للقدر والنصيب كلمة اخرى

22

#للنصيب_والقدر_كلمة_اخرى

ح22
انا كملت تزيين التشيز كيك ولصقت الكواشيك على كل علبة لانهم شباب واكيد مش حيعبو بالكواشيك الصغار
وطلعت الحافظة اللي تحفظ في البارد حطيتها في الشحن بيش يلقاها بكرة واتية على جية ماما وعمتو  وقعدن يهدرزن على عميمة عزيزة وهي قلبها بيتقطع على فراق بنيتها وانا استئذنت منهن وقلت نبي نرقد
وخشيت لداري ورنيت على انوار وتت شنطتي او لا
انوار ..اه وتيتها وان شاءالله مانسيت شئ
انا..به صحيتي حبيبة
انوار ..هيا نكلم في وسيم
انا ..هي تصبحي على خير
واتكيت بنرقد خطر عليا احمد كيف قعد يشبحلي لما لمبست الجمبسوت وبعدها قلت لروحي هي ارقدي وانتي عقلك تما مش تمام
الصبح نضت بدري توضيت وصليت لاني من التعب مافطنتش بالفجر وحتى بيش انسقد احمد خشيت للمطبخ انوتي في الفطور
خش عليا احمد
احمد..صباح الورد
انا..صباح الفل والحاجات الحلوة
احمد ..نايضة بدري واجد اليوم
انا ..ماهو مانضتش للفجر شكلي من التعب طفيت المنبه
احمد ..تعبتي واجد شكلك سامحيني
انا..شنو قلت انا معاش تقول هكي التعب عادي يصرلي في اي شئ انديره
هيا قمعز الفطور واتي
احمد..به خلاص تو شنو حالك
انا ..باهية الحمدلله
احمد ..ديمة لما نطلع في الزردة هذي اكثر حاجة انرايف عليها الكابتشينو
انا..وحتى انا نبنقعد ثلاثة ايام مش حنشوفك
احمد..هههه اللي يسمعك يصدق مايعرفش انك تكلمي فيا في اليوم سكايب قريب ثلاث مرات
انا..ههههه ها امنا تبيني انكلمك هكي بدون مانشوفك اصلا انا لولا صلة الرحم راه منعتك من المشي للزردة هدي
احمد..والله لو تقوليلي اقعد نقعد وانتي عارفة اني انديرها
انا..اكيد
هيا افطر بيش تلحق تطلع بدري
احمد ..به وقعد يفطر
انا قعدت نوتي في التشيز كيك حطيته في الحافظة
احمد ..احسن حاجة درتيها انك لصقتي الكواشيك عليها
انا ..اه على خاطر عارفاتكم مش حدورو الكواشيك الصغار وتاكلوها بالكبار وانا نحب الحاجة تتاكل باصولها
احمد ..ينعلي نا منك وخلاص
انا ..هيا نوض
خذا حاجاته  واسقد بالسلامة وحسيت كان قلبي مشى معاه مش زي كل مرة مش معدلة ومش عارفة ليش   قلت لروحي غير عارفة روحك بتزوجي هذا ليش شعورك ناحية احمد تغير لانك بتحسي روحك بتبعدي عليه قعدت نقنع في روحي بالفكرة هذي
ورنيت على يوسف
انا..صباح الورد
يوسف
انا قعدت نشوف في الاسم ونتاكد فعلا ان عبورة متصلة بيا
انا..يوسف ههه شكلك فاتح الفون وانت راقد
يوسف ..صباح الياسمين صباح نبضات قلبي اللي ترفرف من الفرح
انا ..للدرجة هذي فرحك اتصالي
يوسف ..ماهو اول مرة تتصلي بيا بدون مانكون انا متصل بيك ولا معاها اول مكالمة في نهاري يعني نهاري بيكون عال العال
انا..قلت نكلمك قبل ماتوكل ونصبح عليك
يوسف ..معناها كل يوم بنمشي زردة على الحال هذا
انا..هيا نوض انا كيف سقدت احمد
يوسف ..انا مستني خالد وعبدالسلام بيتكو عليا
انا ..مانكش ماشي بسيارتك
يوسف .. لا   تعرفي مانحبش السواقة واجد ونفرح طالما نلقى حد يرفعني
انا ..غريبة انا من يوم تعلمت السواقة وانا نحايل على احمد يخليني اندير سيارة
يوسف ..احمد رافض عليش
انا ..ماعطانيش اسباب ديمة يقولي كملي السنة هذي وانا انديرلك سيارة وتمشي السنة ومايديرش ليا وحتى رخصة قيادة طلعلي راه
يوسف .. بالك ماعنداش فلوس
انا .. لا لا مش مسئلة فلوس معقولة احمد ماعنداش فلوس لان حتى بابا بيشريلي سيارة مخلاشي وقال انا اللي بنجيبها لها
يوسف ..ولايهمك لما تكوني عندي انديرلك احلى سيارة حتى ديمة توفري عليا السواقة ومش حيقدر يتكلم عاد 
انا..تسلم يارب
هيا نوض وتي روحك
يوسف .. هيييي سلام
انا ..سلام دير بالك على روحك
يوسف ..ان شاءالله ربي يخليك لي
وطبعا انا طلبت من بابا طلب بما ان احمد خذالي اللبسة وماباش ياخذ نص المبلغ زي مايدير في كل مرة قررت اني ناخذ لبسة كاملة ليه وبابا قالي الفلوس اللي ينقصن تو نزيدك وعديت للمحل لاني اللبسة شفتها على صفحة المحل على الفيس وعجبتني وكانت عبارة عن بنطلون جينز بني محروق وسورية بيضا وجاكيت خفيف قصير بيج وركبت معاه سبيدرو ابيض واكيد مع شكل احمد حتطلع اللبسة تهبل عليه تاكدت من المقاسات خذيتها وطلعت وغلفتها وطلبت من انوار تحطها في داره وعدى اليوم طبعا كلمت احمد اكثر من مرة سكايب وخش علينا يوسف مرة مرة وجاء ثاني يوم
ووتيت روحي انا وانوار ورفعنا بابا تكينا على هبة ومشينا لحلومة وبدينا نعولو على العرس وبعد وصلتنا بشوي اصالة جت وهنادي بعدها  
هبة ..تعرفي حلومة الحمدلله انك درتي عزومة صاحباتك قبل بوقت كنهدا راه قعدنا واحليين فيها
احلام ..حتى نا فكرت هكي لما قررت انديرها قبل امتحاناتكم لان قلت ايام الفرح نلهى بناسي
انا..هيا نغلفو الدبش بيش بعد بكرة يبدا واتي حتى كان ناقصة حاجة نلحقو انديروها وقعدنا غلفنا البتات وكملناه قريب من المغرب
ودارت عمتي عزيزة العشاء وتعشينا واول باول من ناسهم واقاربهم قعدو يجو ونحن قعدنا نفرشو فيهن ونوتي في ضيافتهم لكن الحق اقارباهم مش همجيين ناس ماشاءالله عليهم مرتبين ومنظمين
وفي الليل بعد كملنا حوستنا ركبت للسطح على خاطر انكلم احمد سكايب لاني قبلها كنت نكلم في يوسف وقالي احمد يدوش ولاني عارفة قديش احمد ياخذ وقت في الدوش رنيت على طلعته بالزبط
احمد ..اهلين نوارتي
انا ..صحة صحة
احمد..كيف عرفتي اني ندوش
انا..رنيت على يوسف سئلته عليك قالي كيف خشيت لدوش عطيتك وقتك واتصلت
احمد ..سلمك يارب رايفت عليك اليوم يامكارة كلمتيني مرة وحدة بس واتصال عادي
انا..ماهو لهينا في التغليف وقعدنا واحليين وبعدين جو اقاربهم وشرقنا معاهم
احمد ..ربي يعاونكم يارب لكن معاش اديريها اليوم نحس في روحي كاني فاقد حاجة حتى يوسف قالها ليا
انا..شنو قالك يوسف بحشم
احمد..نجيه الحشومي يارب
انا..تسلم
احمد.. قالي غريبة نوارتك ماكلمتكش اليوم الا مرة
انا..مركز لهدرجة
احمد ..مش عشان يبيك مركز لكن ديمة في الزردات اللي فاتن لما تعطلي ماترنيش نبدا كل شوي نقول هذي وين راحت فيعرفو كلهم اني نستنى في اتصالك
انا ..خلاص ياقلبي معاش نعاودها
شنو عجبكم التشيز كيك
احمد..هههه قريب كلو العلب معاه من حلاوته سلم دياتك
انا..الله يسلمك يوسف كلى منه
احمد...هههه ياعنجد هذي اه كلى منه
انا..غريبة
احمد..عليش
انا..لانه قالي مايحبش الحلو ومش اي نوع ياكل فيه
احمد ..لا هالمرة اكيد كان حياكل منه لان المرة هذي مش نوارتي بس اللي دايراته
هالمرة حتى عبورة حبيبته دايراته
انا ..انحرجت وقلت اشبح عجبه او لا
احمد..هههه ماتخافيش عجبه واجد لانه قال نادم انه ماكلاش من اي حاجة قبل ادير فيها من الحلويات
انا...حمودي خلاص بنسكر هبة تنادي فيا ونبي نرقد تعبنا واجد ونحن نغلفو اليوم
احمد ..هييي تصبحي على خير
انا..بتجي بعد بكرة الصبح بيش نمشو نفرشو الشقة
احمد ..اكيد
انا ..وانت من اهل الخير
وسكرت ونزلت رقدت في فراشي وقعدنا نهدرزو نحن والبنات وكل وحدة فيهن شافت حالها وانا اتصلت بيوسف هدرزت معاه شوي وغلبني النوم وانا معاه على الفون وهو سكر