شكله يحبك صح لانه وحيد اهله ومافكرش في الموضوع هذا واتزوج بيك
انا.. ربي يحفظه ليا
وعدى يوسف وانا سرحت بخيالي يااااااه يا احمد هذا كله حب ليا انت وحيد اهلك ومع ذلك ما فكرتش في ان نسلك بينقطع ومن كثر ما ادهشني حب احمد ليا  لدرجة ماخطرش عليا نفكر في مصيبتي على جيت احمد يجري
احمد بعصبية .. كنه يوسف نوارتي ضايقك قالك حاجة
انا.. مافي شئ حبيبي
احمد.. ماتاكدة نوارتي
انا.. والله مافي حاجة سلم عليا بس
احمد.. نوارتي شنو قلتي تو
انا.. شنو
احمد.. مافي شئ  شنو
انا.. قربت منه وهمستها في وذنه حبيبي
احمد.. الله نوارتي ماحلاها من فمك هي نخشو وشد ايدي وحطينا الكبوط والمنشف احذا البنات ومشينا للبحر وكانت اصالة وراجلها وسند وسماح يعومو وخشينا قعدنا نعومو وخشينا للداخل انا واحمد بحكم نعومو مزبوط وبعد مابعدنا عليهم وقفت شوي جاني احمد وقرب مني
احمد.. نوارتي كنك
انا.. نحس كانه شدني عرق
احمد..متاكدة او شاكة
انا .. معاش قادرة نمد رجلي
احمد..هيا نطلعو وقعد احمد يعوم ويرفع فيا معاه نين لما قربنا من الشط رفعني في غمره وانا منسجمة نسمع في دقات قلبه الله يا احمد قديش عرفت روحي محظوظة بيك وحطني على الشط وقعد يدلك في رجلي نين ارتخت وعدى خلاني مع هبة 
هبة .. شنو تو رجلك تمام
انا.. دلكها ليا احمد ومش حتكون تمام
هبة .. شنو في جديد شكله
انا.. تو نحكيلك لكن تو بنموت من الجوع وجاني احمد قبل مانصبي لفني بالكبوط وهو حاط المنشف على كتوفه شديت المنشف وقعدت نشف في شعره
احمد.. هيا نوارتي وهبة اكيد بدو في الشوا
انا..جعانة هلبة
هبة ..وحتى انا
احمد.. امنا انا شنو نقول
ومشينا لجهة الشاليهات عند اهلينا وبادين شويات دجاج على لحم وسلطة مشوية ومشروبات وعصائر وكان جو يهبل وليلة تهبل والحمدلله اهل عمتو غالية جيهة شاليهتم بعيدة علينا مع اني نشوف في منال وامل ومرت يوسف يتمشن يقربن من شاليهاتنا ويردن وبعدها حسيت روحي تاعبة نفتح في عيوني بالغصب
انا.. بنرقد حمودي نفتح في عيوني بالغصب
احمد.. به نحكي مع الشباب ولما ننعس تو نجي
وخشيت للشاليه ودوشت
وتمددت على الفراش وبنرقد طار النوم قعدت انتقلب وانتقلب نين سمعت باب الشاليه نفتح وخش احمد
احمد .. كيف صار مش نعسانة
انا.. واجد لكن شكلي خذيت على النومة في حضنك ههههه على قد مادرت ماقدرت نرقد
احمد.. اندوش على السريع ونجيك
خشيت اندوش وانا فرحان بكلمتها هذي
دوش احمد وجاء خذاني في حضنه ورقدنا من تعب العوامة ونضنا ثاني يوم على دق هنادي علينا تنوض فينا
انا.. نضنا ياهنادي تو نطلعو
احمد.. صباح الخير ياقلبي
انا.. صباح الورد حبيبي
احمد.. ديمة قوليها نبي نسمعها منك
انا..تامر امر
احمد..بستها على خدودها وراسها وطلعت
وانا مشيت شور هبة وقعدنا نهدرزو برواحنا لان الغذاء على هنادي وسماح وخالدة يعاونو  امهاتنا ونحن العشاء ومعانا احلام واصالة 
هبة .. احكيلي شنو جد معاك
انا.. اسمعي انا بعد مانروحو من البحر بنكون زوجة احمد مش على الورق بس
هبة .. متاكدة
انا.. كل التاكيد امبارح عشان طول وهو سهران وانا تالفة من النعاس ماقدرت نرقد نين جاء وخذاني في حضنه
هبة .. الحمدلله يارب ربي يهنيكم يارب به شنو تفكري
انا.. اللي مفروض درته يوم الدخلة
هبة .. شنو شموع وورد وحركات
انا.. الاسبوع  الجاي بيكون ذكرى  ميلادي وميلاد احمد
(طبعا تاريخ ميلاد احمد وانا في نفس الشهر بفرق يومين لكن السنة تختلف فكنا انديرو في حفلة وحدة)
ونبي نكلم ماما وعمتو اني بنحتفل بيه انا واحمد بس ومتاكدة من ان عمتو حتفضي لينا الجو وتعدي لحوش اهلي يباتو غادي لكن تو كيف بنطلع للسوق بدون احمد
هبة .. نطلعو مع فتحي وقولي انك بتجيبي حاجات خاصة
انا.. تمام بس بنحجز في تورتة لكن انتي اللي بتوصليها لعندي في اليوم اللي نبيها فيه
هبة .. ساهلة هذي به شنو تبي ثاني
انا .. طبعا نبي روب صايع ونبي ارواب لان وانتي عارفة وانا نشري في بتاتي ماخذيتش ارواب الا روب الدخلة ولان لونه ابيض مانبيش نلبسه في اول ليلة لي مع احمد
هبة .. ياصايعة
انا.. مع حبيبي وراجلي واه طبعا بناخذ هدية مش عارف شنو ناخذ ليه
هبة .. خوذي ساعة
انا.. شنو رايك بناخذ بيجامة لان هو بالبيجامات يهبل شكله
هبة .. والله طحتي وماحد سمى عليك
انا.. شكلي هكي
سند .. هيا تعالن الغذاء واتي
انا.. قول عصور مش غذاء
سند ..عشان مش انتي اللي تعاوني تتدلعي تو
انا.. لاتكلمني مازالت عروسة
سند وهبة ..ههههههه
ومشى الجو يهبل وخشينا عمنا واحمد على المغرب وماطولتش لان العشاء عليا انا وهبة واصالة واحلام  وقعدنا نعولو طبعا كان العشاء خروف مشوي جاهز جابه احمد من المطعم موصي عليه ونحن درنا السلاطات وفرشنا قريب من الشط وهدرزنا لليل موخر قريب الفجر طبعا الاهالي يرقدو بدري وينوضو بدري 
انا.. حمودي كان نعومو تو الجو يهبل 
احمد.. انتي شكلك بتجيبي اخرتي
انا.. عليش
احمد.. شئ  هي جيبي المنشف والكبوط بيش نحطوهن قراب من الشط
انا.. به
عديت للشاليه خذيت سلة حطيت فيها كيكات وشوكلا وعصير وخذيت ترمس حطيت فيه حليب ساخن وخذيت علبة الكابتشينو وحطيتها وزوز مقات وحطيت فوقهن المنشف والكبوط وجيت شور احمد
احمد
نفكر بنعوم معاها والوقت قريب فجر يارب صبرني هو بس نذكر جسمها نهبل لابال تو بتبدا قريبة مني واجد والدبش لاصق عليها من المية يارب الصبر المفروض قلت ليها اني تعبان لكن مانقدرش معاها نقول لا ياهمي نموت فيها
انا..هيا حمودي
وخشينا للبحر وقعدنا نعومو وبعدها قلت
انا.. حبيبي خلينا نلعبو بالمية
احمد..راه لعبي سامط عارفتيه
لعبي سامط لاني نحذف فيها في المية حذف  ونرفعها بين ايديا ونغطسها وفي اللعب هذا كنت نقرب منها واجد لكن زمان كان عادي لان ماعنديش مشاعر ناحيتها لكن تو هيا العشق كله والروح مش عارف كيف بنلعب معاها بدون مانضعف
انا..على قلبي عسل
احمد
جيتها قربت منها وشديتها من وسطها وقربتها ليا وهي تمت تتنفس بصعوبة
من قربي ليها واجد وبصوت اقرب للهمس  
احمد... كنك نوارتي زايدة العيار عليا
انا
كنت ذايبة بين ايديه وشعره المبلول اللي طايح على وجه ورفعت ايدي حولته من على وجهه ووجهي قريب منه واجد وحسيت برعشة بمجرد ما لمست ايدي وجهه حسيت بشعور ان احمد معاش احمد زمان نبي قربه ونبي حضنه ونبي كل شئ نبيه يكون زوجي
احمد
انتفرج عليها وهي قريبة مني واجد جسمها لاصق في جسمي وايدها ترفع بيها في شعري وبمجرد ايدها مالمست وجهي حسيت برعشة جسمها بين ايديا وفرحت في خاطري وانا ذايب في عيونها وشفايفها الورديات المعبيات بشكل مغري ومانندريش على روحي الا وانا نبوس فيها على ...... في الاول مادارتش اي رد فعل كأنها تحت الصدمة لكن انا مابيتش نحول  لان صعب عليا نتحمل وفرصة ولقيتها وقلت كان زعلت مني تو انراضيها وبعدها استسلمت لي وبادلتني البوسة يعني بوسة طرفين وارتخت بين ايديا حسيت بيها نفسها راح رخيتها شوي تاخذ نفس ورديت التهمتهم  ثاني بكل حب وانا طولت قديش ليا نستنى فيها قديش نرجى في لحظة زي هذي طلعت فيه حب وشوق كل لحظة ليها وبما انها بادلتني البوسة معناها تغيرت مشاعرها شوري وهذا زاد فرحني ولما عرفتها خلاص  ارتخت واجد حولت من عليها ورخيت ايدي شوي قريب طاحت شديتها شوري وهي تحكي بصوت واطي وهادي
انا.. حبيبي طبني في حضنك
احمد.. زدت حضنتها ورفعتها وهيا لافة ايديها على رقبتي ومتكية براسها على صدري حسيت بيها زي الدايخة
احمد ..نطلعو نوارتي
انا.. اه
طلعنا من البحر ومافيش حد كلهم خشو رقدو او بمعنى اصح لما شافونا خشينا البحر فضولنا الجو وقمعزنا على الرملة واحمد لفني بالكبوط وحط المنشف على راسه
احمد.. اوووو مجهزة الجو
انا..اه اكيد
احمد.. نجهزلك كابتشينو يدفئ الجسم  خيرلك من العصير
انا.. ياريت والله
وجهزلي مق وجهز لروحه وعطاني كيكة معاه وجاء قمعز وراي ومد رجليه عليا وكرني شوره تميت مقمعزة ومنسندة بصدره
احمد.. نوارتي مش زعلانة صح مني
انا.. فهمت شنو يقصد وهزيت براسي بمعنى لا
احمد
فرحان واجد ومش قادر نوصف فرحتي لكن لعند هنا بس حنكتفي بيها كخطوة لاني مش قادر نقدم بخطوة اخرى نين هي تقول لان هذا كان اتفاقنا وكان احلى يوم عندي وقعدنا ساكتين ونحن مقمعزين هكي نين ضوت الدنيا مزبوط وانتبهنا ليوسف هو ومرته جايين
يوسف
شفتها كيف مقمعزة هي واحمد حسيت بشعور غريب كاني غرت عليها لكن لما نشوفهم نحس بنظرة الحب والخوف في عيون احمد عليها وقديش واثق فيها حتى لما شافها معاي مادارش اي درة فعل لا ليها او لي وهذا دلالة على الثقة اللي انا ماكانتش عندي شديت ايد مرتي وقعدنا نتمشو بيش نقنع روحي اني نحب المرا المتزوجها مش عبير
عند احمد ونوارة 
احمد..نوارتي هيا نخشو الناس بدت تجي ويادوب اندوشو ونرقدو لان في الليل بنروحو
انا..هي حبيبي
وصبينا واحمد زاد لفني بالكبوط كويس ورفع السلة ومشينا ودوشنا ورقدنا منتهيين وفرحانين وحضنا بعض ورقدنا ونضنا الساعة اثنين الظهر على الهرجة برا وهما يديرو في الغذاء ويلمو في دبشهم اول باول
احمد.. نوارتي نوضي حبيبتي
انا.. نايضة حبيبي مع الهرجة اللي برا من يقدر يرقد وصبينا وتوضينا وصلينا وغيرت دبشي وطلعت
ماما .. ناموسيتك كحلي
انا.. حرام عليك ياماما رقدنا الصبح راه
هنادي .. هي تعالي حطي حاجة في فمك قبل الغذاء
انا.. اهو جيت بندير كابتشينو لي ولاحمد
طبعا جيت لماما وعمتو غالية وطلبت منهم طلب وهو ...... وفرحن واجد لطلبي وافقن عليه 
وجهزنا حاجاتنا ودبشنا واتفقت مع هبة بكرة تجيني هي وفتحي
وروحنا في الليل للحوش وقعدت انا وعمتو انلمو في حوسة الدبش وركبت لجناحي فوق لقيت احمد في صالة الالعاب غاطس في اوراق
انا..حمودي عندك شغل شكله
احمد..اه لما حطيتكم عديت للمكتب جبت منه الاوراق بيش نشوفهن قبل بكرة لان عندي اجتماع
انا..ربي يعاونك ان شاءالله
احمد..امين
انا.. حمودي نبي نطلع بكرة مع هبة وفتحي بيرفعنا للسوق
احمد.. عليش شنو تبي وليش مع هبة وفتحي ليش مش معاي او مع امك او امي
انا.. مع امي او عمتو نتحشم لاني نبي نجيب حاجات خاصة مع هبة لان فتحي يحط فينا ويقعد يستنا في السيارة نين نكملو وانت مانبيش ترفعني لان من الحاجات اللي بناخذها مفاجاءة ليك وكيف بتكون مفاجاءة وانت معاي
احمد
سرحت بتفكيري زعمك لشنو تخطط