للقدر والنصيب كلمة اخرى

11

#للنصيب_والقدر_كلمة_اخرى

ح11
جيت مع احمد للكلية طبعا بابا وماما عجبهم الجو وقررو يمددو طبعا لانهم مطمنين علينا
وجاء وقت دخول للقاعات طبعا عشان ماحد يدفني قعدت انا اخر وحدة لاني بنركب بالقيلات
انا ...هيا اركبو ماتراجونيش انا عندي اذن لكن انتم لا
احمد..كيف بنخليك
انا..حمودي اركب بالله عليك وماتخاف عليا وكان صارتلي حاجة تو نرن عليك خير مايمنعوك من خشوش الامتحان
وبعد جهد جهيد ركبو وسيبوني نركب بالشوي عليا
ركبت الدروج بالشوي علي بتاعت الدور الاول والدور الثاني وانا نركب حسيت بحد يمشي وراي لكن مباش يسرع خطوته خفت الحق لكن ريحة عطره قوية ومميزة طبعا انا مانعرفش شنو العطر لكن حلوة وتهبل الريحة من كثر ماركزت في العطر وخلط عليه الخوف ليش قعد يمشي بالشوي بدل مانحط القيلات في نص الدرجة نلقى روحي حاطتها على الحاشية وانا ركبت ونجي طايحة على وراي هو تلاقني وساعدني نين كملت الدروج وشكرته وقاعته بعدي بقاعتين تقريبا على حسب ماشفته كيف يجري
وشكرته وماردش عليا الشكر وانا رفعت القيلات في ايديا وقعدت نمشي عادي نين وصلت لقعاتي وخشيت وامتحنت وكان الامتحان واعر لكن الحمدلله اللي قاري مافيه شئ واعر عليه
وطبعا ديمة نطلع انا اول وحدة بس على خاطر الامتحان كان واعر وفي نفس الوقت بيش تخف الزحمة ونلقى الدروج فاضيات
ولما طلعت من الامتحان ورافعة قيلاتي في ايديا سمعت صوت وراي يقولي
هو ..كيف صار امبدري القيلات قريب كسرنك وتو رافعتيهن في ايديك
انا ...عرفته ومع اني نحس بالصوت كأني نعرفه وقلت ليه شكرا على معاونتك ولما جيت بنحكيله صادفني الدروج نزلت القيلات وقعدت ننزل بيهن
هو ..امرك غريب
انا..ممنوع عليا الدروج بس لكن المشي نمشي عادي حتى لو مشاور طويل
هو ...شكلها ضربة قوية نين مخلفة اثر
انا ...اه
ولما جيت في جيهة الدروج الثانية لقيت هبة محايلة علي واقف على الباب وخلاها تخش وقبل مانكمل دوتي جتني هبة عاونتني على النزول ولقيت الشلة يستنو فيا ويسئلو فيا على الامتحان وشنو صار معاي ولما تلفتت لقيته يستنى فيا كانه يبي اللي حداي يعدو بيش يحكي معاي هكي فهمت من نظرة عيونه لكن طبعا مستحيل اللي معاي يسيبوني و بحتت فيه لقيته عطاني نظرة بمعنى مافيش نصيب نحكي معاك ضحكت ومافكرتش في الموضوع واجد وجاء احمد بعد ماسخن السيارة و روحنا للحوش طبعا نحن ايام الامتحانات القروب مانتلاقوش اتصالات بس الا لما تكون المادة صعبة وماكملناش قراية فيه لكن مثلا انا وهبة نتلاقو عادي وسند  واحمد عادي والباقي هكي
هشام وعبدالله 
عبدالله  ..فيش تقول انت كنك شنو جد عليك
هشام ..والله زي مانحكي ياعبدالله مش عارف شنو اللي جد عليا شكلي نحبها
عبدالله  ..انت شنو تبي تخسر القروب امنا
معقولة على خاطرها تخسرهم كلهم
هشام  ...والله ماني عارف ياعبدالله  شنو اندير م قادر انتحمل مش قادر نتحمل قرب احمد منها مش قادر نشد روحي عليها نبيها لي ونبيها في وسط قلبي نحطها ونسكر عليها
عبدالله ...هشام  والله ماعندي مانقول غير ربي يهديك لكن انت عارف رد عبير شنو
عبير مستحيل توافق ترتبط بيك انت عارف من لما كبرنا في العمر وبدينا في جو العلاقات شنو قالت وشنو نبهت وهذا ليش كلنا حبينا غيرهن لانهن هنا عمرهن ماحبنا الا خوت لهن معقولة ياهشام ماقدرتش تقاوم
هشام  ...بالله قولي عبير تتقاوم عبير ماتنحبش
عبدالله  ..شهادة لله بنت بالف بنت ومافي زيها لاربايتها ولا اخلاقها ولاجمالها الحق 
هشام..اه ريت ماتلومنيش ياعبدالله 
عبدالله  ..به كيف بدير
هشام  ..مش عارف شنو اندير
عبدالله  ..خلي الامتحانات يمشن على خير وبعدها ساهل
وجاء الامتحان ماقبل الاخير
يوسف ..عبير راه مازال يوم بس على الامتحان الاخير
لان طبعا نمتحنو يوم ويوم لا
انا ...عارفة والمطلوب
يوسف ..نبي نشوفك
انا...اه خلاص زي ما اتفقنا انا في الكلية الفلانية
يوسف ..والله صح نفس كليتي
تخصص شنو انتي
انا تخصص....
يوسف ...لا انا تخصص... بس كانت عندنا مادة مشتركة وكنا نحضرو في المحاضرة مع بعض وخطر عليا اليوم اللي دقات قلبي تمن سريعات 
انا...ضحكت عليك صدفة
يوسف ...خلاص امنا بعد بكرة نتلاقو في الامتحان
انا ...خلاص لما تتطلع من الامتحان رن عليا بيش نقولك مكاني وين ونكلم حتى احمد يلهي الشلة عليا نين يجي الوقت ونعرفهم عليك
يوسف ...خلاص تمام امنا
انا ...هي تصبح على خير
يوسف ...بترقدي بدري مريضة
انا..لا مش مريضة غير احمد بكرة بيجيني الصبح بيرفعني للمستشفى عندي مراجعة لان بابا عنده اجتماع مايقدرش ايسبه
يوسف ...تصبحي على خير ونصبر لعند مايجي الوقت اللي انا نرفع ونشيل فيك قريبا
انا..بندوي سكر عليا ضحكت لان الكلمة عجبتني ورقدت
جاء الصبح ورفعني للمستشفى والدكتور وقف الدواء وعطاني مسكن عند اللزوم بس وقال الاسبوع الجاي مراجعة وطلعت انا واحمد وفي السيارة حكيتله على موعدي مع يوسف
احمد
مع اني لما حكتلي نوارة  اضايقت لكن درت روحي عادي لاني خايف عليها من الصدمة لاني نتحمل كل شئ الا نوارة  تجرب وجع الحب اللي انا جربته وفي نفس الوقت قعدت نربط في الاحداث يوسف وكلية وقسم
معقولة يطلع يوسف ولد خالتي
انا...وين رحت حمودي
احمد ...قاعد وحاضر تو نفضيلك الجو على اخر الوقت تخليني بقروني
انا ...حشى من ايدرلك قرون
احمد ..تسلمي يارب