للقدر والنصيب كلمة اخرى

49

#للنصيب_والقدر_كلمة_اخرى

ح49
هبة ..يوسف
انا.. خيره هالهم اللي معاش يخلص
هبة .. بتوقفي بكا وتخليني نحكي واذا مانكش موقفة  والله ماني حاكية
انا.. مسحت دموعي احكي هي
هبة .. الشباب اللي هزبتي واحد منهم صح احمد خلاك تكلميه وتوقفيه عند حده بس لما طلعو تاريتهم يستنو فيهم  برا احمد وسند وعبدالله ورفعوهم للمزرعة واضارب احمد معاهم ولما زر واحد فيهم لان احمد كان شاك ان في حد مقريه طلع يوسف اللي قايللهم يضايقوك احمد ماقدرش يشد روحه وطلع وسند وعبدالله رفعو الشباب وطلعو وراء احمد لكن لما وصلو كانو خوت يوسف واحمد شادين في بعض واجد واحمد اضرر واتصل بيا وهو اللي قالي نكلمك تجي
انا.. ماتخيلتش يوسف يوصل بيه للدرجة هذي يسكر في الحياة في وجهي وميسحابش ان الحياة كلها معاي
وانا بديت نبكي من جديد ومش مفكرة في شئ الا اني نطمن على احمد
انا.. هوبي بالله عليك كلمي فتحي يروح بيا
هبة .. لا عبورة احمد مايبيكش تشوفيه هكي تو تقعدي تبكي ودايرة حالة
انا.. مسحت دموعي مش حنبكي بس والله مانقدر نقعد بالله عليك هبة ريحيني
هبة .. خلاص تو نكلمه
وطلع بينا فتحي وصلنا حوش عمو محمود وفتحت زيزي  الباب وخشيت نجري لاقتني عمتو
عمتو .. من اللي قالك
انا.. عمتو مش مهم من احمد وين
عمتو .. تو كيف رقد
هبة .. خلاص امنا عمتي قبل نا وفتحي بنشوفه لكن تو نجو بكرة
انا بنركب شدتني عمتو
عمتو .. نوارة احمد ايده مكسورة ومباش يجبسها لانه خايف عليك قال نين تشوفها قبل وبعدين نجبسها
انا.. به عمتو تو نخليه يجبسها
وركبت نجري وخشيت للدار لقيتها مظلمة ضي الوناسة  بس اللي والع على الهادي قويتها بيش نشوفه كويس وجه متورم واجد وشكله يتوجع من ايده شديته من ايده وقعدت نقوله
انا.. سلامتك ياقلبي ديمة نقولك مش كل حاجة الضرب لكن انت شئ ماتبيش تسمعني ودمعت عيني ومسحتها وانتبهت لاحمد فتح عيونه
احمد.. شنو جابك انتي ومنو قالك
انا.. اسس مش لازم تعرف المهم اني حذاك ومعاك
انا... هيا حاول تصبي
احمد..وين بنصبي
انا .. ولاكلمة بنرفعك للمصحة تجبس ايديك
احمد ..منو بيرفعني
انا.. انا نرفعك شنو ناسي اني نعرف انسوق
احمد.. لا تو نستنى عمي عمر والله باتي مانبيكش تسوقي
انا.. عدها اول واخر مرة هي نوض والله نقلبها مناحة هنا
احمد..امري لله هي نلبس تيشرت بس
انا .. استنى انساعدك
احمد
هيا تساعد فيا وانا كل ما ايدها تلمس جسمي نحس فيه نار يولي  ولبستني التشيرت ولبستني الكويش وطلعنا ولقيت امي لابسة
احمد.. شنو امي بتعدي معانا
عمتو .. اكيد بنعدي امنا بنخليكم برواحكم في هاليل
احمد.. وانتي نوارتي بتعدي هكي
وقعد يضحك والضحكة توجع فيه
انا .. بحتت في روحي لقيت روحي لابسة سروال واسع وتيشرت دايرتهن للحوش وضحكت
خزيه الحقيرة هبة ماوقضتنيش على لبستي
احمد .. اكيد ذهبتي شيرتها وانتي تبكي نعرفك نا
وخشيت جري لداري ولبست سروال وعليه سورية طويلة ولميت الشعر لمة على بعضه وطلعنا ومشينا للمصحة وجبسو ايد احمد وركبنا في السيارة وطبعا احمد مابطلش نصايح
احمد.. تريحتي تو
انا.. اه مازال نروح وانديرلك كمادات ساخنة بيش يخف التورم في وجهك
عمتو .. مش كمادات مصقعات
انا.. لا كمادات ساخنات مفعولهن اسرع
طبعا انا نسيت بكل الكلام اللي قاله احمد لهبة ونسيت يوسف شنو قصده من الحركة اللي دارها 
احمد
لما شفت نوارة تتعامل معاي عادي تاكدت ان هبة ماحكتش ليها شئ الا اني درت عركة
وروحنا للحوش وركب احمد وساعدته في الكويش و تمدد وانا عديت جبت مية ساخنة وقعدت اندير في كمادات
احمد.. نوارة
انا.. نعم
احمد.. هذي اخر مرة تسوقي فهمتي
انا.. حاضر بطل انت عرايك وتفجعني عليك
احمد.. به
طبعا انا في عالم ثاني من لمس ايديها لوجهي
نوارتي
انا..نعم ياقلبها
احمد..نبيك في موضوع
انا .. احكي
احمد.. مش تو نصح قبل ويحول تورم وجهي
انا..هههه  الموضوع بتقوله بفمك والله بوجهك
احمد.. لا بوجهي
انا.. به
انا اذكرت كلامه لهبة زعمك بيحكلي وشنو بتكون ردت فعلي وقعدت بيني وبين روحي نفكر نين خذاني النوم على الكرسي بحذا احمد
احمد
انا قعدت نفكر كيف بنحكي ليها وكيف بنقوللها لاني قررت اني بنقوللها خصوصا لما كلهم يقولو لي نين ياخذها غيري زي الاول وشنو الطريقة اللي بندوي بيها نين غفاني النوم ومانتبهتش نين تقلبت فطنت بنوارة راقدة على الكرسي قعدت نشوف فيها وهي زي الملاك كيف راقدة وبعدها نوضتها
نوارة نوارتي نوضي
انا..نعم
احمد.. نوضي رقدتي على الكرسي راه
انا.. اه ماحسيتش بروحي وصبيت جبت فراش وغطاء وفرشت تحت بحذا السرير وتمددت
احمد.. وين راقدة
انا .. بنرقد هنا وكان تبي حاجة
احمد.. مانبي شئ نوضي ارقدي في دارك وعلى سريرك تو اضرك الوطا
انا.. لا ماهو الفرشة ثقيلة وبطل دوة نبي نرقد
احمد
فرشت رقدت وانا نتفرج عليها وبدون مانتكلم اتكيت وقعدت نفكر قديش كنت حمار (حشاكم ) اللي صبرت هذا كله ليش محبيتهاش من البداية ليش ماحسيتش بمشاعري نين جاء واحد بياخذها مني مش عارف وين كنت راقد يارب توافق على طلبي وماتردني وانا نصبر معاها نين هيا تحبني وتحس بيا من قلبها كحبيب مش احمد اللي كبرت معاه ولقيت روحي راقد ونضنا الصبح وطبعا لقيتها نايضة قبلي ودايرتلي كمادات جدد ونازالة تجهز في فطور مع امي ونزلت بشوي بدون ماتفطن وانا نراقب فيها ونقول في خاطري امتى تبدا هي وامي زي تو بس بدل ما امي ونوارة القلب بنتها تكون كنتها وحسيت على روحي اني معاش قادر وشوي خش علينا عمي عمر وعمتو حواء وموسى ومحمد وانوار وطبعا انوار اضبطتني وقعدت تبكي وقعد موسى يبكي معاها
احمد  .. خلاص سادكم  مافيا شئ كيف الجن
موسى .. خيره وجك هكي
احمد.. طبستله وبسته مافي شئ حبيبي طحت بس وتغمره موسى
انا
نبي نقول لموسى  حول لان احمد محصل ضربة على صدره فنص فيا احمد وتحمل الوجع ياروحي ولا با يحول موسى من عليه
انا ..خلاص حبيبي اطلق حمودي راه مريض
موسى يمسح في دموعه ..به
وخش باتي وعمو محمود واحمد للمربوعة وطبعا لما يخشو للمربوعة مايبوش حد يجيهم لان المربوعة تعتبر الاستفراد بالشخص هكي عودونا وانا تميت خايفة على احمد
عمتو .. ماتخافيش بنيتي احمد مش غالط هالمرة
انا.. كيف عرفتي
عمتو .. احمد حكالي كل شئ وتوقعت كل شئ الا ان ولد اختي يطلع واطي هكي ومازال احسابه عند جده
انا.. عمتو ماتكبريش الموضوع وجده عارفتيه قديش يعزه حرام تهزي صورته قدامه بس هو ليش دار هكي 
عمتو .. ربي يكملك بعقلك يارب
دار هكي بيش معاش يجيك حد يطلبك للزواج عشان لما يرجعلك توافقي
انا.. لو نقعد عمري كله بلا راجل ولانرجع ليه
ماما .. ماتعرفي النصيب وين
وطبعا جاء سند وعبدالله سند محصل فجخة بسيطة وعبدالله دمديمة على ايده لافها والبنات جن والتمينا وتغذينا وبعدها طلع عمو محمود وبابا وانا محصلتش فرصة نعرف من احمد شنو حكى مع بابا وعمو وروحو البنات والشباب وقعدو اهلي وبعدين روحت ماما وموسى ومحمد قال بنقعد مع احمد وانوار طبعا قعدت
وحصلت فرصة في احمد
انا..شنو صار معاك حمودي مع بابا وعمو
احمد..ماصار الا كل خير وامبدري عدو لعمي علي يحطو حد لولده
وطبعا عمي علي شكله واعر لان  بعد ايام سمعنا انه يوسف خطب لكن ما اثرش فيا حتى شوي لاني خلاص يوسف صفحة من حياتي انتهت وبالذات بموقفه الاخير نهى اي مشاعر كانت ليه عندي ومشن ايام والحمدلله احمد حاله احسن ووجه اموره تمام وخبطت صدره صحت ومازال ممكن اسبوع يحول الجبس وقضينا الفترة اللي فاتت كلها في حوش عمو محمود بسبب الناس ماشاءالله انكبت علينا وطبعا مايخلاش الموضوع من التلقيح عليا بالذات من بنات عمه الباردات لكن نفوت فيهن لان اي ضيق احمد حيلاحظه وانا معاش نبيه يضايق
وجاء يوم الصبح كانت الشمس زارقة تهبل والجو شكله حلو ومازال يومين على وقفة العيد والتجهيزات على العيد عندنا على اخرها لان ديمة نحبو نعطو كل حاجة حقها والعيد عيد
احمد.. نوارتي الجو يهبل
انا.. اه شكله مش عادي اصلا نحن في نص الربيع 
احمد.. هي وتي روحك بنطلع انا وياك
انوار ..خوذوني معاكم
عمتو .. كانها عارفة حاجة
بتخليني بروحي وكان يجي حد
انوار .. اه صح نسيت حتى زيزي  اليوم واخذة اجازة
انا.. وين احمد
جاء احمد وقرب مني
احمد.. مش قلت نبيك في موضوع تتذكري
انا.. اه
احمد..بنحكيه ليك اليوم