للقدر والنصيب كلمة اخرى

41

#للنصيب_والقدر_كلمة_اخرى

ح41
انا..يوسف
يوسف ..ياعيونه
حسيت الكلمة وجعتني لكن درت روحي ماعدلتش
انا..ارفعني لحوش اهلي او نكلم احمد او بابا او عمو لو انت مش فاضي
يوسف
حسيت كأن الدنيا دارت بيا والكلمة اللي مانبيش نسمعها اني سمعتها تو نحس في قلبي بيوقف وبعد جهد جهيد قدرت نتكلم
يوسف .. لللللللليش
انا ..خلاص اللي بينا انتهى معاش في شئ بينا على شانه نقعد
يوسف جاني ومسك ايديا
يوسف ..لا متقوليهاش لا مانبيش نسمعها منك الكلمة هذي تبي تعدي تسهري عندهم لكن في الليل نروح بيك ارجوك لا
انا
بعدت ايديه عليا خايفة نضعف وقعدت نذكر في روحي بمسباته وبوجع صدري من ضربته
انا .. خلاص يوسف انا كنت قاعدة معاك على خاطر بس نبين برائتي وتعرف اني لاضحكت عليك ولاكذبت واني انظف ممن يتخيل عقلك وتحساب البنات كلهن زي امل
يوسف ..مصدوووم من الكلام اللي تقول فيه وبحتت فيها وانا ساكت
انا..ايه يا يوسف موضوعك مع امل اللي دسيته عليا ونش عارفة شنو السبب ولعلمك انوريك الفرق بين ردت فعلك وفعلي الست امل باعته ليا صور مش تمام انت وياهها ومع ذلك مابيتش نظلمك ولانتهمك كذب وقلت نستنى احمد نفهم منه قبل مانظلمك وفعلا سمعت من احمد والموضوع معاش يهمني لكن درت هكي بنبين الفرق بيني وبينك طلعت فوني وفتحت له على الصور شوف يا يوسف الصور اللي جني مش حتى قراب لصوري اللي عند هشام  على الاقل انا صوري اللي عنده مش في حضنه قاعدة او نبوس فيه بوسه زي هذي مركز معاي يا يوسف والله الصورة هذي بروب نوم تي روب دخولي قاعد استر منه ومع ذلك مادويتش معاك ولاتهمتك بالكذاب والخداع والخيانه لاني نش متاكدة وقلت بالك صور من الماضي رغم انك ماحكيت ليا شئ عليه وكان معاي الحق لو قمت القيامة عليك لكن انا انسانة نثق في اللي نحبه ومستحيل  نتهمه بدون مانسئل ونتاكد
شفت الفرق بيني وبينك يا يوسف
يوسف
انا من لما شفت الصور معاش قدرت حتى نرفع عيني في عينها وصور زي هذين المفروض خلانها تسبيني من اول ماوصلنها لكن هي وثقت فيا ومابتش تحكي معاي نين  تتاكد من امتى الصور بينما اني شنو درت جيتها زي الثور وضربتها قريب ودرتها ومعاها دافعت عليا وماخلتش حد يعلم باللي درته فيها وخليت غيرتي عمتني ونا قاعد نتخبط وفي راسي الف كلمة وكلمة
انا..ماتقوليش غيرة يا يوسف اللي درته بسببها  الغيرة مش هكي الغيرة اسئل وتاكد وبعدين عاتب وازعل لكن اللي درته كان بسبب الشك واني خذيتك بسبب فلوسك مع انك عارف اني والحمدلله مش مستحقة لفلوسك
يوسف ..بالله عليك ماتمشي وتخليني اني بلاك ولاشئ
انا ..قصيت عليه كلامه لاني مانبي نسمع شئ منه
وقلت ليه الجرح والوجع اللي في صدري يايوسف سيوره يبرا لكن وجع قلبي وانت تسمع فيا في كلمات عمري ماسمعتهن مديت عليا ايدك وانا حتى بابا عمره مادارها انت من يا يوسف
يوسف ..نا قلبك وحبك وعيونك
انا..ودموعي بحر على وجهي كنت يا يوسف صح مش حننساك بسهولة لكن حيجيني يوم وننساك كون متاكد
يوسف ..عبير ماتخلينيش 
انا ..يوسف ارجوك ماتخلينيش نطلع بروحي هيا ارفعني لحوش اهلي ومعاش تزيد معاي كلمة لان مهما دويت من هنا لبكرة الصبح مستحيل رايي يتغير
يوسف ..وانا قلبي يتقطع ودموعي في عيوني
باه هيا وتي روحك
انا ..خشيت حطيت كابي على راسي وخذيت شنطتي وطلعت بدون ولاكلمة وطلع وراي فتح السيارة وركبت ومشينا لحوش اهلي ونزلت شد ايدي
يوسف ..اعطي لنفسك فرصة تفكري وانت بعيدة عليا اعطيني فرصة وسامحيني وانا مستعد انعوضك على غلطي بلي تبيه غير ماتخلينيش
انا ..جبدت ايدي ونزلت وسكرت باب السيارة بهدوء وخشيت حوشنا لاقتني انوار اضبتطها وقعدت نبكي وطلع علينا احمد من الحمام (حشاكم)
احمد ..كنك نوارة  شنو في
انا ..مافيي شئ نبي نخش لداري بنرتاح ماحد يكلمني احمد شدني من ايدي احمد..نوارتي كنك
انا..بحتت لاحمد وعيوني دموع ومش قادرة نبي نحكي اللي في قلبي نبي نقول كيف يوسف هاني وكيف شك فيا لكن خايفة من احمد يمشي ايدير فيه حاجة ايه خايفة على الزوز على يوسف واحمد ايه خايفة على يوسف كان اول شخص فتحت ليه قلبي كان حبي الاول عرفته في فترة قصيرة لكن كل يوم خلاني نتعلق بيه اكثر 
انا ..احمد خليني بنخش نرقد وبعد مانوض تو نحكيلك
احمد ..بدون اقتناع به
خشت نوارتي لدارها وانا قعد قلبي يغلي على نار وبعدين كلمت انوار خشت عليها لقاتها راقدة وقعدت نسئل في انوار
انوار ..والله يااحمد علمي علمك
احمد..شفتي عيونها كيف ريحات حمر من البكاء ابصر يوسف شنو داير ليها انا قلت كلمتي هذي ورن عليا يوسف
يوسف ..اهلين احمد
احمد ..اهلين كنها  نوارة يا يوسف
يوسف ..والله ماني عارف يا احمد اصلا انا متصل بيك نبيك تفهم منها وانا نحن متزوجين ويصيرن الخلافات بينا
احمد..تو هيا رقدت ولما تنوض تو نشوفها
يوسف ..ان شاءالله خير بنقولك احمد راكم تنسو مواعيد دواها
احمد ..ان شاءالله
قلبي يوجع فيا وكل مانغمض عيوني تجي بين عيوني شكل عيونها وهنا كيف ذابلات ورايحات حمر من البكا وبيني وبين نفسي مايخلصك مني واحد يايوسف لو ضارها على مرواحة عمتي حواء وامي وحكت لهم انوار وخشن للدار لقن نوارة مازالت راقدة ونحن قعدنا على اعصابنا ولما اذن العشاء وهي راقدة شهادة لله ماعاد اقدرت نتحمل
احمد.. انوار انوار خشي نوضي نوارة تو
انوار ..به تو نشوفها
خشيت للدار نوارة بنوضها لقيتها مفتحة عيونها وتبكي
انوار .. خيرك حبيبة شنو اللي صاير معاك برا كلهم على نار وبالذات احمد بينفجر من خوفه عليك حتى امية ماخشت فمه من كثر مايخمم فيك
انا..مافي شئ حبيبة غير خلاص اللي بيني وبين يوسف خلاص
انوار ..كيف حبيبة تقولي هكي وانتي ماليكش شهرين
انا..بحرقة شهر واسبوع
لكن خلاص حياتي انتهت وقعدت نبكي بوجع نين حسيت صدري زاد وجعه وكانه يزيد يذكر فيا بلي داره فيا يوسف
دق احمد الباب وخش عليا لقاني في حالة شد ايدي
احمد ..خلاص نوارتي غير فهميني خيرك وكان يوسف غلط فيك ناخذلك حقك
انا...مشاكل تصير بين الازواج عادي بس في من اول مشكلة يهرب وفي اللي يتحمل وانا من النوع الاول هربت لاني مانقدرش انتحمل قدام احمد بنحط اللوم عليا على خاطر مايضرش يوسف ويضر روحه وقعدت نبكي انا معاش نبيه معاش نبي نعيش معاه
احمد..اسسس به خلاص عليش تبكي
انا..نبكي على حظي ونبكي على عمري
احمد..اي عمرك مازالتي صغيرة والحياة قدامك شنو الدوة اللي تدوي فيها
انا..مسحت دموعي وسكتت
احمد..هيا نوضي صبي كولي حاجة موعد دواك مازال عليه نص ساعة
انا..ماخاطريش في شئ الحق
احمد..كيف بتاخذي دواك وحتى نا ماكليت شئ هيا نوضي كولي بيش انا ناكل بنموت من الجوع راه
انا
خطرت عليا كلمة انوار حتى المية ماخشت فمه
انا.. هيا نضت ولما طلعت جت ماما وحضنتني وجت بتسئلني سكتها احمد بحركة تو نحكيلكم بعدين
وتعشينا وانا اللقمة تنزل جمر لان في وذني قاعدات كلمات يوسف تتردد في عقلي