للقدر والنصيب كلمة اخرى

18

#للنصيب_والقدر_كلمة_اخرى

ح18
نرجى في احمد ونحس روحي موجوعة واجد وبمجرد ماخش احمد جيته ووقفت قدامه وهو يسلح في كندرته ومسكت ايده بسرعة وخش بيا شادني من كتفي
احمد..كنك نوارتي 
انا..بحتت فيه وعيوني مدمعات
احمد ..شكلها القصة كبيرة نين مدمعة نوارتي
انا ..اه تعال نحكيلك
احمد ..باه نسلح جاكتي بس
جت انوار
انوار ..هات احمد الجاكة نرفعها لدارك راه نوارة  من بدري تستنى فيك على نار
مد احمد الجاكة لانوار وخشيت انا وياه لداري وقعدت نحكيله على اللي صار وانا نبكي
احمد ..بشوي بشوي  يانوارتي هذا مش شك لان معقولة بيشك فيك وواحد طابك وانتي في الشارع هذي غيرة يانوارتي ومن كثر  ما نار الغيرة كلت كبده مركزش حتى على شكلي من لوراء بيش يعرف اني نا اللي معاك
انا...وانت شنو عرفك
احمد ..جاني يوسف للمكتب
انا ..والله
احمد ...وحكى لي اللي صار بينك وبينه وقال ديرلي راي مانبيش نخسرها وانا كيف لقيتها وماصدقت لقيتها
انا عجبني الكلام وابتسمت
احمد ..اه شفتي الراجل يبيك وحسيته صادق وانا نعرفه يوسف يانوارة راجل مايحبش يلف ويدور وماعنداش في وجيج الصبايا ولما حبك حبك بجنون وبعدين من يعرفك ومايقدرش يغير عليك في حد تكون السماحة هذي ملكه ومايغيرش
انا ..انحرجت
احمد ..نجيه الحشومي ولما يكلمك ردي عليه ماتتجهليش اتصاله
انا ..به
احمد ..خطرها بات يوسف كلم باتي اليوم وشبه باتي وافق وطالما باتي يعتبر عطى شبه موافقة معناها حتى عمي عمر موافق
انوار خشت علينا فجاءة
انوار ..به وانا شنو صار فيي انا ووسيم قاعد على نار قال حكيت لهلي وقاعدين نستنو في رايكم بيش نجو اشقى بيا ياحمودي
احمد ..حاضر يا انوار تو نشوف امي ونقولك
اليوم خلوني بنروح
انا ..اقعد يا احمد معانا الليلة
قلتها وخايفة على احمد يجيه الليل يقعد يبكي زي امبارح
احمد ..نوارتي اليوم لازم نبات غادي بكرة عندي اجتماع الصبح ونبي انسق اوراق الاجتماع وكلهن غادي وبعدين اكيد الليلة تو يجو ضنا خالاتي وعمامي   والشباب بيش نتفقو على المكان وكل واحد شنو شوره
انوار ..حمودي ماتختارش الخروف انت كل زردة اتجيبلهم في الخروف وهما مايجيبو في شئ يعتبر كبير
احمد ..بطلي مكر ماهو على خاطر انا امكانياتي تسمح وهما لا
انا..باه ليش ماتجمعوش مع بعض
احمد ماهما يجمعو ويجيبو في دجاج لثاني يوم  وحاجات لباقي الايام وبعدين عادي الرازق ربي
انوار ..دير اللي يريحك حمودي
احمد ..وتقريبا السنة بنقوللهم فوتو الدجاج وبنجيبلهم زوز خرفان على خاطر خطوبة يوسف ونوارتي وكان تاكدت من موضوعك بنزيد ثالث
انا ...اووووووووه ياسلم حمودي قدر من يومك
احمد ...يافرخة بطلي الدوة هذي خيرلك تقول راجل يدوي غير شكله سمح
انوار جاته وحباته على راسه ياسلم سندنا يارب
وضحكت ضحكة كبيرة
بحتنا فيها انا واحمد خيرك
انوار ..تخيلت بنات خوالك وبنات عمامك وهنا فرحانات ومضايقات في نفس الوقت
انا ..كيف
انوار.. فرحانات لانهن افتكن منا يسحابن وحدة منا تبي تاخذ احمد منهن ويضايقن على خاطر احمد لما بيذبح ثلاث خرفان بس على خاطر انخطبنا معناها في العرس قديش بيصرف احمد
احمد .. هههههههه فلوسي مش فلوسهن
انوار ...ماهن يسحابن انهن بياخذنك فكل وحدة تفكر في فلوسك على انهن فلوسها
انا ...ينعلي يافرخة وانتي مركزة معاهن واجد
انوار... تسحابيني نهز في دمقنلي زيك وهبلة وطيبة زيك
انا ...خزي عليك انا هبلة
احمد.. نشهد بالله في هذي انوار ما ظلمت
انا ..بحتت فيهم بحزن
احمد .. انتي يانوارتي طيبة واجد لدرجة تسحابي الناس كلهم  زيك كم مرة منال بنت خالتي صالحة تعزق عليك في كلام وماترديش عليها
طبعا منال اخت سالم ولد خالة احمد
انا ..ماهو كان نرد عليها نزل روحي لمستواها وبعدين هيا تعزق ماتحكيش في كلام مباشر بيش نعرف شنو نرد عليها
احمد ..لكن ياحنة ولايهمك عندك وخية ماشاءالله لسانها ياخذ حقك وزيادة
انوار ..ها امنا نخليهن مستفردات بااختي بالذات هي وبنت عمك علياء  عليك مكر وحسد فيهن يالطيف
احمد ..هيا عطني الاذن وبكرة انوار العشية نرفعك للسوق
انوار .. به
انا ..حمودي بكرة جمعة هو كيف قررت الاجتماع
احمد ..ماهو على خاطر الزردة يوم السبت
انا ..اه حتى الشباب بيمشو
احمد ...اه
انا ..المفروض اجلو مشيتهم لانك انت بتنقص وهما بينقصو على عرس احلام والعوالة من بيها
احمد .. ماهو ماناش قاعدين للاسبوع كله نحن الاثنين في الليل نكونو هنا وهما يكملو الاسبوع
انا ...اه به
احمد..نوارة في بالك موديل معين وله ناخذ على ذوقي
انا .. جيب على ذوقك المهم مش عريان واجد عرفني نحبش العريان
احمد ..اكيد ماتوصيش
هيا سلام تو
انا وانوار .. رد بالك على روحك
طبعا خشيت على قروب الفايبر وقلت للبنات الاحد نتلاقو عند احلام واللي تبينا انتكو عليها تقول وماتنسنش شئ لان ماناش مروحين نين نسقدو احلام لحوشها
هبة ...انتي تكي عليا لان فتحي مسافر
هنادي ...انا تو بجيبني باتي
اصالة  ...تو نشوف باتي كنهدا اتكي علي
انا ..تمام متفقين باذن الله واللي تبي حاجة مني ابعتهنا خاص بيش نجيبها لكن معاي
سند  ..باه اللي طليتو
عبدالله ...قلت هذين شكلهن متعاركات
هشام  ...نور القروب مقضينها نحن الشباب نحكو وانتو مختفيات بكل
هبة ..نحن متفقين بعد الامتحانات ناخذو فترة نقاهة من بعضنا لاهدرزة في القروب ولا اتصال ولا لقاء 
اصالة  ..عشان نتلاقو معبيات دوة ومرايفات على بعضنا
هنادي .. والله رايفت عليكن واجد
انا.. حتى انا رايفت عليكن
هشام .. اما انتن غريبات
سند .. مهما تحاول مستحيل تفهم البنات
عبدالله  ..ماتحاولش ولاتفكر
انا ..خلاص امنا نتلاقو يوم الاحدعند حلومة
سند .. تانسو وتشرفو
انا ..انتم ياشباب بتمشو مع احمد زي كل زردة صح
هشام  ..اكيد ان شاءالله
هبة ..والعوالة من بيها وانتم رجالة الحوش احمد نقولو صعب انه يعتذر لكن انتم كيف وياروحي على شاهين اللي بيتقطع معانا
انا ..حتى نا قلت هكي لاحمد لكن احمد قالي انهم يوم الاثنين في الليل بيرحو كلهم لكن اولاد خواله وعمامه بيقعدو يكملو الاسبوع
عبدالله  ..اصلا الليلة بنتلاقو مع احمد بيش انسقو على الزردة
انا ...هيا سلام تو
هبة وهنادي  واصالة  وعبدالله  وهشام وسند 
كل واحد كتب سلام