#للنصيب_والقدر_كلمة_اخرى
ح5
الصبح نوضتني ماما وقالت ليا نوضي وقت على الكلية فقلت ليها ماخاطريش نمشي بحتت فيا ماما
ماما ..خيرك نوارة مش بالعادة انك تغيبي
انا... نحس في روحي تاعبة ياماما امس في عزومة حلومة تعبنا واجد
ماما ..كيف تعبتو وكل حاجة ايديرن فيها العاملات
انا... ماهو انتي عارفتيني ماعندي ثقة فيهن لازم نشرف عليهن وبهدلت معاي حتى البنات والولاد بسبب طبعي هذا وانت عارفة
ماما .. الله يهديك جايبة الشقاء لعمرك
باه خليك تكملي نومك
انا حاولت نرقد وفعلا رقدت شكلي من اللي صار معاي امس ونضت على رنت هاتفي
انا... الو
احمد ...اهلين كيف حالك نوارة
انا ...بخير الحمدلله كيف حالكم انتم اليوم
احمد .. بخير خليتي مكانك اليوم
انا... ماهو حكيت ليكم على القروب وقلت انحس في روحي تاعبة
احمد ... على العموم نحن جايين العشية عشان نبدو المراجعة ماتنسيش الامتحانات قربن
انا... مرحبتين بيكم تبو حاجة معينة ماما اطيبها لكم على العشاء
احمد... ايه يطعمك الحج والناس راجعة
من امبدري كلمت عمتي حواء وقلنا لها شنو نبو
انا... هههه مهنين على روحاكم نعني مانفقدكم
احمد ...هي سلام تو
انا تقلبت شوي وبعدين نضت توضيت وصليت وقريت شوي قران
وجو القروب وقعدنا نراجعو ونقرو وتعشينا طبعا الحلوين موصيين ماما يبو بازين وطبعا بازين ماما لايعلى عليه
وروحو وضميت مع ماما الحوسة وخشيت لداري على رنة تليفوني ولقيت حتى علامة مكالمة فايتة شكله رن قبل مانجي طبعا رديت وقلبي بيطير من الفرح لقيته يوسف
يوسف ... اهلين
انا ...اهلين بيك
يوسف ...وين من بدري وانا نرن
انا...كنت انضم في الحوسة مع ماما
يوسف ...ماشاءالله حرة
انا ..لا ماتشدش ايدك واجد
يوسف ... ههههه صراحة من الاخير
انا...شنو بنكذب بنقول فالحة لكن عاد مش بايرة لكن كان حطيت ايدي في حاجة معاش ترد وراي
يوسف ...تمام بكل
انا ... شنو اللي التمام
يوسف ... خلاص معاش تركزي
انا...شنو اخبارك انت
يوسف ... كساد ونفكر فيك
انا...فيا انا قلتها دير روحني باستغراب وانا قلبي قريب ينفجر من الدق
يوسف ... اكيد ومافي حاجة شاغلة بالي غيرك
انا ... عليش
يوسف ... مش عارف نبي نتعرف عليك ونبي نشوفك ونبي وسكتت
كنت نبي نقول ليها اني نبي نتمسك بيك ونبي نتعرف عليك اكثر لان نحس في حاجة في قلبي ليك بس سكتت خفت تسكر عليا
انا... صح انت حكيت على روحك لكن انا خليني نحكيلك عليا
انا البكر عند اهلي ونحن اربع خوت اثنين بنات واثنين ولاد طبعا نحن البنات الكبار والولاد الزوز هما الصغار وصغار واجد علينا
وبابا راجل معروف في البلاد بطيبة قلبه وسمعته الطيبة وماما ربة بيت ربي يحفظهم لي وهذي هيا عيلتي وعندي عيلة ثانية تو نحكيلك عليها لقدام لكن نين نتاكد قبل بعدين نقولك عليه
يوسف ...ربي يحفظهم ليك بس تبي تتاكدي من شنو
انا...امين ويحفظلك احبابك لما نتاكد تو نقولك شنهو اللي نبي نتاكد منه يوسف..امين يارب خلاص وانا نستنى وكملنا هدرزتنا على كل شئ شنو نحبو وشنو نكرهو ومشى الوقت ولقيت الساعة قريب 4الصبح استاذنت منه وقلت ليه بنرقد شوي لان عندي محاضرة الصبح بدري
يوسف ... تصبحي على خير
انا ..وانت من اهل الخير
يوسف
كان خاطري نسئلها وين تقرا في اي كلية وسنة كم بس خفت نزيد نظغط عليها واستغربت من روحي اني في كل كلمة نقول فيها اندير في الف حساب ليها على خاطر ماتسكرش في وجي
انا
تمنيته انه يتمسك بيا اكثر ويحاول يقعد معاي اكثر بس هيا تمنيات
مشيت للكلية ويوم مشى عادي وقضينا الايام اللي بعدها نقرو للامتحانات وكل مرة نتلاقو في حوش
وفي الليل بعد انروح نهدرز مع يوسف شوي ونسكر من التعب بتاع القراية
وحاسة ان يوسف يتجنب يسئلني على قروبي حتى لما نفتح موضوع حسيته يسكر فيه وماركزتش على الموضوع لان قروبي مستحيل نستغنى عليه
قبل الامتحانات باسبوع وانا في حوش احمد
عمتي غالية ... نوارة ترا بنيتي نوضي نزلي الدبش من على السطاح زيزي (الشغالة )روحت قبل ماتنزله
انا ...حاضر ياعميمة
ركبت نزلت الدبش وشكلي وانا انزل فيه مالميتاش في السلة كويس في طرف السورية كمها قاعد برا وانا نازلة من على الدروج وقريب نوصل قريب عشر درجات مازالن نعتر في كم السورية المدلي ونجي متكركبة من هدوكم الدروج
أنت تقرأ
للقدر والنصيب كلمة اخرى
Romanceحب فراق وحياة جديدة.... حينما يمنحك القدر فرصة جديدة للحياة قصة باللهجة الليبية للكاتبة حياة
