للقدر والنصيب كلمة اخرى

33

#للنصيب_والقدر_كلمة_اخرى

ح 33
طول الطريق وانا يوسف شاد ايدي ويقولي في كلام عمري ماسمعته ولاتخيلت اني نسمعه ومرة مرة يبوس في ايدي ويبحث في الطريق ووصلنا للحوش وانا خايفة ومتوترة مع اني نعرفهم بالذات اللي من طرف امه لكن مش زي هالمرة هذي جايتهم زوجة يوسف حبيب قلبي
يوسف ..كنك عبورة يديك ترعش بين ايديا
انا..خايفة
يوسف ..ونا معاك
انا ..ماهو انت بدخلني وبتطلع
يوسف ..لوتبيني نقعد معاك نقعد
انا ..شبحتله بضحكة
وخشينا للحوش ولاقتنا ام يوسف عمتي سميحة بالزغاريد وسلمت عليها وبست راسها وسلم عليها يوسف وباس راسها وطلع علينا جد يوسف سلمت عليه وبست راسه وايده وسلم عليا ومدلي فلوس تحشمت منه لكن قالي يوسف لازم تقبليهن وسلم يوسف على جده وضمه ليه نين عيون يوسف دمعو عاد هو اللي رباه وكبره وخشينا للحوش وسلمنا على جدة يوسف وبست راسها وايدها وحتى هيا عطتني فلوس وسلم عليها يوسف وحتى هي حضناته وقعدت تبكي نين دمعو عيوني جتنا عمتي سميحة وسكتتني وفكت يوسف من جدته وخشينا للصالة ولاقتني عمتو غالية وانوار اضبطتهن وقعدت نبكي نين فكنا يوسف وسلم على خالته وانوار ولاقاني مازالت اندمع جاء ضمني شوره ومسح دموعي والبنات قعدو يعيطو ودايرات جو
رفع يوسف وجي ومسح دموعي
يوسف ..ههه ياهبلة  مكياجك خرب هيا تعالي عديله
ركبني فوق خششني لدار كبيرة او بمعنى اصح جناح حلو وفيه حاجات واجد
يوسف .. عدلي مكياجك هنا لان هذي هيا دارك
بحتت فيه باستغراب
يوسف بضحكة ..بما انها داري فهيا دارك
انا قعدت انلف ونشوف فيه الالات الرياضية وجهاز صوني وشاشة كبيرة وسرير زوجي وشكله جديد
انا.. تو بنعدل مكياجي وببنزل لكن قبل مانروحو ركبني ليها بيش نشوفها اكثر
يوسف ..حاضر
انا عدلت مكياجي بسرعة ونزلت انا ويوسف وقعدت بين عمتو غالية وانوار وكل مرة وحدة تجي تسلم عليا وكل مرة نتعرف على العيلة وتغذينا والجو تما يهبل لعند ماخشت بنت علينا الوجوه تغيرت كلها لكن انا وانوار عادي لاننا مانعرفو شئ وجت وسلمت عليا
البنت ..الف مبروك عليك يوسف 
انا ..باستغراب من طريقة مباركتها ورديت الله  يبارك فيك وبحتت في انوار وعمتو غالية
البنت ..ماعرفتينيش
انا ..لا عرفيني بيك لانك طالما جاية اليوم اكيد من العيلة
طبعا بحكم اليوم مكلمين العيلة بس بيش يتعرفو عليا
البنت ..انا ...وقبل ماتكمل جت ام يوسف وخذتها واعتذرت مني وعدت بيها بسرعة لكن الجو اللي صار مش تمام بكل حتى عمتو غالية حسيتها تغيرت طبست عليها
انا..عمتو  من هذي وليش كلكم تغيرتو لما خشت
عمتو غالية  ..بنت اختي اخت سالم ومنال اسمها امل 
انا..اه بس ليش عمتي سميحة خذتها قبل ماتقولي من
عمتو غالية  ..مانعرفش بالك تبيها في حاجة
انا..بنتكلم خش يوسف وقالي المصورة برا بنصور انا وياك وصبيت وطلعت معاي انوار وعمتو 
انا.. عمتو وين احمد ماشفتاش معقولة مايجينيش معقولة مارايفش عليا
انوار ..احمد اليوم سافر
انا..اه وين وليش وليش ماكلمنيش
عمتو غالية  ..والله كلنا تفاجئنا بسفرته وقال سفرة ضرورية وليش ماقالكش كيف بيكلمك وانتي عروسة وليلة دخلتك لان هو سافر امبارح
انا ..وين سافر ومطول او لا
انوار ..لدبي وقال اسبوع او عشرة ايام
انا..زعمك رقمه الاول بيفتحهه والله بياخذ رقم جديد
عمتو غالية  ..والله ماني عارفة قال لما نوصل نتصل انطمنكم
انا..اول مايتصل بيكم كلموني راكم تنسوني بيش تعطوني الرقم وتو لما نروح نحاول معاه على الماسنجر او السكايب كان لقيته فاتح ونشوف حتى شفرته الاولى بتاعت دبي 
يوسف ..هيا حبيبي
صورنا ودارت لنا لقطات واجد وكلهن حلوات طبعا مش جريئات واجد على خاطر العيلة كلها اتفرج علينا
وبعدها سلمت عليهم وطلعت وانا قاعدة في المدخل نلبس في كابي نسمع في اثنين يحكن من بنات عم يوسف في الدار اللي مقابلة المدخل وماشافنيش لانهن جايات في زاوية انا نشوفهن هنا لا
البنت ..عليك اللي ماتحشم على وجهها بعد اللي دارته وبكل صحاحة وجه جاية
البنت الثانية .. مش مغير جاية وتبي تخرب عليه زعمك شافها يوسف
البنت ..ان شاءالله لا كنهدا تو تغمله وتنكد عليه وهو عريس
انا نسمع في الحوار وقعدت نلبس بالشوي عليا بيش نزيد نسمع ونعرف على من يحكن
البنت الثانية ..غير الحمدلله جت خالتها وكرتها ولزتها
البنت ..احسن مادارت كان شافتها امال اخت يوسف راه قتلتها
خش عليا يوسف فجعني من كثر ماني مركزة مع دوتهن 
يوسف ..كنك انفجعتي عبورة
انا..غير كنت سارحة شوي
يوسف ..هيا السيارة سخنت
طلعت وركبت في السيارة وانا عقلي يدوي بكلام البنات ويفكر فيه وعرفتها البنت اللي يحكن عليها لان مافيش الا هي اللي لما خشت الوجوه تغيرت وتلونت لكن شنو علاقتها بيوسف وقعدت نشبح في يوسف ونشوف فيه شنو جوه
يوسف ..كنك عبورة مش عاجبتيني نا من بدري نحكي مارديتيش عليا
انا..راسي دايخ شوي
يوسف ..بالك ماكليتيش  زين
انا..اه الحق تحشمت ماعرفتش ناكل براحتي
يوسف ..تو نتكو على مطعم وناخذو وكال
انا ..انت شنو كنت تحكي معاي تو
يوسف ..كنت نقولك غريبة طلعتي مش قلتي تبي تشوفي دارنا زين
انا..نسيتها بكل لكن الايام جاية ونشوفها براحتي ونرقد حتى فيها
يوسف ..ان شاءالله
يوسف نزل للمطعم شوي وجاء
ووصلنا حوشنا
وخشيت تمددت  طول على السرير
يوسف ..كنك عبورة مش عاجبتيني
فيك حاجة توجع  فيك حاجة
انا ..ظهري يوجع فيا واجد اليوم كله ونا مقمعزة
يوسف ..لاباس عليك ياقلبي فيا ولافيك
انا ..بعيد السو
يوسف ..خلاص حبيبي نوضي غير دبشك بالشوي عليك وانا نغير دبشي ونوتي العشاء
انا ..خليه تو نغير دبشي ونجيه نوتيه
يوسف .. لا ارتاحي حبيبي انتي حتى وجك متغير ومنصفر
انا..تعبانة واجد الحق
يوسف ..باسني على راسي لاباس عليك ياقلبي
وخذا بيجامته وطلع وانا صبيت بالغصب وغيرت فستاني ولبست بيجامة خفيفة ستان ناعم لونها احمر وابيض ومسحت مكياجي ومشطت شعري لميته كعكعة فوق
وطلعت على يوسف لقيته موتي العشاء على الطاولة وقعدنا نتعشو وبعدها خشينا للدار وخذاني في حضنه ومانندري على روحي رقدت طول
يوسف بصوت واطي .. عبورة حبيبتي قلبي 
انا فتحت عيوني على همسه الحلو
انا ..صباح الخير حبيبي
يوسف ..صباح الورد ياقلب يوسف
كيف حالك تو
انا ..حالي باهي الحمدلله
يوسف ..دوووم يارب صبي حبيبي امنا وتي روحك راه الساعة 11
انا..اه ماحسيتش بكل حتى بالمنبه
هيا نوض انت خش دوش مابين انا نضت فتحت الروشن بيش تتهوى الدار ووتيت الفطور
يوسف ..باه ياقلبي بس بشوي عليك
انا..لاحالي تمام غير انا طبيعتي لما نمرض لازم اول يوم نرقد بيش ما اتعبنيش لكن شوفت عينك اول يوم وانا يوم فرحي المفروض وين قضيتها وطولنا في السهرة هذا ليش ثاني يوم تعبت واجد
يوسف ..بس شغلتيني عليك الليل كله وانتي تتوجعي وماعرفتش شنو اندير لدرجة اتصلت حتى بانوار
انا بفجعة ..امتى صار
يوسف ..امبارح لما رقدتي كل شوي تتوجعي وينزلن دموعك وانتي راقدة خفت عليك ومانعرفش شنو اندير نوضتك اكثر من مرة وقلت ليك نرفعك للمستشفى قلتي ليا لا ولما اتصلت بي انوار هيا اللي طمنتني وقالت ليا اللي انتي فيه عادي راه وسمتلي دواء اتصلت بخالد خوي طلع جابه ليا وعطيتك منه رقدتي مرتاحة بعدها
انا..ههههه معقولة هذا صار مانندري على حاجة
يوسف ...ههه قالتها ليا انوار قالت كان قعدت اتوجع وهيا راقدة لو ترفعها تعزقها في البحر ماتتندري على حاجة
انا..خزي عليها تفضح فيا قدامك
يوسف ..ضمني ليه تفضح شنو عبورة انتي زوجتي وحلالي ورفيقة دربي
انا..ربي يحفظك ليا يارب هيا معاش عندنا وقت
طبعا نحن اليوم بنعدو نتغدو عند اهل اب يوسف ولان حتى جده بيش نسلم عليه
فطرنا وخشيت نوتي في روحي ولبست بدلة رسمية لونها وردي هادي قونة طويلة فيها فتحة من الخلف للركبة وهي من القماش الواقف وعليها جاكيت نظامه دانتيل ومن نفس قماش القونة وكم طويل وطالعة عليا تهبل لبست عليها كندرة فوشيا بشنطتها وطلقت شعري على طوله وشديته بالجنب ببروش ورد الورد بتاعه صغير بين الوردي الهادي  والسكري ومكيجت مكياج حلو ودكنته شوي لان البدلة الوردي لونها هادي هلبة ولبست عليها طاقم  فضة جابه ليا احمد  واذكرت احمد وكيف سافر بدون مايشوفني لكن حسابك معاي يا احمد غير انشوفك بس حتى النت مافتحش بكل وشفرته مسكرة
ولبست ساعة فضة وحديدة المسمار كارتيه ودبلة فضة جابها ليا يوسف مع دبلة الخطوبة وطلعت ماسكة كابي في ايدي
يوسف ..بسم الله ماشاءالله
وجاء وضمني مش قلت قمر ياربي يمشي على الارض
انا..دفيته وقعدت نشبح فيه لابس زبون كامل يهبل وحتى انت تبارك الله طلع غزال
يوسف ..عيونك الحلوات
هيا ياقلبي
انا ..لبست كابي وطلعنا ووصلنا لحوش بوه ولاقتنا مرت بوه بالزغاريد ومعاها امال وحسيت بيهن فرحانات واجد ماتقولش يوسف مش ولدها
واضبتني واضبطت يوسف وبكت قعد يهدي فيها يوسف وانا ضميتها وبست على راسها وسلمت عليا امال بحرارة
امال ..واخيرا ربي فرح قلبنا وشفناك عريس وجايب عروستك معاك
انا...بضحكة امنا بيجي بلاي تبيه
امال .ههههه خاني التعبير بس
هيا خشو عبدالسلام ومرته من بدري جايين سلمو على جدي قبل يستنى فيكم من بدري عاد حتى هو وسيفة راه 
يوسف ..عبدالسلام شقته خطوتين منكم عاد
خشيت انا ويوسف على جده سلمنا عليه وحبيت على راسه وايده وهو اضبط يوسف زين ومدلي فلوس وقالي عينك منه راه يوسف غالي
انا بحشم ..حاضر ياجدي ماتخاف عليه وبعدها خشينا لداخل وشادة في ايدي امال وسلمت على سلفتي حتى هيا كانت طالعة ماشاءالله ولابسة بدلة رسمية
لما حولت كابي بحتت فيا امال وضحكت 
امال ..تقول متفقات انتي وسلفتك
انا..هههه ان شاءالله ديمة متفقات بدون اتفقاق
منى ..القلوب عند بعضها خاطري نلبس العربي قبل لكن سبركم ماخلانيش
انا..حتى انا والله
امال ..هانت مازال اربع ايام وتلبسنه ولايقعد في خواطركن
انا ..ومنى ..ان شاءالله
وقمعزنا على الصالون وقعدنا نهدرزو ومش عارفة ليش حسيت الجو هنا احسن من امس جوهم يهبل وكله ضحك من القلب وجت حتى ام يوسف عمتي سميحة والمعاملة بينها وبين مرات اب يوسف عادية جدا ماتقولش كانن ضراير قبل لكن الحق مرات اب يوسف طيوبة واجد وشوي وخش علينا عمي علي وسلم علينا وانا بست راسه وايده ومد لينا فلوس انا ومنى وطلع
بحتت في امال ونضحك
امال ..كنك عبورة
انا ..ماسكة الفلوس في ايدي لانهن شكلهن واجد ماخشنش في الشنطة لانها صغيرة وقلت لها
انا بين امس واليوم  قريب نولي مليونيرة
امال ..ضحكت عليش
انا..امس جد وجدت يوسف مدولي فلوس لما شفتهن بعد روحت لقيت جدي مادلي 3000وجدتي مدتلي 1500 واهو اليوم عمي علي مادلي فلوس حتى في الشنطة ماخشن
امال .ههههه هاتي تو نعطيهن ليوسف يحطهن لك في السيارة لان هذين عادات الكبار في العيلة وكل واحد وجهده 
انا...سلمها يارب
امال ..تسلمي
وعدت رفعت لفلوس ليوسف
انا..شنو الجو منى مازالتو مش مسافرين
منى ..يجنن الجو انا مفروض نشكر يوسف لان لولاه ماطلعنا الفرح تو راه قعدت انأجل  فيه للصيف الثاني
انا..ربي يهنيك يارب ماهو مستعجل ماباش يصبر لدرجة في حاجات مازالت نسئل فيهن عليه لاني مانعرفهنش عليه
منى ..عاد نا حافظته صم سنين عاد هنا
انا..ربي يخليكم لبعض يارب
منى ..ويخليكم لبعض والسفر طبعا نين نمشي لزورة اهلي قبل وانتو
انا ..حتى انا هكي مقررين
طبعا تحشمت نقول لها نين تكمل مرضتي
ومشى جو يهبل من الاخير وحتى يوسف لما جاء بيطلع بيا كان لقيته مازال لكن هذاك هو وجت المصورة وصورنا كلنا وكانت الضحكة ماتفارق وجوههم ولما جيت بنطلع طلعني يوسف من الباب لكن ركبني من دروج خارجيات
انا ..وين ماشيين نحن
يوسف ..شوي بس
وصلنا عند ممر فيه بابين تقول شقتين فتح يوسف باب منهن بمفتاح عنده وخشينا وان فتحت فمي من الجمال والنظام كان عبارة عن شقة صغيرة اول ماتخشي ممر صغير بعدها حمام ومقابلاته دار وصالة صغيرة يفتح فيها مطبخ صغير بنظام بار وبعدها ممر ثاني صغير فيها دار وحمام وفتح يوسف الدار لقيتها دار نوم وواضح الفرش في الشقة والديكور كله انه جديد
انا..حبيبي لمن الشقة هذي
يوسف ..لنا
انا ..والله وفيلاتنا لمن امنا
يوسف ..لنا حلوة لمن
انا..باستغراب فهمني حبيبي
يوسف ..هذي باتي لما بنى الفيلا هذي دار فيها الجناح هذا لي واللي مقابل لعبدالسلام وفي باب اخرى لخالد غير في الجيهة الثانية بحيث لما نزوجو وحبينا نجو ونباتو هنا نبدو براحتنا ماحد يضايقنا وهو من قبل كان داري لان باتي مادراش لواحد منا دار لوطة بحكم نحن شباب خلانا براحتنا وماكاننش هكي بكل طبعا لكن قبل الفرح امال وخالتي عازة فرشنهن جناحي وجناح عبدالسلام وعلى ذوقهن وقالو لنا لو في حاجة ماعجبتش العروس تو تغيرهن بروحها
انا..ماشاءالله عليهن شنو بنغير ذوقهن يهبل وبعدين حتى لو ماعجبتني حاجة مستحيل انغير حاجة تعبن فيها
يوسف ..ضمني سلمها العاقلة واحفظها لي يا رب
انا..تحبني
يوسف ..لا لا لا نموت فيك مجنون بيك شوية نحبك هذي
انا..نموت فيك ياقلبي
يوسف ..هيا نروحو والله تحبي تباتي هنا
انا ..من كثر جو هلك يهبل لو معاي دبش راه بتت
يوسف ..هي امنا وبكرة نجيبو دبشنا ونباتو هنا
ونزلنا وسلمنا عليهن وشكرتهن على ذوقهن اللي يهبل وطلعنا وفي السيارة تقريبا ماسكتناش بكل ونحن نهدرزو نين وصلنا
وخشينا وانا نحول في كابي قعدت نضحك
يوسف ..دووووم يارب
انا ..تخيل عندنا ثلاثة حواشين
يوسف ..بيش تعرفي حبيبك بس
انا..حبيبي قلبه ابيض وربي يعطي فيه على نيته وجاء باسني بوسة طويلة نين ارتخيت منها وقعد هو ماسكني
وخشيت غيرت دبشي وهو غير دبشه ولبست بيجامة ستان وردية هادية موردة بورد فوشيا طرفين بس
انا طلعت مدلي يوسف الفلوس هذين الفلوس عطتهن ليا امال امبدري قالتلي دسهن لعبورة عرفت ان باتي اللي عطاهن لك صح
انا ..اه بالله كم ترا لاني حسيتهن واجدات
يوسف ..5000
انا بعيطة  ...اه شنو تقول
يوسف بضحكة .. والله جد
انا ...وعمتي عازة مدتلي 1000 وجدك مدلي 1500 وين هلك هدوووم اللي مايعرفوش يمدو بالميات بكل يعني اليوم بوك ماشاءالله بيني وبين منى حط 10000
يوسف ...باتي خيره واجد وهكي تعبير على فرحته بيكم
انا ..ان شاءالله نطلعو قد فرحته يارب
يوسف ..بالنسبة ليك انا متاكد
انا ..حتى منى ماشاءالله عليها امغير تسلم
يوسف ..انتي اللي قلبك ابيض تشوفي في الناس كيفك
انا ..ماحد رافع منها حاجة
يوسف ..ربي يحفظك يارب
انا ..تعرف بين اليوم وامس كم عندي فلوس 12000 تخيل
يوسف ..استني شوي
مشى للدار وجاء ومدلي فلوس خليهن يقعدن 15000 مرة وحدة
انا ..عليش حبيبي هكي واجد راه
يوسف ..مافي حاجة واجدة عليك
مش انتي بعد مانروحو من سفرتنا تفكري تفتحي مشروع
انا..اه
يوسف ..خلاص افتحيهن بيهن لان هذين حقك وهدايا لك محد يتجمل عليك بيهن وتكوني فتحتي مشروعك الاول من فلوسك
انا..جيت ضميته ربي يخليك لي يارب
صبيت ضميت الفلوس حطيتهن في شنطة ذهبي وسكرت عليهن وطلعت لقيته حاط على فيلم يتفرج عليه واول ماجيته فتحلي ايده وخشيت فيها وقعدنا نتفرجو ونحن متغطيين ومانندرو على روحنا نين لقينا روحنا راقدين  في الصالة