للقدر والنصيب كلمة اخرى

20

#للنصيب_والقدر_كلمة_اخرى

ح20
عند يوسف وعبدالسلام
يوسف ..اسمع راه نبي نطلع الفرح بسرعة ماعنديش صبر لعند الصيف الجاي تسع شهور بنصبر مستحيل
عبدالسلام ..كنك شنو جد عليك
يوسف..بعد اللي صار اليوم وكيف خفت انها تسبيني شهادة لله ماعاد نقدر انخليها بعيدة عليا
عبدالسلام ..لهدرجة هذي هبلتك في جرتها
يوسف ..انا كان نلقى نحطها جوا قلبي ونسكر عليها
عبدالسلام ..كذا قولي يافالح كيف منسق وضعك وحوشك مازال ماكمل
يوسف ..الاسبوع الجاي يمشو الصبايا وثاني يوم الرجالة ونتفقو على الفاتحة والفرح بعد شهرين يجي قريب من بداية السنة الجديدة ونطلعو شهر عسل وبعدها انروحو ممكن ثاني اسبوع في الجامعة وعلى الاقل تخش الجامعة وهي حلالي
عبدالسلام ..كلام سليم والسكن يافالح
يوسف ..الفيلا مامازالش عليها واجد لو نشد الهمة شهر ونص يكون كامل
عبدالسلام ..مفكر في كل شئ
يوسف ..ها شنو قررت اطلع فرحك معاي
عبدالسلام ..سبحان الله بعد ماكنت رابط فرحك بفرحي تو بنربط فرحي بفرحك
يوسف ..اللي يريحك انا مانزر فيك
عبدالسلام .. اكيد وهي فيها تفكير خصوصا انا حوشي ماناقصه شئ الا هي تجيه تنوره غير هي كانت تبي تكمل اخر سنة عند هلها لكن نقدر نقنعها انها تكملها عندي
يوسف ..تمام بكل معناها وصل الكلام هذا للحاج بيش يتفق مع الناس لما يمشيلهم وقوله مرات هلها يعكو على موضوع الفاتحة لكن قوللهم يزر عليهم خصوصا ان الفرح قريب ونطلعه
عبدالسلام ..تمام تو بكرة نتم معاه و نحكيله ونسق معاه قبل مانطلعو للزردة
وجاء الصبح
انا
نضت الفجر صليت وقريت قرآن وقريت سورة الكهف وبعتت رسالة لاحمد انوقض فيه يقراها قبل اجتماعه
ورجعت رقدت نين نوضتني ماما
ماما ..نوضي حبيبة الساعة 9.5 راه
انا ..شوي بس ياماما
ماما ..نوضي عمتك غالية وعمك محمود جو وبنفطرو مع بعض
انا ..اه الجمعة هذي عندنا
ماما ..شكلك ناسية
انا ..اه شكلي ناسية هي ماما تو نوض اندوش ونجي وله تبيني نوتي الفطور معاك
ماما ..لادوشي انوار نايضة قبلك تساعد فيا نا وعمتك
انا ..به هي مصبية وصبيت دوشت وغيرت دبشي ولبست قفطان طويل ونص كم وردي وامبطش بالابيض
طبعا نحن يوم الجمعة هذا يوم كانه عيد جمعة عندنا وجمعة في حوش عمو محمود ومستحيل حد مايجيش لثاني حتى لو عنده ضيوف
طلعت عليهم وصبحت عليهم وبست راس بابا وعمو محمود وفطرنا ونحس في الفطور ناقص من غير احمد
انوار ..احمد مخلي مكانه حتى هو ربي يهديه مفروض داره عشية
بابا ..ماهو على خاطر سريبكن داره الصبح
انا ..شنو بنديرو كان ماما وعمتو غالية بيعدو لعمتي عزيزة نحن من بينا الا احمد
عمتو غالية ... والله مانقدرو نغيبو عليها بتعطي بنتها الوحيدة واكيد تبي من يعاونها
انوار ...اه شفت يا بابا
عمو محمود ..هو الغذاء بيكون هنا ان شاءالله
انا ..ان شاءالله طيب   شنو بديرو الغذاء
ماما ..الجمعة اللي فاتت غالية دارت كسكسي وانا بندير بازين ان شاءالله الجمعة هذي
انا وانوار يميييي بازين لينا واجد عليه
ماما ..وخيركن ماقلتن خاطركن فيه
انوار ..لان متوقعين الجمعة هذي اديريه
نضت انا وانوار نضمو في حوسة الفطور وبابا وعمو محمود وعمتو غالية وماما طلعو لدار المعيشة يهدرزو وعمتو غالية قمعزت على عدالة الشاهي لان مستحيل الجمعة بدون عدالة شاهي
وجاء احمد وعدو لصلاة الجمعة وخذو معاهم محمد وموسى دار حالة زي كل جمعة
وقعدنا نتغذو  ونتعاركو زي كل مرة على رفاس بابا ويكمل الغذاء ياروحي انه ماياكلش كويس لانه كل مرة بيرضي حد مرة نا ومرة انوار ومرة احمد وكل مرة يقوللها انا مانشبعش معاهم حطولنا بروحنا ولما تجي ماما تسئله يقوللها في بنة الوكال بلاهم
خش اللي بيقيل يقيل وانا خشيت للمطبخ بندير التشيز كيك وجاء احمد احداي
انا ..حمودي خيرك جيت عدي اتكى انت نايض بدري اليوم
احمد ..شوي وبنخش نرقد
انا ..انبه حمودي قريت سورة الكهف او مافضيتش كنهدا معاك وقت اقراها قبل ماترقد
احمد..معقولة تبعثي رسالة ومانقرهاش
قريتها الحمدلله قبل ماطلعت للاجتماع
انا ..حمودي شنو عندك ربكة في عملك او شنو
احمد..لا غير خاش في مقاولتين مع بعض ومانبيش نقصر في وحدة على حساب الثانية
انا ..وانت ليش تضغط على روحك وتقبلهن الاثنين
احمد ...والله كان تشوفي اللي يستنو فقلت اندير اثنين كل مرة
انا ..ربي يرزقك ويوسع رزقك لان شركتك سمعتها كويسة وهذا ليش ديمة زحمة عندك ولان اللي مايسيبش ربي عمره ربي مايسبه حتى ولو جاه هم من ربي معناها ربي يختبر فيه
احمد ..ونعم بالله وان شاءالله مانقصرو في فرض من فروض ربي
هيا بنرقد انا
انا ..نوم العوافي مقدما
احمد..تسلمي
انا ..شمرت يديا وبديت اندير في كيكة لهلي على خاطر يشربو بيها قهوة العشية وبعدها بديت في التشيز كيك
ناضو وصلو وحتى انا مشيت توضيت وصليت وجهزت القهوة لبابا وماما وعمو وعمتو وانوار وانا واحمد درت كابتشينو وحطيت معاها الكيكة وقمعزنا نشربو فيها وجونا يهبل ربي مايفرق بينا ولايحرمنا من هاللمة وطبعا مايسلمش الموضوع من تعليق بابا وعمو عليا وعلى احمد على خاطر الكابتشينو وانه مافيهاش جو
احمد ..انوار هي ياغالية نوضي غيري دبشك
انوار ...حاضر
انا ..احمد راك تنسى قفطاني وقفطان انوار لونهن يكون من درجات الوردي
احمد ..ليش اللون هذا بالذات هو عارفك تحبيه بس ليش حتى انوار
انا ..ماهو حلومة هيا اللي طالبة درجات اللون الوردي حتى هبة واصالة  وهنادي  وبنت عمها بيلبسن من نفس درجة اللون الوردي
احمد ..اه كلا انتن يا البنات عندكن حاجات
انوار ..ماهو نحن نعتبرو من صاحبات العروسة وتو طالعة موضة ان صاحبات العروس يايلبسن كلهن نفس موديل القفطان واللون او يتفقو على اللون بس وبما ان نحن كل وحدة ليها جسمها فحلومة قالت خليكن في درجات الوردي واي موديل يعجبنا
احمد ...هي كان واتية
طلعو احمد وانوار وبابا وعمو طلعو رفعو ماما وعمتو لحوش احلام
وانا خشيت للمطبخ قعدت نكمل في تجهيزي للتشيز كيك
اتصل يوسف
انا ..السلام عليكم
يوسف ..وعليكم السلام
كيف حالك اليوم شنو دايرة
انا ..بخير الحمدلله كيف حالك انت
يوسف ..تمام بكل بالذات بعد ماتما كل شئ زي مانبي
انا ..شنو صاير معاك حاجة جديدة
يوسف ..امبارح حكيت لعبدالسلام واتفقت معاه وبيطلع فرحه معاي وكلم اليوم باتي و اقتنع بكلامي
انا..تحشمت وسكتت
يوسف ..يادي الحشم غير لمتى بيحول
انا..نعرفش
يوسف ..نجيه هالحشومي غير شنو درتي في بس
انا..تسلم مادرت فيك شئ غير اني حبيتك
يوسف ..شنو شنوووو ماسمعتش
انا ..بحشم وصوت واطي حبيتك
يوسف ...اه ياقلبي من قبل مجنون بيك وتو بيزيد اخرى نحس فيه بيوقف
انا ..خلاص يوسف معاش تركب علي
خليني تو بنكمل شغلي
يوسف ..فيش اديري
انا ..اندير في تشيز كيك لاحمد بيرفعه للزردة
يوسف ..اااايه ماشاءالله شكلك شيف
انا ..نحب صنع الحلويات واجد وتقريبا كل زردة انديرله في حاجة شنو مش ضايق حاجة من دياتي قبل
يوسف ..تبي الحق الحلو مش اي حاجة ناكلها لكن كانو يشكرو ديمة في حاجاتك بس انا كنت انقول ينافقو في احمد
انا ..معقولة لهدرجة هذي احمد مافيش حد يحبه قلتها بحزن
يوسف ..مش مايحبوشي لكن الغيرة عاميتهم
انا ..به طالما ماتاكلش في الحلو مرة وحدة طيبت لاحمد حاجة حارة ماكليتهاش
يوسف ..ذكريني بيها
انا ..لما نجحنا في الشهادة الثانوية قبل ماندير حادث
يوسف ..اه ماتقوليش الخروف المحشي براك وورق عنب
انا..اه
يوسف ..احلفي
انا ..معقولة بنحلف على حاجة زي هذي اسئل احمد
يوسف ..ماهو اصلا تقول مطعم دايره هذا ليش استغربت
انا ..صح التطيب رفعه احمد لمطعم لانه يبي فرن كبير ونحن ماعندناش لكن التتبيلة والحشو انا اللي دايرته حتى البراك وورق العنب انا لفتهن صوبع صوبع
يوسف ..نجك لي وانتي صوبع صوبع
والله كان نقولك اولا فتحنا فمنا فيه بالذات لما شفناه شن محشي وماتوقعناش الحشو تعطيه طعم روعة هكي نذكر ان طحنا فيها بايدينا الاثنين والبراك وورق العنب خليناهن ثاني يوم تغذينا بيهن حاجة ماتفهم شئ ومافيش تقريبا  ولا واحد سئل احمد من داره لان كلنا متوقعين انه من مطعم
انا ..ان شاءالله ديمة ربي ساترني مع سندي يارب
يوسف ..معاش تقولي سندك
انا ...بصدمة ليش