للقدر والنصيب كلمة اخرى

51

#للنصيب_والقدر_كلمة_اخرى

ح51
عند سند واحمد
سند ..كيف وافقت بالسرعة هذي
احمد.. مش عارف لكن حسيت نوارتي كانها حاسة بيا اني نحبها
سند..عليش
احمد..لانها الكلام كله ما استغربتاش الا لما عرضت عليها الزواج
سند.. زعمك تحبك
احمد.. لا
سند.. تي يا راجل دخت هيا لو نوارة ماتحبكش مافيش حد في الدنيا يحبك خليني نقلبو الكلمة متقبلتك كزوج
احمد.. في الوقت الحالي لا مش متقبلتني
سند.. كيف كيييييف وضح مافهمتش امنا وافقت على شنو
احمد.. حكى له الاتفاق
سند.. ياعنجد هذي تبدا حداك ويتسكر عليكم باب واحد وماتقدرش ادير شئ
احمد.. عادي نصبر عليها وانا حنخليها في وقت قريب تتغير من ناحيتي مشاعرها
سند.. شهادة لله ياصبرك ياراجل
احمد.. على خاطر نوارتي نصبر العمر كله مش شهر والله شهرين والله حتى سنة
سند.. ربي يهنيك ويقلب قلبها بسرعة عليك يارب
احمد.. امين
جاء بابا وعمو وفرحو واجد لما عرفو اني وافقت وكلهم نسمع فيهم يقولو كان من الاول
انا.. هوبي زعمك فعلا كان من الاول
هبة .. الله اعلم هي #نصيب الحكاية ومرات ربي خلاك تمري بالتجربة هذي عشان تعرفي قيمة احمد اكثر وهو يحبك اكثر
انا..الحمدلله على كل حال
انوار .. خشت الدار تعالي يبيك بابا وباتي 
انا.. خدودي تمو حمر وحسيت روحي سخنت وقلبي يرعش
هبة.. كنك شنو صارلك تو كنتي عمتي الشجاعة
انا.. ضمي فمك اي شجاعة هذوم بابا وعمو فاهمة والله نفهمك
انوار بري كلمي احمد يجي معاي
انوار .. ايوه بدينا من تو نستقوو باحمد
انا.. خزييي من يومنا ونحن قوا بيه
هبة .. هههه اما انتي امرك يضحك
انا.. عليش
هبة .. كل كلامك يدل على حبك لاحمد
انا.. الزواج شئ ثاني
هبة ..يعلم انك مازالتي بنت
انا.. اكيد لان التسجيل قاعد في فونه وماحذفتاش اكيد سامعه
هبة ..اه
احمد.. كنك نوارتي هكي متوترة
انا.. هذووم بابا وعمو كيف مانتوترش
احمد.. بس عريسك احمد مش حد ثاني كنك انتي
انا.. وحتى انكان نخاف منهم وخايفة من اسئلتهم ونخاف كذبتنا تبان علينا
احمد فهم انا هبة تعلم 
احمد.. اي كذبة نوارة نحن مش كاذبين عليهم لان نحن اللي بينا ماهوش اتفاق فترة وبعدين بننفصلو نحن اللي بينا عقد ابدي مايفرقه الا الموت وهي عملية صبر بس وانتي حاليا تتعاملي معاي زي قبل ماتغير شئ في المعاملة
انا..صح عندك حق
ومشيت انا واحمد لبابا وعمو
اضبطني عمو زين وقالي اخيرا بنتي بتولي كنتي وبابا مضبط احمد ويقوله بتولي نسيبي اخيرا وباين عليهم الفرحة اللي ماشفتها عليهم لما خطبني يوسف حسيت قديش قرارنا هذا اسعدهم
لدرجة عمو عيونه دمعو واللي خفت منه ماقالو شئ قالولنا نبو العرس بسرعة
احمد.. قاللهم حاضر نتفق انا ونوارة ونقوللكم
وطلعنا وخشينا للدار
انا.. احمد مش لازم انديرو عرس
احمد.. شنو تقولي نوارتي
انا..ماهو مطلقة كيف بندير عرس
احمد..اولا وكان مطلقة حرام تفرح مرة ثانية وثانيا اني وحيد امي وباتي تبيني مانديرش فرح وكبير اخرى وثالثا انسي الاول كله وعدي معاي كانك اول مرة تتزوجي فاهمة
انا.. حاضر بس خلي اي شئ بعد شهر
احمد.. عليش
انا .. عشان يوسف فرحه الاسبوع الجاي احمد.. في قلبك حاجة مازالت ليه
انا .. ابدا من يوم كسرتك وانا اي حاجة ليوسف انتهت وحتى لما شفته في الكلية والله ماحسيت بحاجة
احمد.. به عليش
انا..عشان كان درنا حاجة تو وانتشرت خطبتنا يسحابها اني دايرتها كردة فعل على زواجه وبتاع اهو انخطبت حتى انا قبل عرسك وانا مانبيش يفهم اي شئ من ناحيتي لاني لاعاد يهمني ولا يعنيني
احمد..هكي قنعتيني
انا..وبعدين ماتنساش عرس اصالة  الاسبوع اللي بعد الجاي وعرس عبدالله  اللي بعده ويالا نقعدو نجرو عليهم والله نسيتهم
احمد.. والله فرحتي نستني كل شئ
انا.. فرحان واجد حمودي
احمد.. قد الدنيا والله وانتي
انا..مرتاحة ومطمنة لاني بنكون معاك فرحانة اكيد فرحانة لاني الفرحة اللي شفتها في عيون بابا وعمو والدينا تخليك اطير من الفرحة
انوار .. احمد ينادي عليك سند
احمد.. ايه نسيته بكل
انا.. ههههه
انوار..هههه عاد من تو بنبدو
احمد..تحشمي يافرخة وطلع
انوار .. والله فرحانة لك واجد ياقلبي
انا..حتى انا فرحانة والله
انوار ..شنو مقررين اديرو
انا.. شئ في الوقت الحالي بنعيدو وبعد العيد بنلهو بفرح اصالة واللي بعده عبدالله وبعدها نشقو باروحنا
انوار .. مش واجد هكي
انا.. احمد يبي كل شئ كبير حتى لما قلت ليه انا مطلقة قالي شنو المطلقة ماتفرحش
انوار.. عنده حق خيرك تما تفكيرك زي المتخلفين
انا.. مش متخلفين حبيبة لكن هذا المجتمع اللي عايشين فيه
انوار.. ونحن امتى عدلنا عليهم البشر
انا.. عندك حق وبعدين حتى احمد وحيد  هله يبو يفرحو بيه فرحة كبيرة
انوار .. لكن نسمع في بابا وباتي يتفقو انهم بيدور فاتحة بعد العيد
انا.. تو يكلمهم احمد
انوار ..بدن الاتفاقيات من تو
انا.. ااااكيد
ماما..هيا تعالن للغذاء
ومشينا تغذينا وسند وهبة معانا اقرب شخصين لينا شاركونا فرحتنا ولكن فرحة اهلنا هي اللي لايمكن وصفهها
وجاء يوم عرفة وكلنا طبعا نصيمو والعام هذا اصر علينا عمي خليفة اب هبة ان نفطرو عندهم ومشينا فطرنا كانه عيد ماشاءالله ملمتمين سبع عائلات ورغم ان بابا قال لعمي خليفة كلم عيلة هشام وكلمهم عمي خليفة لكن شكلهم متحشمين من عملة ولدهم ماقدروش يجو وسهرنا وضحكنا وفرحنا وحسيت روحي فعلا فرحانة وقعدنا نحكو على تجهيزات عرس اصالة وشنو ناقصها طبعا اصالة لانها كانت عارفة ولد عمها يبيها ومش حيخليها تاخذ غيره فكانت ديمة توتي وتجهز في روحها وتو لما جاء العرس وقرب كل شئ عندها جاهز حتى الفيلو قالت تبي الفيلو بتاعي لانها ضعفت واجد دايرة رجييييم طبعا وانا عطيته لها بكل معاش نبيه وروحنا لحوشنا وخشيت اتكيت خلاص اليوم بدلنا مجهود عالمي وخطر عليا احمد وضحكته اللي تجنن اللي ماغابت عن فمه اليوم وقلت
يانجي ضحكته يارب ورقدت وعينا قبل الصلاة جهزو بابا وعمو واحمد وطبعا انا ساعدته في اللبس لان ايده مازالت مجبسة ومحمد وموسى وعدو للجامع وصوت الصلاة والتكبير محلاه وبدينا نحن نجهزو وروحو من الصلاة وذبحنا وطبعا السنة انا وانوار قبل انا واحمد لكن عاد السنة احمد ايده ومعاها يعاون بلي يقدر عليه
ماما.. السنة هذي انوار بتغسل البطن
انوار..شنووووو شنو ماما قلتي
عمتو .. ايه بتغسلي البطن لازم تتعليمها بنيتي
انا واحمد فاطسين ضحك على منظر انوار
انوار.. والله ماتعبو عليا
عمو .. كيف مانعبو عليك مش تبي تتزوجي السنة هذي او ماتبيش كنهدا مش لازم ناجلوه السنة الجاية
انوار تحشمت وخشت تجري وانا خشيت وراها
انوار .. معناها باتي بيطلع عرسي السنة هذي وووه مش مصدقة
انا.. هذا اللي هامك مش البطن اللي وراك
انوار.. عشان عرسي بنغسلها ونغسلهن الاربعة كلهن
انا.. ههههه خفي علينا ناقص غير بتغسلي اربع بطون
ومشينا وكل وحدة فينا شدت بطن وطبعا كلنا نعلمو في انوار وغسلناهن ولميناهم لان نحن انديرو في عصبان ثاني يوم وشوينا وضحكنا ومشى علينا عيد زي كل عيد لا  السنة غير فرحة اهالينا زايدة لاني انا واحمد بنتزوجو