للقدر والنصيب كلمة اخرى

17

#للنصيب_والقدر_كلمة_اخرى

ح17
انا ..غير قول السلام عليكم
يوسف .. وين كنتي تو
انا
انقنها رقتلي وغمتلي وقلت هذا خيره
يوسف ..ردي نسئل فيك
انا..كنت في سوبر ماركت وبعدها مشيت لمحل مستلزمات افراح
يوسف من اللي رفعك
انا ..اكيد احمد
يوسف
لما قالت احمد انحرجت ومعاش عرفت شنو ننطق انا لماشفتها طابها شاب وجه مابانش عليا ونار ركبت فيا لاني عارفه فري جوها والغيرة ماخلتنيش نتاكد حتى من جسم الشاب او نركز عليه
وتو كيف بنرقعها قعدت نفكر لكن قلت مافيش خير من الصراحة
انا ..
لما طول وهو ساكت بعد ماقلت احمد قلت هذا اكيد شافني ومعرفش ان احمد اللي معاي يعني شك فيا او يسحابني مستهترة
انا.. خيرك حامق والسلام مارديته تسحابني طالعة مع حد ثاني والله شنو والله شفته وهو طابني للمحل لعلمك نحن مانسحبوش المحلات هذين فيهن دروج مرفعناش القيلات معانا ولان احمد عنده اجتماع ووقت عليه معاش في وقت اندور محل مافيشي دروج ولعلمك حاولت حتى اني نسند على احمد بيش ماننحرج وهو طابني لكن الوجع من درجتين قريب قتلني وبعدين انت تشوف فيا جوي فري جوي فري مع قروبي بس ومانعرفش اولاد غيرهم لعلمك لاتربايتي ولا احمد او بابا وعمو محمود يخلوني نحكي مع غيرهم وعندي حدود مستحيل نتعداها وانا لعلمك ماعنديش اقاراب هنا بيش ماتقوليش نسحابه قريبك انا اقاربي كلهم في طرابلس وماعندي حد هنا الا احمد بس بعد بابا وعمو محمود هما هدوم ناسي ورجالتي وعزوتي
يوسف
انا كلامها ينزل عليا زي السهوم من كثر ماهي تحكي بثقة ووجع وتعقد لساني معرفتش شنو نحكي معاها
انا .. خليك ساكت احسن خير ماتقول كلمة بدل ماترقع تخرب
عيب عليك يايوسف المفروض سئلت بهدوء وبعدين كان غالطة تحاسبني لكن هكي حامق وسلام الله مارديته وبدون حتى ماتحاول تسمع كلامي قبل
معليش يوسف بنسكر تو على الاقل تروق وتفكر في الكلام اللي بيطلع من فمك وانا يخف وجعي شوي من ردت فعلك اللي ماليهاش لزوم لان الحق قلبي وجعني هيا سلام
يوسف
سكرت الفون بدون مانقول ولا كلمة وقديش وجعني قلبي لما سمعتها تحكي بوجع هكي وقديش هيا متاثرة اني تكلمت بعربدة عليها واستغربت انها حساسة هكي وماتتحملش وخش عليا عبدالسلام
عبدالسلام ..وين رايح شاد فونك وماسمعتكش تحكي كلمة بكل
يوسف ..انا مش عارف شنو درت ياعبدالسلام
عبدالسلام ..ان شاءالله مش مع عبير
يوسف ..اه
عبدالسلام ..نهارك هو اليوم مشى باتك لعمك محمود وحكاله عليها وقال يشرفني النسب وعمي محمود شبه عطاه الموافقة
تغير شنو درت احكي انطق
يوسف ...اللي صار ....
عبدالسلام ..كلا انت ربي يصلح حالك معقول قاعد تقول ياهادي ادير هكي
يوسف .. والله وجعني قلبي عليها وهي كيف تحكي بوجع مني ماتخيلتهاش حساسة هكي لان عمرها ماتركب واعرة وحساسة
عبدالسلام ..الله يصلح حالك جبت الوجع ليك وليها وبعدين ليش مستغرب ماهو انت قلت هي جميع المتناقضات تلقاهن مع بعض عندها تذكر
يوسف اااااااه طلعت بحرقة
عبدالسلام حاول انك تتصل بيها وجرب اكثر من مرة وبعدين خليها وكلمها في الليل
يوسف ..مش حترد عليا تو نا عارف
عبدالسلام ..ماتردش عليك هذا شئ اكيد لكن بيش ماتزيدش الطين بلة وتقول بعد عفنها معاي ماكلفش روحه يحاول يتصل بيا حتى لو مارديتش
يوسف ..اه باه تو نتصل
انا
اتصل يوسف اكثر من مرة بس مارديتش عليه نحس في قلبي يوجع فيا ونرجى غير امتى احمد يروح
يوسف ..مابتش ترد تعرف انا طالع
عبدالسلام ..وين ماشي
يوسف ..لاحمد على الاقل راجل ويفمهني ويقدر يفهمها شنو حسيت وانه غيرة مش شك
عبدالسلام .. راي حتى هو
يوسف
طلعت لاحمد مانشوفش في الطريق من كثر ماخايف اني نخسرها وانا كيف لقيتها
وصلت للمكتب وخشيت على السكرتيرة
يوسف ..السلام عليكم
السكرتيرة.. وعليكم السلام
يوسف ..احمد موجود
السكرتيرة ..الاستاذ احمد عنده اجتماع
يوسف ..مطول مازال
السكرتيرة .. نص ساعة ويكمل تقريبا
يوسف ...نستناه ان شاءالله
السكرتيرة ..تحب تشرب حاجة
يوسف ..قهوة لو سمحتي
انا قاعد سارح ونشرب في القهوة على نار لكن ثقتي كبيرة بان احمد يفهمني لانه واعر وغيور زيي وديمة كنا نسمعو بعرايكه على خاطر نوارة
النص ساعة عدت عليا دهر
طلعو الضيوف اللي عند احمد وقالت ليا السكرتيرة تفضل
يوسف .شكراً
خشيت على احمد وسلمت عليه وانا مرتبك شوي لاني اول مرة نتلاقى انا واحمد بعد قصتي مع عبير
وسلم عليا احمد بحرارة ومبتسم
احمد ..كنك يايوسف تقول اول مرة تشوفني راك ولد خالتي
يوسف ..منحرج والله ماني عارف نحس في روحي كاني مع نسيبي
احمد ..بدون شك نسيبك لكن قبل النسبة ولد خالتي انت
يوسف ..ضحكت وقلت ليه وانا جايك اليوم بالصفتين لاني نبيك تساعدني
احمد.. ان شاءالله خير
يوسف ..والله ماني عارف لكن بنحكيلك لانك تقدر تفهم عليا وتقدر تعرف عبير كيف تفكر
احمد ..ماتقولش تعاركتو
حي عليك نوارة  راه رغم انها حساسة راه قاسية واجد
يوسف ... ماتخوفني يا احمد مانبيش نخسرها وانا كيف القيتها وماصدقت لقيتها
احمد ..شنو يايوسف حسك شغلتني
يوسف.. اللي صار ....
احمد ..ساهلة يا راجل فجعتني نسحابها حاجة كبيرة
وبعدين يايوسف انقولك حاجات على نوارة  ماتعرفهنش عليها
نوارة  صح بنت جوها يبان للناظر جوها فري لانها مش محجبة لكن ركز شوي عمرك شفتها لابسة لبسة مش مستورة لانك اكيد في سنة اولى جامعة زابطها خصوصا في كليتنا مافيش الا نوارة  تقريبا بس شعرها بالطول هذا صح يعني كانت ملفتة للانتباه عمرك شفتها حاطة مكياج على وجهها عمرك شفتها مع هشام  او سند  او عبدالله تضحك بصوت عالي او تبصر معاهن زي هبة وهنادي  واصالة  نوارة  رغم الجو السمح اللي عندها والحرية اللي وعطينها لها عمرها ماتعدت الحدود حتى لما كلماتك كانت اول مرة ادير حاجة زي هكي وماصبرتش قالتها لي طول حتى قبل هبة اللي تعتبر صديقتها المقربة واجد ليش لانها ماتبيش تخون الثقة اللي عطيناها لها
نوارة  عمرها مافاتها وقت صلاة ولاقراية قرآن نوارة  لو تحط محرمة على راسها تقدر تقول عليها محجبة من كثر ماهي ملتزمة بدينها وعمرها ماطلعت من حوش بروحها يا امي يا امها يا بوها يا نا يا باتي والله فتحي خو هبة وتكون هبة معاه حتى هشام  وسند  وعبدالله  مستحيل تركب معاهم كان انا مش معاها والبنات
نوارة  عطيناها حرية هي وانوار وعمرهن ماخانن ثقتنا حتى انوار لما دارت علاقة كنت انا اول واحد نعلم قبل حتى نوارة  شفت يايوسف كيف متربيات وانت بروحك كم مرة صارت عندنا حاجة وهيا اللي تبدا شايلة المناسبة كلها على راسها عمرك شفتها او لمحتها زي ماتلمح في بنات خالتي وبنات عمي من كثر مايتلصقن على الشباب
يوسف ...انا نحرجت واجد وفرحت واجد بالكلام اللي يقول فيه احمد ومافيش حد اصلا يقدر يقولي كلام زي هذا الا احمد لانه يعرفها كويس 
يوسف .. لا والله طول عمري نسمع بيها سمع وعلى قد مايصير عندكم نسمع بيها بس مطيبة نوارة دايرة نوارة منسقة نوارة لكن اني تشوفها عمري ماشفتها الحق
احمد ..اه شفت ومع انها لو طلعت عمري ماندوي ليها لاني عارفها باحترامها حتقعد لكن عمري ماشفتها طالعة تخيل حتى نبدا مش قاعد تخلي في انوار او امي او امها اطلع الحاجة للشباب
يوسف ...باه شنو يصير تو انا مانبي نخسرها وغيرتي عمتني وانت يااحمد عارف الغيرة شنو
احمد... ولايهمك تو نروح واصلا اكيد حنلقاها تستنى في وانا تو نراضيها ولايهمك
يوسف .. بالله طمني عشان نقدر نرتاح ويهنى بالي
احمد ..كون هاني يا راجل من تو