للقدر والنصيب كلمة اخرى

52

#للنصيب_والقدر_كلمة_اخرى

ح52
وتفاهم احمد مع هله ان الفاتحة تكون الجمعة اللي بعد عرس اصالة يعني يوم اسبوعها وبعدها نخشو على عرس عبدالله وغصبنا على عمتو انها تمشي تحضر عرس ولد اختها عيب مهما انكان
انا.. عمتو انا نبي نفهم عليش ماتبيش تمشي كان عليا انا والله ماعندي عليه حيتيه يتجوز حتى اربعة مش وحدة واهو حتى انا بنبدا حياتي وفرحانة واجد باحمد انه بيقاسمها ليا
عمتو .. خلاص تو نمشي
ماما.. وتاخذي هدية سمحة للعروسة حاجة ذهب
عمتو ..امنا نوضي وتي روحك نطلعو نجيبوها
احمد
انا كنت واقف برا لكن شدني الحديث وقلت بنسمع كلامها لان عرفتهم يقنعو في امي انها تحضر فرح يوسف  مش خوف من مشاعر مازالن في قلبها ليوسف لكن اهو حب اطمئنان وفرحتني كلمتها خشيت للحوش وباتي رفع امي وعمتي حواء للسوق وانا خشيت دقيت على دار نوارتي
احمد.. السلام عليكم
انا..وعليكم السلام
خش حمودي خيرك واقف في الباب
خش احمد وسكر الباب وقبل عمره مادارها قبل لما نكونو في دار بروحانا لازم يخليها مردودة استغربت لكن ماعلقتش
احمد.. خذيت الكرسي وقمعزت جنبها وهي تصنع في حاجة على طاولة المكتب بتاعها
نوارتي شنو اديري
انا.. تذكر لما مشينا لتركيا وشريت حاجات قلت ليك بنجرب كان نجحت بنفتح مشروع
احمد.. اه ومابيتيش تقوليلي شنو حتى لما خذيتي الحاجات انا مش معاك
انا.. صنع اشكال بعجينة السيراميك
احمد..كيف
انا.. شفت المدالية اللي في مفتاحك من يوم ماعطيتها لك وهي فيه
احمد.. لانها منك وفي نفس الوقت عاجبتني
انا.. هذي صنع ايديا ياقلبي
والمدالية كانت عبارة عن مجسم صغير لسيارة الكروزر بتاعته
احمد.. وانا نقول والله الشبه الكبير اللي بينها وبين سيارتي
انا.. ومعاها المداليات اللي عند القروب كله شغل ايدي لكن مافيش ولا واحد يعلم
احمد .. طلعتي ادسي عليا
انا..ماتزعلش مني ياقلبي لاني نبي ننجح بدون دعمكم نبي نعرف روحي نقدر ننجح بروحي او لا
احمد.. امنا امتى كنتي تشتغلي فيهن ولما تنقصك حاجة منو يجيبلك فيها
انا.. انوار وهبة الوحيدات يعلمن وديمة نخدم في الليل واكثر الوقت وانت مش بايت عندنا والحاجات داستهن في دار انوار واللي من تركيا نتعامل مع الوكيل اللي هنا ويجبولي فيها للحوش
احمد.. فعلا الضربة اللي ماتكسر تقوي
انا.. اكيد ومعاكم وبيكم انا قوية
احمد.. وتو وين وصل مشروعك
انا.. الفترة اللي فاتت خشت انوار محل اكسسورات فسئلها الشاب على المدالية اللي في فونها قالت ليه اختي تشتغل فيهن فقاللها نبي عينة وسمى ليها كذا حاجة وقاللها لو لقيت عليها طلب بنكبر الطلبية وتو قاعدة نخدم في العينات اللي طلبهن
احمد.. تو تشوف انوار عرفت ادس عليا
انا.. حمودي كيف ماتبينيش ننجح ونعتمد على نفسي
احمد.. معقولة تقولي هكي انا اكثر واحد في الدنيا يبيك تكوني افضل شئ لكن على الاقل انوار كان حكتلي راه ساعدتك من بعيد
انا.. وبعدها كيف بنعرف روحي نجحت لكن تو العينة هذي هي اللي بتبين
احمد.. ربي يوفقك نعاونك في حاجة
انا.. بايدك المجبسة  يعني
احمد..هههههه خطرها بعد بكرة بنفك الجبس
انا..تفكه على خير وتنذكر وماتنعاد
احمد.. ان شاءالله قوليلي شنو تبي تلبسي على فرح اصالة
انا.. بنلبس الفستان الازرق الملكي اللي خذيته من تركيا وفي عرس عبدالله بنلبس الجمبسوت الزرعي اللي خذيته ليا لانه مستور لانهم دايرين العرس مشترك بحكم انهم ضنا عم
احمد.. احسن كنهدا راه تقطعتي بين اهل عبدالله واهل هنادي
انا.. الحمدلله حيشانهم احذا بعض ولانهم ضنا عم سهلو علينا وبعدين هما ماهمش دايرين حاجة كبيرة واجد بيدرو الحنة الصغيرة ويوم الصالة وخطرها حتى اصالة هكي دايرة لان حتى هيا ولد عمها
احمد.. احسن حتى نحن بنديرو هكي
انا.. تمام بكل
احمد.. نحن ماحكيناش في تفاصيل الفرح
انا..قول اللي عندك لاني لما نتكلم نحس فيك تزعل مني
احمد.. ماهو تبدي في كلامك بكلمة مطلقة وانا ماتعنيش ليا شئ الكلمة هذي
انا.. وقفت اللي في ايدي وجيت قربت كرسيا احذاه وشديت ايده
نعني مانفقدك
احمد.. انديرو فاتحة كبيرة بين فرح اصالة وفرح عبدالله وبعدها نبدو نجهزو للفرحنا وفرح انوار  لان باتي قال يافرح انوار  الاول وفرحكم بعده يالعكس
انا.. نسئلو انوار رايها قبل
احمد..به
وطبعا فرحنا لانه بيكون يوم واحد مشترك بحكم نحن صعب الفصل بينا بيكون يوم كبير واجد  والحنة الصغيرة نبيها بالاسم بس صغيرة بنجيب فرقة ونعزمو عزومة كبيرة
انا.. مش مصاريف واجد
احمد.. اس شنو مصاريف حتى هو فرح نوارة واحمد
انا.. تسلم يارب
احمد.. خلاص متفقين باذن الله
انا.. اكيد وان شاءالله ديمة متفقين
احمد.. معناها بنوفرو وقت وبنجيبلك كاتلوجات لفساتين الفاتحة والفيلوات عشان نلحق نبعث عليهن من تركيا
انا.. بتجيبهن من تركيا بتمشي يعني
احمد.. لا بيبعتوهن هما زمان لما مشيت كنت ....
انا..كنت شنو
احمد
كنت بنهرب من انك خلاص بتكوني لغيري وانا اللي نجيبلك في الفيلو بايديا وانا قلبي كله حسرة 
احمد.. شئ يجي وقت ونقولك
انا.. براحتك
احمد.. هي انخليك تكملي اللي في اديك
انا .. لا بنرقد نحس في روحي طافية بنقيل
احمد.. هيا نوم العوافي 
انا.. خشيت سريري وقلت لاحمد غطيني
تمددت وغطاني احمد وباسني على راسي وطلع
درت هكي لاني نبي نعود روحي على فكرة احمد بيكون زوجي نبي نحاول نتقرب منه واجد بالذات بالتلامس لاني مانبيش نظلمه معاي ويتحمل واجد معاي لان احمد مايستاهلش 
احمد
لما قالت غطيني استغربت وفرحت لان الموقف هذا عمره ماصار بينا الا كان مريضة بس او هي راقدة ماتندري عليا نلقاها من غير غطا نغطيها لكن هي تطلب مني كانت اول مرة وماعرفتش شنو التفسير وخشيت قيلت وفرحان واجد