للقدر والنصيب كلمة اخرى

43

#للنصيب_والقدر_كلمة_اخرى

ح43
هبة ..اهلين عبورة كيف حالك اليوم
انا ..اسوء من اللي قبله كيف بنكون وانا نحس روحي مصدومة ومطعونة من جيهتين جيهة قلبي اللي حب وعشق لاول مرة ومن جيهة عشرة العمر اللي ماعرفتش خيره ليش دار فيا هكي
هبة ..احكيلي حبيبة ريحي بالك
انا..اصلا انا بعتت عليك عشان نقدر نحكيلك اللي ماقلتاش لحد ونبي منك تساعديني
هبة ..وانا كلي لك
انا ..اطلعي ديري برمة وقولي لانوار اديرلنا كابتشينو وتاكدي ان احمد مش قاعد
هبة ..به
طلعت هبة وانا رديت لمناحة البكاء مشن عليا اربع ايام من لما روحت لاهلي وانا نبكي وبس واحمد داير فيا حالة هو وبابا وماما وعمو وعمتو من لما لقو عندي فقر دم لاكبدة عقبو ولا مقوي عقبو وعصير عنب طبيعي عقبو وانا ناكل بالدف من وين نلقى النية اللي ناكل بيها وانا حياتي انهارت وانا ماسكرتش شهر وبنكون مطلقة وووووواو حسيت الكلمة واعرة اول مرة نقولها لروحي واعرة الكلمة الحق
جتني هبة وهيا اللي دارت الكابتشينو
وحكيت ليها كل شئ من لما شفت الصور اللي بعتتهن ليا امل ووريتهن لها يومها لعند هو شاف الصور وكيف ضربني وكل شئ وكل كلمة قالها ليا واللي صار لهبة تغمرتني وقعدت تبكي
هبة ..ينعلي ياوخيتي قديش تحملتي وقديش صبرتي والضربة عطه مايكسر ايده وكسرة في كراعه يارب
وانا قعدت نبكي انا وياها وخشت علينا انوار وتمت حتى هيا تبكي خشت علينا
ماما
ماما ..ياهمي منكن بدل ماتسكتنها وتغيرن جوها اتزيدن عليها نتت علينا ماما وفكينا بعضنا وسكتنا وطلعت انوار بدير عصير ليمون و ليا عنب
انا..بالله عليك حبيبة فكيني منه العنب كرهته والله حتى الليمون كويس ليا
انوار ..به
وطلعت هيا وماما
انا ..هوبي  قوليلي انا بنحكي لماما لكن مانقدرش نكذب بالغصب قدرت ندرق في المستشفى وانتي عارفتيني كان كذبت يبان عليا طول نبيك انتي تمشي لماما وتحكي ليها عشان توقف معاي في انفصالي على يوسف لان لو ماما توقف معاي كلهم يقتنعو
هبة ..واحمد
انا..احمد مش مقتنع بانفصالي لكن يبي راحتي وخلاص وطالما مش مقتنع اهلي مش حيوافقو وانا نموت ولانرجع لحد اهاني ومد ايده عليا مهما كنت نحبه وميته عليه
هبة ..باه كيف بنقول لعمتي حواء
انا ...قوليلها المسبات اللي قالهن ليا وانه سب وهزب وطعن فيا بدون حتى مايسئلني ويفهمني وفي نفس الوقت حتى بنت خالته مش حتخليني في حالي وانها بعتت ليا صور مش تمام وقوليلها حتى لما عترت اصلا كنت خاشة للدار بنجيبله مصحف بنحلف عليه انا اللي مانحلفش بالله حتى عادي يخليني نحلف ليه على مصحف بس غير قولي لماما هكي وطبعا انك انتي جيتي لماما من وراي وانا مانبيش نحكي بيش مايعلمش احمد وايدير مشكلة ليوسف لو يعلم انه قالي كلام زي هذا وماما لانها تخاف على احمد اكثر حتى مني مستحيل تخليه يعلم وحتوقف معاي
هبة ..ان شاءالله بس حبيبة بالك تعطيه فرصة وتسامحيه
انا..تعرفي ياهبة نندم على فراقه ولانعيش معاه يوم اخرى  وانا نبدا ديمة نفكر لو طلعله واحد ثاني غير هشام  شنو بيدير فيا او يبدا ديمة شاك في تصرفاتي حياتي مش حترجع زي الاول معاه في حاجة انكسرت ياهوبي  بينا و اخرى بنت خالته شكلها حاطتني في راسها وانا ماعندي جهد على النزاعات انا خلاص ياهبة نحس في قلبي من ناحية يوسف نقفل ومافيشي الا الوجع نكذب عليك كان نقولك اني مانحباش واني تو عندي شوفة فيه بالدنيا كلها لكن يجيني وقت وننسى ونرجع زي ماكنت خصوصا انها نحسبت عليا زيجة وخلاص
هبة ..قصدك مازالتي
انا..اه ماهو الليلة اللي مفروض تكون احلى ليلة في عمرنا كنا نرجو فيها صار فيها اللي صار والحمدلله ماصار شئ حكمة من ربي ليه في كل شئ سبب الحمدلله
هبة ..بس نا نعرفك قوية وماتنهزميش بسهولة وماتخليش حد ياخذ حاجاتك والحب مافيشي كرامة لابال بين الراجل ومرته
انا .. انا مانحكيش على الكرامة انا نحكي على الاحترام هو ماشغلش عقله حتى ثواني وفكر انه يسئلني يتاكد اني صادقة او كذابة قبل مايواجهني لكن هو جاي وخلاص حكم عليا وطلعني ساقطة وصايعة ومادية وكلبة وحقيرة بدون مايتاكد مني وصح انا مانخسرش بسهولة لكن مانتمسكش براجل مد ايده عليا بدون مايفهم تصدقي ياهبة لو سئلني وناقش معاي وماصدقنيش ومد ايده عليا كنت سامحته وكنت نقول بسبب الغيرة لكن هو مادارش ولاحاجة جاء طول مد ايده عليا قبل مايتاكد واهو تو لما عرف انه كله ملعوب من هشام  وكيف انا اصرفت لما شفت صور امل معاه اهو تو اكيد بياكل روحه ندم
الحمدلله على كل حال ربي حيعوضني خير
هبة ..ربي يعطيك الصبر والله ماتستاهلي ياقلبي لو صار لنا اللي صارلك نقولو نستاهلو من عمايلنا لكن انتي والله قلبك طيب وديمة اضني ان الناس كلها زيك ونحن ديمة وين نحكو عليك بالذات في مواضيع الشباب نقولو انك بيضاء من كثر انك محيطك بس القروب وهلك واحمد بس
انا ..الحمدلله حبيبة ربي ليه حكمة في كل شئ 
تعرفي كان نقولك بعد حكيت ليك ارتحت وارتحت واجد مش شوية
هبة ..ان شاءالله ديمة مرتاحة يارب
انا..ربي يحفظك ليا
هبة ..نسيت نقولك اني بايتة اليوم وبكرة وبعده هلي عندهم فرح وانا ماخاطريش فيه فقالي فتحي امنا طالما انتي بتباتي الليلة عند عبير عدي اقعدي عندها الايام اللي بنمشوهن للفرح قبل كان يقعد معاي علي خوي لكن علي الفرح لعيت خالي وهو مكبد على بنت خالي فمستحيل يقعد 
انا..ياسلام ماهو من حظي وحتى اكيد فتحي على خاطري وعارف الوضع اللي انا فيه لان حتى يوم عركة يوسف وهشام  يوم زورتي عند اهلي كان فتحي حاضر وقعد يهدي في يوسف ويقوله اكيد في غلط عبير مستحيل تكون هكي ونزلن دموعي شوفي حتى فتحي عارفني اكثر من الانسان اللي تزوجني وياريت سمعله بيش تعرفي الشك كيف ركبه خيره ماقالش في عقله ان فتحي يعرفعها من صغرها واكيد مايدافعش عليها لو مش عارفها ومسحت دموعي وقلت لهبة
انا.. تعرفي بابا مسافر ففرصة انك تحكي لماما الليلة نشد انا احمد وانتي اركبي ليها واحكيلها
هبة ..به تمام بكل
قوليلي قبل كيف عرفتي ان فتحي حكى  مع يوسف هكي
انا ..من التسجيل وحكيت لهبة قصة التسجيل
ومشى الوقت ونحس في روحي تميت مرتاحة واجد وتعشيت كويس والحق ماما وعمتو واحمد وعمو فرحو واجد اني كليت كويس اليوم وروح عمو وعمتو وانا واحمد وانوار كسدنا وماما ركبت لدارها وركبت في جرتها هبة
حكت ليها هبة وونبهتها ان احمد مايعلمش طبعا ماما وجعتها نا واجد على خاطر عارفتني وعارفة روحها كيف ربتني عشرين سنة وهيا عارفة شنو زرعت فيا وماعمرها حد جاها وقاللها بنتك دارت او فعلت او بنتك صبت مع حد او كلمت حد واحمد مش معاها حتى يوسف اول ماكلماته احمد كان عنده العلم لانها عمرها مادارت حاجة من ورانا وقعدت تبكي وتهدي فيها هبة
ونزلن هبة وماما وجتني ماما حضنتني وخفت انها تحكي قدام احمد لكن الحمدلله ضمتني ليها وقالتلي مايصير غير اللي تبيه وبكرة بوك مروح تو نقوله يمشي لبو يوسف ويقوله خشينا بمعروف نطلعو بمعروف
احمد ..شنووووووو