للقدر والنصيب كلمة اخرى

35

#للنصيب_والقدر_كلمة_اخرى

ح35
خشيت للمطبخ وجهزت الغذاء وطاب طفيت عليه وقعدت مكسدة على التلفزيون نين جاء يوسف وحطيت له الغذاء وتغذينا
يوسف ..سلم دياتك والله طلعتي تحكي جد يهبل الرز وطعمته سمحة
انا..الله يسلمك صحة وعافية
يوسف ..على قلبك
انا نضت ضميت المطبخ والماعين حطيتهن في الغسالة وطيبت شاي اخضر وجبته قعدت نشرب فيه انا ويوسف
انا ..قولي حبيبي مارنش احمد عليك بكل او اي رقم دولي
يوسف ..لا معقولة كان رن عليا مانقولكش
انا..غير انتاكد بس قلتها لانوار لان انوار قالت كلمهم احمد وقال تو نتصل بيك على رقم يوسف لان زي ماتعرف فوني  قاعد في داري في حوش هلي
يوسف ..اه لا والله ماكلمني
خطرها حبيبي دارك نبي بعد الزورة ومروحتنا من السفر بنغيرها لك
انا ..عليش
يوسف ..عشان حتقعد دارنا لما نباتو في حوش هلك
انا..اه صار حتى انت فكرت فيها
يوسف ..عليش في حد فكر فيها قبلي
انا.. احمد قبل العرس باسبوع قالي دارك تبي تغيير على الاقل نجيبو  دار سريرها اوسع شوي لان لما تتزوجي اكيد انتي ويوسف حترقدو فيها لما تباتو عندنا
يوسف ..انا نحكي على دارك اللي في حوشكم مش حوش احمد
انا..اه احمد حتى هو يحكي على داري اللي في حوشنا مش حوش عمو محمود
يوسف ..ماهو قال عندنا تباتو سحبته يحكي على حوشهم
انا ..اااااه ماهو احمد لما يحكي على حوشنا عمره ماقال حوش عمي عمر ديمة يقول حوشنا
يوسف ..اه كل يوم نكتشف جديد على علاقتكم ببعض
انا.مافيش حاجة غريبة
يوسف ..امممم
انا ..شنو امممم
يوسف .. انتي تشوفي فيها هكي لكن علاقتكم باحمد واهله غريبة وغريبة واجد
انا ..من اي ناحية
يوسف ..واجد نواحي منها انكم ماتربطكمش صلة دم لكن علاقة اقوى من الخوت والدم تحكم فيكم احمد اكثر من بوكم وامكم ومتعلقين بيه واجد لدرجة تخلي اللي يقرب منكم ايدير الف حساب لاحمد بيش يقنع روحه انه مايغيرش منه من كثر ما متعلقين بيه وقريببن منه 
دار احمد اللي عندكم وتخصيص الجناح ليه لما يتزوج وداركم عند اهل احمد
وحاجات واجد وحتى صرف احمد ماديا وانتم قاييمين بكل عزوماته ولما تمرضي اعتمادك عليه لدرجة يشريلك الدبش بدون حتى ماتمشي
انا ..قصيت على كلامه بحمق بالك بتقولي اقطعي علاقتك بيه والله بتبقى تغار منه وصبيت وعيوني دمعو وخطرت عليا كلمة هنادي لما قالتلي في البداية حيدير روحه متقبل علاقتكم باحمد وبعد مايتزوج منك يبعدك عليه ونزلت دمعتي على خذي وقلت ليه
انا.. انت من يوم ما ارتبطت بي عارف علاقتي باحمد شنو واني نبيع الدنيا كلها ومانبيع احمد
حسيت ان كلمتي قوية نزلت على يوسف لكن انا فعلا حبي ليوسف لو يخيروه بينه وبين احمد حنختار احمد
وخشيت لدار النوم ورديت الباب وقعدت نبكي بس مش عارفة نبكي من شنو لان كلام يوسف تحسست منه بس هو ماقالش حاجة اتخليني اندير هكي او ممكن بكيت لاني مرايفة على احمد وهو مادورنيش بكل معاش عرفت او مرايفة على بابا وماما وكبيداتي محمد وموسى قعدت حايرة وانا كل مافيا نزيد نبكي ويعلى صوتي خش عليا يوسف وضمني ليه وقعد يهدي فيا
يوسف ..اسسس حبيبي والله ماقصدي حاجة انتي اللي انفعلتي على الفاضي ومن قال اني بنقولك باعدي على احمد انا عارف احمد بالنسبة لكم شنو
انا..نبكي بحرقة رايفت عليه اول مرة يبتعد عليا ومايدورنيش
يوسف ... اسسسس خلاص حبيبي اكيد مشغول وشارق في شغله طالما جاه بشكل مفاجئ والمهم انه صحيح وطيب
انا ..الحمدلله
يوسف ..خلاص ياقلبي والله مانتحملهن دموعك
ومسحلي دموعي وضمني زين ومددني على السرير وانا بعد خذيت شوط البكاء شكلي رقدت مانندري على حاجة نين وعيت على صوت اذان ولما انتبهت للساعة عرفته اذان المغرب طلعت لقيت يوسف مكسد على التلفزيون
يوسف ...صح النوم حبيبي
انا ..اسفة رقدت وخليتك
يوسف ..مش مهم حبيبي المهم رقتي
انا ..اه الحمدلله
انديرلك قهوة واندير لروحي كابتشينو ونطلع لحم للعشاء
يوسف ..تمام ديري القهوة حبيبي لكن لحم ما اطلعيش على خاطر كلمت خالد وقلت له جيب لنا عشاء من برا لاني مانبيش نطلع ونسيبك ومانبيكش تتعبي روحك بعد اللي صار امبدري
انا ..جيت وضميته وبسته على خده وخشيت طيبت القهوة وحطيت معاها كيكات هو جايبهن وقعدنا نشربو ونهدرزو وجاء خالد جابلنا العشاء وعدى وتعشينا وضميت حوست العشاء وبديت نجهز في كيك لبكرة العشاء ودرت  وخش عليا يوسف وانا نجهز فيها
يوسف ..قصدك لما تشتغلي في المطبخ هكي تكوني منظمة
انا..مانعرفش نشتغل في حوسة فهذا ليش لما اندير في حاجاتي مانحبش حد يعاوني
يوسف ..تبي الحق ماشاءالله عليك كل مرة نكتشف فيك جديد وغريب
انا..عالم متناقضات تلقاني ماتغركش هدواتي ودموعي لاني لما نتعصب وحش ننقلب ولما حد يهيني مهما كنت نعزه ونحبه من القسوة اللي عندي نكرها بالقدر اللي حبيته فيه
يوسف ..بالنسبة للقسوة وقضني عليها احمد
انا ...بتنهيدة احمد
يوسف ..جاء وراي وضمني
وقالي تو يفضى ويتصل
انا ..ان شاءالله
مع ان احمد مهما كان مشغول مستحيل ينسى انه يطمني عليه
حطيت الكيكة في الكوشة وحطيت الماعين في الغسالة وقعد يوسف مقمعز على الطاولة وهو يتفرج عليا وانا نجهز في حشو وزينة الكيكة وطابت الكيكة وبردت حشيتها وزينتها ودخلتها الثلاجة
يوسف ..هيا حبيبي نعست راه
انا ..عاد خليتني نرقد للمغرب وبنقعد سهرانة وانت بترقد تو
يوسف ..اصلا كان مارقدتيش امبدري راه تعبتي اكثر وقعدتي زعلانة مني
انا ..جيت ضميته وهمست ليه انا مستحيل نزعل منك انت قلبي وروحي راك
يوسف ..ضمني بقوة وانت حياة وقلب وعقل ونبض يوسف
انا ..هيا حبيبي شكلك نعسان بكل
خشينا للدار وضمني يوسف ورقد وانا قعدت انتقلب ماجانيش نوم نسحبت بالشوي من بين ايدين يوسف وغيرت دبشي وخشيت للمطبخ وقلت خليني اندير حاجات  للعزومة بيش يقعد ماعندي شئ ومقررة اني بندير مشاوي وسلاطات
تبلت الدجاج وغلفته  وحطيته في الثلاجة وقطعت اللحم وتبلته لاني بنديره اسياخ وحتى هو غلفته وحطيته في الثلاجة وحطيت مكونات سلطة مشوية في الكوشة بيش نجهزها وبعد ماطابن حطيتهن في كيس ودخلتهن الثلاجة وقلت بكرة اندير معاه سلاطة خضرا وبعد ماكملت حسيت روحي ينعس فيا النوم وخشيت غيرت دبشي ورقدت طول