للقدر والنصيب كلمة اخرى

7

#للنصيب_والقدر_كلمة_اخرى

ح7
ونحن في الطريق
انا ..احمد نقول للشلة على موضوع يوسف او لا
احمد .. لا استني نين تعرفيه قبل وتشوفيه مرات مايعجبكش شكله مرات مايطلعش حلو كيفي ههههه
انا ...ههههه انت  عارفني الشكل اخر همي لكن لو يطلع كيفك ماخلا ربي ماعطاني
طبعا نسيت نقوللكم ان احمد شكله واو طول وعرض ومهتم بجسمه وانيق  وبشرته القمحية الحلوة وفيه لحية تهبل وشعرته سودا ناعمة مسبسبة يبس فيها بالجل بالغصب يبها توقف
وصلت الحوش وتلقتني ماما وانوار وخششوني لداري قلت ليهم نبي نرقد راه اللي رقدته في المستشفى ماينحسبش
احمد ..باه ارقدي وارتاحي وفي العشية تو نجي
انا ..باه دير بالك على روحك وبلغ الشلة اني روحت
احمد ...ان شاءالله
وخشيت رقدت زي الميتة نضت على البنات فوق راسي
انا ...هيي يافرخات اسكتن شوي
هنادي  ..نوضي حبيبة سادك نوم مرايفين عليك
انا...تقول غايبة عليكن سنة هي ليلة
اصالة  ...ليلة وانتي في المستشفى تقول عام مرت علينا
هبة ...نوضي صحصحي وخليني نساعدك تغيري دبشك الشباب بيخشو يطمنو عليك
انا...باه نعني مانفقدكن
طبعا خلوني نعطيكن لمحة على العلاقات العاطفية لقروبي
احمد بعد صدمة تعرض ليها تو نحكيلكم عليها لقدام دار علاقات واجد لكن معاش فتح قلبه للحب
عبدالله ... يحب اخت هنادي  الصغيرة خالدة  لانه ولد عمها ويموت في  الارض اللي تمشي عليها وهي زيه
هشام  ... معنداش واجد على العلاقات جرب مرة وطلعة فرخة تعباته واجد ففات سريب البنات
سند  ...مكبد على بنت جيرانهم اسمها سماح يحبها من لما هو صغير وتو ليه علاقة معاها ونحن مانحبوهاش دمها بارد نتحملو فيها على خاطر سند  بس
وهبة ...ادير علاقة مع واحد يعجبها واحد اخرى ادير المستحيل بيش اطيحه وتسيب اللي دايرة معاه علاقة وترتبط بالاخر وهكذا لكن حب لتو مادقش بابها
هنادي ... مكبدة على خو هبة الكبير فتحي  لكن هو مايعلمش مع اني شاكة انه حتى هو يبادل فيها نفس الشعور
اصالة  ..يبها ولد عمها وهي متعودة عليه لكن مش متاكدة انها تحبه او لا
جو الشباب وقعدنا مكسدين وجو حتى اهاليهم والحوش ماشاءالله معبي الحوش بيهم
عمتو غالية .. يانعلي يابنيتي انا سببتها لك
انا..عيب ياعمتو شنو سببتي لي كاتبه لي ربي حتى هنا انطيح وبعدين انا طحت في حوشنا
عمتو غالية ... انا مادرت فرق يابنيتي لكن لو محيرتك ماطحتي 
انا ...معناها معاش تقولي الكلام هذا
احمد ..احم احم نغار نا راه
عمتو غالية ... تغار والله تجنح مانك جاي كي غلا نوارة  وضمتني
انا ... نشبح لاحمد ووانديرله في حركة زي بتاعت العيال الصغار
احمد .. وحق ربي مش ديمة نقولك طفلة ماتبيش تكبر
انا ..نخاف نكبر معاش تعدل عليا
احمد ...ياهلبة حتى تبقي بضناك تبقي طفلة في نظري
هشام 
نسمع في الحوار بين احمد وعبير وحاس بشعور مافهمتش شنو حسد او غيرة مع ان كلنا مانقدروش انقارنو علاقتها باي واحد فينا زي احمد
احمد محسوب كانه ولدهم والوحيد اللي مسموح ليها تركب معاه السيارة عكسنا نحن كان مش معانا احمد مستحيل تركب معانا غير ان احمد عنده دار ليه في حوشهم وهي عندها واختها دار في حوش احمد
لكن استغربت من شعوري هذا وقلت لروحي نا كني نفكر هكي
هبة ...هيي هشام  وين رحت
هشام  ..قاعد هنا غير نفكر كيف عبير تمشي للامتحانات والقاعة في الدور الثاني دايرينهن
انا ...تحكي جد
هشام  ...اه اليوم مشيت بيش نجيب الجدول وسئلت على القاعة وكلمت مسجل الكلية لكن قالي ماعندي ماندير حل الا اني نقدر نعطوها وقت للتاخير يعني اذا تاخرتي شوي عادي مابين ماركبتي
انا ...صحيت هشومي 
هشام  ... معاش تعاوديها من امتى بينا شكر والكلام الفاضي هذا
انا...عادة ياهشومي من لم يشكر الناس لايشكره الله وبعدين دليل محبة وامتنان
هشام ...باه خلاص وانتي قلتي نشرة
وكسدنا لليل اتفقنا ان بكرة نتلاقو ونبدو نراجعو اول مادة في الامتحان
احمد ...انا بايت هنا اليوم
انا ...فرحت باه اللي خطرلك ليك قريب اسبوعين ماجيتش بتت هنا
طبعا نحن دايرين لاحمد دار عندنا اللي هيا انا داري تو
نحن حوشنا على ثلاث ادوار الدور الاول للمعيشة وصالة وفيه مربوعة  بحمامها برا وفي  مربوعة اخرى خارجية كبيرة بحمامها في الصور  ودار بحمامها داخل دايرنها لاحمد والدور الثاني لاستقبال الضيوف والدور الثالث دار نوم بابا وماما وبحمامها الخاص وانا وانوار كل وحدة دار بينهن حمام ودار فاضية تو دار خوتي الصغار
ولما صارلي الحادث خذيت دار احمد على خاطر مانقدرش على الدروج ولاني قعدت فترة طويلة بالقيلات فدرنا دار احمد في الدور الثاني لكن احمد معاش يبات فيها يغير في دبشه او يتكى فيها لكن لما يبي يرقد يجي يرقد لوطا في دار المعيشة او الصالة  او في المربوعة
احمد ... عادي وحدة بوحدة حتى انتي ليك عشرة ايام معاش بتي عندنا
انا ..صار ترد فيها لي
احمد ...اه
هشام
حسيت بالغيرة وحسيت بنار ولعت في ومش عارف ليش تمنيت ان احمد روح معانا