للقدر والنصيب كلمة اخرى

8

#للنصيب_والقدر_كلمة_اخرى

ح8
احمد خش غير دبشه وانا قعدت نتقلب في فراشي طلعت شوي قلت نهدرز مع احمد
جاء احمد وقعدت انهدرز معاه
انا ...احمد خطرها
احمد نعم
انا...في حاجة على يوسف ماقلتش ليك عليها لكن مانقدرش انقولك عليها تو خليني نشوفه قبل
احمد ...باه مانيش ضاغط عليك
انا..حمودي خيرك معاش فتحت بابك للحب ثاني
احمد ...نوارتي  نسئلك سؤال
انا...تفضل
احمد .. لو يوسف طلع حالته المادية اقل منك او شكله شين
انا... الحب مايعرفش فرق مادي وبعدين خطاب واجد جو ليا حالتهم المادية اقل من حالتي وكان بابا سبب رفضه على التربية مش المادة لان بابا يقول خوذوهم فقراء يغنيهم الله فالفقر مش عيب حمودي والمرا لما تحب تحب من قلبها وتتحمل مع حبيبها كل شئ والشكل انت عارفني ان اخر همي لان الاخلاق قبل كل شئ
انا من غير مانندري التفتت شور احمد لقيت عيونه مدمعات ارتبكت
انا.. خيرك حمودي والله اسفة ما قصدي
احمد ..نوارتي  عليش تتاسفي لان تربايتك صح هذا بيكون كلامك انا هذا ليش معاش فتحت بابي للحب لان القلب يتحمل صدمة وحدة مش اثنين
انا ...ربي يعوضك خير وحميدة في الف خير منها
انا
خلوني نحكيلكم على احمدوقصته
احمد كان يحب من قلب ورب وبكل جوراحه ويموت في التراب اللي تمشي عليه لكن هيا ماتستاهله احمد لان جرب بنات واجد ويلقى فيهن يحبن فيه على خاطر فلوسه لكن لما حب حميدة كذب عليها وقاللها ان هو على قد حالهم والفيلا اللي ساكنين فيها جت من الورثة نصيب بوه والفلوس اللي عند بوه يشتغل بيهن لخوته لان خاف حتى هيا تكون تحبه على خاطر فلوسه زيها زي غيرها وبعد عشق وهيام قريب سنة واكثر اتصلت بيه حميدة وهو عندنا
انا خشيت عليه داره بنركب عليه ونلبسه شوي لقيت ايده ترعش وعينه مدمعة جيته نجري ونسمع فيه يقوللها تحكي جد انتي ماتبصريش صح وانا نسمعها وصوتها كان عالي تقوله انا مانقدرش انتحمل الفقر واجد عليا عند هلي عشت فقيرة وحتى راجلي فقر واحمد تنزل دمعته وانا شديت  ايده اللي ترعش وسكر التيلفون وانهار يوم ماننساه عمري كله قديش واعرة دمعة الراجل لابال انه يبكي بحرقة وعدى يوم اسود على احمد لدرجة جبنا دكتور ضربله ابرة مهدية
وانا ثاني يوم مشيت ومعاي هبة للفرخة حميدة وقلت لاختها معليش نبيها بروحها وطلعت حتى هبة ونعطيها كف نين صوابعي علمن على وجها وقلت ليها هذا بس على خاطر اول دمعة نزلت من حمودي وهي جت بترفع ايدها بترد الكف وانا مانندري على روحي الا وهما يحزو فيا منها قريب قتلتها ولما جيت بنطلع قلت ليها يامادية يامعفنة احمد يشريك ويشري هلك والراجل اللي جايك احمد كذب في الفلوس  العز اللي شفتيه عند اب احمد وهذا كله ماشفتي منه شئ وكله ملك احمد وبوه عمامه هما اللي يشتغلو مع عمو محمود  يامعفنه وطلعت نغلي نحس في روحي ببنفجر من اللي صار لاحمد وهبة تهدي فيا
وحكيت طبعا الموضوع لاحمد والتمت الشلة عندنا وقعدنا داير روحنا دايرين جو لاحمد لكن ماصار شئ احمد قاعد زي ماهو وبعد ايام قعد احمد يطلع ويوخر في المرواحة وفي يوم اتصلت بيا
عمتو غالية .. ليا نوارة  احمد معاش جاكم صح
انا..  اه معاش جانا وديمة نتصل بيه ويقولي تو نجيكم اليوم ويفوت فيا ووحلت فيه
عمتو غالية ..نوارتي  احمد شكله خش على وجيج ثاني
انا ..وجيج شنو ياعمتو 
عمتو غالية .. شكله حشيش
انا...بصدمة شنو وكيف عرفتي
عمتو غالية ...حتى الصلاة سيبها
انا ... سكري ياعمتو تو نكلم بابا نخليه يشوف موضوعه
عمتو غالية ...سلم بنيتي حاولو ماتخلوش عمك محمود يعلم بيه
انا...اطمني عمتو 
انا عديت لبابا وحكيت معاه وقالي ماعليك تو انديرله راي وطلعت من بابا قعدت نبكي محروق قلبي على احمد ونتحسب على حميدة خسرت واجد وحطمت احمد بسببها وكان لقيت مشيت لها اخرى وعطيتها طريحة سمحة لاني نحس ان الطريحة الاولى مازالت مافشت خاطري والمشكلة ان احمد كان يبي يقوللها الحقيقة وبيجي يخطبها لان حكى حتى لماما بيش تكلم عمتو غالية في الموضوع غير وقتها كانت عمتو غالية مسافرة مع عمو محمود لكن هي في الاخير نصيب وكنت لما نعارك احمد نبيه يحكي ليها كان يقولي خليني نتاكد قبل لان يانوارة  وكان باتي خش في تجارة وخسر وفلسنا حتى وانا متزوجها تسيبني لان اللي تاخذك على خاطر الفلوس تسيبك على خاطرهن وكنت نسكت لاني نلقى في كلامه صح
وبعد يومين لقينا بابا جايب لينا تذاكر انا وانوار واحمد وعمتو غاليه وسافرنا برا ليبيا وقعد احمد شوي شوي يتغير والحمدلله رجع لصلاته وسيب العفن اللي كان ياخذ فيه ورفعناه حتى لدكتور نفسي طبعا احمد كان واعر شوي لكن على وعارته مايردليش طلب ولايتحمل ادموعي وانا كنت لاقيتها فرصة  لما ماباش يمشي للدكتور قعدت نبكي ومانكلمش فيه والحمدلله مع الدكتور رجع احمد اللي نعرفوه زي قبل واحسن بس من غير مايفتح قلبه للحب مرة ثانية
انا... هيا عاد حمودي خليني بنرقد ورانا بكرة قراية واجد
احمد ..باه تمام نوارة  بنسئلك خطرها
انا...نعم
احمد ...مالحظتيش حاجة على هشام 
انا...زي شنو
احمد ..طالما مش عارفة لاخلاص
انا... خيرك قولي شنو في
احمد ...مافي شئ خليني انتاكد
انا...باه تصبح على خير
طبعا انا مانقدرش نظغط على احمد لانه طبعه مهما اندير مستحيل يقولي طالما مايبيش يقول لكن خلاني نفكر في هشام 
احمد
انا الحق اليوم حسيت هشام وجه تغير لما قلت لهم عدو انا بايت هنا واستغربت ليش وجه تغير مع ان بيتي في حوش عمي عمر حاجة عادية لكن قلت طالما نوارتي  مالاحظت شئ معناها غير ان نتخيل
انا
خشيت لداري وشفت تليفوني لقيت يوسف متصل بيا قريب سبع مرات
انا على طول رنيت عليه سكر عليا وشوي اتصل بيا رقم نقال مميز لكن انا مانردش طبعا على ارقام فجتني رسالة من نفس الرقم ردي انا يوسف رديت طول
يوسف ...اهلين
انا .. اهلين بيك
يوسف بلهفة ..كيف حالك شغلتيتي عليك طمنيني عليك شنو اللي صايرلك نين رقدتي في المستشفى امس قلبي على نار لدرجة حتى قراية ماقريت ولاقدرت نرقد كويس
انا...فرحانة من لهفته عليا
بشوي شوي خليني تو نحكيلك
حالي تمام مافي شئ غير زي ماقلت ليك لاني دلوعتهم مايتحملو فيا شئ وابسط حاجة يرفعوني طول للمستشفى مع اني لانحبها ولانحب ريحتها
يوسف ...شنو اللي صار
انا.. راكبة على الدروج وزلقت طحت قريب عشر درجات تكركبت منهن وصارلي شوي كدمات والتواء في رجلي بس هذا اللي صار
يوسف ...الف لاباس عليك يارب
والله ماتعرفي قديش قلبي وجعني لدرجة فكرت حتى نمشي للمستشفى امبارح بس معاش عرفت نمشي وين ونقول يامن
انا...ضحكت
يوسف ...عليش تضحكي
انا ...انت ماتعرفنيش وتعلقت بيا واجد لدرجة هذي انت ماتعرف عليا شئ وكان نطلع شينة
يوسف ...حتى كان عفريته انا راضي بيك انتي ماتعرفيش قديش اثرتي فيا وخليتيني نتعلق بيك ونفكر فيك طول الوقت لدرجة خليتيني امس نحكي عليك لعبدالسلام خوي
انا ... شنو حكيت عليا ليه نهارك هو واكيد ضحك عليك لانك ماتعرفش الا اسمي الاول بس واكيد حسك انك مش بعقلك
يوسف ...اه مش مغير ضحك عليا واجد نين رقالي منه لكن فرح ليا
اناباستغراب ...ليش
يوسف ...لاني اول مرة نفتح قلبي للحب
انا...قصدك ماحبيتش قبل
يوسف ...لا ماحبيتش 
انا...صار نعتبرو نتعلمو في بعض
يوسف ...كيف شن قصدك
انا...انا ولاعمري يوم فتحت قلبي للحب غير حب هلي وقروبي وناسي لكن الحب اللي يوجع ويخلي القلب يدق ومرات يكون فيه فرح وحزن وخيانة والم وخوف وراحة وامان ماجربتاش لكن شفته بس
يوسف ...تعرفي فسرتي الحب بمعناه الصحيح بس ان شاءالله ماتكون فيه خيانة يارب
انا
بعدين نا فطنت لروحي شنو قلت لكن قلت الحمدلله شكله ماركزش عليا
يوسف
سكتت شوي وركزت في الكلام اللي قالته وقلت لها
يوسف .. قصدك حبيتيني حتى انتي
انا...انصدمت ومعاش عرفت شنو نرد
يوسف ...ردي كنك سكتي
انا...لامش حب بس راحة شعور مختلف عن اللي نحس فيه اتجاه حد ثاني لكن ماعتقدش حب مازال بيش نحب
يوسف ...عبورة
انا...نعم
يوسف ...نبي نشوفك
انا...وحتى نا بس مش تو
يوسف ..عليش وامتى
انا...لان مازالت مدمدمة من الطيحة ووجي اخي رايح منفخ وامتى شنو رايك خليها اخر يوم في امتحاناتي
يوسف ... هنا امتى يبدن امتحاناتك
انا ...السبت الجاي يعني بعد اربع ايام
يوسف ..زيي حتى انا امتحاناتي يبدن في نفس التوقيت في اي كلية انتي
انا ...كلي... لا مانيش قايلة خليها في اليوم اللي بنتلاقو فيه
يوسف...عليش نا نرجى في الساعة والدقيقة بيش نشوفك
انا...حتى انا لكن زي ماقلت ليك وجهي منفخ ومنظره شين واذا قلت ليك اي كلية حتجي تشوف في الكلية وحتعرفني لان بوجهي هذا حتزبطني طول وتقعد انت شايفني وانا لا
يوسف ...به خلاص معاش بنظغط عليك
انا...به بنقولك الايام الجاية عارف امتحانات ونحن وقروبي نقرو ديمة مع بعض وكل مرة في حوش ومعاش نقدر نتصل بيك واجد لاني مازالت ماحكيت ليهم عليك
يوسف ...عليش ماحكيتيش ليا عليهم
والله متحشمة فيا
انا...تبقى انت ماتعرفنيش انا الحاجة اللي نتحشم منها ما انديرهاش لعلمك وماحكيتش عليك ليهم عشان مايضحكوش عليا زي ماضحك عليك خوك نين نعرف على الاقل اسمك بالكامل ونشوف شكلك وبعدين نقولها بكل ثقة والوحيد اللي حكيت ليه عليك احمد بس لاني مانقدرش اندس عليه
يوسف ...باه خلاص وانتي رقتلك
انا... ماهو انا مانعرفش نخاف وعمري ماخفت من حد الا من ربي واللي نخاف منها او تخلي موقفي بايخ مستحيل انديرها ولعلمك حتى موضوعنا غير لما نشوفك ونعرف انت من ونتاكد من مشاعري  نحيتك حتى ماما بنحكيلها لاني مانعرفش ومانقدرش نخدع الثقة اللي منحوها ليا
يوسف ...ماشاءالله عليك وربي يحفطك لي يارب وبه ومش حيضايقو لما يعرفو انك ماحكيتيش ليها من الاول
انا...طالما حكيت لاحمد من الاول بالنسبة لاهلي خلاص نعتبر كاني حكيت ليهم وانا قروبي يزعلو شوي لكن يرضو بسرعة لما حيعرفو اسبابي
يوسف ...نجيه الواثق يارب
انا...انحرجت
يوسف... انا عندي سؤال لكن خليك تو ارقدي وحتى بكرة نسئله لك
انا ...رغم اني فضولية لكن خلاص انحس في روحي نفتح في عيوني بالغصب
يوسف ...هي تصبحي على خير
انا ...وانت من اهل الخير