للقدر والنصيب كلمة اخرى

26

#للنصيب_والقدر_كلمة_اخرى

ح26
احمد..امتى بيجو اهل يوسف
انا..تقريبا السبت 
احمد..اه  اكيد تبي حاجات
انا..اكيد لاني نبي الضيافة كلها من ايديا
احمد..بتوري فلاحتك من البداية
انا..لا والله ماهو حمودي انت عارفني حتى في عزايمك انت اندير في كل حاجة بروحي وتبدا تعارك في ولانسيت
احمد.. عارفك فالحة والله يوسف امه داعية ليه في ليلة قدر شكلها
انا..شكلها
احمد.. شنو تبي تكتبي اللي ناقصك وله تمشي معاي تجيبهن
انا..لا معاش معاي وقت بعد بكرة السبت نكتبلك اللي نبيه وجيبهن ليا اصلا اللي ناقصني مش واجد لان لما جبنا بضاعة التشيز كيك جبنا واجد فقاعد منهن اللي نبيه واللي نبيه فواكه بيش اندير عصير طبيعي ونبي بودرة لوز بندير معكرون انضيفه مع العصير
احمد..هذين بس
انا.. اه
احمد.. تمام بكرة تو نجيبهن ليك وانا جايكم
انا..به ليش ماتباتش عندنا
احمد..عشان هبة بايتة وانا لما نكون قاعد تقضو معظم وقتكم في الدار وانا بما ان عمتي حواء مش قاعدة نخليكم براحتكن
انا..اللي يريحك
احمد..هي تصبحي على خير
انا ..وانت من اهله دير بالك على روحك
مع ان سبب احمد ماقنعني لكن قلت براحته
احمد.. سلام
وانا منبيش نقعد قريب منها ديمة لازم نعود روحي اني نقعد بعيد عليها طالما مشاعري تغيرن من ناحيتها
هبة طلعت من الحمام حشاكم وانا خشيت دوشت وغيرت دبشي ولقيت هبة وانوار دايرات كابتشينو ومكسدات يستنن فيا وقعدنا نهدرزو على التحضيرات
هبة ..شنو بديري عبورة
انا..بنقدم عصير فواكه فرش ومعاه معكرون وبعدها كابتشينو وقهوة عربية ومارس كيك وشاي ومعاه مكسرات
هبة ..تمام بكل بس ليش بديري قهوتين
انا..لان مانندريش عليهم شنو يحبو يشربو حتى الشاهي بنديره احمر واخضر
هبة ..تمام بكل وتفكيرك صح
انوار.. به معناها بكرة نبرمو على دار الجلوس اللي هنا بما انك لدور الثاني ماتقدري تركبي
انا..ههههه منظري غير وانا خاشة عليهن بالقيلات وبعدين مش مغير منظر لكن حتى وانا راكبة بالقيلات يديرن  في جو شين يعني نوصل فيهن تاعبة
هبة .. هو امتى تحوليهن
انا.. تقريبا مازالي اسبوع يعني لو وافق بابا على قراية الفاتحة يقروها وبعدها عندي مراجعة واكيد يقولي حوليهن
هبة .. تمام بكل وان شاءالله عمي عمر يوافق
انوار ..تقريبا حيوافق  لان موعد العرس حيكون بعدها بشهر وثلاث اسابيع وبابا وباتي يديرو عزومة كبيرة عليها ويفكونا من حوسة الرجالة ايام العرس
انا..وانتي شنو عرفك
انوار ..سمعت بابا وباتي يتنقاشو فيها
لان شكل اب يوسف فاتح الموضوع لباتي
هبة ..عليك المستعجل
انا..هههه مش غير مستعجل هو اصلا لولا حوشه يبي شهر بيش يجهز راه دار العرس توا
انوار ..ربي يهنيك يارب شكله يحبك مع ان الوقت قصير اللي تعرفتو فيه على بعض
هبة .. ومن يعرف عبورة بقلبها الابيض مايحبهاش تعرفي لو يوسف يشوفك بعيونا نحن راه يذوب فيك اكثر ماهو ذايب فيك
انا..نجكن لي اللي ديمة معاي وسانداتني
انوار ..حتى هنادي واصالة  بكرة جايات بيش نتعاونو
انا..اه شن خطركلك بديري
انوار ..نبي انغير الجلسة اللي تحت بلي في الدور الثاني
انا..عليش حتى الحمرا تهبل وجديدة
انوار ..بس اللي فوق نظامها ملكي وفخمة اكثر وماتنسيش انها حمرا حتى هيا يعني تركب على اللي الدار اللي تحت
انا..بس الصالون اللي فوق ثقيل وين تقدرن عليه
انوار ..اتفقت مع احمد يجيب هشام وسند وعبدالله وينزولها
هبة ..صح ليك اما انتي منسقة كل شئ
انوار ..تسحابوني زيكن انهز في دمنقلي الحاجة اللي عارفة روحي انا المسؤلة عليها انديرها على اكمل وجه
انا..سلمها يارب
هبة ..يعني بكرة ماناش ماشيين لعمتي عزيزة
انا..بالنسبة لي مانقدر وكان كملنا بدري نمشو لاحلام عند عربها لان دايرين للصباحية عشاء
هبة ..تمام
وقعدنا نهدرزو نين رن يوسف عليا
انا..اهلين حبيبي
يوسف ..اهلين بقلب وعقل يوسف
خلاص حبيبتي ايام بس وتكوني ملكي حلالي
انا..حلالك ايه لكن ملكك ماااازال شوي عليها
يوسف ..يجرن بسرعة الايام وكلهن شهرين
انا..صح يعدن بسرعة الايام
يوسف ..انا ليا يومين العمال في الحوش ليه ليه وطبعا حنبعتلك مع احمد كتالوجات للسيراميك والفرش
انا..لا لا لا دير كل حاجة انت بذوقك
يوسف ..عليش
انا..هكي اريح ليا
وبيني وبين روحي مش عارفة ليش مانبيش ندخل في تفاصيل الحوش ليش مش عارفة مع ان كل عروس تتمنى انها تكون واخذة تفاصيل حوشها 
يوسف ..خلاص اللي يريحك بس ماتجيش بعدين وتقولي هذي ماعجبتنيش
انا.. لا ماتخافش اي حاجة اديرها حتعجبني انت اختارتني نا مانثقش في ذوقك وتعرف اختك امال ذويقة في لبسها واكيد عندها ذوق خليها تساعدك
يوسف .. اكيد اذا بيحكمو على ذوقي باختيارك معناها انا احسن واحد في العالم ذويق
انا..مش لهدرجة
يوسف ..تعرفي التواضع اللي عندك غريب شكل مرايتكم في الحوش مغبشات طول الوقت
انا..خلاص يوسف راك تحرج فيا واجد
يوسف ..غير امتى بس يمشي الوقت
انا..مقتليش يوسف من اللي بيجي
يوسف ..امي وخالتي عازة واختي امال وجدتي ام امي اللي ربتني
انا..يانسو ويشرفو
وطبعا طولت وانا ويوسف نحكو وبعدها خشيت للدار لقيت هبة راقدة في سابع نومة وانا خشيت تمددت احداها ورقدت طول ومانندرو على حاجة نين الصبح احمد داير هرجة بيش انوضو
انا..اهو نضنا وانت سكنت سكنة مش طبيعية
احمد..عارفين الساعة كم يافالحات
انا.. لما شفت الساعة لقيتها الساعة 11 انفجعت وقعدت انوض في هبة ووخشيت للحمام حشاكم وطلعت صليت وهبة بعدي ونزلت انوار متوضية ومصلية وخشينا للمطبخ درنا فطور
احمد ..قولن غذاء مش فطور يا خامرات
انا..ضحك الجمل مرة في عمره فلق شاربه
احمد..هههههه شنو قصدك
انا..نضت قبلنا مرة تمينا خامرات قالها اللي كنت انوض فيه بكاس امية
احمد..تخففي في دمك على الصبح قصدي على الظهر
انا..عندك شك يعني
انوار ..حمودي فوتها هذي زاهية عندها قولي كلمت الشباب
احمد ..اه بعد الغذاء بيجو بحكم انهم عارفين ان عمتي حواء مش قاعدة
هبة ..عندهم حق والله الوكال كان مش من يدين عمتي حواء مافيه طعمة
انا..خزي عليك يعني انا نعرفش انطيب
هبة ..كل واحد ونفسه في التطييب بس عمتي حواء بروحها
انوار ..هيا كل وحدة اتشد حاجاتها وانتن قلبتنها هدرزة
ناضت هبة وانوار وقعدت انا انلم في الماعين حطيتهن في الغسالة ولميت الطاولة وقعدت نطلع في حاجات الكيك
احمد.. بديريها من تو
انا ..اه على خاطر كل ماتقعد كل ماتقعد طعمتها احلى
احمد ..اه تمام
ودرت الكيكة درت كيكتين على خاطر حساب الشباب والبنات
وشوي خشن اصالة وهنادي ومعاهن شناطي معناها بايتات وفرحتني بيتتهن وطبعا كل وحدة جاية ومعاها مفاجاءة وجو الشباب ونزلو الصالون والبنات نظمنه وانا ضيفتهم وطلعو لكن حسيت بهشام كانه مش تمام وكلام اصالة واحمد خلاني نركز عليه وجهزنا وضمينا كل حاجة ودرت المعكرون والعصير خليته بكرة الصبح بيش يقعد فريش صح
وفي الليل كسدن البنات وطبعا كل وحدة حكت شنو داسة
اصالة  .. اسمعن يابنات بنقوللكن حتى انا فاتحتي قريبة ان شاءالله
كلنا تفاجاءنا صح نحن نعرفو اصالة ولد عمها يبيها لكن هي قالت كان ماحبيتاش مانيش محولة علاقتهم لحاجة رسمية انا.. كيف صار
اصالة ..خلاني نحبه خلاني مجنونته فيه حنية تهبل صح واعر لكن واعرته فيها جو يهبل
هبة .. اخيرا قدر عليك هاالاسامة  وصار منه صح ليه
هنادي..لانه حبها بقلب صافي واصالة مالفتش ودارت جو علاقات مع غيره مع انها مكانتش تحبه فربي بارك في حبه وخلاها تحبه
انا..ااااايه الدرر هذين هنودي
هنادي..كلام حق
طبعا فرحنا لي اصالة واجد وباركنا لها لان فعلا اسامة يحبها من قلب ورب واصالة تستاهل كل خير
انا..به وانتي شن عندك ياهنودي
هنادي.. فتحي كلمني
نحن وبصوت واحد وعالي ...اه   هييييي
هبة ..واخيرا كيف صار احكو وكيف درتوه من وراي
هنادي.. واخذ الرقم من فونك وقعد يرن عليا ولقيته رقم فتحي طبعا انا مخزنته لاني واخذاته منك
انا..ايوه حق ربي
هنادي..خلوني نكمل بدون مقاطعة
انوار ..خلاص اسكتن هبة ونوارة
هنادي.. ورديت عليه واستغربت اتصاله الحق لكن اول مافتحت
فتحي ..كيف امنا تردي على الارقام ماتعرفيهاش
هنادي..غير قول خير
فتحي بحمق ..ردي نسئل فيك
هنادي..طبعا ما اهتميتش لحمقه لاني مش مصدقة اصلا انه يكلم فيا ورديت عليه وقلت له اني مخزنة رقمك  في فوني امنا كيف عرفت انك فتحي طول رغم صوتك الحامق
فتحي ..اه وكيف حصلتيه رقمي
هنادي..كنك يافتحي ناسي انا نحن عشرة عمر ورقمك مش عندي نا بس رقمك عند البنات كلهن
فتحي .. بس ليش عمرك مارنيتي عليا
هنادي..عليش بنرن
فتحي ..اسمعي يابنت الناس هنا كلمتين بنقولهن لك ونبي رد عليهن تو
هنادي..تفضل
فتحي ..هنادي انا نبيك
هنادي..نا من الفرحة قريب طرت وقلبي قعد جوا دايرة هرجة واجدة من الفرحة ورديت باستعباط
كيف تبيني
فتحي ..ياعنجد كيف نبيك  نبيك تكوني حلالي ومرتي ونبي نتقدم ليك ونبي نحطك جوا في قلبي
هنادي..نا طبعا قريب اغمى عليا من الفرحة مش مصدقة الحلم اللي حلمته اليوم تحقق
فتحي ..وين رحتي شنو تبيني انتي او لا
هنادي
طبعا فكرت شوي زعميتني بندير جو ثقل لكن لقيت روحي زي الهبلة نحكي اللي قلبي كله ونبكيت
هنادي.. تسئل نبيك نا تي انت حلم وكان بعيد نرقد ونوعى على صورتك وكان يبدا اسعد يوم عندي اللي نشوفك فيه حبيتك من سنين مش يوم ولا اثنين اول انسان وحتكون اخر انسان  نحطه جو قلبي وكانت الكلمة منك ليا تفرحني اسبوع كامل ومازالت تسئل نبيك او لا
فتحي ..نحبك ونموت فيك نحبك نحبك نحبك والله لو كنت نعرف انك تحبيني زي مانحبك راه قديش ليا مكلمك
هنادي..به ليش ماتكلمتش قبل طالما انك تحبني حتى انت
فتحي ..خفت انك ماتحبينيش ولما نحكيلك نخسرك ومعاش تقعدي واخدة راحتك معاي وننحرم مني
هنادي..نحبك نحبك
فتحي .. قديش كنت غبي انا مافكرتش حتى نقول لهبة تقيس نبضك
هنادي ..هبة عايشة كل لحظة معاي وهي اللي تقولي في اخبارك كلها
فتحي.. غريبة مالمحتش ليا بكل
هنادي ..لاني حتى انا خفت زيك وعندي المهم انشوفك وانت تتعامل معاي عادي خير ماننحرم منك بكل
فتحي ..خلاص سكري تو نبي نكلم امي عشان تمشي لهلك لاني مانيش مطول ومانبيش علاقة نبي كل حاجة بالحلال وهذا حيكون اخر اتصال بينا نين نقرا فاتحتك
طبعا انا وهبة وانوار واصالة عيونا دمعن لان نحن كنا نعرفو كيف هنادي تحب فتحي وفرحنا واجد انه طلع يحبها زيها
قعدنا نضبطو في هنادي وفرحانين ليها واجد وانوار عطتها زغروتة سمحة وقعدنا نضحكو
هبة ..ينعليا مازالت غير نا
انا..ماهو كان تحطي عقلك في راسك وثتبتي على حد يصفن امورك ويجيك النصيب اللي كويس
هبة ..يستر الله
ومشت علينا ليلة تهبل فرحانات واجد وجاء ثاني يوم ونا مرتبكة واجد والبنات يهدن فيا وقررت نلبس فستان طويل شيفون كمامه طوال وفيهن نفخة بسيطة ممسوك باسوارة عند نهاية اليد و لونه وردي هادي ومنقط بنقاطي صغار فوشيا ومادرتش حاجة على وجهي وشعري قالولي البنات خليه مطلوق ولبست سير شعر عليه لونه فوشيا  وجو الناس  وطبعا استقبلوهم ماما وعمتو غالية وانوار طلعت ليهم العصير الفرش وورها هبة بالمعكرون بعد ما ماما ضيفتهم شوكلا محطوطة في حلاية على طاولة الصالون اول ماخشو وجيت بنطلع عليهم وانا قلبي يدق يدق