للقدر والنصيب كلمة اخرى

68

#للنصيب_والقدر_كلمة_اخرى

ح68
انصدمت ومعاش عرفت شنو اندير
احمد..احكي كل شئ وبدون ما ادسي عليا حاجة
انا..زدت من البكاء وبصوت عالي انا مانبيش نذكر مانبيش نفتح وجع نسيته بيك
احمد
قلبي بيتقطع عليها وهي تبكي وانا نبي نعرف الحيوان شن دارلها انا نوارتي روحي مانبي حد يطق فيها وجيتها خذيتها في حضني وزادت تبكي باكثر حرقة ووجع وجيت قمعزت على السرير وهي في حضني
احمد..خلاص ياقلبي سامحيني نرفزت عليك بس نبي نعرف الحيوان كيف مد ايده عليك
انا..نحكيلك لكن توعدني ماديرش شئ لانه موضوع وانتهى
احمد..احكي قبل
انا..اوعدني قبل مانيش حاكية نين توعدني انك تحكم عقلك حتى اذا تبي ادير اي تصرف
احمد..حاضر نوعدك
انا..حكيت ليه كل شئ وكنت لما نحكي نبكي ونزيد نخش في حضن احمد وحسيت بيه يعصر على روحه ويضغط
ولما وصلت عند انه بعد دفني على الكنبة زاد ضربني برجله صبى احمد وباعدني عليه
احمد..يعني هالحيوان هو سبب كسرتك يعني هالحيوان هو سبب العلامة وقعد يشير على صدري على مكان العملية رغم ان الخياطة لحم لكن مسيبة علامة بسيطة ويقولي صار هو سببها هالحيوان وبحذاه فازة كبيرة خذاها وكسرها وقعد يرفس فيها برجليه  نين كل الكسر تم حجمهن زي حبات الكسكسي  ليش هالحيوان يسمح لروحه يمد ايده عليك باي حق
انا..خلاص حبيبي تخوفني منك هكي
اهدى بالله عليك
احمد..كيف بنهدا وانا نار راكبة جواي
انا..حبيبي الموضوع ليه فوق السنة
احمد..فهميني ليش دسيتي ليش ماحكيتي
انا..قعدت نبكي اخرى لانك كنت حتقتله وتنحبس وانا نقعد خسرتك انا خفت عليك انت
احمد.. فتح الدولاب وطلعة لبسة وغير دبشه
انا..وين طالع ياحبيبي
احمد......
ونزل وانا عقلي يودي ويجيب وبعتت ليه رسالة
(حبيبي انت وعدتني انك ماتخليني مانحملش الدنيا وانت مش فيها حطها في بالك)
وبعدها اتصلت بسند وقلت ليه يشوف احمد وحكيت بالمختصر السريع للسند وطمني سند
سند
كنت متوقع احمد حيدور يوسف فمشيت طول لحوش يوسف وقعدت نستنى قدامه لما تاكدت من سيارة يوسف قاعدة وقعدت حاجة نص ساعة وشوي شفت سيارة احمد نزلت ليه بسرعة
احمد..شنو جيبك هنا انت
سند .. عبير كلمتني  شنو بدير ووين كنت
احمد..ماني داير شئ بنكلمه بس  لان نوارة بعتتلي رسالة خلتني نهدا شوي هذا ليش طولت لاني كنت ندور في الشوراع مش متخيل كيف نوارتي تحملت هذا كله وبدون ماتتكلم بيش ناخذو حقها من خوفها عليا معقولة نوارة اللي عمرنا مامدينا ايدنا عليها هالحيوان هذا يضربها ضربة قريب جابت اخرتها ومعاها ماسداش دفها ويرفسها بكراعه تقول حمار (حشاكم) مش متخيل
سند.. قصة وفاتت يا احمد
احمد.. عارف فاتت لكن لو ماتكلمتش معاه مش حنرتاح لاني كل مابنشوف العلامة اللي في صدرها حنضايق
ودق احمد على الباب ومعاه سند
وفتح يوسف الباب وعرف من وجه احمد ان في حاجة
يوسف .. اهلين تفضلو
احمد.. مش جاي انتفضل جاي بنقول كلمتين وماشي
يوسف .. احكي
احمد.. تعرف غير القصة مر عليها وقت فوق السنة ولان ربي يحبك ونوارتي بنت اصول كنهدا تو انت راك في قبرك معقولة ادير هكي في الامانة اللي امنتك عليها ومعاها نجي لعندك بيش نوريك كيف ترجعها ليك وانت داير فيها هكي وترفسها تقول حمار (حشاكم )معقولة هذي جزاة  الثقة اللي حطيناها فيك وانا نقول نوارتي مستحيل تقسى على شخص بالطريقة هذي الا في حاجة وعمرها ماكذبت علينا لكن بسببك قدرت تكذب
يوسف بحسرة .. والله ماكنت بعقلي والله ماكنت بعقلي
احمد.. تعرف احمدربك الف مليون مرة اني سمعت الموضوع تو بس واني وعدت نوارة اني مانديرش شئ يضرني عشان مانخليهاش بروحها كنهدا راه تصرفي معاك غير راه مش قاعد نتكلم معاك
يوسف .. اي عقاب بتعاقبه لي مايجي شئ قدام فقدي لها مايجي شئ قدام اني خسرتها
احمد انصدم من كلامه  ماتوقعش ان يوسف مازال بعد المدة هذي كلها انه نادم على فراقي لتو معاش زاد ولاكلمة وطلع وسند لحقه
ووصلو لعند الحوش وانا سمعت صوت السيارة لكن قعد واقف مع سند برا
سند.. معقولة مازال يبيها لتو
احمد.. حتى انا صدمني بكلامه لدرجة اني مازال بنقول كلام اخرى سكتت
سند .. ماتقولش لعبير شنو قالك
احمد.. اصلا نوارة ماتفكرش فيه بكل كنهدا ماتمتش زوجتي بالمزبوط
سند .. اوووووه اخيرا يا راجل وانا انقول معاش شفت وجك في المكتب الا خطف
احمد.. الحمدلله ربي عطاني على قد صبري تهبل وبتهبلني وراها
سند..ربي يهنيك يارب تستاهل حتى انت هي خش اكيد على نار تو
احمد.. ايه هي سلام
خشيت للحوش بمجرد ماسكرت الباب جتني تجري وضمتني زين وقعدت تبكي وانا ارتبكت من ضمتها ليا مرات يخش باتي وحاوالت نفكها مابتش تطلقني
احمد .. نوارتي خلاص حبيبي مادرت شئ والله كلمته بس والله مامديت ايدي عليه
ماردتش عليا تبكي بس وبعدها معاش سمعت شئ حولتها من عليا لو ماشديتها راه طاحت خذيتها في حضني ورفعتها وخششتها جو وقلبي بيوقف خفت عليها
نوارة نوارة امي امي
عمتو ..نعم
احمد..هاتي امية والله عطر نوارة شكلها مغمي عليها
عمتو ..ياروحي يابنيتي خيركم شنو اللي صار بينكم عين ماصلاة على النبي
احمد
قعدت انوض فيها مانضتش قلبي وقف خذيتها رفعتها وبنرفعها للمصحة وعدت معاي امي وخذوها مني طول وماخلونيش نخش معاها وانا على نار طلعت علينا الدكتورة
احمد.. ها طمنيني دكتورة مرتي كنها شنو فيها
الدكتورة .. شكلها تمر بوضع نفسي مش تمام الضغط هابط عندها واجد ودرنا تغذية ليها وعطيتها مهدئ وتو هيا راقدة
احمد.. نقدر انخشلها دكتورة
الدكتورة.. ايه عادي
خشيت  عليها  ولقيتها راقدة ووجعني شكلها وشديت ايدها سامحيني حبيبي فتحت جرح نسيته سامحيني ياعمري
وطلعت لامي
عمتو ..ها شنو حالها تو
احمد.. راقدة يا امي تو كلمت باتي اهو جايك روحي معاه وانا بنقعد معاها نين يعطوها خروج ونروح بيها وماتقوليش لعمي عمر وعمتي حواء
عمتو .. شنو اللي صار بينكم بس فهمني
احمد.. والله مافي حاجة بيني وبينها يا امي الحاجة اللي صارت بيني وبين الحيوان يوسف بس
عمتو .. شنو دار الهم هذا اخرى
احمد.. ماتركزيش يا امي عدت على حالها تو
امي بالله ركبي زيزي لحوشي  خليها تلم الفازة المنكسرة مانبيش تروح تلقاه زي ماهو
عمتو .. حاضر تو نقوللها وكان بطول طمني به
عمو محمود.. طمني عليها احمد كنها  شنو اللي صار سيبتكم ماشاءالله عليكم
احمد.. حالها باهي يا باتي ضغطها هبط بس والله ماصار بينا حاجة والله لاموري تمام اني وياها
عمو .. والله لو يطلع اللي هي فيه منك انت مايخلصك واحد مني
احمد.. حاضر يا باتي  تو تنوض واسئلها هي عدو خلوني بنخش ليها وخشيت عليها لقيتها راقدة زي الملائكة بست راسها وقعدت نقول لروحي شنو درت فيها هي قوية عمرها ماكانت هشة لدرجة هذي ياريتني ماسمعته وانا حاط ايدها بين ايديا وحاط راسي على حاشية السرير حسيت بايدها تتحرك رفعت راسي
انا.. حبيبي انا وين
احمد.. كيف حالك تو اغمى عليك ومابيتيش توعي جبتك للمصحة
انا..نبي نروح لحوشي نبي نرقد على سريرنا
احمد.. الدكتورة ماعطاتكش خروج
انا..حبيبي بنروح عارفني مانحبش المستشفيات
احمد.. حبيبي على خاطري خليني نطمن عليك
انا.. تعال ضمني
احمد... جيتها ضميتها ضميتها زين خوفتيني عليك
انا.. اسفة حبيبي
احمد.. اش حبيبي ماتقولي شئ
انا.. شنو درت معاه
احمد.. ماتفكري في شئ والله مادرت حاجة عديت كلمته بس
انا..خفت ادير فيه حاجة ونخسرك انا نتحمل كل شئ الا خسارتك
احمد.. وانا معاك مستحيل اندير حاجة تخليني نخسرك او نبعد عنك
جت الدكتورة وشافتها وقالت تقدر اتروح لكن تبعد على اي ضغط نفسي
احمد.. ان شاءالله
وروحنا لحوشنا وتلاقتني عمتو وعمو
عمو..كيف حالك بنيتي شنو دارلك هالمعفن
انا.. هههه لا والله مادارلي حاجة ياعمو
عمو ..امنا كنك
انا.. ضغطي هبط فجاءة وانت عارفه مرة مرة يهبط
عمو ..حمدلله على السلامة بنيتي
انا.. الله يسلمك يارب وحبيت على راسه
عمتو .. اركبي بنيتي فوق وتو تركبلكم زيزي عشاء
وركبنا لفوق واحمد مباش يسيب ايدي ولقيت الدار ملمومة وتمددت على السرير
احمد.. غيري دبشك بيش ترتاحي مرة وحدة
انا..بندوش بنحول ريحة المستشفى من خشمي لكن انحس في روحي ماعندي جهد
احمد.. ندوشلك اني
انا.. ياريت حبيبي
احمد.. وحتى انا ندوش بالمرة وخش دوشلي ومخلاش الامر من المشاغبات ولفني بالكبوط وطلعني وهو كمل دوشه وطلع ولقاني قاعدة بالكبوط ماخاطريش اندير حاجة جابلي روب ولبسه ليا وهو لبس شورت وتشيرت نص وجاء جففلي شعري وجفف شعره وجت زيزي جابت العشاء وتعشينا وبعدها قعدنا نتفرجو ورقدت في حضن احمد وانا نتفرج
احمد
لما حسيت بيها رقدت رفعتها للسرير وحطيتها في حضني ورقدنا وانا نقول ان بكرة لازم نحكو بيش يسكرن هالصفحات اللي كل مرة تنفتح صفحة جديدة