للقدر والنصيب كلمة اخرى

73

#للنصيب_والقدر_كلمة_اخرى

ح73
عندنا في المصحة
طلع الدكتور عليهم وقبلها حكى لهم عمو محمود شنو صار معاه
وجو كلهم يجارو للدكتور
بابا .. طمنا يادكتور
الدكتور .. حالها مستقر لكن للاسف صاير ليها انهيار عصبي وضربة السيارة جتها قوية وللاسف خسرت جنينها لانه صغير واجد وحصلت ضربة على راسها وهي حاليا راقدة 
بابا بفزع  .. قصدك هيا كانت حامل
الدكتور باندهاش .. هيا مش مدام
عمو .. اه مرت ولدي
غير ليها مدة متزوجة وماصارش حمل 
الدكتور .. بما انها ليها فترة متزوجة معناها ماتقولوش ليها حتى تروق نفسيتها
بابا.. بالله بنيتي منين تلقاها ومنين بتجيب الروقة
الدكتور .. هي صايرة ليها مشكلة
عمو بحرقة  ..زوجها مخطوف ومانعلموش عليه شئ
الدكتور ..ربي يرجعه بسلامة
ومشن عليا ايام انوض نعيط باسم احمد ونرجع نرقد ومانندري على حاجة نين مرة نضت لقيت عمو محمود احذاي
انابصوت كله تعب ودموع .. عمو اااااحمد وين
عمو .. مازالنا بنيتي مانندرو على شئ ولاقدرنا نوصلو لحاجة
انا.. عمو بنطلع انا احمد لو يعرف اني مريضة حيزعل مني اني مادرتش بالي على روحي
عمو ..خلي بنيتي يشوفك الدكتور
وجاء الدكتور وعطاني مقويات وقالي لازم نتغذا كويس ونجي نغير على الجرح ونحاول مانبدلش مجهود ولما طلعنا سئلت عمو لانهم كانو يتبادلو عليا بسبب الناس اللي تجي وتمشي للحوش
انا..عمو قديش ليا في المصحة
عمو.. عشرة ايام
انا.. ياقلبي وقعدت نبكي بدون صوت خفت على عمو عنده الضغط
معقولة عشرة ايام مافكروش يتصلو يارب احفظه ليا يارب
عمو .. امين يابنيتي مش مهم كم يغيب المهم انه يرجع طيب
انا.. يارب ياعمو
عمو فوني وين
عمو .. عند سند تحسبا انهم يتصلو بيك لانهم اول ماكلمو على فونك
انا.. ياريت ياعمو
عمو بنسئلك انتم ماسيبتونيش بكل في المصحة
عمو .. لا عليش بنيتي
انا.. كاني لمحت خيال علياء جتني
عمو .. يتهئ ليك بنيتي
انا.. اه ممكن
ووصلت الحوش واستقبلوني كلهم وفي عيونهم نظرة مافهمتهاش وجيت لهبة
انا.. هوبي في حاجة داسينها عليا صح
هبة .. لاحبيبتي مافي شئ عليش تسئلي
انا.. في عيونكم انتي وليد وهنادي وخالدة وسند  وعبدالله وماما وعمتو وانوار ووسيم واصالة واسامة  وفتحي وحتى سماح نظرة مافهمتهاش كانكم داسين حاجة عليا سمعتو حاجة على احمد وماتبوش تقولولي
هبة .. لا والله مانعلمو حاجة عليه اصلا نراقبو  في فوناتنا كلهم لدرجة فونك بالذات يبادلو عليه بالدور عشان لو رنو عليه
انا.. بندير دوش بنحول ريحة المستشفى مني لكن استغربت حاجة
هبة .. شنو
انا.. لقيت روحي مريضة وهيا مش موعدها بكل
هبة بدموع في عيونها .. ممكن حبيبة من اثر الحادث
انا.. به عليش الدموع انا احذاك اهو
حضنتني هبة
هبة .. مرن علينا ايام مايعلم بيها الا ربي
انا.. خلاص حبيبة اس اهو احذاك انا وحتى احمد تو يروح طيب قلبي حاسسني
هوبي مانبيش نركب لحوشي واحمد مش فيه بالله جيبلي دبش بندوش هنا
هبة .. حاضر
وركبت هبة نزلتني دبش وعيونها حمر وعرفت انها بكت واجد لما ركبت
وخشيت للحمام وعاونتني هبة دارتلي حمام بالشوي على خاطر الجروح اللي في جسمي وخياطة راسي وطلعت من الدوش وقاعدة انوار تجففلي في شعري ونسمع سند ينادي
سند.. عبير عبيررررر تعالي بسرعة
انا.. نعم
سند ..فونك يرن برقم احمد
انا رديت ودموع في عيوني .. احمد وردت فيا الروح على الرد اللي جاني
احمد.. عيونه
انا.. كيف حالك ياحبي كيف حال صحتك انت طيب صح
وسند وكلهم يشيرو ليا نفتح المايك وفتحته
احمد بصوت تاعب .. انا كويس نوارتي لكن مطر اندير حاجة غصبن عني بيش نحميك
انا.. المهم انت مش انا امتى بترجع قوللهم لو يبو فلوس سيارات ذهب اللي يبوه حاضرين فيه وانا بدموع
احمد.. معاش تبكي انا كويس مافيا شئ الا بعدي عليكم
انا... به شنو يبو
احمد.. سامحيني ياحبي عبير انتي طااااالق
انا.. ... ااااااحمد
احمد.. طوط طوط طوط سكر الخط
احمد
من لما طلب مني اني انطلقها عاندت وقلت لو نموت لكن هددني بيها ومعدلتش عليهم لاني عارف ان مافيش حد حيسيبها بالذات في الوضع اللي انا فيه لكن ماتوقعتش انهم داهية للدرجة هذي ونسيت ان الشيطان يكون قوي مع الناس الضعيفة والبعيدة على ربي ولما سمعت بيها في المصحة وكل يوم يتصل بصاحبته الممرضة ويفتح في المايك تحكي في وضعها  وانا قلبي بيتقطع ومافيدي شئ انديره مربط ومرات حتى فمي يسكرو فيه وحتى الوكال اول ايام عاندت لكن بعدين على خاطر نرجع ليها ونرد حقي قعدت ناكل مايخليني عايش بس ولما عرفت انها طلعت وحالها كويس ولما علمت انهم كانو في سبب قتل طفلي اللي مافرحناش بيه واللي كانت نوارتي تستنى في خبر زي هذا بفارغ الصبر اطريت اني انوفق على طلبهم عشان مايضروهاش اخرى لانهم هددوني المرة الجاية مش حتنوض منها وانا حتى لو بعيدة عليا نتحمل الا الموت  تي  انا تحملت تكون مع راجل ثاني المهم تكون متهنية ورضخت لطلبهم ولما كلمتها كان قلبي بيتقطع وانا حاس بدموعها تنزل على خدها ولما طلعت كلمة طالق من لساني  كان قلبي طلع قبلها وعقلي يقول مش طالق 
انا
عاودت  زي المهبولة ولقيت الخط مسكر
انا قعدت  مهسترة
انا سمعت غلط صح وقعدت نشد في عمو وبابا سمعت غلط انا صح سمعت غلط صح احمد يحبني مستحيل يسبني مستحيل وبصوت عالي ااااااااااااحمد
ومعاش نندري على شئ الا وانا في المصحة وصارت ربكة في الجميع ومعاش عرفو شنو يديرو
الدكتور .. انا شنو قلت باعدو عليها اي توتر بسبب الصدمة خشت في غيبوبة ومش معروف امتى تنوض ادعولها
ماما طاحت عليهم وعمو ارتفع عليه الضغط ووسيم معاش عرف يقطع روحه على من والله من على مرته والله بابا  او ماما  او عمو او عمتو والشلة كلها تما حالها يرثى لها وانا في الغيبوبة قعدت عشرين يوم وكنت نسمع فيهم لما يحكو حذاي وسمعت صوت نعرفه كويس لكن مافهمتش شنو تحكي وكانو يبادلو عليا رغم ان الدكتور قاللهم جيتهم ماليهاش لزوم في البداية لكن بعد اربع ايام حركت ايدي فقال لهم الدكتور تعالو واحكو معاها مرات تفوق وفعلا كل مرة جايني حد من قروبي حتى هشام سمعت صوته اه هشام جاء مهما كان نحن عشرة عمر حتى لو غلط لكن غلطه فادني لاني عرفت حب احمد ليا عرفت سعادتي معاه لكن اي سعادة وهو طلقني ولما وصلت للفكرة هذي نضت من غيبوبتي وانا نعيط
انا.. ااااااحمد احمد احمد ماتسيبنيش احمد تعااااال
هبة .. اهدي عبورة بالله عليك اهدي
وطلعت تجري للدكتور وتقوله اني فقت
انا.. احمد هنا احمد انا متاكدة انه هنا
هبة .. حاضر تو ندوره غير اهدي بس وجاء الدكتور وعطاني مهدئ
وهبة كلمتهم كلهم وجو بين فرح وحزن
هبة .. ناضت تعيط وتقول احمد هنا وتقول فيها متاكدة ياعمي
بابا.. غير من الصدمة بس
سند.. القلب ياعمي عمر يحس نحن مش خاسرين شئ خلينا نشوفو المصحة
وفعلا انتشرو بين الغرف  كلهن لكن العناية ماقدروش يخشو ليها
وانا فقت وهديت وطلبت نروح والدكتور منع ذلك
وماما عاونتني للحمام ودوشتلي وتوضيت وصليت وانا مقمعزة لان جسمي من النوم لعشرين يوم كانت حركتي صعبة وكملت صلاتي وقعدت ندعي
انا.. ياربي احفظه لي يارب هو ماطلقني الا لسبب انا عارفة احمد مايستغناش عليا بسهولة يارب رده طيب حتى لو مش ليا يارب عفوك عليا يارب جود بكرمك عليا يارب
وطلبت يجيبو  فوني وقعدت نتفرج على صوري انا واحمد ونبكي بصمت عشان مانوجعش حد معاي وبعد ثلاثة ايام الدكتور عطاني خروج وكانت معاي انوار وكلمت وسيم يروح بيا  لكن ونحن قدام المصحة رن فوني وكان في ايد انوار
انوار .. احمد هاكي
انا.. ايوه حبيبي
الراجل .. اختي صاحب الرقم بيش تعرفيه
انا.. راجلي بالله عليك قولي وينه الله يربحك
الراجل .. هدي بالك اختي انا لقيته من ثلاث ايام مصاب في كتفه ومغمى عليه وجبتها للمصحة
انا بلهفة .. اي مصحة خوي
الراجل .. المصحة ****
انا... فيها تو انت وين
وصف لينا الراجل وطرت نجري نسيت وجعي ونسيت المي وعدينا نجارو ولقينا الراجل وقال هو في العناية لكن حالته مش خطيرة لان الرصاصة
انا
سمعت كلمة رصاصة طحت من طولي
الراجل .. ماتخافيش اختي الاصابة في الكتف مش خطيرة لكن هو في العناية لانه نزف واجد وسوء تغذية وجسمه ضعيف
وسيم .. به ليش خوي ماكلمتناش الاتو
الراجل .. لقيته مغمي عليه ومعزوق حذاه الفون لكن بدون شحن واليومين اللي فاتن لهيت معاه وبعدها اذكرت الفون شحنته والحمدلله مافيشي كلمة سر واتصلت طول باخر رقم
انا.. الحمدلله يارب استجبت لدعواتي وصلواتي الحمدلله يارب
ووسيم وانوار قعدو يتصلو بيهم كلهم وانا لبست روب المستشفى وخشيت ليه في العناية وقاعدة مش مصدقة كيف رايح ذابل  وضاعف واجد وكيف لحيته اللي ديمة مهتم بيها كيف طاولة ومبهدلة وشعره كيف طاول واجد تحت من كتوفه وقعدت انتلمس فيه ونمرر في صوابعي بخفة على جسمه ووجه كاني نبي نتاكد انه حذاي وانه حي ودموع تنزل من عيوني
انا.. اشتقت ليك ياقطعة من روحي لا انت روحي كلها انت عمري نوض حبيبي نوض خوذني في حضنك نوض دفيني في صدرك نحس في دينتي ولاحاجة بلاك نوض ياقلبي ونبضه وبسته على جبينه وحسيت بحركة فطنت لايده تشد على ايدي وفتح عيونه بشويش ودمعو طول
انا.. ماتفكر في شئ ياقلبي المهم اشفى بسرعة ليا ومسحت دموعه
وطلعت ناديت الدكتور وشدوني اهلي يسئلو فيا ويبو يطمنو وقلت فتح عيونه
وطلع الدكتور
كلنا ... ها دكتور
الدكتور .. الحمدلله فاق واموره كلها تمام وبنطلعوه لغرفة عادية بيش نهتمو بيه من ناحية التغذية
بابا .. لا حطوه في جناح
وعدو بابا وعمو للراجل اللي لقاه وعطوه الفلوس اللي دفعهن وشكروه واجد لانه جابه للمصحة مش مستشفى
وطلع احمد للجناح وانا ماقدرتش نسيبه بكل لكن ماقدرنا نحكو شئ لبعضنا هو يشوف في شكلي الذابل وكيف ضعفت واجد وكيف رايحة منصفرة  وحسيت بيه بيسئل وبعد نهار طويل من الزيارات والسعادة اللي في عيون الكل وروحو  ودار حديث وحاولت ان لايسمعه احمد
عمتو .. روحي بنيتي انتي اليوم كيف طلعتي من المصحة وتو نا نقعد معاه
انا.. مانقدر انفارقه دقيقة نخاف يبعد عليا اخرى
عمتو .. باهي غير دبشك ودوشي وتعالي
انا.. كلمت انوار تو تبعتلي دبش مع وسيم وبندير دوش هنا
وطلعت عمتو وعمو وبابا وماما بعد ماسلمو علينا
احمد.. كيف طلعتي اليوم من المصحة
انا.. اسس ماتحكي شئ انا حالي كويس تشوف فيا
احمد.. بضحكة باردة اه كويس
كيف كويس وانتي رايحة صفرا وعظم على جلد ودبشك مبهدل كيف كويس
انا.. حبيبي ليش بنهتم بحياتي والله دبشي وانت مافيها
احمد.. انا اسف نوارتي
دق الباب وخش وسيم جايبلي الدبش وسلم شوي وطلع
انا.. حبيبي بندوش ونغير دبشي ونرجعلك سريع
احمد.. اقفلي باب الحمام زين
انا.. حاضر
خشيت دوشت وتقريبا اسرع دوش انديره لاني مانبيش نسيب احمد لدرجة طلعت بالداخلي نلبس في باقي دبشي برا
احمد .. هييييي يخش حد
انا.. نلبس بسرعة مش حيجي حد تو وموعد المرور مازال عليه ساعة
وجيته وانا قاعدة نجفف في شعري بالمنشف 
احمد.. حتى انا نبي دوش نحول العفن اللي عالق فيا
انا.. حبيبي مازال الجرح جديد خلينا نشوفو الدكتور وبعدها ساهل
احمد.. انا آسف نوارتي
انا ..حطيت صبعي على فمه بمعنى يسكت
حبيبي انت لما نطقت الكلمة عرفت انك تحت تهديد لانك مستحيل تتخلى عليا
ومعاها قلت عبير اللي عمرك ماناديتني بيه حتى في القراية
احمد.. والله هددوني بيك في البداية ماعدلتش عليهم وبعدين هما كانو سبب الحادث اللي تعرضتي ليه وبسببه خسرتي اول فرحة لينا
انا باستغراب .. فرحة شنو
احمد..شد ايديا طفلنا الا ماليه شئ في رحمك
انا..قصدك انا كنت حامل وقعدت نبكي
انا كنت بنكون ام انا كنت حنجيب بيبي منك وفقدته ياربي اه
وناض احمد بالسيف وقمعز وخذاني في حضنه وقالي كيف ماكنتيش تعلمي
انا.. لا  ماقالي حد وقعدت نبكي في حضنه الله قديش مرايفة عليه الله يارب الحمدلله انك رجعته ليا طيب
احمد .. وكانه تفكر حاجة باعدني عليه ولاني فهمت ليش دار هكي رديت ضميته وشديت بقوة على ضمه
انا.. حبيبي مازالت حلالي راه سئلت شيخ وقالي لو الطلاق بالاكراه وفي ضرر زي القتل يعتبر باطل وبعدين لانه طلقة وحدة غير مبينة تقدر اترجعني وانا في ايام العدة
ضمني احمد  بقوة وكانه ارتاح
احمد.. مانتخيل حياتي بلاك
انا.. احكيلي ياقلبي كيف صار فيك هكي
احمد.. حاضر ياقلبي بس نوضي اتصلي بسند خليه يجبلك وكال انتي ماكليتي شئ اليوم فاطن ليك راه بالك تسحابي الزحمة خلتني تغيبي عن عيني
انا.. ههه حاضر وبسته على .....وحدة طوووووويلة وهو رغم تعبه وضعفه كان بنفس الشوق لي  واه قديش كنت مرايفة عليه وعلى كل شئ فيه  
وجاء سند جابلي وكال وكليت ووكلت حمودي معاي ولاني كنت جعانة واجد
احمد.. حبيبي صحة بشوي عليك
انا.. حبيبي عشرين يوم لي ماكليت شئ
احمد.. كيف عشرين يوم
انا..  وكالي كان تغذية بس وانا في الغيبوبة  حبيبي
طلعت مني بعفوية 
احمد... شنوووووووو