للقدر والنصيب كلمة اخرى

30

#للنصيب_والقدر_كلمة_اخرى

ح30
جاء اسبوع الفرح وتمن التجهيزات على اصولها طبعا البنات وماما وعمتو ريحوني من التفاصيل وحتى ديكور الصالة قلت ليهم نبي ديكورها بالوان الوردي ومابيتش انتعب روحي بالتفاصيل لاني عارفتهم حيدرولي كل شئ زي مانبي وطبعا جو خوالي وعمامي بنسوانهم وصغارهم المرة هذي ودارو جو وطبعا صحباتي ذابن في دوتهم لانها غرباوية مسكرة وطبعا هدايهم كلها كانت فلوس لي بروحي وهلي بروحهم وكانت لفتة حلوة منهم وطبعا بنات عمامي مع البنات ايد بايد عكس بنت خوالي اللي يدرهن الكبد ومدرهات كبود صحباتي  ومشن الايام وجاء يوم التفريشة وعدن البنات وروحن فاتحات فمهن على الفيلا وقالولي كل حاجة تهبل وقعدن يحكن عليها بالتفصيل وطبعا انا اتفقت انا ويوسف من يوم التفريشة معاش نحكو مع بعض مع ان يوسف عارض واجد لكن رضخ لطلبي وجاء يوم الحنة الصغيرة وعزمت بنات واجد من الكلية  معاي والجيران وطبعا هبة واصالة وهنادي  وتسنيم صديقة انوار المقربة وماذكرتهاش في الايام اللي فاتن لانها كانت مسافرة علاج وروحت الحمدلله اقامة عندنا من عشرة ايام  وطبعا بديت نتوتر واجد وحتى الوكال ناكل بالغصب ومرات نين يطرن يخبرن فيا احمد ويجي احمد وناكل بالغصب طبعا لما جو هل يوسف وجابلولي فلوس الدبش قلت ليهم ان ذوقهم في التلبيسة عجبني فياريت يجبولي حتى سوابيت الفرح بذوقهم ولما جيت بنرجع لهم طاقم التلبيسة بيش يجبوه مع ذهب الفرح مابوش قالتلي امال زيك زي منى خطيبت عبدالسلام التلبيسة طاقمها بروحه والفرح بروحه وقالت كان هو نفس طاقم الفرح معقولة نجيبولك حاجة بسيطة هكي مع انه مكانش بسيط بس عادي ماحولتش نوجع دماغي وقلت في الاخير الذهب كله لولدهم  وهما مكبرين بي بابا لان ماشرط عليهم شئ وقاللهم اللي يناسبكم ديروه فهذا ليش حسيتهم بيكبرو بقدر بابا زي ماكبر بقدرهم
وفي نفس الوقت اللي مخلانيش نجيب دبش السوابيت بروحي لان الحق مانبي نتعب معاي احمد اكثر من اللازم وحتى فتحي شنو ذنبه انا بابا لاهي مع الرجالة والتجهيزات ومع ذلك ماقصر معانا ووقف مع احمد ايد بيد والشباب ماغابو على الحوش من عشرة ايام الفرح ومشيت للحناية والسبع تمرات الصبح قبل مانطلع واندير في كوب كابتشينو ليا ولاحمد يوميا وبعدها رفعني احمد انا واصالة للحناية وحنيت حنة سمحة والحق كان خاطري نلبس بدلتنا البودرية لكن مرت خالي قالت بتجيبها هدية ليا لكن شكلها نست او الله اعلم شنو في نيتها فلبست تقشيطة مغربية حلوة بالاحمر والذهبي  وطلعت نهبل بيها وماحطيت شئ على وجهي طبعا بعد الفتلة وحواجب ما انديرش فيهن لان حواجبي بطبيعتهن مرسومات تقول منقيات لان ماما وهي حامل بيا كانن عجباتها حواجب عمتو غالية واتوحم عليهن  فجيت زي حواجبها وتريحت من ذنب لعنتهن ولله الحمد وشعري انا مانبيش نغيره وحتى الكوافيرة قالتلي لونه يهبل الطبيعي وجيت للحوش وطبعا دارولي جو حلو وحنتي جت سمحة وبعدها جاني احمد
احمد.. نوارتي
انا..نعم ياقلبها
احمد.. قوليلي مش متريحة ليوسف انتي في شئ انا مانعرفاش
انا باستغراب .. ليش تسئل هكي
احمد .. ليا يومين نفكر فيك من يوم قراية فاتحتك لعند اليوم حسيتك كانك مش انتي نوارتي كانك وحدة ثانية
انا..ليش حمودي تقول هكي
احمد..نحكيلك بس تجاوبيني بصراحة انا ..حاضر
احمد..هيا نخشو لدارك بنات خالتك جوهن احرف من بنات خالاتي وعمامي انا.. هي
وخشينا لداري ورديت الباب ووصيت هبة ان البنات مايقربنش شورها مهما كان عذرهن وهنا ماعندهن حاجة غير التملسق على احمد
انا..هي احكي يا احمد
احمد.. نوارتي انا نعرفك اكثر مانعرف خطوط كف ايدي وليش نقول هكي من يوم فاتحتك انتي زمان لما كنتي تحكي على فرحك كنتي تقولي نبي سوابيت البيان بروحاهن بس يقعدو يحكو عليهن سنة وانك بتمشي تختاري كل شئ فيهن حتى التول اللي بيتغلف بيهن وانك يوم تلبيستك بتلبسي ميدي كبير ومبوج واجد وبتمكيجي ثقيل وبديري تسريحة ومانكش طالقة شعرك والفرح انك بتاخذي احلى بتات وانك مش حتخلي راجلك يفرش حوشك الا على ذوقك وكان هو مش شقة يعني بني حتى الجليز والسراميك انتي بتختاريه ودبش فرحك انتي بتختاريه حتى من الذهب والعقد الكبير تذكري يانوارتي
انا..ساكتة
احمد.. واللي زادني اكثر فيلو الفرح لما طلعتي ليا صورة قلتي تبي زي الموديل هذا او قريب منه انصدمت لانه عكس اللي كنتي تحلمي بيه قلت وين نوارة اللي كانت تقول انها تبي فيلو فرح قصير ومبوج وتبي تلبس عليه كويش وكان العريس طلع اطول منها بواجد لما قريب يخش تحول الكويش وتلبس الكعب وانها يوم حنتها بترقص وبدير جو نين يسحابوها الناس مش هي العروس والمشكلة ان انا وباتي وعمي عمر تحت امرك ماديا واحلامك كانت حتكون اوامر حتى من عند يوسف حالته المادية مرتاحة واجد لو بنقول بتراعي مشاعره واللي زادني اكثر وخلاني نتلكلم تو كنت نحكي مع هبة وانوار وقالولي مشو اليوم تاكدو من ديكورات الصالة فسئلتهن قالولي انك مش انتي اللي اخترتيه قلتي ليهن تبي حاجة درجات الوردي وخلاص وانتي اللي كنتي تقولي الصالة ديكورتها نبي انديرهن على مزاجي لو مالقيتش في بنغازي انجيبهن من تركيا هذا اللي خلاني نحكي  والله يا نوارتي لوكان مش عارفك وعارف اربايتك راه عقلي مشى شور حاجة ثانية هي احكي قوليلي خيرك شنو فيه
انا.. قعدت نبكي واضبطت احمد ومش عارفة خيرني بيني وبين روحي قلت ممكن على خاطر بنباعد عليهم وحياتي بتتغير
احمد.. اسسسس خلاص
انا ضعيف جدا قدام دموعها وهي تزيد تبكي وتزيد اضم فيا وانا واجعتني ومش عارف خيرها والله لو مانعرف كيف متربية لقلت كانها غلطت معاه وزواجها منه بالغصب بتستر على روحها لكن عارف نوارتي هذي نوارة قلبي مستحيل ادير حاجة كيف هكي هي حتى قبل ماتعرف منو مزبوط جت وحكتلي
احمد..خلاص نوارتي خيرك معقولة عروس هكي ادير
انا..مش عارفة خيرني حمودي نحس في روحي خايفة
احمد.. عليش بتخافي وانت قد المسوؤلية وست بيت وتقدري تفتحي حوش من صغرك مش لابال تو
خلاص هييي اسكتي على خاطري
انا.. على خاطرك نسيب الدنيا مش نمسح دموع بس مسحت دموعي
احمد.. هيا قوليلي كنك شنو اللي صاير معاك
انا.. والله يا احمد نقولك حاجة بس ماتزعلش مني
احمد..لا مش حنزعل منك احكي
انا.. نحس في كل شئ جاي زي مانبي وزيادة وحتى اللي مانطلبهاش اتجيني احسن من ماكنت نتوقع زي سوابيت البيان لكن قلبي خايف من الفرحة اللي اني فيها وحاسة كأن حياتي مش دايمة مع يوسف ليش مش عارفة نحس في فرحتي مش مطولة معاه ومش قادرة نمنع نفسي من الشعور هذا مسيطر عليا واجد 
احمد..كنك نوارتي تحكي خلي املك بربي كبير وربي اكيد جزاك على نيتك البيضاء والحلوة اللي عمرها ماحسدت ولاحقدت على حد ربي لما يجزاي كرمه كبير
انا..ونعم بالله
احمد.. خلاص نوارتي اتكي وتمددي اليومين الجايات طوال عليك وبكرة ما تلعبيش بالسير او الدراجة سئلت الدكتور قال لانها بتقمعز واجد فالرياضة حتزيد اتعبك وتو نخلي هبة تجيبلك عصير ليمون
انا.. به ربي يخليك لي
احمد ..ويخليك لي
وطلع احمد وانا حولت اللبسة بتاعت الحنة وابست بيجامة حمرا حلوة وخشت عليا هبة بكباية العصير
انا..جت في وقتها
هبة ..احمد قالي عليها
انا..سلمك وسلمه
هبة ..كنك شكلك باكية
انا..شوي بس من رهبة الفرح
هبة ..كلمي يوسف ايهون عليك من بدري هو يتصل بيا ويطمن عليك ويسئل على حنتك هههههه
انا..تو نكلمه
هبة .. به خليني نطلع انوتو في السفر  السحور
انا ..ربي يعاونكم كلا انا نبي نرقد
هبة .. نوم العوافي  
رقدت نحس في روحي تاعبة من الحنة