للقدر والنصيب كلمة اخرى

57

#للنصيب_والقدر_كلمة_اخرى

ح57
احمد.. متوترة نوارتي
انا..هلبة 
احمد..حتى انا متوتر واجد
انا..احمد كيف صبرت عليا ثلاثة ايام
احمد.. يعلم ربي كيف صبرتهن بس هكي لسبب في عقلي تو نقولك عليه لما تصيري زوجتي مش ورق بس
انا.. راك تنساه اذكره لما نسئله لك
بس قولي ليش ماحاولتش اتشوفني بالفيلو قبل مانطلعو
احمد.. حسيت بيك ماتبيش توريه ليا تو
انا..صح
احمد..نطلب منك طلب
انا.. ادلل
احمد.. ماتزعليش مني لو درت حاجة غصبن عنك اليوم
انا.. بخوف زي شنو
احمد.. ماتخافيش مش اللي في بالك انا عند كلمتي عيب نوارتي لكن لاني عارف قديش حتطلعي حلوة خايف ندير حاجة مانقدرش انتحمل
انا..متت من الحشم وقلت ليه انت حاول
احمد .. بضحكة يستر الله
ووصلنا للصالة وخشينا للحجرة انا واحمد وجت هبة وانوار وهنادي  حولن الكاب وطبعا ماخلاش الامر من التعليقات السخيفة
هبة .. بنطلعو افطنو لروحكم
هنادي .. ماجابناش روج معانا راه
انا.. بنموت من الحشم خزي يامسوسة
وطلعن البنات وقعدت انا واحمد وجاء احمد قرب مني وصباني وخلاني انلف وهو ماسك ايدي وهو يقول
احمد.. ربي يحفظك لي يا كل ما لي طالعة تهبلي ملاك يمشي على الارض
انا.. خلاص حمودي راسي بيدوخ
وقفني وقرب مني وانا طبست راسي رفع راسي بايده
احمد..معاي ديمة راسك مرفوع ماتخافيش نوارتي معاي فاهمة ديمة خليك قوية ولما نطلعو على الناس انديرو زي الفاتحة واحلى من الفاتحة عشان تقعد احلى ليلة وتبدا اسم على مسمى ليلة العمر
انا.. قوية بيك ومعاك وسعيدة بوجودك معاي وانك بتقاسمني حياتي وبسته بوسة خفيفة على خده
احمد.. نوارتي راه انا على سبلة
انا..بضحكة عاد مش معانا روج ههههه
وخشت علينا هبة ونحن قراب واجد من بعض
هبة .. فيش اديرو
انا.. سكري فمك راجلي عندك اعتراض
هبة .. ابدا هيا الزفة بدت
وحطيت ايدي في ايد احمد وخشينا والصالة واو  والديكورات تهبل لان الصالة ماشفت فيها شئ وحتى الديكورات قال احمد بنختارهن انا وقمعزنا على الصالون وكان كنبة بس صغيرة واحمد ماباش يطلق ايدي وجت المصورة وقعدت تصور فينا وصورتنا مع العيلة وبعدين غيرنا الدبل ولبسني احمد اسوارة حلوة هدية منه وباسني احمد على خدي من الجهتين وبعدها طلع والفرقة دايرة جو مش عادي وبعدها بشوي الفرقة وقفت وحطو موسيقى وجابو العشاء وطبعا الصالة معبية واجد وانا خشيت للدار بيش نفك الذيل ونقعد بالفيلو قصير بس وخشيت للصالة وشوي وخش احمد وطلبو منا نرقصو على موسيقى هادية رومانسية ونزلنا
احمد.. تعرفي الفيلو من غير ذيل احلى
انا.. عشان انا اللي لابساته
احمد.. يا واثق
انا.. ههههه عندك شك
احمد.. ابدا 
وشوي وخفضو الاضاءة اكثر وبدو صور على جيهة من جيهات الصالة وكانت (داتا شو ) ويعرضو في صوري انا واحمد من عمرنا صغير واجد وقعدت انا واحمد على الموسيقى نرقصو ونتفرجو وقديش شفت ان حياتي كلها قضيتها مع احمد لان مافيش مرحلة من عمري احمد مافيهاش لعند صور الفاتحة وجيت قربت من احمد واجد كاني نبيه يحضني وعيوني دمعو واحمد انتبه ليا
احمد..نوارتي عليش الدموع
انا.. كيف كنت عمياء ان حياتي كلها انت معاي فيها
احمد.. حتى انا كنت اعمى مش انتي بس
وحضني حضن خفيف وما انتبهناش الا البنات في الصالة قلبنها عياط ومشينا قمعزنا وجابولنا الحليب والتمر لان قلت ليهم مانبيش تورتة على خاطر درناها في الفاتحة وخذيناهن وصورنا انا واحمد بالفيلو بدون الذيل 
احمد.. نطلعو نوارتي
انا.. بحشم هي
وصبا احمد وصباني معاه وطلعنا وخشينا للدار وجني البنات ولبسني الكاب وقعدن يحضنن فيا بدون بكا لاني موصيتهن مانبيش بكا وجتني ماما تميت انا اللي بنبكي
ماما.. ماتبكيش بنيتي اهو انا مانبكيش
انا.. عليش ماما عشان افتكيتي مني
ماما..ياهبلة وعطيتك لولدي اللي عمره ما حيغلط فيك ولا حيضرك ولا حيقصر معاك
احمد جاء حضن امي وهو اللي دمع
وانا جيت حضنتهم الاثنين وقعدو البنات يضحكو علينا
انوار .. هي فكونا منكم بنهيجو مع الفرقة النص الساعة اللي مازالت
فكينا بعضنا وقعدنا نضحكو على انوار
احمد.. هيا بنات كلمن المصورة وانا بنكلم سند وعبدالله بنصورو صورتنا المعتادة
انا
اول مرة مايوجعنيش ان هشام مش موجود 
هنادي .. به
وصورنا وساعدني احمد في السيارة وطلعو معانا الشباب دارولنا جو ووصلنا لحوش عمو محمود وساعدني احمد في ركبت الدروج وخشينا جناحنا وقلبي يدق بسرعة لدرجة حسيت روحي معاش قادرة نتنفس حولت الكاب بسرعة
احمد.. كنك نوارتي
انا.. انحس في روحي مش قادرة نتنفس
عدى احمد فتح الروشن وجاني
احمد.. نوارتي هدي بالك والله ماهي صايرة حاجة انتي ماتبيها
انا.. بدموع مش خايفة منك لكن غصبن عني ومش عارفة ليش
احمد.. باه عليش الدموع
وحضني زين وبعدها باعد وجهي ومسح دموعي
هيا نوضي غيري وتوضي بيش نصلو تو تهدي شوي
انا.. به
وجيت بنحول الفيلو نسحابه زي الاول وعلى قد ماعانيت مابا ينفتح وقعدت انادي احمد حمودي
احمد..نعم  نعم نوارتي
انا.. حمودي السوستة مابتش تنفتح
احمد.. هذي بس
فتح السوستة وبدون اي حركة غريبة وطلع وانا حولت الفيلو ولبست بيجامة شورت من الستان وحطيت عليها كبوط وخشيت للحمام مسحت المكياج وغسلت وجهي وتوضيت ولبست ملاية الصلاة وخشيت على احمد لقيته مغير ولابس بيجامة حلوة وصلينا وحط ايده على راسي وقال دعاء (اللهم اني اسألك من خيرها وخير ماجلبتها عليه اعوذ بك من شرها وشر ما جلبتها عليه    )
احمد.. جعانة
انا.. شوي وانت
احمد.. جعان من الفطور ماكليت شئ
انا.. عليش لتو  انت اهتميت بيا وبعتت ليا غذاء وانت ماتغذيتش
احمد.. من الفرحة والتوتر
انا.. ههه تو نجهز عشاء
احمد.. في واتي غير سخني بس
انا.. اه به
حولت ملاية الصلاة وقعدت بالكبوط فوق البيجامة وبعدها سخنت من حرارة الكوشة والمطبخ صغير حولته ونسيت وطلعت بالسفرة حطيتها على طاولة الاكل الصغيرة في الصالة 
احمد
اول ماشفتها لابسة البيجامة انصدمت وقلبي قعد يدق بسرعة هو انا مع الفيلو وذايب لكن هكي واجد عليا ربي يصبرني ومعاها شعرها كيف رافعاته
انا..هي حمودي سمي
وانا مقمعزة انتبهت للبستي لكن معاش فيها انصدمت وزمطتها وبعدها قلت بين وبين روحي لازم اندير هكي بيش نعود روحي انه زوجي مش اللي كبرت معاه
وتعشينا ولميت الماعين في الغسالة
وخشيت للدار قاعدة نخمم في لبستي واللي فكرته صح او لا وبيساعدني او لا 
احمد.. نوارتي تعالي في فيلم حلو
انا.. هيي وطبعا طلعت بدون مانغير بيجامتي ولانلبس كبوطي لاني لو قعدت نتحشم منه كيف بناخذ عليه كزوج ليا
احمد
استغربت وفرحت انها ماغيرتش لبستها وحسيت انها مش مسكرة الباب اللي بيخليها  تتقرب مني بسرعة
انا
وقعدنا انتفرجو وكان الفيلم حلو اكشن رومانسي وشكلي من تعب اليوم والتوتر رقدت مانندري على شئ
احمد
معاش حسيت بحركتها وانتبهت لراسها طاح عليا عرفتها رقدت وجيت رفعتها وحطيتها على السرير وغطيتها وقديش كانت حلوة زي الملاك وهي راقدة ببشرتها الصافية وشعرتها  الشقرا الناعمة وفكيت المساكة اللي في شعرها لانها ماتحبش ترقد شعرها ملموم وقعدت نفكر نرقد جنبها او نرقد برا وبعد طول نقاش بيني وبين نفسي قررت نرقد برا مانبيش نضايقها ونخلي كل شئ براحتها ونكون قد الوعد اللي وعدتها ليها اني نصبر عليها وعديت رقدت في دار الجلسة لانها اريح من الصالون وجاء الصبح
انا
نضت لقيت روحي راقدة على السرير واحمد مش حذاي واذكرت وعده ليا انه مايجبرني على شئ لكن وين رقد ان شاءالله مش في الصالة لان الصالون مش مريح وخشيت للحمام  وتوضيت وصليت وغيرت دبشي ولبست فستان قصير لتحت الركبة لونه احمر وفيه خطوط من عند الكم والنهاية باللون الابيض ولبست صباط الفرش ابيض وطلعت مالقيتش احمد في الصالة استغربت زعمك نزل لوطا وحسيتها بترقالي لان  لو صح و جاء عمو محمود على غفلة ويلقاه لوطة شنو بيقول على طلعة احمد من دار الجلسة
احمد.. صباح الورد نوراتي
انا.. بابتسامة صباح الياسمين ياقلبي
  هي خش للحمام توضى وصلي مابين وتيت الفطور طولنا في الرقدة
احمد .. ماتعبيش روحك جاء سند وعبدالله جابولنا فطور وعدو
انا.. اسمله الكريم امتى وتو الساعة 11
احمد.. الساعة 9.30
انا.. خيرهم بدري هكي
احمد.. قالولي تكو على الكوشة لقو عندهم بريوش ساخن بيرفعو منه لحوشنا الثاني فخطرنا عليهم ان نحن نموتو فيه فدارو حسابنا وكلمو البنات جهزولنا فطور ورنو عليا ونزلت ليهم حطيته في الكوجينة مغطي
انا.. سلمهم يارب خلاص امنا اندير كابتشينو
احمد.. تمام مابين خشيت للحمام توضيت وصليت 
وجهزت الكابتشينو وجبت الفطور وكان فطور صح الصح بريوش على عسل على فطير مشلتت ومربى وزبدة وتن وهريسة ودحي مطبوخ
انا.. خطرو عليا العرسان المصريين يوم الصباحية هكي فطورهم
احمد.. يعطيك الهنا ههههه ناقصها دجاج محمر او حمام
انا.. هو كان طولنا في النوم شوي راه صار منا وتمينا غذاء
احمد
حسيتها تحكي ومرتاحة لكن هي طول عمرها مرتاحة معاي في الحكي
انا.. خطرها حمودي امبارح نسيت