للقدر والنصيب كلمة اخرى

45

#للنصيب_والقدر_كلمة_اخرى

ح45
حبيبتي عبورة..
هذين حقك ومازدت عليهن شئ ومع اني اليوم جبتهن  ونا كان عندي امل اني انشوفك ونحاول اني نقنعك ولو للمرة الاخيرة انك تسامحيني لكن ماقدرتش ومن كثر ماعقلي مشوش نسيت انك اليوم عندك مراجعة
امنيتي انه يجيك يوم وتسامحيني وترجعيلي ومستعد نصبر لان دنيتي اذا  انتي مش فيها نا مانبيها وحنستنى لعند قلبك يحن عليا وان شاءالله ماتردي حاجة لانهن زي ماقلت ليك هذين حقك الذهب حقك في الدين والشرع والفلوس اللي بروحهن هذين هدايا ليك مايحقش لحد فيهن ولانقدر نرجعهن لاصحابهن والباقي مؤخرك والدبش اللي خذيته لك خليتيه وانا مش حنرجعه لك لان ريحتك مازالت فيه بيش نضمه وانا بنرقد نكتب وانا قلبي واجعني لاني ماتخيلتش يجي يوم زي هذا بينا لكن لاني نحبك مانقدرش نجبرك انك تكوني معاي ولو سعادتك في البعد عني انا نتمناك سعيدة
سلام ياقلبي وعمري
هبة كانت تقرا فيها وانا دموعي شلال سكرت الشنطة وخذيت الورقة منها ومزقتها بين ايديا ومسحت دموعي وخلاص معاش في دمعة بتنزل ياسر ياسر بكيت واجد ليا شهرين وانا في هم وحزن ياسر حتى بابا وماما وعمو وعميمة وانوار واحمد وحتى انتي ماقدرتي اديري خطوة في خطوبتك بسببي تعبتو في جرتي وعايشين في نكد بسبي
هبة ..ماتفكري في حد فكري في روحك ونحن هلك مانقدروش نخلوك مهما كان السبب
انا.. هيا حبيبة ننزلو لوطة وتعرفي خاطري في حاجة حلوة ديرلنا كيكتك العبيطة اللي ماتعرفي غيرها
هبة ..خزي طالما عارفتيها عبيطة ليش تبيها
انا .. والله كان ماعاجبتني ماقلت ليك ديرها وبعدين ماعندي جهد اندير كيكة فانتي اللي بديريها ليا نبي ندلل شوي
هبة .. وادللي وخوذي راحتك هيا ننزلو
ونزلنا وخشت هبة ادير في كيكة هي وانوار ودارولي كباية يانسون دافية لما عرفوني مريضة وانا بين ماما وبابا
انا ..خلاص معاش تفكرو في شئ بنتكم قوية راه غير نكمل عدتي ونبدا في حياتي من جديد
بابا ..عارف بنيتي كبيرة عقل وكبيرة قلب
ماما.. سامحيه
احمد..منو
ماما .. يوسف
انا.. طالما دار اللي نبيه مسامحته وان شاءالله يلقى بنت حلال احسن مني
احمد .. فرحت من كلماتها لان نوارتي لما تسامح حد غلط فيها تكون اسامحت مع روحها ولما تسامح مع روحها معناها حتطلع من وجعها بسرعة
وخشت هبة وانوار علينا ودايرات جو حلو
هبة ..اي تعليق اي مقارنة بيني وبين عبير في الكيكة نهاركم اللي تشوفوه
نحن ضحكنا وحسيت روحي ضحكت من قلبي وكأن  همي انزاح وقلبي ارتاح بمجرد ما اني سامحته
وكلينا وقعدنا مكسدين ولعبنا شوط كورة انا واحمد وانوار وهبة لعبو مصارعة ومشى الوقت ماحسيناش بيه وحسيت بيهم كلهم راقو وارتاحو لما شافوني اني تمام انا تمام اه تمام صح مش واجد لكن عشان خاطرهم ننسى ونرتاح حرام عليا مشو عليهم شهرين صح انا ضعفت ورحت جلد على عظم لكن حتى بابا وانوار  وماما وعمو وعميمة وهبة ضعفو واجد وحتى اصالة وهنادي وسند وعبدالله نقص وزنهم  بسببي حتى احمد عضلاته المرسومة كانت مع ضعفه راحن مش واضحات زي قبل وعميمة لدرجة عرس بنت عمها مامشتلاش على كثر ماهي متغششة عليا لازم نقوى على خاطرهم
انا ..هيا ماتبوش ترقدو انا عييت بنخش نمدد جسمي
هبة ..حتى انا خلاص
طبعا انا عارفة هبة ماتبيش تخليني بروحي
انا ..هيا امنا
احمد ..هبة امنا بكرة منكش ماشية للجامعة
هبة ..لا مانيش ماشية وحتى اصالة وهنادي  بكرة بيجو هنا وسند وعبدالله  تقريبا حتى هما
احمد ..اه امنا بنعدي لاني متفق مع سند   وبنشدو عاد في المحاضرات
انا..غريبة حمودي السنة متحمس للقراية  قبل اقلنا واحد تقعد متحمس ليها
احمد..ماهو على خاطرك بيش نقدر نشرحلك ونقريك ونكون استاذ كويس
انا..مشيت شور احمد وضميته ايه ضميته ضمة قوية اخرا طلعت فيها الوجع اللي حسيته كله طلعت فيها كل امتنان والشكر لانه موجود بحياتي طلعت فيها كل يوم قضاه بعيد عليا من لما تزوجت
احمد
ولما جت ضمتني استغربت قلت من تاثير كلامي عليها لكن قعدت تزيد تضغط وهيا اضم فيا لقيت روحي ضامها وحاط راسي فوق راسها ورغم تعبها واهمالها لروحها لكن قاعدة زي ماهي بريحتها الحلوة و ريحة شعرها قاعدة زي ماهي  تهبل وكل ماتضغط عليا كل مانا نحس روحي طاير لدرجة نبي نطبها ونبرم بيها فوق
انا..شوي بعدت عليه وقلت ليه شكرا لانك في دينتي شكرا لانك في حياتي وخشيت لداري انا وهبة وطبعا انوار وهبة لاتعليق لانهن عارفات ان احمد يستاهل اكثر من هكي وممكن انا درت هكي على خاطر مازالت موجوعة
وكملت هدرزة انا وهبة وهي تحكيلي على وليد  لان في وقت مشكلتي ماحكتش ليا عليه بتفاصيل واجدة ويبي يجي يخطبها رسمي لانه مش بتاع علاقات وكانت تاجل في الموضوع على خاطري
قديش صحبتكن كنز واصالة  اجلت فرحها اللي مفروض يكون قبل اسبوعين لكن من لما روحت للحوش وقفت كل شئ وسند حتى هو اجل فاتحته وعبدالله  نفسه على اخت هنادي  الصغيرة لما قعدت نذكر اصدقائي الكويسين واللي ثمرت فيهم العشرة على خاطري اجلو افراحهم على خاطري وهشام خرب فرحتي على حساب نفسه حسبي الله ونعم الوكيل فيك ونزلن دموعي وتغطيت ورقدت
هبة
حسيت بيها تبكي بس خليتها واعر عليها اليوم